೪. ಏಕಮೂಲಸುತ್ತವಣ್ಣನಾ

೪೪. ಚತುತ್ಥೇ ಏಕಮೂಲನ್ತಿ ಅವಿಜ್ಜಾ ತಣ್ಹಾಯ ಮೂಲಂ, ತಣ್ಹಾ ಅವಿಜ್ಜಾಯ. ಇಧ ಪನ ತಣ್ಹಾ ಅಧಿಪ್ಪೇತಾ. ದ್ವೀಹಿ ಸಸ್ಸತುಚ್ಛೇದದಿಟ್ಠೀಹಿ ಆವಟ್ಟತೀತಿ ದ್ವಿರಾವಟ್ಟಾ. ಸಾ ಚ ರಾಗಾದೀಹಿ ತೀಹಿ ಮಲೇಹಿ ತಿಮಲಾ. ತತ್ರಾಸ್ಸಾ ಮೋಹೋ ಸಹಜಾತಕೋಟಿಯಾ ಮಲಂ ಹೋತಿ, ರಾಗದೋಸಾ ಉಪನಿಸ್ಸಯಕೋಟಿಯಾ. ಪಞ್ಚ ಪನ ಕಾಮಗುಣಾ ಅಸ್ಸಾ ಪತ್ಥರಣಟ್ಠಾನಾ, ತೇಸು ಸಾ ಪತ್ಥರತೀತಿ ಪಞ್ಚಪತ್ಥರಾ. ಸಾ ಚ ಅಪೂರಣೀಯಟ್ಠೇನ ಸಮುದ್ದೋ. ಅಜ್ಝತ್ತಿಕಬಾಹಿರೇಸು ಪನೇಸಾ ದ್ವಾದಸಾಯತನೇಸು ಆವಟ್ಟತಿ ಪರಿವಟ್ಟತೀತಿ ದ್ವಾದಸಾವಟ್ಟಾ. ಅಪತಿಟ್ಠಟ್ಠೇನ ಪನ ಪಾತಾಲೋತಿ ವುಚ್ಚತೀತಿ. ಏಕಮೂಲಂ…ಪೇ… ಪಾತಾಲಂ, ಅತರಿ ಇಸಿ, ಉತ್ತರಿ ಸಮತಿಕ್ಕಮೀತಿ ಅತ್ಥೋ. ಚತುತ್ಥಂ.