೪. ಅಚ್ಚಯಸುತ್ತವಣ್ಣನಾ

೨೭೦. ಚತುತ್ಥೇ ಸಮ್ಪಯೋಜೇಸುನ್ತಿ ಕಲಹಂ ಅಕಂಸು. ಅಚ್ಚಸರಾತಿ ಅತಿಕ್ಕಮಿ, ಏಕೋ ಭಿಕ್ಖು ಏಕಂ ಭಿಕ್ಖುಂ ಅತಿಕ್ಕಮ್ಮ ವಚನಂ ಅವೋಚಾತಿ ಅತ್ಥೋ. ಯಥಾಧಮ್ಮಂ ನಪ್ಪಟಿಗ್ಗಣ್ಹಾತೀತಿ ನ ಖಮತಿ. ಕೋಧೋ ವೋ ವಸಮಾಯಾತೂತಿ ಕೋಧೋ ತುಮ್ಹಾಕಂ ವಸಂ ಆಗಚ್ಛತು, ಮಾ ತುಮ್ಹೇ ಕೋಧವಸಂ ಗಮಿತ್ಥಾತಿ ದೀಪೇತಿ. ಮಾ ಚ ಮಿತ್ತೇ ಹಿ ವೋ ಜರಾತಿ ಏತ್ಥ ಹೀತಿ ನಿಪಾತಮತ್ತಂ, ತುಮ್ಹಾಕಂ ಮಿತ್ತಧಮ್ಮೇ ಜರಾ ನಾಮ ಮಾ ನಿಬ್ಬತ್ತಿ. ಭುಮ್ಮತ್ಥೇ ವಾ ಕರಣವಚನಂ, ಮಿತ್ತೇಸು ವೋ ಜರಾ ಮಾ ನಿಬ್ಬತ್ತಿ, ಮಿತ್ತಭಾವತೋ ಅಞ್ಞಥಾಭಾವೋ ಮಾ ಹೋತೂತಿ ಅತ್ಥೋ. ಅಗರಹಿಯಂ ಮಾ ಗರಹಿತ್ಥಾತಿ ಅಗಾರಯ್ಹಂ ಖೀಣಾಸವಪುಗ್ಗಲಂ ಮಾ ಗರಹಿತ್ಥ. ಚತುತ್ಥಂ.