೯. ಕಾಯಗತಾಸತಿಸುತ್ತವಣ್ಣನಾ

೧೫೩-೪. ಏವಂ ಮೇ ಸುತನ್ತಿ ಕಾಯಗತಾಸತಿಸುತ್ತಂ. ತತ್ಥ ಗೇಹಸಿತಾತಿ ಪಞ್ಚಕಾಮಗುಣನಿಸ್ಸಿತಾ. ಸರಸಙ್ಕಪ್ಪಾತಿ ಧಾವನಸಙ್ಕಪ್ಪಾ. ಸರನ್ತೀತಿ ಹಿ ಸರಾ, ಧಾವನ್ತೀತಿ ಅತ್ಥೋ. ಅಜ್ಝತ್ತಮೇವಾತಿ ಗೋಚರಜ್ಝತ್ತಸ್ಮಿಂಯೇವ. ಕಾಯಗತಾಸತಿನ್ತಿ ಕಾಯಪರಿಗ್ಗಾಹಿಕಮ್ಪಿ ಕಾಯಾರಮ್ಮಣಮ್ಪಿ ಸತಿಂ. ಕಾಯಪರಿಗ್ಗಾಹಿಕನ್ತಿ ವುತ್ತೇ ಸಮಥೋ ಕಥಿತೋ ಹೋತಿ, ಕಾಯಾರಮ್ಮಣನ್ತಿ ವುತ್ತೇ ವಿಪಸ್ಸನಾ. ಉಭಯೇನ ಸಮಥವಿಪಸ್ಸನಾ ಕಥಿತಾ ಹೋನ್ತಿ.

ಪುನ ಚಪರಂ…ಪೇ… ಏವಮ್ಪಿ, ಭಿಕ್ಖವೇ, ಭಿಕ್ಖು ಕಾಯಗತಾಸತಿಂ ಭಾವೇತೀತಿ ಸತಿಪಟ್ಠಾನೇ ಚುದ್ದಸವಿಧೇನ ಕಾಯಾನುಪಸ್ಸನಾ ಕಥಿತಾ.

೧೫೬. ಅನ್ತೋಗಧಾವಾಸ್ಸಾತಿ ತಸ್ಸ ಭಿಕ್ಖುನೋ ಭಾವನಾಯ ಅಬ್ಭನ್ತರಗತಾವ ಹೋನ್ತಿ. ವಿಜ್ಜಾಭಾಗಿಯಾತಿ ಏತ್ಥ ಸಮ್ಪಯೋಗವಸೇನ ವಿಜ್ಜಂ ಭಜನ್ತೀತಿ ವಿಜ್ಜಾಭಾಗಿಯಾ. ವಿಜ್ಜಾಭಾಗೇ ವಿಜ್ಜಾಕೋಟ್ಠಾಸೇ ವತ್ತನ್ತೀತಿಪಿ ವಿಜ್ಜಾಭಾಗಿಯಾ. ತತ್ಥ ವಿಪಸ್ಸನಾಞಾಣಂ, ಮನೋಮಯಿದ್ಧಿ, ಛ ಅಭಿಞ್ಞಾತಿ ಅಟ್ಠ ವಿಜ್ಜಾ. ಪುರಿಮೇನ ಅತ್ಥೇನ ತಾಹಿ ಸಮ್ಪಯುತ್ತಧಮ್ಮಾಪಿ ವಿಜ್ಜಾಭಾಗಿಯಾ. ಪಚ್ಛಿಮೇನ ಅತ್ಥೇನ ತಾಸು ಯಾ ಕಾಚಿ ಏಕಾ ವಿಜ್ಜಾ ವಿಜ್ಜಾ, ಸೇಸಾ ವಿಜ್ಜಾಭಾಗಿಯಾತಿ ಏವಂ ವಿಜ್ಜಾಪಿ ವಿಜ್ಜಾಯ ಸಮ್ಪಯುತ್ತಾ ಧಮ್ಮಾಪಿ ವಿಜ್ಜಾಭಾಗಿಯಾತೇವ ವೇದಿತಬ್ಬಾ. ಚೇತಸಾ ಫುಟೋತಿ ಏತ್ಥ ದುವಿಧಂ ಫರಣಂ ಆಪೋಫರಣಞ್ಚ, ದಿಬ್ಬಚಕ್ಖುಫರಣಞ್ಚ, ತತ್ಥ ಆಪೋಕಸಿಣಂ ಸಮಾಪಜ್ಜಿತ್ವಾ ಆಪೇನ ಫರಣಂ ಆಪೋಫರಣಂ ನಾಮ. ಏವಂ ಫುಟೇಪಿ ಮಹಾಸಮುದ್ದೇ ಸಬ್ಬಾ ಸಮುದ್ದಙ್ಗಮಾ ಕುನ್ನದಿಯೋ ಅನ್ತೋಗಧಾವ ಹೋನ್ತಿ, ಆಲೋಕಂ ಪನ ವಡ್ಢೇತ್ವಾ ದಿಬ್ಬಚಕ್ಖುನಾ ಸಕಲಸಮುದ್ದಸ್ಸ ದಸ್ಸನಂ ದಿಬ್ಬಚಕ್ಖುಫರಣಂ ನಾಮ. ಏವಂ ಫರಣೇಪಿ ಮಹಾಸಮುದ್ದೇ ಸಬ್ಬಾ ಸಮುದ್ದಙ್ಗಮಾ ಕುನ್ನದಿಯೋ ಅನ್ತೋಗಧಾವ ಹೋನ್ತಿ.

ಓತಾರನ್ತಿ ವಿವರಂ ಛಿದ್ದಂ. ಆರಮ್ಮಣನ್ತಿ ಕಿಲೇಸುಪ್ಪತ್ತಿಪಚ್ಚಯಂ. ಲಭೇಥ ಓತಾರನ್ತಿ ಲಭೇಯ್ಯ ಪವೇಸನಂ, ವಿನಿವಿಜ್ಝಿತ್ವಾ ಯಾವ ಪರಿಯೋಸಾನಾ ಗಚ್ಛೇಯ್ಯಾತಿ ಅತ್ಥೋ. ನಿಕ್ಖೇಪನನ್ತಿ ನಿಕ್ಖಿಪನಟ್ಠಾನಂ.

೧೫೭. ಏವಂ ಅಭಾವಿತಕಾಯಗತಾಸತಿಂ ಪುಗ್ಗಲಂ ಅಲ್ಲಮತ್ತಿಕಪುಞ್ಜಾದೀಹಿ ಉಪಮೇತ್ವಾ ಇದಾನಿ ಭಾವಿತಕಾಯಗತಾಸತಿಂ ಸಾರಫಲಕಾದೀಹಿ ಉಪಮೇತುಂ ಸೇಯ್ಯಥಾಪೀತಿಆದಿಮಾಹ. ತತ್ಥ ಅಗ್ಗಳಫಲಕನ್ತಿ ಕವಾಟಂ.

೧೫೮. ಕಾಕಪೇಯ್ಯೋತಿ ಮುಖವಟ್ಟಿಯಂ ನಿಸೀದಿತ್ವಾ ಕಾಕೇನ ಗೀವಂ ಅನಾಮೇತ್ವಾವ ಪಾತಬ್ಬೋ. ಅಭಿಞ್ಞಾಸಚ್ಛಿಕರಣೀಯಸ್ಸಾತಿ ಅಭಿಞ್ಞಾಯ ಸಚ್ಛಿಕಾತಬ್ಬಸ್ಸ. ಸಕ್ಖಿಭಬ್ಬತಂ ಪಾಪುಣಾತೀತಿ ಪಚ್ಚಕ್ಖಭಾವಂ ಪಾಪುಣಾತಿ. ಸತಿ ಸತಿ ಆಯತನೇತಿ ಸತಿಸತಿ ಕಾರಣೇ. ಕಿಂ ಪನೇತ್ಥ ಕಾರಣನ್ತಿ? ಅಭಿಞ್ಞಾವ ಕಾರಣಂ. ಆಳಿಬನ್ಧಾತಿ ಮರಿಯಾದಬದ್ಧಾ.

ಯಾನೀಕತಾಯಾತಿ ಯುತ್ತಯಾನಂ ವಿಯ ಕತಾಯ. ವತ್ಥುಕತಾಯಾತಿ ಪತಿಟ್ಠಾಕತಾಯ. ಅನುಟ್ಠಿತಾಯಾತಿ ಅನುಪ್ಪವತ್ತಿತಾಯ. ಪರಿಚಿತಾಯಾತಿ ಪರಿಚಯಕತಾಯ. ಸುಸಮಾರದ್ಧಾಯಾತಿ ಸುಟ್ಠು ಸಮಾರದ್ಧಾಯ ಸುಸಮ್ಪಗ್ಗಹಿತಾಯ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಕಾಯಗತಾಸತಿಸುತ್ತವಣ್ಣನಾ ನಿಟ್ಠಿತಾ.