೮. ಸಿಙ್ಗಾಲಸುತ್ತವಣ್ಣನಾ

೧೬೪. ಅಟ್ಠಮೇ ಸಿಙ್ಗಾಲೋತಿ ಜರಸಿಙ್ಗಾಲೋ. ಯಥಾ ಹಿ ಸುವಣ್ಣವಣ್ಣೋಪಿ ಕಾಯೋ ಪೂತಿಕಾಯೋ ತ್ವೇವ, ತಂಖಣಂ ಗಳಿತಮ್ಪಿ ಚ ಮುತ್ತಂ ಪೂತಿಮುತ್ತನ್ತ್ವೇವ ವುಚ್ಚತಿ, ಏವಂ ತದಹುಜಾತೋಪಿ ಸಿಙ್ಗಾಲೋ ಜರಸಿಙ್ಗಾಲೋತ್ವೇವ ವುಚ್ಚತಿ. ಉಕ್ಕಣ್ಟಕೇನ ನಾಮಾತಿ ಏವಂನಾಮಕೇನ ರೋಗೇನ. ಸೋ ಕಿರ ಸೀತಕಾಲೇ ಉಪ್ಪಜ್ಜತಿ. ತಸ್ಮಿಂ ಉಪ್ಪನ್ನೇ ಸಕಲಸರೀರತೋ ಲೋಮಾನಿ ಪತನ್ತಿ, ಸಕಲಸರೀರಂ ನಿಲ್ಲೋಮಂ ಹುತ್ವಾ, ಸಮನ್ತತೋ ಫುಟತಿ, ವಾತಬ್ಭಾಹತಾ ವಣಾ ರುಜ್ಜನ್ತಿ. ಯಥಾ ಉಮ್ಮತ್ತಕಸುನಖೇನ ದಟ್ಠೋ ಪುರಿಸೋ ಅನವಟ್ಠಿತೋವ ಭಮತಿ, ಏವಂ ತಸ್ಮಿಂ ಉಪ್ಪನ್ನೇ ಭಮಿತಬ್ಬೋ ಹೋತಿ, ಅಸುಕಟ್ಠಾನೇ ಸೋತ್ಥಿ ಭವಿಸ್ಸತೀತಿ ನ ಪಞ್ಞಾಯತಿ. ಅಟ್ಠಮಂ.