೯. ನಾಗಸುತ್ತವಣ್ಣನಾ

೨೩೧. ನವಮೇ ಅತಿವೇಲನ್ತಿ ಅತಿಕ್ಕನ್ತವೇಲಂ ಕಾಲಂ ಅತಿಕ್ಕನ್ತಪ್ಪಮಾಣಂ ಕಾಲಂ. ಕಿಮಙ್ಗಂ ಪನಾಹನ್ತಿ ಅಹಂ ಪನ ಕಿಂಕಾರಣಾ ನ ಉಪಸಙ್ಕಮಿಸ್ಸಾಮಿ? ಭಿಸಮುಳಾಲನ್ತಿ ಭಿಸಞ್ಚೇವ ಮುಳಾಲಞ್ಚ. ಅಬ್ಬುಹೇತ್ವಾತಿ ಉದ್ಧರಿತ್ವಾ. ಭಿಙ್ಕಚ್ಛಾಪಾತಿ ಹತ್ಥಿಪೋತಕಾ. ತೇ ಕಿರ ಅಭಿಣ್ಹಂ ಭಿಙ್ಕಾರಸದ್ದಂ ಕರೋನ್ತಿ, ತಸ್ಮಾ ಭಿಙ್ಕಚ್ಛಾಪಾತಿ ವುಚ್ಚನ್ತಿ. ಪಸನ್ನಾಕಾರಂ ಕರೋನ್ತೀತಿ ಪಸನ್ನೇಹಿ ಕತ್ತಬ್ಬಾಕಾರಂ ಕರೋನ್ತಿ, ಚತ್ತಾರೋ ಪಚ್ಚಯೇ ದೇನ್ತಿ. ಧಮ್ಮಂ ಭಾಸನ್ತೀತಿ ಏಕಂ ದ್ವೇ ಜಾತಕಾನಿ ವಾ ಸುತ್ತನ್ತೇ ವಾ ಉಗ್ಗಣ್ಹಿತ್ವಾ ಅಸಮ್ಭಿನ್ನೇನ ಸರೇನ ಧಮ್ಮಂ ದೇಸೇನ್ತಿ. ಪಸನ್ನಾಕಾರಂ ಕರೋನ್ತೀತಿ ತೇಸಂ ತಾಯ ದೇಸನಾಯ ಪಸನ್ನಾ ಗಿಹೀ ಪಚ್ಚಯೇ ದೇನ್ತಿ. ನೇವ ವಣ್ಣಾಯ ಹೋತಿ ನ ಬಲಾಯಾತಿ ನೇವ ಗುಣವಣ್ಣಾಯ, ನ ಞಾಣಬಲಾಯ ಹೋತಿ, ಗುಣವಣ್ಣೇ ಪನ ಪರಿಹಾಯನ್ತೇ ಸರೀರವಣ್ಣೋಪಿ ಸರೀರಬಲಮ್ಪಿ ಪರಿಹಾಯತಿ, ತಸ್ಮಾ ಸರೀರಸ್ಸ ನೇವ ವಣ್ಣಾಯ ನ ಬಲಾಯ ಹೋತಿ. ನವಮಂ.