೬. ಕುಲಾವಕಸುತ್ತವಣ್ಣನಾ

೨೫೨. ಛಟ್ಠೇ ಅಜ್ಝಭಾಸೀತಿ ತಸ್ಸ ಕಿರ ಸಿಮ್ಬಲಿವನಾಭಿಮುಖಸ್ಸ ಜಾತಸ್ಸ ರಥಸದ್ದೋ ಚ ಆಜಾನೀಯಸದ್ದೋ ಧಜಸದ್ದೋ ಚ ಸಮನ್ತಾ ಅಸನಿಪಾತಸದ್ದೋ ವಿಯ ಅಹೋಸಿ. ತಂ ಸುತ್ವಾ ಸಿಮ್ಬಲಿವನೇ ಬಲವಸುಪಣ್ಣಾ ಪಲಾಯಿಂಸು, ಜರಾಜಿಣ್ಣಾ ಚೇವ ರೋಗದುಬ್ಬಲಾ ಚ ಅಸಞ್ಜಾತಪಕ್ಖಪೋತಕಾ ಚ ಪಲಾಯಿತುಂ ಅಸಕ್ಕೋನ್ತಾ, ಮರಣಭಯೇನ ತಜ್ಜಿತಾ ಏಕಪ್ಪಹಾರೇನೇವ ಮಹಾವಿರವಂ ವಿರವಿಂಸು. ಸಕ್ಕೋ ತಂ ಸುತ್ವಾ ‘‘ಕಸ್ಸ ಸದ್ದೋ, ತಾತಾ’’ತಿ? ಮಾತಲಿಂ ಪುಚ್ಛಿ. ರಥಸದ್ದಂ, ತೇ ದೇವ, ಸುತ್ವಾ ಸುಪಣ್ಣಾ ಪಲಾಯಿತುಂ ಅಸಕ್ಕೋನ್ತಾ ವಿರವನ್ತೀತಿ. ತಂ ಸುತ್ವಾ ಕರುಣಾಸಮಾವಜ್ಜಿತಹದಯೋ ಅಭಾಸಿ. ಈಸಾಮುಖೇನಾತಿ ರಥಸ್ಸ ಈಸಾಮುಖೇನ. ಯಥಾ ಕುಲಾವಕೇ ಈಸಾಮುಖಂ ನ ಸಞ್ಚುಣ್ಣೇತಿ, ಏವಂ ಇಮಿನಾ ಈಸಾಮುಖೇನ ತೇ ಪರಿವಜ್ಜಯ. ಸೋ ಹಿ ರಥೋ ಪುಞ್ಞಪಚ್ಚಯನಿಬ್ಬತ್ತೋ ಚಕ್ಕವಾಳಪಬ್ಬತೇಪಿ ಸಿನೇರುಮ್ಹಿಪಿ ಸಮ್ಮುಖೀಭೂತೇ ವಿನಿವಿಜ್ಝಿತ್ವಾವ ಗಚ್ಛತಿ ನ ಸಜ್ಜತಿ, ಆಕಾಸಗತಸದಿಸೇನೇವ ಗಚ್ಛತಿ. ಸಚೇ ತೇನ ಸಿಮ್ಬಲಿವನೇನ ಗತೋ ಭವೇಯ್ಯ, ಯಥಾ ಮಹಾಸಕಟೇ ಕದಲಿವನಮಜ್ಝೇನ ವಾ ಏರಣ್ಡವನಮಜ್ಝೇನ ವಾ ಗಚ್ಛನ್ತೇ ಸಬ್ಬವನಂ ವಿಭಗ್ಗಂ ನಿಮ್ಮಥಿತಂ ಹೋತಿ, ಏವಂ ತಮ್ಪಿ ಸಿಮ್ಬಲಿವನಂ ಭವೇಯ್ಯ. ಛಟ್ಠಂ.