೫. ಚೂಳಧಮ್ಮಸಮಾದಾನಸುತ್ತವಣ್ಣನಾ

೪೬೮. ಏವಂ ಮೇ ಸುತನ್ತಿ ಚೂಳಧಮ್ಮಸಮಾದಾನಸುತ್ತಂ. ತತ್ಥ ಧಮ್ಮಸಮಾದಾನಾನೀತಿ ಧಮ್ಮೋತಿ ಗಹಿತಗಹಣಾನಿ. ಪಚ್ಚುಪ್ಪನ್ನಸುಖನ್ತಿ ಪಚ್ಚುಪ್ಪನ್ನೇ ಸುಖಂ, ಆಯೂಹನಕ್ಖಣೇ ಸುಖಂ ಸುಕರಂ ಸುಖೇನ ಸಕ್ಕಾ ಪೂರೇತುಂ. ಆಯತಿಂ ದುಕ್ಖವಿಪಾಕನ್ತಿ ಅನಾಗತೇ ವಿಪಾಕಕಾಲೇ ದುಕ್ಖವಿಪಾಕಂ. ಇಮಿನಾ ಉಪಾಯೇನ ಸಬ್ಬಪದೇಸು ಅತ್ಥೋ ವೇದಿತಬ್ಬೋ.

೪೬೯. ನತ್ಥಿ ಕಾಮೇಸು ದೋಸೋತಿ ವತ್ಥುಕಾಮೇಸುಪಿ ಕಿಲೇಸಕಾಮೇಸುಪಿ ದೋಸೋ ನತ್ಥಿ. ಪಾತಬ್ಯತಂ ಆಪಜ್ಜನ್ತೀತಿ ತೇ ವತ್ಥುಕಾಮೇಸು ಕಿಲೇಸಕಾಮೇನ ಪಾತಬ್ಯತಂ ಪಿವಿತಬ್ಬತಂ, ಯಥಾರುಚಿ ಪರಿಭುಞ್ಜಿತಬ್ಬತಂ ಆಪಜ್ಜನ್ತೀತಿ ಅತ್ಥೋ. ಮೋಳಿಬದ್ಧಾಹೀತಿ ಮೋಳಿಂ ಕತ್ವಾ ಬದ್ಧಕೇಸಾಹಿ. ಪರಿಬ್ಬಾಜಿಕಾಹೀತಿ ತಾಪಸಪರಿಬ್ಬಾಜಿಕಾಹಿ. ಏವಮಾಹಂಸೂತಿ ಏವಂ ವದನ್ತಿ. ಪರಿಞ್ಞಂ ಪಞ್ಞಪೇನ್ತೀತಿ ಪಹಾನಂ ಸಮತಿಕ್ಕಮಂ ಪಞ್ಞಪೇನ್ತಿ. ಮಾಲುವಾಸಿಪಾಟಿಕಾತಿ ದೀಘಸಣ್ಠಾನಂ ಮಾಲುವಾಪಕ್ಕಂ. ಫಲೇಯ್ಯಾತಿ ಆತಪೇನ ಸುಸ್ಸಿತ್ವಾ ಭಿಜ್ಜೇಯ್ಯ. ಸಾಲಮೂಲೇತಿ ಸಾಲರುಕ್ಖಸ್ಸ ಸಮೀಪೇ. ಸನ್ತಾಸಂ ಆಪಜ್ಜೇಯ್ಯಾತಿ ಕಸ್ಮಾ ಆಪಜ್ಜತಿ? ಭವನವಿನಾಸಭಯಾ. ರುಕ್ಖಮೂಲೇ ಪತಿತಮಾಲುವಾಬೀಜತೋ ಹಿ ಲತಾ ಉಪ್ಪಜ್ಜಿತ್ವಾ ರುಕ್ಖಂ ಅಭಿರುಹತಿ. ಸಾ ಮಹಾಪತ್ತಾ ಚೇವ ಹೋತಿ ಬಹುಪತ್ತಾ ಚ, ಕೋವಿಳಾರಪತ್ತಸದಿಸೇಹಿ ಪತ್ತೇಹಿ ಸಮನ್ನಾಗತಾ. ಅಥ ತಂ ರುಕ್ಖಂ ಮೂಲತೋ ಪಟ್ಠಾಯ ವಿನನ್ಧಮಾನಾ ಸಬ್ಬವಿಟಪಾನಿ ಸಞ್ಛಾದೇತ್ವಾ ಮಹನ್ತಂ ಭಾರಂ ಜನೇತ್ವಾ ತಿಟ್ಠತಿ. ಸಾ ವಾತೇ ವಾ ವಾಯನ್ತೇ ದೇವೇ ವಾ ವಸ್ಸನ್ತೇ ಓಘನಂ ಜನೇತ್ವಾ ತಸ್ಸ ರುಕ್ಖಸ್ಸ ಸಬ್ಬಸಾಖಾಪಸಾಖಂ ಭಞ್ಜತಿ, ಭೂಮಿಯಂ ನಿಪಾತೇತಿ. ತತೋ ತಸ್ಮಿಂ ರುಕ್ಖೇ ಪತಿಟ್ಠಿತವಿಮಾನಂ ಭಿಜ್ಜತಿ ನಸ್ಸತಿ. ಇತಿ ಸಾ ಭವನವಿನಾಸಭಯಾ ಸನ್ತಾಸಂ ಆಪಜ್ಜತಿ.

ಆರಾಮದೇವತಾತಿ ತತ್ಥ ತತ್ಥ ಪುಪ್ಫಾರಾಮಫಲಾರಾಮೇಸು ಅಧಿವತ್ಥಾ ದೇವತಾ. ವನದೇವತಾತಿ ಅನ್ಧವನಸುಭಗವನಾದೀಸು ವನೇಸು ಅಧಿವತ್ಥಾ ದೇವತಾ. ರುಕ್ಖದೇವತಾತಿ ಅಭಿಲಕ್ಖಿತೇಸು ನಳೇರುಪುಚಿಮನ್ದಾದೀಸು ರುಕ್ಖೇಸು ಅಧಿವತ್ಥಾ ದೇವತಾ. ಓಸಧಿತಿಣವನಪ್ಪತೀಸೂತಿ ಹರೀತಕೀಆಮಲಕೀಆದೀಸು ಓಸಧೀಸು ತಾಲನಾಳಿಕೇರಾದೀಸು ತಿಣೇಸು ವನಜೇಟ್ಠಕೇಸು ಚ ವನಪ್ಪತಿರುಕ್ಖೇಸು ಅಧಿವತ್ಥಾ ದೇವತಾ. ವನಕಮ್ಮಿಕಾತಿ ವನೇ ಕಸನಲಾಯನದಾರುಆಹರಣಗೋರಕ್ಖಾದೀಸು ಕೇನಚಿದೇವ ಕಮ್ಮೇನ ವಾ ವಿಚರಕಮನುಸ್ಸಾ. ಉದ್ಧರೇಯ್ಯುನ್ತಿ ಖಾದೇಯ್ಯುಂ. ವಿಲಮ್ಬಿನೀತಿ ವಾತೇನ ಪಹತಪಹತಟ್ಠಾನೇಸು ಕೇಳಿಂ ಕರೋನ್ತೀ ವಿಯ ವಿಲಮ್ಬನ್ತೀ. ಸುಖೋ ಇಮಿಸ್ಸಾತಿ ಏವರೂಪಾಯ ಮಾಲುವಾಲತಾಯ ಸಮ್ಫಸ್ಸೋಪಿ ಸುಖೋ, ದಸ್ಸನಮ್ಪಿ ಸುಖಂ. ಅಯಂ ಮೇ ದಾರಕಾನಂ ಆಪಾನಮಣ್ಡಲಂ ಭವಿಸ್ಸತಿ, ಕೀಳಾಭೂಮಿ ಭವಿಸ್ಸತಿ, ದುತಿಯಂ ಮೇ ವಿಮಾನಂ ಪಟಿಲದ್ಧನ್ತಿ ಲತಾಯ ದಸ್ಸನೇಪಿ ಸಮ್ಫಸ್ಸೇಪಿ ಸೋಮನಸ್ಸಜಾತಾ ಏವಮಾಹ.

ವಿಟಭಿಂ ಕರೇಯ್ಯಾತಿ ಸಾಖಾನಂ ಉಪರಿ ಛತ್ತಾಕಾರೇನ ತಿಟ್ಠೇಯ್ಯ. ಓಘನಂ ಜನೇಯ್ಯಾತಿ ಹೇಟ್ಠಾ ಘನಂ ಜನೇಯ್ಯ. ಉಪರಿ ಆರುಯ್ಹ ಸಕಲಂ ರುಕ್ಖಂ ಪಲಿವೇಠೇತ್ವಾ ಪುನ ಹೇಟ್ಠಾ ಭಸ್ಸಮಾನಾ ಭೂಮಿಂ ಗಣ್ಹೇಯ್ಯಾತಿ ಅತ್ಥೋ. ಪದಾಲೇಯ್ಯಾತಿ ಏವಂ ಓಘನಂ ಕತ್ವಾ ಪುನ ತತೋ ಪಟ್ಠಾಯ ಯಾವ ಮೂಲಾ ಓತಿಣ್ಣಸಾಖಾಹಿ ಅಭಿರುಹಮಾನಾ ಸಬ್ಬಸಾಖಾ ಪಲಿವೇಠೇನ್ತೀ ಮತ್ಥಕಂ ಪತ್ವಾ ತೇನೇವ ನಿಯಾಮೇನ ಪುನ ಓರೋಹಿತ್ವಾ ಚ ಅಭಿರುಹಿತ್ವಾ ಚ ಸಕಲರುಕ್ಖಂ ಸಂಸಿಬ್ಬಿತ್ವಾ ಅಜ್ಝೋತ್ಥರನ್ತೀ ಸಬ್ಬಸಾಖಾ ಹೇಟ್ಠಾ ಕತ್ವಾ ಸಯಂ ಉಪರಿ ಠತ್ವಾ ವಾತೇ ವಾ ವಾಯನ್ತೇ ದೇವೇ ವಾ ವಸ್ಸನ್ತೇ ಪದಾಲೇಯ್ಯ. ಭಿನ್ದೇಯ್ಯಾತಿ ಅತ್ಥೋ. ಖಾಣುಮತ್ತಮೇವ ತಿಟ್ಠೇಯ್ಯ, ತತ್ಥ ಯಂ ಸಾಖಟ್ಠಕವಿಮಾನಂ ಹೋತಿ, ತಂ ಸಾಖಾಸು ಭಿಜ್ಜಮಾನಾಸು ತತ್ಥ ತತ್ಥೇವ ಭಿಜ್ಜಿತ್ವಾ ಸಬ್ಬಸಾಖಾಸು ಭಿನ್ನಾಸು ಸಬ್ಬಂ ಭಿಜ್ಜತಿ. ರುಕ್ಖಟ್ಠಕವಿಮಾನಂ ಪನ ಯಾವ ರುಕ್ಖಸ್ಸ ಮೂಲಮತ್ತಮ್ಪಿ ತಿಟ್ಠತಿ, ತಾವ ನ ನಸ್ಸತಿ. ಇದಂ ಪನ ವಿಮಾನಂ ಸಾಖಟ್ಠಕಂ, ತಸ್ಮಾ ಸಬ್ಬಸಾಖಾಸು ಸಂಭಿಜ್ಜಮಾನಾಸು ಭಿಜ್ಜಿತ್ಥ. ದೇವತಾ ಪುತ್ತಕೇ ಗಹೇತ್ವಾ ಖಾಣುಕೇ ಠಿತಾ ಪರಿದೇವಿತುಂ ಆರದ್ಧಾ.

೪೭೧. ತಿಬ್ಬರಾಗಜಾತಿಕೋತಿ ಬಹಲರಾಗಸಭಾವೋ. ರಾಗಜಂ ದುಕ್ಖಂ ದೋಮನಸ್ಸಂ ಪಟಿಸಂವೇದೇತೀತಿ ತಿಬ್ಬರಾಗಜಾತಿಕತ್ತಾ ದಿಟ್ಠೇ ದಿಟ್ಠೇ ಆರಮ್ಮಣೇ ನಿಮಿತ್ತಂ ಗಣ್ಹಾತಿ. ಅಥಸ್ಸ ಆಚರಿಯುಪಜ್ಝಾಯಾ ದಣ್ಡಕಮ್ಮಂ ಆಣಾಪೇನ್ತಿ. ಸೋ ಅಭಿಕ್ಖಣಂ ದಣ್ಡಕಮ್ಮಂ ಕರೋನ್ತೋ ದುಕ್ಖಂ ದೋಮನಸ್ಸಂ ಪಟಿಸಂವೇದೇತಿ, ನತ್ವೇವ ವೀತಿಕ್ಕಮಂ ಕರೋತಿ. ತಿಬ್ಬದೋಸಜಾತಿಕೋತಿ ಅಪ್ಪಮತ್ತಿಕೇನೇವ ಕುಪ್ಪತಿ, ದಹರಸಾಮಣೇರೇಹಿ ಸದ್ಧಿಂ ಹತ್ಥಪರಾಮಾಸಾದೀನಿ ಕರೋನ್ತೋವ ಕಥೇತಿ. ಸೋಪಿ ದಣ್ಡಕಮ್ಮಪಚ್ಚಯಾ ದುಕ್ಖಂ ದೋಮನಸ್ಸಂ ಪಟಿಸಂವೇದೇತಿ. ಮೋಹಜಾತಿಕೋ ಪನ ಇಧ ಕತಂ ವಾ ಕತತೋ ಅಕತಂ ವಾ ಅಕತತೋ ನ ಸಲ್ಲಕ್ಖೇತಿ, ತಾನಿ ತಾನಿ ಕಿಚ್ಚಾನಿ ವಿರಾಧೇತಿ. ಸೋಪಿ ದಣ್ಡಕಮ್ಮಪಚ್ಚಯಾ ದುಕ್ಖಂ ದೋಮನಸ್ಸಂ ಪಟಿಸಂವೇದೇತಿ.

೪೭೨. ನ ತಿಬ್ಬರಾಗಜಾತಿಕೋತಿಆದೀನಿ ವುತ್ತಪಟಿಪಕ್ಖನಯೇನ ವೇದಿತಬ್ಬಾನಿ. ಕಸ್ಮಾ ಪನೇತ್ಥ ಕೋಚಿ ತಿಬ್ಬರಾಗಾದಿಜಾತಿಕೋ ಹೋತಿ, ಕೋಚಿ ನ ತಿಬ್ಬರಾಗಾದಿಜಾತಿಕೋ? ಕಮ್ಮನಿಯಾಮೇನ. ಯಸ್ಸ ಹಿ ಕಮ್ಮಾಯೂಹನಕ್ಖಣೇ ಲೋಭೋ ಬಲವಾ ಹೋತಿ, ಅಲೋಭೋ ಮನ್ದೋ, ಅದೋಸಾಮೋಹಾ ಬಲವನ್ತೋ, ದೋಸಮೋಹಾ ಮನ್ದಾ, ತಸ್ಸ ಮನ್ದೋ ಅಲೋಭೋ ಲೋಭಂ ಪರಿಯಾದಾತುಂ ನ ಸಕ್ಕೋತಿ, ಅದೋಸಾಮೋಹಾ ಪನ ಬಲವನ್ತೋ ದೋಸಮೋಹೇ ಪರಿಯಾದಾತುಂ ಸಕ್ಕೋನ್ತಿ. ತಸ್ಮಾ ಸೋ ತೇನ ಕಮ್ಮೇನ ದಿನ್ನಪಟಿಸನ್ಧಿವಸೇನ ನಿಬ್ಬತ್ತೋ ಲುದ್ಧೋ ಹೋತಿ, ಸುಖಸೀಲೋ ಅಕ್ಕೋಧನೋ ಪಞ್ಞವಾ ವಜಿರೂಪಮಞಾಣೋ.

ಯಸ್ಸ ಪನ ಕಮ್ಮಾಯೂಹನಕ್ಖಣೇ ಲೋಭದೋಸಾ ಬಲವನ್ತೋ ಹೋನ್ತಿ, ಅಲೋಭಾದೋಸಾ ಮನ್ದಾ, ಅಮೋಹೋ ಬಲವಾ, ಮೋಹೋ ಮನ್ದೋ, ಸೋ ಪುರಿಮನಯೇನೇವ ಲುದ್ಧೋ ಚೇವ ಹೋತಿ ದುಟ್ಠೋ ಚ, ಪಞ್ಞವಾ ಪನ ಹೋತಿ ವಜಿರೂಪಮಞಾಣೋ ದತ್ತಾಭಯತ್ಥೇರೋ ವಿಯ.

ಯಸ್ಸ ಪನ ಕಮ್ಮಾಯೂಹನಕ್ಖಣೇ ಲೋಭಾದೋಸಮೋಹಾ ಬಲವನ್ತೋ ಹೋನ್ತಿ, ಇತರೇ ಮನ್ದಾ, ಸೋ ಪುರಿಮನಯೇನೇವ ಲುದ್ಧೋ ಚೇವ ಹೋತಿ ದನ್ಧೋ ಚ, ಸುಖಸೀಲಕೋ ಪನ ಹೋತಿ ಅಕ್ಕೋಧನೋ.

ತಥಾ ಯಸ್ಸ ಕಮ್ಮಾಯೂಹನಕ್ಖಣೇ ತಯೋಪಿ ಲೋಭದೋಸಮೋಹಾ ಬಲವನ್ತೋ ಹೋನ್ತಿ, ಅಲೋಭಾದಯೋ ಮನ್ದಾ, ಸೋ ಪುರಿಮನಯೇನೇವ ಲುದ್ಧೋ ಚೇವ ಹೋತಿ ದುಟ್ಠೋ ಚ ಮೂಳ್ಹೋ ಚ.

ಯಸ್ಸ ಪನ ಕಮ್ಮಾಯೂಹನಕ್ಖಣೇ ಅಲೋಭದೋಸಮೋಹಾ ಬಲವನ್ತೋ ಹೋನ್ತಿ, ಇತರೇ ಮನ್ದಾ, ಸೋ ಪುರಿಮನಯೇನೇವ ಅಪ್ಪಕಿಲೇಸೋ ಹೋತಿ, ದಿಬ್ಬಾರಮ್ಮಣಮ್ಪಿ ದಿಸ್ವಾ ನಿಚ್ಚಲೋ, ದುಟ್ಠೋ ಪನ ಹೋತಿ ದನ್ಧಪಞ್ಞೋ ಚ.

ಯಸ್ಸ ಪನ ಕಮ್ಮಾಯೂಹನಕ್ಖಣೇ ಅಲೋಭಾದೋಸಮೋಹಾ ಬಲವನ್ತೋ ಹೋನ್ತಿ, ಇತರೇ ಮನ್ದಾ, ಸೋ ಪುರಿಮನಯೇನೇವ ಅಲುದ್ಧೋ ಚೇವ ಹೋತಿ ಸುಖಸೀಲಕೋ ಚ, ಮೂಳ್ಹೋ ಪನ ಹೋತಿ.

ತಥಾ ಯಸ್ಸ ಕಮ್ಮಾಯೂಹನಕ್ಖಣೇ ಅಲೋಭದೋಸಾಮೋಹಾ ಬಲವನ್ತೋ ಹೋನ್ತಿ, ಇತರೇ ಮನ್ದಾ, ಸೋ ಪುರಿಮನಯೇನೇವ ಅಲುದ್ಧೋ ಚೇವ ಹೋತಿ ಪಞ್ಞವಾ ಚ, ದುಟ್ಠೋ ಪನ ಹೋತಿ ಕೋಧನೋ.

ಯಸ್ಸ ಪನ ಕಮ್ಮಾಯೂಹನಕ್ಖಣೇ ತಯೋಪಿ ಅಲೋಭಾದಯೋ ಬಲವನ್ತೋ ಹೋನ್ತಿ, ಲೋಭಾದಯೋ ಮನ್ದಾ, ಸೋ ಮಹಾಸಙ್ಘರಕ್ಖಿತತ್ಥೇರೋ ವಿಯ ಅಲುದ್ಧೋ ಅದುಟ್ಠೋ ಪಞ್ಞವಾ ಚ ಹೋತಿ.

ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಚೂಳಧಮ್ಮಸಮಾದಾನಸುತ್ತವಣ್ಣನಾ ನಿಟ್ಠಿತಾ.