೩. ಪೇಸಲಸುತ್ತವಣ್ಣನಾ

೨೧೧. ತತಿಯೇ ಅತಿಮಞ್ಞತೀತಿ ‘‘ಕಿಂ ಇಮೇ ಮಹಲ್ಲಕಾ? ನ ಏತೇಸಂ ಪಾಳಿ, ನ ಅಟ್ಠಕಥಾ, ನ ಪದಬ್ಯಞ್ಜನಮಧುರತಾ, ಅಮ್ಹಾಕಂ ಪನ ಪಾಳಿಪಿ ಅಟ್ಠಕಥಾಪಿ ನಯಸತೇನ ನಯಸಹಸ್ಸೇನ ಉಪಟ್ಠಾತೀ’’ತಿ ಅತಿಕ್ಕಮಿತ್ವಾ ಮಞ್ಞತಿ. ಗೋತಮಾತಿ ಗೋತಮಬುದ್ಧಸಾವಕತ್ತಾ ಅತ್ತಾನಂ ಆಲಪತಿ. ಮಾನಪಥನ್ತಿ ಮಾನಾರಮ್ಮಣಞ್ಚೇವ ಮಾನಸಹಭುನೋ ಚ ಧಮ್ಮೇ. ವಿಪ್ಪಟಿಸಾರೀಹುವಾತಿ ವಿಪ್ಪಟಿಸಾರೀ ಅಹುವಾ, ಅಹೋಸೀತಿ ಅತ್ಥೋ. ಮಗ್ಗಜಿನೋತಿ ಮಗ್ಗೇನ ಜಿತಕಿಲೇಸೋ. ಕಿತ್ತಿಞ್ಚ ಸುಖಞ್ಚಾತಿ ವಣ್ಣಭಣನಞ್ಚ ಕಾಯಿಕಚೇತಸಿಕಸುಖಞ್ಚ. ಅಖಿಲೋಧ ಪಧಾನವಾತಿ ಅಖಿಲೋ ಇಧ ಪಧಾನವಾ ವೀರಿಯಸಮ್ಪನ್ನೋ. ವಿಸುದ್ಧೋತಿ ವಿಸುದ್ಧೋ ಭವೇಯ್ಯ. ಅಸೇಸನ್ತಿ ನಿಸ್ಸೇಸಂ ನವವಿಧಂ. ವಿಜ್ಜಾಯನ್ತಕರೋತಿ ವಿಜ್ಜಾಯ ಕಿಲೇಸಾನಂ ಅನ್ತಕರೋ. ಸಮಿತಾವೀತಿ ರಾಗಾದೀನಂ ಸಮಿತತಾಯ ಸಮಿತಾವೀ. ತತಿಯಂ.