೯. ವಜ್ಜಿಪುತ್ತಸುತ್ತವಣ್ಣನಾ

೨೨೯. ನವಮೇ ವಜ್ಜಿಪುತ್ತಕೋತಿ ವಜ್ಜಿರಟ್ಠೇ ರಾಜಪುತ್ತೋ ಛತ್ತಂ ಪಹಾಯ ಪಬ್ಬಜಿತೋ. ಸಬ್ಬರತ್ತಿಚಾರೋತಿ ಕತ್ತಿಕನಕ್ಖತ್ತಂ ಘೋಸೇತ್ವಾ ಸಕಲನಗರಂ ಧಜಪಟಾಕಾದೀಹಿ ಪಟಿಮಣ್ಡೇತ್ವಾ ಪವತ್ತಿತೋ ಸಬ್ಬರತ್ತಿಚಾರೋ. ಇದಞ್ಹಿ ನಕ್ಖತ್ತಂ ಯಾವ ಚಾತುಮಹಾರಾಜಿಕೇಹಿ ಏಕಾಬದ್ಧಂ ಹೋತಿ. ತೂರಿಯತಾಳಿತವಾದಿತನಿಗ್ಘೋಸಸದ್ದನ್ತಿ ಭೇರಿಆದಿತೂರಿಯಾನಂ ತಾಳಿತಾನಂ ವೀಣಾದೀನಞ್ಚ ವಾದಿತಾನಂ ನಿಗ್ಘೋಸಸದ್ದಂ. ಅಭಾಸೀತಿ ವೇಸಾಲಿಯಂ ಕಿರ ಸತ್ತ ರಾಜಸಹಸ್ಸಾನಿ ಸತ್ತಸತಾನಿ ಸತ್ತ ಚ ರಾಜಾನೋ, ತತ್ತಕಾವ ತೇಸಂ ಉಪರಾಜಸೇನಾಪತಿಆದಯೋ. ತೇಸು ಅಲಙ್ಕತಪಟಿಯತ್ತೇಸು ನಕ್ಖತ್ತಕೀಳನತ್ಥಾಯ ವೀಥಿಂ ಓತಿಣ್ಣೇಸು ಸಟ್ಠಿಹತ್ಥೇ ಮಹಾಚಙ್ಕಮೇ ಚಙ್ಕಮಮಾನೋ ನಭಸ್ಸ ಮಜ್ಝೇ ಠಿತಂ ಚನ್ದಂ ದಿಸ್ವಾ ಚಙ್ಕಮನಕೋಟಿಯಂ ಫಲಕಂ ನಿಸ್ಸಾಯ ಠಿತೋ ಅಭಾಸಿ. ಅಪವಿದ್ಧಂವ ವನಸ್ಮಿಂ ದಾರುಕನ್ತಿ ವತ್ಥವೇಠನಾಲಙ್ಕಾರರಹಿತತ್ತಾ ವನೇ ಛಡ್ಡಿತದಾರುಕಂ ವಿಯ ಜಾತಂ. ಪಾಪಿಯೋತಿ ಲಾಮಕತರೋ ಅಮ್ಹೇಹಿ ಅಞ್ಞೋ ಕೋಚಿ ಅತ್ಥಿ. ಪಿಹಯನ್ತೀತಿ ಥೇರೋ ಆರಞ್ಞಿಕೋ ಪಂಸುಕೂಲಿಕೋ ಪಿಣ್ಡಪಾತಿಕೋ ಸಪದಾನಚಾರಿಕೋ ಅಪ್ಪಿಚ್ಛೋ ಸನ್ತುಟ್ಠೋತಿ ಬಹೂ ತುಯ್ಹಂ ಪತ್ಥಯನ್ತೀತಿ ಅತ್ಥೋ. ಸಗ್ಗಗಾಮಿನನ್ತಿ ಸಗ್ಗಂ ಗಚ್ಛನ್ತಾನಂ ಗತಾನಮ್ಪಿ. ನವಮಂ.