೪. ಪಹಾರಸಿಕ್ಖಾಪದವಣ್ಣನಾ

೪೪೯. ಚತುತ್ಥೇ – ಪಹಾರಂ ದೇನ್ತೀತಿ ‘‘ಆವುಸೋ ಪೀಠಕಂ ಪಞ್ಞಪೇಥ, ಪಾದಧೋವನಂ ಆಹರಥಾ’’ತಿಆದೀನಿ ವತ್ವಾ ತಥಾ ಅಕರೋನ್ತಾನಂ ಪಹಾರಂ ದೇನ್ತಿ.

೪೫೧. ಪಹಾರಂ ದೇತಿ ಆಪತ್ತಿ ಪಾಚಿತ್ತಿಯಸ್ಸಾತಿ ಏತ್ಥ ಪಹರಿತುಕಾಮತಾಯ ಪಹಾರೇ ದಿನ್ನೇ ಸಚೇಪಿ ಮರತಿ ಪಾಚಿತ್ತಿಯಮೇವ. ಪಹಾರೇನ ಹತ್ಥೋ ವಾ ಪಾದೋ ವಾ ಭಿಜ್ಜತಿ, ಸೀಸಂ ವಾ ಭಿನ್ನಂ ಹೋತಿ, ಪಾಚಿತ್ತಿಯಮೇವ. ‘‘ಯಥಾಯಂ ಸಙ್ಘಮಜ್ಝೇ ನ ವಿರೋಚತಿ, ತಥಾ ನಂ ಕರೋಮೀ’’ತಿ ಏವಂ ವಿರೂಪಕರಣಾಧಿಪ್ಪಾಯೇನ ಕಣ್ಣಂ ವಾ ನಾಸಂ ವಾ ಛಿನ್ದತಿ, ದುಕ್ಕಟಂ.

೪೫೨. ಅನುಪಸಮ್ಪನ್ನಸ್ಸಾತಿ ಗಹಟ್ಠಸ್ಸ ವಾ ಪಬ್ಬಜಿತಸ್ಸ ವಾ ಇತ್ಥಿಯಾ ವಾ ಪುರಿಸಸ್ಸ ವಾ ಅನ್ತಮಸೋ ತಿರಚ್ಛಾನಗತಸ್ಸಾಪಿ ಪಹಾರಂ ದೇತಿ, ದುಕ್ಕಟಂ. ಸಚೇ ಪನ ರತ್ತಚಿತ್ತೋ ಇತ್ಥಿಂ ಪಹರತಿ, ಸಙ್ಘಾದಿಸೇಸೋ.

೪೫೩. ಕೇನಚಿ ವಿಹೇಠಿಯಮಾನೋತಿ ಮನುಸ್ಸೇನ ವಾ ತಿರಚ್ಛಾನಗತೇನ ವಾ ವಿಹೇಠಿಯಮಾನೋ. ಮೋಕ್ಖಾಧಿಪ್ಪಾಯೋತಿ ತತೋ ಅತ್ತನೋ ಮೋಕ್ಖಂ ಪತ್ಥಯಮಾನೋ. ಪಹಾರಂ ದೇತೀತಿ ಕಾಯಕಾಯಪಟಿಬದ್ಧನಿಸ್ಸಗ್ಗಿಯಾನಂ ಅಞ್ಞತರೇನ ಪಹಾರಂ ದೇತಿ, ಅನಾಪತ್ತಿ. ಸಚೇಪಿ ಅನ್ತರಾಮಗ್ಗೇ ಚೋರಂ ವಾ ಪಚ್ಚತ್ಥಿಕಂ ವಾ ವಿಹೇಠೇತುಕಾಮಂ ದಿಸ್ವಾ ‘‘ಉಪಾಸಕ, ಏತ್ಥೇವ ತಿಟ್ಠ, ಮಾ ಆಗಮೀ’’ತಿ ವತ್ವಾ ವಚನಂ ಅನಾದಿಯಿತ್ವಾ ಆಗಚ್ಛನ್ತಂ ‘‘ಗಚ್ಛ ರೇ’’ತಿ ಮುಗ್ಗರೇನ ವಾ ಸತ್ಥಕೇನ ವಾ ಪಹರಿತ್ವಾ ಯಾತಿ, ಸೋ ಚೇ ತೇನ ಪಹಾರೇನ ಮರತಿ, ಅನಾಪತ್ತಿಯೇವ. ವಾಳಮಿಗೇಸುಪಿ ಏಸೇವ ನಯೋ. ಸೇಸಮೇತ್ಥ ಉತ್ತಾನಮೇವ. ಸಮುಟ್ಠಾನಾದೀನಿ ಪನಸ್ಸ ಪಠಮಪಾರಾಜಿಕಸದಿಸಾನಿ, ಇದಂ ಪನ ದುಕ್ಖವೇದನನ್ತಿ.

ಪಹಾರಸಿಕ್ಖಾಪದಂ ಚತುತ್ಥಂ.