೨. ರಾಧಸಂಯುತ್ತಂ

೧. ಪಠಮವಗ್ಗೋ

೧. ಮಾರಸುತ್ತವಣ್ಣನಾ

೧೬೦. ರಾಧಸಂಯುತ್ತಸ್ಸ ಪಠಮೇ ಮಾರೋ ವಾ ಅಸ್ಸಾತಿ ಮರಣಂ ವಾ ಭವೇಯ್ಯ. ಮಾರೇತಾ ವಾತಿ ಮಾರೇತಬ್ಬೋ ವಾ. ಯೋ ವಾ ಪನ ಮೀಯತೀತಿ ಯೋ ವಾ ಪನ ಮರತಿ. ನಿಬ್ಬಿದತ್ಥನ್ತಿ ನಿಬ್ಬಿದಾಞಾಣತ್ಥಂ. ನಿಬ್ಬಾನತ್ಥಾತಿ ಫಲವಿಮುತ್ತಿ ನಾಮೇಸಾ ಅನುಪಾದಾನಿಬ್ಬಾನತ್ಥಾತಿ ಅತ್ಥೋ. ಅಚ್ಚಯಾಸೀತಿ ಅತಿಕ್ಕನ್ತೋಸಿ. ನಿಬ್ಬಾನೋಗಧನ್ತಿ ನಿಬ್ಬಾನೇ ಪತಿಟ್ಠಿತಂ. ಇದಂ ಮಗ್ಗಬ್ರಹ್ಮಚರಿಯಂ ನಾಮ ನಿಬ್ಬಾನಬ್ಭನ್ತರೇ ವುಸ್ಸತಿ, ನ ನಿಬ್ಬಾನಂ ಅತಿಕ್ಕಮಿತ್ವಾತಿ ಅತ್ಥೋ. ನಿಬ್ಬಾನಪರಿಯೋಸಾನನ್ತಿ ನಿಬ್ಬಾನಂ ಅಸ್ಸ ಪರಿಯೋಸಾನಂ, ನಿಪ್ಫತ್ತಿ ನಿಟ್ಠಾತಿ ಅತ್ಥೋ. ಪಠಮಂ.

೨-೧೦. ಸತ್ತಸುತ್ತಾದಿವಣ್ಣನಾ

೧೬೧-೧೬೯. ದುತಿಯೇ ಸತ್ತೋ ಸತ್ತೋತಿ ಲಗ್ಗಪುಚ್ಛಾ. ತತ್ರ ಸತ್ತೋ ತತ್ರ ವಿಸತ್ತೋತಿ ತತ್ರ ಲಗ್ಗೋ ತತ್ರ ವಿಲಗ್ಗೋ. ಪಂಸ್ವಾಗಾರಕೇಹೀತಿ ಪಂಸುಘರಕೇಹಿ. ಕೇಳಾಯನ್ತೀತಿ ಕೀಳನ್ತಿ. ಧನಾಯನ್ತೀತಿ ಧನಂ ವಿಯ ಮಞ್ಞನ್ತಿ. ಮಮಾಯನ್ತೀತಿ ‘‘ಮಮ ಇದಂ, ಮಮ ಇದ’’ನ್ತಿ ಮಮತ್ತಂ ಕರೋನ್ತಿ, ಅಞ್ಞಸ್ಸ ಫುಸಿತುಮ್ಪಿ ನ ದೇನ್ತಿ. ವಿಕೀಳನಿಯಂ ಕರೋನ್ತೀತಿ ‘‘ನಿಟ್ಠಿತಾ ಕೀಳಾ’’ತಿ ತೇ ಭಿನ್ದಮಾನಾ ಕೀಳಾವಿಗಮಂ ಕರೋನ್ತಿ. ತತಿಯೇ ಭವನೇತ್ತೀತಿ ಭವರಜ್ಜು. ಚತುತ್ಥಂ ಉತ್ತಾನಮೇವ. ಪಞ್ಚಮಾದೀಸು ಚತೂಸು ಚತ್ತಾರಿ ಸಚ್ಚಾನಿ ಕಥಿತಾನಿ, ದ್ವೀಸು ಕಿಲೇಸಪ್ಪಹಾನನ್ತಿ. ದುತಿಯಾದೀನಿ.

ಪಠಮೋ ವಗ್ಗೋ.

೨. ದುತಿಯವಗ್ಗೋ

೧-೧೨. ಮಾರಸುತ್ತಾದಿವಣ್ಣನಾ

೧೭೦-೧೮೧. ದುತಿಯವಗ್ಗಸ್ಸ ಪಠಮೇ ಮಾರೋ, ಮಾರೋತಿ ಮರಣಂ ಪುಚ್ಛತಿ. ಯಸ್ಮಾ ಪನ ರೂಪಾದಿವಿನಿಮುತ್ತಂ ಮರಣಂ ನಾಮ ನತ್ಥಿ, ತೇನಸ್ಸ ಭಗವಾ ರೂಪಂ ಖೋ, ರಾಧ, ಮಾರೋತಿಆದಿಮಾಹ. ದುತಿಯೇ ಮಾರಧಮ್ಮೋತಿ ಮರಣಧಮ್ಮೋ. ಏತೇನುಪಾಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋತಿ.

ದುತಿಯೋ ವಗ್ಗೋ.

೩-೪. ಆಯಾಚನವಗ್ಗಾದಿ

೧-೧೧. ಮಾರಾದಿಸುತ್ತಏಕಾದಸಕವಣ್ಣನಾ

೧೮೨-೨೦೫. ತತೋ ಪರಂ ಉತ್ತಾನತ್ಥಮೇವ. ಅಯಞ್ಹಿ ರಾಧತ್ಥೇರೋ ಪಟಿಭಾನಿಯತ್ಥೇರೋ ನಾಮ. ತಥಾಗತಸ್ಸ ಇಮಂ ಥೇರಂ ದಿಸ್ವಾ ಸುಖುಮಂ ಕಾರಣಂ ಉಪಟ್ಠಾತಿ. ತೇನಸ್ಸ ಭಗವಾ ನಾನಾನಯೇಹಿ ಧಮ್ಮಂ ದೇಸೇತಿ. ಏವಂ ಇಮಸ್ಮಿಂ ರಾಧಸಂಯುತ್ತೇ ಆದಿತೋ ದ್ವೇ ವಗ್ಗಾ ಪುಚ್ಛಾವಸೇನ ದೇಸಿತಾ, ತತಿಯೋ ಆಯಾಚನೇನ, ಚತುತ್ಥೋ ಉಪನಿಸಿನ್ನಕಕಥಾವಸೇನ. ಸಕಲಮ್ಪಿ ಪನೇತಂ ರಾಧಸಂಯುತ್ತಂ ಥೇರಸ್ಸ ವಿಮುತ್ತಿಪರಿಪಾಚನೀಯಧಮ್ಮವಸೇನೇವ ಗಹಿತನ್ತಿ ವೇದಿತಬ್ಬಂ.

ರಾಧಸಂಯುತ್ತವಣ್ಣನಾ ನಿಟ್ಠಿತಾ.