೯. ಪಠಮಪಜ್ಜುನ್ನಧೀತುಸುತ್ತವಣ್ಣನಾ

೩೯. ನವಮೇ ಪಜ್ಜುನ್ನಸ್ಸ ಧೀತಾತಿ ಪಜ್ಜುನ್ನಸ್ಸ ನಾಮ ವಸ್ಸವಲಾಹಕದೇವರಞ್ಞೋ ಚಾತುಮಹಾರಾಜಿಕಸ್ಸ ಧೀತಾ. ಅಭಿವನ್ದೇತಿ ಭಗವಾ ತುಮ್ಹಾಕಂ ಪಾದೇ ವನ್ದಾಮಿ. ಚಕ್ಖುಮತಾತಿ ಪಞ್ಚಹಿ ಚಕ್ಖೂಹಿ ಚಕ್ಖುಮನ್ತೇನ ತಥಾಗತೇನ. ಧಮ್ಮೋ ಅನುಬುದ್ಧೋತಿ, ‘‘ಇದಂ ಮಯಾ ಪುಬ್ಬೇ ಪರೇಸಂ ಸನ್ತಿಕೇ ಕೇವಲಂ ಸುತಂಯೇವ ಆಸೀ’’ತಿ ವದತಿ. ಸಾಹಂ ದಾನೀತಿ, ಸಾ ಅಹಂ ಇದಾನಿ. ಸಕ್ಖಿ ಜಾನಾಮೀತಿ, ಪಟಿವೇಧವಸೇನ ಪಚ್ಚಕ್ಖಮೇವ ಜಾನಾಮಿ. ವಿಗರಹನ್ತಾತಿ, ‘‘ಹೀನಕ್ಖರಪದಬ್ಯಞ್ಜನೋ’’ತಿ ವಾ ‘‘ಅನಿಯ್ಯಾನಿಕೋ’’ತಿ ವಾ ಏವಂ ಗರಹನ್ತಾ. ರೋರುವನ್ತಿ, ದ್ವೇ ರೋರುವಾ – ಧೂಮರೋರುವೋ ಚ ಜಾಲರೋರುವೋ ಚ. ತತ್ಥ ಧೂಮರೋರುವೋ ವಿಸುಂ ಹೋತಿ, ಜಾಲರೋರುವೋತಿ ಪನ ಅವೀಚಿಮಹಾನಿರಯಸ್ಸೇವೇತಂ ನಾಮಂ. ತತ್ಥ ಹಿ ಸತ್ತಾ ಅಗ್ಗಿಮ್ಹಿ ಜಲನ್ತೇ ಜಲನ್ತೇ ಪುನಪ್ಪುನಂ ರವಂ ರವನ್ತಿ, ತಸ್ಮಾ ಸೋ ‘‘ರೋರುವೋ’’ತಿ ವುಚ್ಚತಿ. ಘೋರನ್ತಿ ದಾರುಣಂ. ಖನ್ತಿಯಾ ಉಪಸಮೇನ ಉಪೇತಾತಿ ರುಚ್ಚಿತ್ವಾ ಖಮಾಪೇತ್ವಾ ಗಹಣಖನ್ತಿಯಾ ಚ ರಾಗಾದಿಉಪಸಮೇನ ಚ ಉಪೇತಾತಿ. ನವಮಂ.