೩. ಕುಲಸುತ್ತವಣ್ಣನಾ

೨೨೫. ತತಿಯೇ ಸುಪ್ಪಧಂಸಿಯಾನೀತಿ ಸುವಿಹೇಠಿಯಾನಿ. ಕುಮ್ಭತ್ಥೇನಕೇಹೀತಿ ಯೇ ಪರಘರಂ ಪವಿಸಿತ್ವಾ ದೀಪಾಲೋಕೇನ ಓಲೋಕೇತ್ವಾ ಪರಭಣ್ಡಂ ಹರಿತುಕಾಮಾ ಘಟೇ ದೀಪಂ ಕತ್ವಾ ಪವಿಸನ್ತಿ, ತೇ ಕುಮ್ಭತ್ಥೇನಕಾ ನಾಮ, ತೇಹಿ ಕುಮ್ಭತ್ಥೇನಕೇಹಿ. ಸುಪ್ಪಧಂಸಿಯೋ ಹೋತಿ ಅಮನುಸ್ಸೇಹೀತಿ ಮೇತ್ತಾಭಾವನಾರಹಿತಂ ಪಂಸುಪಿಸಾಚಕಾ ವಿಧಂಸಯನ್ತಿ, ಪಗೇವ ಉಳಾರಾ ಅಮನುಸ್ಸಾ. ಭಾವಿತಾತಿ ವಡ್ಢಿತಾ. ಬಹುಲೀಕತಾತಿ ಪುನಪ್ಪುನಂ ಕತಾ. ಯಾನೀಕತಾತಿ ಯುತ್ತಯಾನಂ ವಿಯ ಕತಾ. ವತ್ಥುಕತಾತಿ ಪತಿಟ್ಠಾನಟ್ಠೇನ ವತ್ಥು ವಿಯ ಕತಾ. ಅನುಟ್ಠಿತಾತಿ ಅಧಿಟ್ಠಿತಾ. ಪರಿಚಿತಾತಿ ಸಮನ್ತತೋ ಚಿತಾ ಸುವಡ್ಢಿತಾ. ಸುಸಮಾರದ್ಧಾತಿ ಚಿತ್ತೇನ ಸುಟ್ಠು ಸಮಾರದ್ಧಾ. ತತಿಯಂ.