೧. ಛೇತ್ವಾಸುತ್ತವಣ್ಣನಾ

೭೧. ಛೇತ್ವಾವಗ್ಗಸ್ಸ ಪಠಮೇ ಛೇತ್ವಾತಿ ವಧಿತ್ವಾ. ಸುಖಂ ಸೇತೀತಿ ಕೋಧಪರಿಳಾಹೇನ ಅಪರಿದಯ್ಹಮಾನತ್ತಾ ಸುಖಂ ಸಯತಿ. ನ ಸೋಚತೀತಿ ಕೋಧವಿನಾಸೇನ ವಿನಟ್ಠದೋಮನಸ್ಸತ್ತಾ ನ ಸೋಚತಿ. ವಿಸಮೂಲಸ್ಸಾತಿ ದುಕ್ಖವಿಪಾಕಸ್ಸ. ಮಧುರಗ್ಗಸ್ಸಾತಿ ಕುದ್ಧಸ್ಸ ಪಟಿಕುಜ್ಝಿತ್ವಾ, ಅಕ್ಕುಟ್ಠಸ್ಸ ಪಚ್ಚಕ್ಕೋಸಿತ್ವಾ, ಪಹಟಸ್ಸ ಚ ಪಟಿಪಹರಿತ್ವಾ ಸುಖಂ ಉಪ್ಪಜ್ಜತಿ, ತಂ ಸನ್ಧಾಯ ಮಧುರಗ್ಗೋತಿ ವುತ್ತೋ. ಇಮಸ್ಮಿಂ ಹಿ ಠಾನೇ ಪರಿಯೋಸಾನಂ ಅಗ್ಗನ್ತಿ ವುತ್ತಂ. ಅರಿಯಾತಿ ಬುದ್ಧಾದಯೋ. ಪಠಮಂ.