೧೧. ಓಘವಗ್ಗೋ

೧-೨. ಓಘಸುತ್ತಾದಿವಣ್ಣನಾ

೧೭೨-೧೭೩. ಓಘವಗ್ಗೇ ಕಾಮೋಘೋತಿ ಪಞ್ಚಸು ಕಾಮಗುಣೇಸು ಛನ್ದರಾಗೋ. ಭವೋಘೋತಿ ರೂಪಾರೂಪಭವೇಸು ಛನ್ದರಾಗೋ. ದಿಟ್ಠೋಘೋತಿ ದ್ವಾಸಟ್ಠಿ ದಿಟ್ಠಿಯೋ. ಅವಿಜ್ಜೋಘೋತಿ ಚತೂಸು ಸಚ್ಚೇಸು ಅಞ್ಞಾಣಂ. ಕಾಮಯೋಗಾದೀಸುಪಿ ಏಸೇವ ನಯೋ.

೩-೪. ಉಪಾದಾನಸುತ್ತಾದಿವಣ್ಣನಾ

೧೭೪-೧೭೫. ಕಾಮುಪಾದಾನನ್ತಿ ಕಾಮಗ್ಗಹಣಂ. ದಿಟ್ಠುಪಾದಾನಾದೀಸುಪಿ ಏಸೇವ ನಯೋ. ಗನ್ಥಾತಿ ಗನ್ಥನಾ ಘಟನಾ. ಕಾಯಗನ್ಥೋತಿ ನಾಮಕಾಯಸ್ಸ ಗನ್ಥೋ ಗನ್ಥನಘಟನಕಿಲೇಸೋ. ಇದಂಸಚ್ಚಾಭಿನಿವೇಸೋತಿ ಅನ್ತಗ್ಗಾಹಿಕದಿಟ್ಠಿವಸೇನ ಉಪ್ಪನ್ನೋ ‘‘ಇದಮೇವ ಸಚ್ಚ’’ನ್ತಿ ಏವಂ ಅಭಿನಿವೇಸೋ.

೫-೧೦. ಅನುಸಯಸುತ್ತಾದಿವಣ್ಣನಾ

೧೭೬-೧೮೧. ಕಾಮರಾಗಾನುಸಯೋತಿ ಥಾಮಗತಟ್ಠೇನ ಕಾಮರಾಗೋವ ಅನುಸಯೋ ಕಾಮರಾಗಾನುಸಯೋ. ಸೇಸೇಸುಪಿ ಏಸೇವ ನಯೋ. ಓರಮ್ಭಾಗಿಯಾನೀತಿ ಹೇಟ್ಠಾಕೋಟ್ಠಾಸಿಯಾನಿ. ಸಂಯೋಜನಾನೀತಿ ಬನ್ಧನಾನಿ. ಉದ್ಧಮ್ಭಾಗಿಯಾನೀತಿ ಉಪರಿಕೋಟ್ಠಾಸಿಯಾನಿ. ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ.

ಓಘವಗ್ಗೋ ಏಕಾದಸಮೋ.

ಮಗ್ಗಸಂಯುತ್ತವಣ್ಣನಾ ನಿಟ್ಠಿತಾ.