೧೦. ಪುಗ್ಗಲಸುತ್ತವಣ್ಣನಾ

೧೩೩. ದಸಮೇ ಅಟ್ಠಿಕಙ್ಕಲೋತಿಆದೀನಿ ತೀಣಿಪಿ ರಾಸಿವೇವಚನಾನೇವ. ಇಮೇಸಂ ಪನ ಸತ್ತಾನಂ ಸಅಟ್ಠಿಕಾಲತೋ ಅನಟ್ಠಿಕಾಲೋವ ಬಹುತರೋ. ಗಣ್ಡುಪ್ಪಾದಕಾದಿಪಾಣಭೂತಾನಞ್ಹಿ ಏತೇಸಂ ಅಟ್ಠಿಮೇವ ನತ್ಥಿ, ಮಚ್ಛಕಚ್ಛಪಾದಿಭೂತಾನಂ ಪನ ಅಟ್ಠಿಮೇವ ಬಹುತರಂ, ತಸ್ಮಾ ಅನಟ್ಠಿಕಾಲಞ್ಚ ಬಹುಅಟ್ಠಿಕಾಲಞ್ಚ ಅಗ್ಗಹೇತ್ವಾ ಸಮಟ್ಠಿಕಾಲೋವ ಗಹೇತಬ್ಬೋ. ಉತ್ತರೋ ಗಿಜ್ಝಕೂಟಸ್ಸಾತಿ ಗಿಜ್ಝಕೂಟಸ್ಸ ಉತ್ತರಪಸ್ಸೇ ಠಿತೋ. ಮಗಧಾನಂ ಗಿರಿಬ್ಬಜೇತಿ ಮಗಧರಟ್ಠಸ್ಸ ಗಿರಿಬ್ಬಜೇ, ಗಿರಿಪರಿಕ್ಖೇಪೇ ಠಿತೋತಿ ಅತ್ಥೋ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ. ದಸಮಂ.

ಪಠಮೋ ವಗ್ಗೋ.