೩-೧೦. ಆನನ್ದತ್ಥೇರಅಪದಾನಂ

೬೪೪. ‘‘ಆರಾಮದ್ವಾರಾ ನಿಕ್ಖಮ್ಮ, ಪದುಮುತ್ತರೋ ಮಹಾಮುನಿ;

ವಸ್ಸೇನ್ತೋ ಅಮತಂ ವುಟ್ಠಿಂ, ನಿಬ್ಬಾಪೇಸಿ ಮಹಾಜನಂ.

೬೪೫. ‘‘ಸತಸಹಸ್ಸಂ ತೇ ಧೀರಾ, ಛಳಭಿಞ್ಞಾ ಮಹಿದ್ಧಿಕಾ;

ಪರಿವಾರೇನ್ತಿ ಸಮ್ಬುದ್ಧಂ, ಛಾಯಾವ ಅನಪಾಯಿನೀ [ಅನುಪಾಯಿನೀ (ಸ್ಯಾ. ಕ.)].

೬೪೬. ‘‘ಹತ್ಥಿಕ್ಖನ್ಧಗತೋ ಆಸಿಂ, ಸೇತಚ್ಛತ್ತಂ ವರುತ್ತಮಂ;

ಸುಚಾರುರೂಪಂ ದಿಸ್ವಾನ, ವಿತ್ತಿ ಮೇ ಉದಪಜ್ಜಥ.

೬೪೭. ‘‘ಓರುಯ್ಹ ಹತ್ಥಿಖನ್ಧಮ್ಹಾ, ಉಪಗಚ್ಛಿಂ ನರಾಸಭಂ;

ರತನಾಮಯಛತ್ತಂ ಮೇ, ಬುದ್ಧಸೇಟ್ಠಸ್ಸ ಧಾರಯಿಂ.

೬೪೮. ‘‘ಮಮ ಸಙ್ಕಪ್ಪಮಞ್ಞಾಯ, ಪದುಮುತ್ತರೋ ಮಹಾಇಸಿ;

ತಂ ಕಥಂ ಠಪಯಿತ್ವಾನ, ಇಮಾ ಗಾಥಾ ಅಭಾಸಥ.

೬೪೯. ‘‘‘ಯೋ ಸೋ ಛತ್ತಮಧಾರೇಸಿ, ಸೋಣ್ಣಾಲಙ್ಕಾರಭೂಸಿತಂ;

ತಮಹಂ ಕಿತ್ತಯಿಸ್ಸಾಮಿ, ಸುಣೋಥ ಮಮ ಭಾಸತೋ.

೬೫೦. ‘‘‘ಇತೋ ಗನ್ತ್ವಾ ಅಯಂ ಪೋಸೋ, ತುಸಿತಂ ಆವಸಿಸ್ಸತಿ;

ಅನುಭೋಸ್ಸತಿ ಸಮ್ಪತ್ತಿಂ, ಅಚ್ಛರಾಹಿ ಪುರಕ್ಖತೋ.

೬೫೧. ‘‘‘ಚತುತ್ತಿಂಸತಿಕ್ಖತ್ತುಞ್ಚ, ದೇವರಜ್ಜಂ ಕರಿಸ್ಸತಿ;

ಬಲಾಧಿಪೋ ಅಟ್ಠಸತಂ, ವಸುಧಂ ಆವಸಿಸ್ಸತಿ.

೬೫೨. ‘‘‘ಅಟ್ಠಪಞ್ಞಾಸಕ್ಖತ್ತುಞ್ಚ, ಚಕ್ಕವತ್ತೀ ಭವಿಸ್ಸತಿ;

ಪದೇಸರಜ್ಜಂ ವಿಪುಲಂ, ಮಹಿಯಾ ಕಾರಯಿಸ್ಸತಿ.

೬೫೩. ‘‘‘ಕಪ್ಪಸತಸಹಸ್ಸಮ್ಹಿ, ಓಕ್ಕಾಕಕುಲಸಮ್ಭವೋ;

ಗೋತಮೋ ನಾಮ ಗೋತ್ತೇನ, ಸತ್ಥಾ ಲೋಕೇ ಭವಿಸ್ಸತಿ.

೬೫೪. ‘‘‘ಸಕ್ಯಾನಂ ಕುಲಕೇತುಸ್ಸ, ಞಾತಿಬನ್ಧು ಭವಿಸ್ಸತಿ;

ಆನನ್ದೋ ನಾಮ ನಾಮೇನ, ಉಪಟ್ಠಾಕೋ ಮಹೇಸಿನೋ.

೬೫೫. ‘‘‘ಆತಾಪೀ ನಿಪಕೋ ಚಾಪಿ, ಬಾಹುಸಚ್ಚೇ ಸುಕೋವಿದೋ;

ನಿವಾತವುತ್ತಿ ಅತ್ಥದ್ಧೋ, ಸಬ್ಬಪಾಠೀ ಭವಿಸ್ಸತಿ.

೬೫೬. ‘‘‘ಪಧಾನಪಹಿತತ್ತೋ ಸೋ, ಉಪಸನ್ತೋ ನಿರೂಪಧಿ;

ಸಬ್ಬಾಸವೇ ಪರಿಞ್ಞಾಯ, ನಿಬ್ಬಾಯಿಸ್ಸತಿನಾಸವೋ.

೬೫೭. ‘‘‘ಸನ್ತಿ ಆರಞ್ಞಕಾ ನಾಗಾ, ಕುಞ್ಜರಾ ಸಟ್ಠಿಹಾಯನಾ;

ತಿಧಾಪಭಿನ್ನಾ ಮಾತಙ್ಗಾ, ಈಸಾದನ್ತಾ ಉರೂಳ್ಹವಾ.

೬೫೮. ‘‘‘ಅನೇಕಸತಸಹಸ್ಸಾ, ಪಣ್ಡಿತಾಪಿ ಮಹಿದ್ಧಿಕಾ;

ಸಬ್ಬೇ ತೇ ಬುದ್ಧನಾಗಸ್ಸ, ನ ಹೋನ್ತು ಪಣಿಧಿಮ್ಹಿ ತೇ’ [ನ ಹೋನ್ತಿ ಪರಿವಿಮ್ಭಿತಾ (ಸ್ಯಾ.), ನ ಹೋನ್ತಿ ಪಣಿಧಿಮ್ಹಿ ತೇ (ಕ.)].

೬೫೯. ‘‘ಆದಿಯಾಮೇ ನಮಸ್ಸಾಮಿ, ಮಜ್ಝಿಮೇ ಅಥ ಪಚ್ಛಿಮೇ;

ಪಸನ್ನಚಿತ್ತೋ ಸುಮನೋ, ಬುದ್ಧಸೇಟ್ಠಂ ಉಪಟ್ಠಹಿಂ.

೬೬೦. ‘‘ಆತಾಪೀ ನಿಪಕೋ ಚಾಪಿ, ಸಮ್ಪಜಾನೋ ಪತಿಸ್ಸತೋ;

ಸೋತಾಪತ್ತಿಫಲಂ ಪತ್ತೋ, ಸೇಖಭೂಮೀಸು ಕೋವಿದೋ.

೬೬೧. ‘‘ಸತಸಹಸ್ಸಿತೋ ಕಪ್ಪೇ, ಯಂ ಕಮ್ಮಮಭಿನೀಹರಿಂ;

ತಾಹಂ ಭೂಮಿಮನುಪ್ಪತ್ತೋ, ಠಿತಾ ಸದ್ಧಮ್ಮಮಾಚಲಾ [ಠಿತೋ ಸದ್ಧಮ್ಮಮಾಚಲೋ (ಸೀ.), ಠಿತಾ ಸದ್ಧಾ ಮಹಪ್ಫಲಾ (ಸ್ಯಾ.)].

೬೬೨. ‘‘ಸ್ವಾಗತಂ ವತ ಮೇ ಆಸಿ, ಬುದ್ಧಸೇಟ್ಠಸ್ಸ ಸನ್ತಿಕೇ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೬೬೩. ‘‘ಪಟಿಸಮ್ಭಿದಾ ಚತಸ್ಸೋ, ವಿಮೋಕ್ಖಾಪಿ ಚ ಅಟ್ಠಿಮೇ;

ಛಳಭಿಞ್ಞಾ ಸಚ್ಛಿಕತಾ, ಕತಂ ಬುದ್ಧಸ್ಸ ಸಾಸನಂ’’.

ಇತ್ಥಂ ಸುದಂ ಆಯಸ್ಮಾ ಆನನ್ದೋ ಥೇರೋ ಇಮಾ ಗಾಥಾಯೋ ಅಭಾಸಿತ್ಥಾತಿ.

ಆನನ್ದತ್ಥೇರಸ್ಸಾಪದಾನಂ ದಸಮಂ.

ತಸ್ಸುದ್ದಾನಂ –

ಬುದ್ಧೋ ಪಚ್ಚೇಕಬುದ್ಧೋ ಚ, ಸಾರಿಪುತ್ತೋ ಚ ಕೋಲಿತೋ;

ಕಸ್ಸಪೋ ಅನುರುದ್ಧೋ ಚ, ಪುಣ್ಣತ್ಥೇರೋ ಉಪಾಲಿ ಚ.

ಅಞ್ಞಾಸಿಕೋಣ್ಡಞ್ಞೋ ಪಿಣ್ಡೋಲೋ, ರೇವತಾನನ್ದಪಣ್ಡಿತೋ;

ಛಸತಾನಿ ಚ ಪಞ್ಞಾಸ, ಗಾಥಾಯೋ ಸಬ್ಬಪಿಣ್ಡಿತಾ.

ಅಪದಾನೇ ಬುದ್ಧವಗ್ಗೋ ಪಠಮೋ.