೧೧. ಸಙ್ಗಾರವಸುತ್ತವಣ್ಣನಾ

೨೦೭. ಏಕಾದಸಮೇ ಪಚ್ಚೇತೀತಿ ಇಚ್ಛತಿ ಪತ್ಥೇತಿ. ಸಾಧು, ಭನ್ತೇತಿ ಆಯಾಚಮಾನೋ ಆಹ. ಥೇರಸ್ಸ ಕಿರೇಸ ಗಿಹಿಸಹಾಯೋ, ತಸ್ಮಾ ಥೇರೋ ‘‘ಅಯಂ ವರಾಕೋ ಮಂ ಸಹಾಯಂ ಲಭಿತ್ವಾಪಿ ಮಿಚ್ಛಾದಿಟ್ಠಿಂ ಗಹೇತ್ವಾ ಮಾ ಅಪಾಯಪೂರಕೋ ಅಹೋಸೀ’’ತಿ ಆಯಾಚತಿ. ಅಪಿಚೇಸ ಮಹಾಪರಿವಾರೋ, ತಸ್ಮಿಂ ಪಸನ್ನೇ ಪಞ್ಚಕುಲಸತಾನಿ ಅನುವತ್ತಿಸ್ಸನ್ತೀತಿ ಮಞ್ಞಮಾನೋಪಿ ಆಯಾಚತಿ. ಅತ್ಥವಸನ್ತಿ ಅತ್ಥಾನಿಸಂಸಂ ಅತ್ಥಕಾರಣಂ. ಪಾಪನ್ತಿ ಪಾಣಾತಿಪಾತಾದಿಅಕುಸಲಂ. ಪವಾಹೇಮೀತಿ ಗಲಪ್ಪಮಾಣಂ ಉದಕಂ ಓತರಿತ್ವಾ ಪವಾಹೇಮಿ ಪಲಾಪೇಮಿ. ಧಮ್ಮೋತಿ ಗಾಥಾ ವುತ್ತತ್ಥಾವ. ಏಕಾದಸಮಂ.