೧೨. ಧಮ್ಮಕಥಿಕವಗ್ಗೋ

೧-೨. ಅವಿಜ್ಜಾಸುತ್ತಾದಿವಣ್ಣನಾ

೧೧೩-೧೧೪. ಧಮ್ಮಕಥಿಕವಗ್ಗಸ್ಸ ಪಠಮೇ ಏತ್ತಾವತಾ ಚ ಅವಿಜ್ಜಾಗತೋ ಹೋತೀತಿ ಯಾವತಾ ಇಮಾಯ ಚತೂಸು ಸಚ್ಚೇಸು ಅಞ್ಞಾಣಭೂತಾಯ ಅವಿಜ್ಜಾಯ ಸಮನ್ನಾಗತೋ, ಏತ್ತಾವತಾ ಅವಿಜ್ಜಾಗತೋ ಹೋತೀತಿ ಅತ್ಥೋ. ದುತಿಯೇಪಿ ಏಸೇವ ನಯೋ. ಪಠಮದುತಿಯಾನಿ.

೩. ಧಮ್ಮಕಥಿಕಸುತ್ತವಣ್ಣನಾ

೧೧೫. ತತಿಯೇ ಪಠಮೇನ ಧಮ್ಮಕಥಿಕೋ, ದುತಿಯೇನ ಸೇಖಭೂಮಿ, ತತಿಯೇನ ಅಸೇಖಭೂಮೀತಿ ಏವಂ ಧಮ್ಮಕಥಿಕಂ ಪುಚ್ಛಿತೇನ ವಿಸೇಸೇತ್ವಾ ದ್ವೇ ಭೂಮಿಯೋ ಕಥಿತಾ. ತತಿಯಂ.

೪. ದುತಿಯಧಮ್ಮಕಥಿಕಸುತ್ತವಣ್ಣನಾ

೧೧೬. ಚತುತ್ಥೇ ತಿಸ್ಸನ್ನಮ್ಪಿ ಪುಚ್ಛಾನಂ ತೀಣಿ ವಿಸ್ಸಜ್ಜನಾನಿ ಕಥಿತಾನಿ. ಚತುತ್ಥಂ.

೫-೯. ಬನ್ಧನಸುತ್ತಾದಿವಣ್ಣನಾ

೧೧೭-೧೨೧. ಪಞ್ಚಮೇ ಅತೀರದಸ್ಸೀತಿ ತೀರಂ ವುಚ್ಚತಿ ವಟ್ಟಂ, ತಂ ನ ಪಸ್ಸತಿ. ಅಪಾರದಸ್ಸೀತಿ ಪಾರಂ ವುಚ್ಚತಿ ನಿಬ್ಬಾನಂ, ತಂ ನ ಪಸ್ಸತಿ. ಬದ್ಧೋತಿ ಕಿಲೇಸಬನ್ಧನೇನ ಬದ್ಧೋ ಹುತ್ವಾ ಜೀಯತಿ ಚ ಮೀಯತಿ ಚ ಅಸ್ಮಾ ಲೋಕಾ ಪರಂ ಲೋಕಂ ಗಚ್ಛತೀತಿ. ಇಮಸ್ಮಿಂ ಸುತ್ತೇ ವಟ್ಟದುಕ್ಖಂ ಕಥಿತನ್ತಿ. ಛಟ್ಠಾದೀನಿ ಉತ್ತಾನತ್ಥಾನೇವ. ಪಞ್ಚಮಾದೀನಿ.

೧೦. ಸೀಲವನ್ತಸುತ್ತವಣ್ಣನಾ

೧೨೨. ದಸಮೇ ಅನಿಚ್ಚತೋತಿಆದೀಸು ಹುತ್ವಾ ಅಭಾವಾಕಾರೇನ ಅನಿಚ್ಚತೋ, ಪಟಿಪೀಳನಾಕಾರೇನ ದುಕ್ಖತೋ, ಆಬಾಧಟ್ಠೇನ ರೋಗತೋ, ಅನ್ತೋದೋಸಟ್ಠೇನ ಗಣ್ಡತೋ, ತೇಸಂ ತೇಸಂ ಗಣ್ಡಾನಂ ಪಚ್ಚಯಭಾವೇನ ವಾ ಖಣನಟ್ಠೇನ ವಾ ಸಲ್ಲತೋ ದುಕ್ಖಟ್ಠೇನ ಅಘತೋ, ವಿಸಭಾಗಮಹಾಭೂತಸಮುಟ್ಠಾನಆಬಾಧಪಚ್ಚಯಟ್ಠೇನ ಆಬಾಧತೋ, ಅಸಕಟ್ಠೇನ ಪರತೋ, ಪಲುಜ್ಜನಟ್ಠೇನ ಪಲೋಕತೋ, ಸತ್ತಸುಞ್ಞತಟ್ಠೇನ ಸುಞ್ಞತೋ, ಅತ್ತಾಭಾವೇನ ಅನತ್ತತೋ. ಏವಮೇತ್ಥ ‘‘ಅನಿಚ್ಚತೋ ಪಲೋಕತೋ’’ತಿ ದ್ವೀಹಿ ಪದೇಹಿ ಅನಿಚ್ಚಮನಸಿಕಾರೋ, ‘‘ಸುಞ್ಞತೋ ಅನತ್ತತೋ’’ತಿ ದ್ವೀಹಿ ಅನತ್ತಮನಸಿಕಾರೋ, ಸೇಸೇಹಿ ದುಕ್ಖಮನಸಿಕಾರೋ ವುತ್ತೋತಿ ವೇದಿತಬ್ಬೋ. ಸೇಸಮೇತ್ಥ ಉತ್ತಾನಮೇವ. ದಸಮಂ.

೧೧. ಸುತವನ್ತಸುತ್ತವಣ್ಣನಾ

೧೨೩. ತಥಾ ಏಕಾದಸಮೇ. ದಸಮಸ್ಮಿಞ್ಹಿ ‘‘ಸೀಲವತಾ’’ತಿ ಚತುಪಾರಿಸುದ್ಧಿಸೀಲಂ ವುತ್ತಂ, ಇಧ ಸುತವತಾತಿ ಕಮ್ಮಟ್ಠಾನಸುತಂ ಇದಮೇವ ನಾನಾಕರಣಂ. ಏಕಾದಸಮಂ.

೧೨-೧೩. ಕಪ್ಪಸುತ್ತಾದಿವಣ್ಣನಾ

೧೨೪-೧೨೫. ದ್ವಾದಸಮತೇರಸಮಾನಿ ರಾಹುಲೋವಾದಸದಿಸಾನೇವಾತಿ. ದ್ವಾದಸಮತೇರಸಮಾನಿ.

ಧಮ್ಮಕಥಿಕವಗ್ಗೋ ದ್ವಾದಸಮೋ.