೫. ಪಾಟಿದೇಸನೀಯಕಣ್ಡಂ (ಭಿಕ್ಖುನೀವಿಭಙ್ಗವಣ್ಣನಾ)

ಪಾಟಿದೇಸನೀಯಸಿಕ್ಖಾಪದವಣ್ಣನಾ

ಪಾಟಿದೇಸನೀಯಾ ನಾಮ, ಖುದ್ದಕಾನಂ ಅನನ್ತರಾ;

ಯೇ ಧಮ್ಮಾ ಅಟ್ಠ ಆರುಳ್ಹಾ, ಸಙ್ಖೇಪೇನೇವ ಸಙ್ಗಹಂ;

ತೇಸಂ ಪವತ್ತತೇ ಏಸಾ, ಸಙ್ಖೇಪೇನೇವ ವಣ್ಣನಾ.

೧೨೨೮. ಯಾನಿ ಹಿ ಏತ್ಥ ಪಾಳಿಯಂ ಸಪ್ಪಿತೇಲಾದೀನಿ ನಿದ್ದಿಟ್ಠಾನಿ, ತಾನಿಯೇವ ವಿಞ್ಞಾಪೇತ್ವಾ ಭುಞ್ಜನ್ತಿಯಾ ಪಾಟಿದೇಸನೀಯಾ. ಪಾಳಿವಿನಿಮುತ್ತಕೇಸು ಪನ ಸಬ್ಬೇಸು ದುಕ್ಕಟಂ. ಸೇಸಮೇತ್ಥ ಉತ್ತಾನಮೇವ. ಅಟ್ಠವಿಧಮ್ಪಿ ಪನೇತಂ ಪಾಟಿದೇಸನೀಯಂ ಚತುಸಮುಟ್ಠಾನಂ – ಕಾಯತೋ ಕಾಯವಾಚತೋ ಕಾಯಚಿತ್ತತೋ ಕಾಯವಾಚಾಚಿತ್ತತೋ ಚ ಸಮುಟ್ಠಾತಿ, ಕಿರಿಯಂ ನೋಸಞ್ಞಾವಿಮೋಕ್ಖಂ, ಅಚಿತ್ತಕಂ, ಪಣ್ಣತ್ತಿವಜ್ಜಂ, ಕಾಯಕಮ್ಮಂ, ವಚೀಕಮ್ಮಂ, ತಿಚಿತ್ತಂ, ತಿವೇದನನ್ತಿ.

ಪಾಟಿದೇಸನೀಯವಣ್ಣನಾ ನಿಟ್ಠಿತಾ.

ಪಾಟಿದೇಸನೀಯಕಣ್ಡಂ ನಿಟ್ಠಿತಂ.

ಸೇಖಿಯಾ ಪನ ಉದ್ದಿಟ್ಠಾ, ಯೇ ಧಮ್ಮಾ ಪಞ್ಚಸತ್ತತಿ;

ತೇಸಂ ಅನನ್ತರಾಯೇವ, ಸತ್ತಾಧಿಕರಣವ್ಹಯಾ.

ಮಹಾವಿಭಙ್ಗೇ ಯೋ ವುತ್ತೋ, ತೇಸಂ ಅತ್ಥವಿನಿಚ್ಛಯೋ;

ಭಿಕ್ಖುನೀನಂ ವಿಭಙ್ಗೇಪಿ, ತಾದಿಸಂಯೇವ ತಂ ವಿದೂ.

ಯಸ್ಮಾ ತಸ್ಮಾ ವಿಸುಂ ತೇಸಂ, ಧಮ್ಮಾನಂ ಅತ್ಥವಣ್ಣನಾ;

ನ ವುತ್ತಾ ತತ್ಥ ಯಾ ವುತ್ತಾ, ವುತ್ತಾಯೇವ ಹಿ ಸಾ ಇಧಾತಿ.

ಸಮನ್ತಪಾಸಾದಿಕಾಯ ವಿನಯಸಂವಣ್ಣನಾಯ

ಭಿಕ್ಖುನೀವಿಭಙ್ಗವಣ್ಣನಾ ನಿಟ್ಠಿತಾ.

ಸಬ್ಬಾಸವಪಹಂ ಏಸಾ, ನಿಟ್ಠಿತಾ ವಣ್ಣನಾ ಯಥಾ;

ಸಬ್ಬಾಸವಪಹಂ ಮಗ್ಗಂ, ಪತ್ವಾ ಪಸ್ಸನ್ತು ನಿಬ್ಬುತಿನ್ತಿ.

ಉಭತೋವಿಭಙ್ಗಟ್ಠಕಥಾ ನಿಟ್ಠಿತಾ.