೧. ವಾತಸುತ್ತವಣ್ಣನಾ

೨೦೬. ದಿಟ್ಠಿಸಂಯುತ್ತೇ ನ ವಾತಾ ವಾಯನ್ತೀತಿಆದೀಸು ಏವಂ ಕಿರ ತೇಸಂ ದಿಟ್ಠಿ – ‘‘ಯೇಪಿ ಏತೇ ರುಕ್ಖಸಾಖಾದೀನಿ ಭಞ್ಜನ್ತಾ ವಾತಾ ವಾಯನ್ತಿ, ನ ಏತೇ ವಾತಾ, ವಾತಲೇಸೋ ನಾಮೇಸೋ, ವಾತೋ ಪನ ಏಸಿಕತ್ಥಮ್ಭೋ ವಿಯ ಪಬ್ಬತಕೂಟಂ ವಿಯ ಚ ಠಿತೋ. ತಥಾ ಯಾಪಿ ಏತಾ ತಿಣಕಟ್ಠಾದೀನಿ ವಹನ್ತಿಯೋ ನದಿಯೋ ಸನ್ದನ್ತಿ, ನ ಏತ್ಥ ಉದಕಂ ಸನ್ದಕಿ, ಉದಕಲೇಸೋ ನಾಮೇಸ, ಉದಕಂ ಪನ ಏಸಿಕತ್ಥಮ್ಭೋ ವಿಯ ಪಬ್ಬತಕೂಟಂ ವಿಯ ಚ ಠಿತಂ. ಯಾಪಿಮಾ ಗಬ್ಭಿನಿಯೋ ವಿಜಾಯನ್ತೀತಿ ಚ ವುಚ್ಚನ್ತಿ, ಕಿಞ್ಚಾಪಿ ತಾ ಮಿಲಾತುದರಾ ಹೋನ್ತಿ, ಗಬ್ಭೋ ಪನ ನ ನಿಕ್ಖಮತಿ, ಗಬ್ಭಲೇಸೋ ನಾಮೇಸೋ, ಗಬ್ಭೋ ಪನ ಏಸಿಕತ್ಥಮ್ಭೋ ವಿಯ ಪಬ್ಬತಕೂಟಂ ವಿಯ ಚ ಠಿತೋ. ಯೇಪಿ ಏತೇ ಚನ್ದಿಮಸೂರಿಯಾ ಉದೇನ್ತಿ ವಾ ಅಪೇನ್ತಿ ವಾ, ನೇವ ತೇ ಉದೇನ್ತಿ ನ ಅಪೇನ್ತಿ, ಚನ್ದಿಮಸೂರಿಯಲೇಸೋ ನಾಮೇಸ, ಚನ್ದಿಮಸೂರಿಯಾ ಪನ ಏಸಿಕತ್ಥಮ್ಭೋ ವಿಯ ಪಬ್ಬತಕೂಟಂ ವಿಯ ಚ ಠಿತಾ’’ತಿ.