೪. ಮಣಿಭದ್ದಸುತ್ತವಣ್ಣನಾ

೨೩೮. ಚತುತ್ಥೇ ಸುಖಮೇಧತೀತಿ, ಸುಖಂ ಪಟಿಲಭತಿ. ಸುವೇ ಸೇಯ್ಯೋತಿ ಸುವೇ ಸುವೇ ಸೇಯ್ಯೋ, ನಿಚ್ಚಮೇವ ಸೇಯ್ಯೋತಿ ಅತ್ಥೋ. ವೇರಾ ನ ಪರಿಮುಚ್ಚತೀತಿ ಅಹಂ ಸತಿಮಾತಿ ಏತ್ತಕೇನ ವೇರತೋ ನ ಮುಚ್ಚತಿ. ಯಸ್ಸಾತಿ ಯಸ್ಸ ಅರಹತೋ. ಅಹಿಂಸಾಯಾತಿ ಕರುಣಾಯ ಚೇವ ಕರುಣಾಪುಬ್ಬಭಾಗೇ ಚ. ಮೇತ್ತಂಸೋತಿ ಸೋ ಮೇತ್ತಞ್ಚೇವ ಮೇತ್ತಾಪುಬ್ಬಭಾಗಞ್ಚ ಭಾವೇತಿ. ಅಥ ವಾ ಅಂಸೋತಿ ಕೋಟ್ಠಾಸೋ ವುಚ್ಚತಿ. ಮೇತ್ತಾ ಅಂಸೋ ಏತಸ್ಸಾತಿ ಮೇತ್ತಂಸೋ. ಇದಂ ವುತ್ತಂ ಹೋತಿ – ಯಸ್ಸ ಅರಹತೋ ಸಬ್ಬಕಾಲಂ ಅಹಿಂಸಾಯ ರತೋ ಮನೋ, ಯಸ್ಸ ಚ ಸಬ್ಬಭೂತೇಸು ಮೇತ್ತಾಕೋಟ್ಠಾಸೋ ಅತ್ಥಿ, ತಸ್ಸ ಕೇನಚಿ ಪುಗ್ಗಲೇನ ಸದ್ಧಿಂ ವೇರಂ ನಾಮ ನತ್ಥಿ ಯಕ್ಖಾತಿ. ಚತುತ್ಥಂ.