೧೦. ಕವಿಸುತ್ತವಣ್ಣನಾ

೬೦. ದಸಮೇ ಛನ್ದೋ ನಿದಾನನ್ತಿ ಗಾಯತ್ತಿಆದಿಕೋ ಛನ್ದೋ ಗಾಥಾನಂ ನಿದಾನಂ. ಪುಬ್ಬಪಟ್ಠಾಪನಗಾಥಾ ಆರಭನ್ತೋ ಹಿ ‘‘ಕತರಚ್ಛನ್ದೇನ ಹೋತೂ’’ತಿ ಆರಭತಿ. ವಿಯಞ್ಜನನ್ತಿ ಜನನಂ. ಅಕ್ಖರಂ ಹಿ ಪದಂ ಜನೇತಿ, ಪದಂ ಗಾಥಂ ಜನೇತಿ, ಗಾಥಾ ಅತ್ಥಂ ಪಕಾಸೇತೀತಿ. ನಾಮಸನ್ನಿಸ್ಸಿತಾತಿ ಸಮುದ್ದಾದಿಪಣ್ಣತ್ತಿನಿಸ್ಸಿತಾ. ಗಾಥಾ ಆರಭನ್ತೋ ಹಿ ಸಮುದ್ದಂ ವಾ ಪಥವಿಂ ವಾ ಯಂ ಕಿಞ್ಚಿ ನಾಮಂ ನಿಸ್ಸಯಿತ್ವಾವ ಆರಭತಿ. ಆಸಯೋತಿ ಪತಿಟ್ಠಾ. ಕವಿತೋ ಹಿ ಗಾಥಾ ಪವತ್ತನ್ತಿ. ಸೋ ತಾಸಂ ಪತಿಟ್ಠಾ ಹೋತೀತಿ. ದಸಮಂ.

ಜರಾವಗ್ಗೋ ಛಟ್ಠೋ.