೧೦. ಚೂಳಪುಣ್ಣಮಸುತ್ತವಣ್ಣನಾ

೯೧. ಏವಂ ಮೇ ಸುತನ್ತಿ ಚೂಳಪುಣ್ಣಮಸುತ್ತಂ. ತತ್ಥ ತುಣ್ಹೀಭೂತಂ ತುಣ್ಹೀಭೂತನ್ತಿ ಯಂ ಯಂ ದಿಸಂ ಅನುವಿಲೋಕೇತಿ, ತತ್ಥ ತತ್ಥ ತುಣ್ಹೀಭೂತಮೇವ. ಅನುವಿಲೋಕೇತ್ವಾತಿ ಪಞ್ಚಪಸಾದಪಟಿಮಣ್ಡಿತಾನಿ ಅಕ್ಖೀನಿ ಉಮ್ಮೀಲೇತ್ವಾ ತತೋ ತತೋ ವಿಲೋಕೇತ್ವಾ ಅನ್ತಮಸೋ ಹತ್ಥಕುಕ್ಕುಚ್ಚಪಾದಕುಕ್ಕುಚ್ಚಾನಮ್ಪಿ ಅಭಾವಂ ದಿಸ್ವಾ. ಅಸಪ್ಪುರಿಸೋತಿ ಪಾಪಪುರಿಸೋ. ನೋ ಹೇತಂ, ಭನ್ತೇತಿ ಯಸ್ಮಾ ಅನ್ಧೋ ಅನ್ಧಂ ವಿಯ ಸೋ ತಂ ಜಾನಿತುಂ ನ ಸಕ್ಕೋತಿ, ತಸ್ಮಾ ಏವಮಾಹಂಸು. ಏತೇನೇವ ನಯೇನ ಇತೋ ಪರೇಸುಪಿ ವಾರೇಸು ಅತ್ಥೋ ವೇದಿತಬ್ಬೋ. ಅಸ್ಸದ್ಧಸಮನ್ನಾಗತೋತಿ ಪಾಪಧಮ್ಮಸಮನ್ನಾಗತೋ. ಅಸಪ್ಪುರಿಸಭತ್ತೀತಿ ಅಸಪ್ಪುರಿಸಸೇವನೋ. ಅಸಪ್ಪುರಿಸಚಿನ್ತೀತಿ ಅಸಪ್ಪುರಿಸಚಿನ್ತಾಯ ಚಿನ್ತಕೋ. ಅಸಪ್ಪುರಿಸಮನ್ತೀತಿ ಅಸಪ್ಪುರಿಸಮನ್ತನಂ ಮನ್ತೇತಾ. ಅಸಪ್ಪುರಿಸವಾಚೋತಿ ಅಸಪ್ಪುರಿಸವಾಚಂ ಭಾಸಿತಾ. ಅಸಪ್ಪುರಿಸಕಮ್ಮನ್ತೋತಿ ಅಸಪ್ಪುರಿಸಕಮ್ಮಾನಂ ಕತ್ತಾ. ಅಸಪ್ಪುರಿಸದಿಟ್ಠೀತಿ ಅಸಪ್ಪುರಿಸದಿಟ್ಠಿಯಾ ಸಮನ್ನಾಗತೋ. ಅಸಪ್ಪುರಿಸದಾನನ್ತಿ ಅಸಪ್ಪುರಿಸೇಹಿ ದಾತಬ್ಬಂ ದಾನಂ. ತ್ಯಾಸ್ಸ ಮಿತ್ತಾತಿ ತೇ ಅಸ್ಸ ಮಿತ್ತಾ. ಅತ್ತಬ್ಯಾಬಾಧಾಯಪಿ ಚೇತೇತೀತಿ ಪಾಣಂ ಹನಿಸ್ಸಾಮಿ, ಅದಿನ್ನಂ ಆದಿಯಿಸ್ಸಾಮಿ, ಮಿಚ್ಛಾ ಚರಿಸ್ಸಾಮಿ, ದಸ ಅಕುಸಲಕಮ್ಮಪಥೇ ಸಮಾದಾಯ ವತ್ತಿಸ್ಸಾಮೀತಿ ಏವಂ ಅತ್ತನೋ ದುಕ್ಖತ್ಥಾಯ ಚಿನ್ತೇತಿ. ಪರಬ್ಯಾಬಾಧಾಯಾತಿ ಯಥಾ ಅಸುಕೋ ಅಸುಕಂ ಪಾಣಂ ಹನ್ತಿ, ಅಸುಕಸ್ಸ ಸನ್ತಕಂ ಅದಿನ್ನಂ ಆದಿಯತಿ, ದಸ ಅಕುಸಲಕಮ್ಮಪಥೇ ಸಮಾದಾಯ ವತ್ತತಿ, ಏವಂ ನಂ ಆಣಾಪೇಸ್ಸಾಮೀತಿ ಏವಂ ಪರಸ್ಸ ದುಕ್ಖತ್ಥಾಯ ಚಿನ್ತೇತಿ. ಉಭಯಬ್ಯಾಬಾಧಾಯಾತಿ ಅಹಂ ಅಸುಕಞ್ಚ ಅಸುಕಞ್ಚ ಗಹೇತ್ವಾ ದಸ ಅಕುಸಲಕಮ್ಮಪಥೇ ಸಮಾದಾಯ ವತ್ತಿಸ್ಸಾಮೀತಿ ಏವಂ ಉಭಯದುಕ್ಖತ್ಥಾಯ ಚಿನ್ತೇತೀತಿ.

ಅತ್ತಬ್ಯಾಬಾಧಾಯಪಿ ಮನ್ತೇತೀತಿಆದೀಸು ಅಹಂ ದಸ ಅಕುಸಲಕಮ್ಮಪಥೇ ಸಮಾದಾಯ ವತ್ತಿಸ್ಸಾಮೀತಿ ಮನ್ತೇನ್ತೋ ಅತ್ತಬ್ಯಾಬಾಧಾಯ ಮನ್ತೇತಿ ನಾಮ. ಅಸುಕಂ ದಸ ಅಕುಸಲಕಮ್ಮಪಥೇ ಸಮಾದಪೇಸ್ಸಾಮೀತಿ ಮನ್ತೇನ್ತೋ ಪರಬ್ಯಾಬಾಧಾಯ ಮನ್ತೇತಿ ನಾಮ. ಅಞ್ಞೇನ ಸದ್ಧಿಂ – ‘‘ಮಯಂ ಉಭೋಪಿ ಏಕತೋ ಹುತ್ವಾ ದಸ ಅಕುಸಲಕಮ್ಮಪಥೇ ಸಮಾದಾಯ ವತ್ತಿಸ್ಸಾಮಾ’’ತಿ ಮನ್ತೇನ್ತೋ ಉಭಯಬ್ಯಾಬಾಧಾಯ ಮನ್ತೇತಿ ನಾಮ.

ಅಸಕ್ಕಚ್ಚಂ ದಾನಂ ದೇತೀತಿ ದೇಯ್ಯಧಮ್ಮಮ್ಪಿ ಪುಗ್ಗಲಮ್ಪಿ ನ ಸಕ್ಕರೋತಿ. ದೇಯ್ಯಧಮ್ಮಂ ನ ಸಕ್ಕರೋತಿ ನಾಮ ಉತ್ತಣ್ಡುಲಾದಿದೋಸಸಮನ್ನಾಗತಂ ಆಹಾರಂ ದೇತಿ, ನ ಪಸನ್ನಂ ಕರೋತಿ. ಪುಗ್ಗಲಂ ನ ಸಕ್ಕರೋತಿ ನಾಮ ನಿಸೀದನಟ್ಠಾನಂ ಅಸಮ್ಮಜ್ಜಿತ್ವಾ ಯತ್ಥ ವಾ ತತ್ಥ ವಾ ನಿಸೀದಾಪೇತ್ವಾ ಯಂ ವಾ ತಂ ವಾ ಆಧಾರಕಂ ಠಪೇತ್ವಾ ದಾನಂ ದೇತಿ. ಅಸಹತ್ಥಾತಿ ಅತ್ತನೋ ಹತ್ಥೇನ, ನ ದೇತಿ, ದಾಸಕಮ್ಮಕಾರಾದೀಹಿ ದಾಪೇತಿ. ಅಚಿತ್ತಿಕತ್ವಾತಿ ಹೇಟ್ಠಾ ವುತ್ತನಯೇನ ದೇಯ್ಯಧಮ್ಮೇಪಿ ಪುಗ್ಗಲೇಪಿ ನ ಚಿತ್ತೀಕಾರಂ ಕತ್ವಾ ದೇತಿ. ಅಪವಿದ್ಧನ್ತಿ ಛಡ್ಡೇತುಕಾಮೋ ಹುತ್ವಾ ವಮ್ಮಿಕೇ ಉರಗಂ ಪಕ್ಖಿಪನ್ತೋ ವಿಯ ದೇತಿ. ಅನಾಗಮನದಿಟ್ಠಿಕೋತಿ ನೋ ಫಲಪಾಟಿಕಙ್ಖೀ ಹುತ್ವಾ ದೇತಿ.

ತತ್ಥ ಉಪಪಜ್ಜತೀತಿ ನ ದಾನಂ ದತ್ವಾ ನಿರಯೇ ಉಪಪಜ್ಜತಿ. ಯಂ ಪನ ತೇನ ಪಾಪಲದ್ಧಿಕಾಯ ಮಿಚ್ಛಾದಸ್ಸನಂ ಗಹಿತಂ, ತಾಯ ಮಿಚ್ಛಾದಿಟ್ಠಿಯಾ ನಿರಯೇ ಉಪಪಜ್ಜತಿ. ಸುಕ್ಕಪಕ್ಖೋ ವುತ್ತಪಟಿಪಕ್ಖನಯೇನ ವೇದಿತಬ್ಬೋ. ದೇವಮಹತ್ತತಾತಿ ಛಕಾಮಾವಚರದೇವಾ. ಮನುಸ್ಸಮಹತ್ತತಾತಿ ತಿಣ್ಣಂ ಕುಲಾನಂ ಸಮ್ಪತ್ತಿ. ಸೇಸಂ ಸಬ್ಬತ್ಥ ಉತ್ತಾನಮೇವ. ಇದಂ ಪನ ಸುತ್ತಂ ಸುದ್ಧವಟ್ಟವಸೇನೇವ ಕಥಿತನ್ತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಚೂಳಪುಣ್ಣಮಸುತ್ತವಣ್ಣನಾ ನಿಟ್ಠಿತಾ.

ಪಠಮವಗ್ಗವಣ್ಣನಾ ನಿಟ್ಠಿತಾ.