೮. ಕಣ್ಡುಪಟಿಚ್ಛಾದಿಸಿಕ್ಖಾಪದವಣ್ಣನಾ

೫೩೭. ಅಟ್ಠಮೇ – ಕಣ್ಡುಪಟಿಚ್ಛಾದಿ ಅನುಞ್ಞಾತಾ ಹೋತೀತಿ ಕತ್ಥ ಅನುಞ್ಞಾತಾ? ಚೀವರಕ್ಖನ್ಧಕೇ ಬೇಲಟ್ಠಸೀಸವತ್ಥುಸ್ಮಿಂ. ವುತ್ತಞ್ಹಿ ತತ್ಥ – ‘‘ಅನುಜಾನಾಮಿ, ಭಿಕ್ಖವೇ, ಯಸ್ಸ ಕಣ್ಡು ವಾ ಪಿಳಕಾ ವಾ ಅಸ್ಸಾವೋ ವಾ ಥುಲ್ಲಕಚ್ಛು ವಾ ಆಬಾಧೋ ತಸ್ಸ ಕಣ್ಡುಪಟಿಚ್ಛಾದಿ’’ನ್ತಿ (ಮಹಾವ. ೩೫೪).

೫೩೯. ಯಸ್ಸ ಅಧೋನಾಭಿ ಉಬ್ಭಜಾಣುಮಣ್ಡಲನ್ತಿ ಯಸ್ಸ ಭಿಕ್ಖುನೋ ನಾಭಿಯಾ ಹೇಟ್ಠಾ ಜಾಣುಮಣ್ಡಲಾನಂ ಉಪರಿ. ಕಣ್ಡೂತಿ ಕಚ್ಛು. ಪಿಳಕಾತಿ ಲೋಹಿತತುಣ್ಡಿಕಾ ಸುಖುಮಪಿಳಕಾ. ಅಸ್ಸಾವೋತಿ ಅರಿಸಭಗನ್ದರಮಧುಮೇಹಾದೀನಂ ವಸೇನ ಅಸುಚಿಪಗ್ಘರಣಕಂ. ಥುಲ್ಲಕಚ್ಛು ವಾ ಆಬಾಧೋತಿ ಮಹಾಪಿಳಕಾಬಾಧೋ ವುಚ್ಚತಿ. ಸೇಸಮೇತ್ಥ ಉತ್ತಾನಮೇವ. ಛಸಮುಟ್ಠಾನಂ.

ಕಣ್ಡುಪಟಿಚ್ಛಾದಿಸಿಕ್ಖಾಪದಂ ಅಟ್ಠಮಂ.