೫. ಸಮಾಧಿಸುತ್ತವಣ್ಣನಾ

೫. ಪಞ್ಚಮೇ ಸಮಾಧಿನ್ತಿ ಇದಂ ಭಗವಾ ತೇ ಭಿಕ್ಖೂ ಚಿತ್ತೇಕಗ್ಗತಾಯ ಪರಿಹಾಯನ್ತೇ ದಿಸ್ವಾ, ‘‘ಚಿತ್ತೇಕಗ್ಗತಂ ಲಭನ್ತಾನಂ ಇಮೇಸಂ ಕಮ್ಮಟ್ಠಾನಂ ಫಾತಿಂ ಗಮಿಸ್ಸತೀ’’ತಿ ಞತ್ವಾ ಆಹ. ಅಭಿನನ್ದತೀತಿ ಪತ್ಥೇತಿ. ಅಭಿವದತೀತಿ ತಾಯ ಅಭಿನನ್ದನಾಯ ‘‘ಅಹೋ ಪಿಯಂ ಇಟ್ಠಂ ಕನ್ತಂ ಮನಾಪ’’ನ್ತಿ ವದತಿ. ವಾಚಂ ಅಭಿನನ್ದನ್ತೋಪಿ ಚ ತಂ ಆರಮ್ಮಣಂ ನಿಸ್ಸಾಯ ಏವಂ ಲೋಭಂ ಉಪ್ಪಾದೇನ್ತೋ ಅಭಿವದತಿಯೇವ ನಾಮ. ಅಜ್ಝೋಸಾಯ ತಿಟ್ಠತೀತಿ ಗಿಲಿತ್ವಾ ಪರಿನಿಟ್ಠಪೇತ್ವಾ ಗಣ್ಹಾತಿ. ಯಾ ರೂಪೇ ನನ್ದೀತಿ ಯಾ ಸಾ ರೂಪೇ ಬಲವಪತ್ಥನಾಸಙ್ಖಾತಾ ನನ್ದೀ. ತದುಪಾದಾನನ್ತಿ ತಂ ಗಹಣಟ್ಠೇನ ಉಪಾದಾನಂ. ನಾಭಿನನ್ದತೀತಿ ನ ಪತ್ಥೇತಿ. ನಾಭಿವದತೀತಿ ಪತ್ಥನಾವಸೇನ ನ ‘‘ಇಟ್ಠಂ ಕನ್ತ’’ನ್ತಿ ವದತಿ. ವಿಪಸ್ಸನಾಚಿತ್ತೇನ ಚೇತಸಾ ‘‘ಅನಿಚ್ಚಂ ದುಕ್ಖ’’ನ್ತಿ ವಚೀಭೇದಂ ಕರೋನ್ತೋಪಿ ನಾಭಿವದತಿಯೇವ. ಪಞ್ಚಮಂ.