೨. ರಥಸುತ್ತವಣ್ಣನಾ

೭೨. ದುತಿಯೇ ಪಞ್ಞಾಯತಿ ಏತೇನಾತಿ ಪಞ್ಞಾಣಂ. ಧಜೋ ರಥಸ್ಸಾತಿ ಮಹನ್ತಸ್ಮಿಂ ಹಿ ಸಙ್ಗಾಮಸೀಸೇ ದೂರತೋವ ಧಜಂ ದಿಸ್ವಾ ‘‘ಅಸುಕರಞ್ಞೋ ನಾಮ ಅಯಂ ರಥೋ’’ತಿ ರಥೋ ಪಾಕಟೋ ಹೋತಿ. ತೇನ ವುತ್ತಂ ‘‘ಧಜೋ ರಥಸ್ಸ ಪಞ್ಞಾಣ’’ನ್ತಿ. ಅಗ್ಗಿಪಿ ದೂರತೋವ ಧೂಮೇನ ಪಞ್ಞಾಯತಿ. ಚೋಳರಟ್ಠಂ ಪಣ್ಡುರಟ್ಠನ್ತಿ ಏವಂ ರಟ್ಠಮ್ಪಿ ರಞ್ಞಾ ಪಞ್ಞಾಯತಿ. ಚಕ್ಕವತ್ತಿರಞ್ಞೋ ಧೀತಾಪಿ ಪನ ಇತ್ಥೀ ‘‘ಅಸುಕಸ್ಸ ನಾಮ ಭರಿಯಾ’’ತಿ ಭತ್ತಾರಂ ಪತ್ವಾವ ಪಞ್ಞಾಯತಿ. ತಸ್ಮಾ ಧೂಮೋ ಪಞ್ಞಾಣಮಗ್ಗಿನೋತಿಆದಿ ವುತ್ತಂ. ದುತಿಯಂ.