೧೦. ಮಾರತಜ್ಜನೀಯಸುತ್ತವಣ್ಣನಾ

೫೦೬. ಏವಂ ಮೇ ಸುತನ್ತಿ ಮಾರತಜ್ಜನೀಯಸುತ್ತಂ. ತತ್ಥ ಕೋಟ್ಠಮನುಪವಿಟ್ಠೋತಿ ಕುಚ್ಛಿಂ ಪವಿಸಿತ್ವಾ ಅನ್ತಾನಂ ಅನ್ತೋ ಅನುಪವಿಟ್ಠೋ, ಪಕ್ಕಾಸಯಟ್ಠಾನೇ ನಿಸಿನ್ನೋ. ಗರುಗರೋ ವಿಯಾತಿ ಗರುಕಗರುಕೋ ವಿಯ ಥದ್ಧೋ ಪಾಸಾಣಪುಞ್ಜಸದಿಸೋ. ಮಾಸಾಚಿತಂ ಮಞ್ಞೇತಿ ಮಾಸಭತ್ತಂ ಭುತ್ತಸ್ಸ ಕುಚ್ಛಿ ವಿಯ ಮಾಸಪೂರಿತಪಸಿಬ್ಬಕೋ ವಿಯ ತಿನ್ತಮಾಸೋ ವಿಯ ಚಾತಿ ಅತ್ಥೋ. ವಿಹಾರಂ ಪವಿಸಿತ್ವಾತಿ ಸಚೇ ಆಹಾರದೋಸೇನ ಏಸ ಗರುಭಾವೋ, ಅಬ್ಭೋಕಾಸೇ ಚಙ್ಕಮಿತುಂ ನ ಸಪ್ಪಾಯನ್ತಿ ಚಙ್ಕಮಾ ಓರೋಹಿತ್ವಾ ಪಣ್ಣಸಾಲಂ ಪವಿಸಿತ್ವಾ ಪಕತಿಪಞ್ಞತ್ತೇ ಆಸನೇ ನಿಸೀದಿ. ಪಚ್ಚತ್ತಂ ಯೋನಿಸೋ ಮನಸಾಕಾಸೀತಿ, ‘‘ಕಿಂ ನು ಖೋ ಏತ’’ನ್ತಿ ಆವಜ್ಜಮಾನೋ ಅತ್ತನೋಯೇವ ಉಪಾಯೇನ ಮನಸಿ ಅಕಾಸಿ. ಸಚೇ ಪನ ಥೇರೋ ಅತ್ತನೋ ಸೀಲಂ ಆವಜ್ಜೇತ್ವಾ, ‘‘ಯಂ ಹಿಯ್ಯೋ ವಾ ಪರೇ ವಾ ಪರಸುವೇ ವಾ ಪರಿಭುತ್ತಂ ಅವಿಪಕ್ಕಮತ್ಥಿ, ಅಞ್ಞೋ ವಾ ಕೋಚಿ ವಿಸಭಾಗದೋಸೋ, ಸಬ್ಬಂ ಜೀರತು ಫಾಸುಕಂ ಹೋತೂ’’ತಿ ಹತ್ಥೇನ ಕುಚ್ಛಿಂ ಪರಾಮಸಿಸ್ಸ, ಮಾರೋ ಪಾಪಿಮಾ ವಿಲೀಯಿತ್ವಾ ಅಗಮಿಸ್ಸ. ಥೇರೋ ಪನ ತಥಾ ಅಕತ್ವಾ ಯೋನಿಸೋ ಮನಸಿ ಅಕಾಸಿ. ಮಾ ತಥಾಗತಂ ವಿಹೇಸೇಸೀತಿ ಯಥಾ ಹಿ ಪುತ್ತೇಸು ವಿಹೇಸಿತೇಸು ಮಾತಾಪಿತರೋ ವಿಹೇಸಿತಾವ ಹೋನ್ತಿ, ಸದ್ಧಿವಿಹಾರಿಕಅನ್ತೇವಾಸಿಕೇಸು ವಿಹೇಸಿತೇಸು ಆಚರಿಯುಪಜ್ಝಾಯಾ ವಿಹೇಸಿತಾವ, ಜನಪದೇ ವಿಹೇಸಿತೇ ರಾಜಾ ವಿಹೇಸಿತೋವ ಹೋತಿ, ಏವಂ ತಥಾಗತಸಾವಕೇ ವಿಹೇಸಿತೇ ತಥಾಗತೋ ವಿಹೇಸಿತೋವ ಹೋತಿ. ತೇನಾಹ – ‘‘ಮಾ ತಥಾಗತಂ ವಿಹೇಸೇಸೀ’’ತಿ.

ಪಚ್ಚಗ್ಗಳೇ ಅಟ್ಠಾಸೀತಿ ಪತಿಅಗ್ಗಳೇವ ಅಟ್ಠಾಸಿ. ಅಗ್ಗಳಂ ವುಚ್ಚತಿ ಕವಾಟಂ, ಮುಖೇನ ಉಗ್ಗನ್ತ್ವಾ ಪಣ್ಣಸಾಲತೋ ನಿಕ್ಖಮಿತ್ವಾ ಬಹಿಪಣ್ಣಸಾಲಾಯ ಕವಾಟಂ ನಿಸ್ಸಾಯ ಅಟ್ಠಾಸೀತಿ ಅತ್ಥೋ.

೫೦೭. ಭೂತಪುಬ್ಬಾಹಂ ಪಾಪಿಮಾತಿ ಕಸ್ಮಾ ಇದಂ ದೇಸನಂ ಆರಭಿ? ಥೇರೋ ಕಿರ ಚಿನ್ತೇಸಿ – ‘‘ಆಕಾಸಟ್ಠಕದೇವತಾನಂ ತಾವ ಮನುಸ್ಸಗನ್ಧೋ ಯೋಜನಸತೇ ಠಿತಾನಂ ಆಬಾಧಂ ಕರೋತಿ. ವುತ್ತಞ್ಹೇತಂ – ‘ಯೋಜನಸತಂ ಖೋ ರಾಜಞ್ಞ ಮನುಸ್ಸಗನ್ಧೋ ದೇವೇ ಉಬ್ಬಾಧತೀ’ತಿ (ದೀ. ನಿ. ೨.೪೧೫). ಅಯಂ ಪನ ಮಾರೋ ನಾಗರಿಕೋ ಪರಿಚೋಕ್ಖೋ ಮಹೇಸಕ್ಖೋ ಆನುಭಾವಸಮ್ಪನ್ನೋ ದೇವರಾಜಾ ಸಮಾನೋ ಮಮ ಕುಚ್ಛಿಯಂ ಪವಿಸಿತ್ವಾ ಅನ್ತಾನಂ ಅನ್ತೋ ಪಕ್ಕಾಸಯೋಕಾಸೇ ನಿಸಿನ್ನೋ ಅತಿವಿಯ ಪದುಟ್ಠೋ ಭವಿಸ್ಸತಿ. ಏವರೂಪಂ ನಾಮ ಜೇಗುಚ್ಛಂ ಪಟಿಕೂಲಂ ಓಕಾಸಂ ಪವಿಸಿತ್ವಾ ನಿಸೀದಿತುಂ ಸಕ್ಕೋನ್ತಸ್ಸ ಕಿಮಞ್ಞಂ ಅಕರಣೀಯಂ ಭವಿಸ್ಸತಿ, ಕಿಂ ಅಞ್ಞಂ ಲಜ್ಜಿಸ್ಸತಿ, ತ್ವಂ ಮಮ ಞಾತಿಕೋತಿ ಪನ ವುತ್ತೇ ಮುದುಭಾವಂ ಅನಾಪಜ್ಜಮಾನೋ ನಾಮ ನತ್ಥಿ, ಹನ್ದಸ್ಸ ಞಾತಿಕೋಟಿಂ ಪಟಿವಿಜ್ಝಿತ್ವಾ ಮುದುಕೇನೇವ ನಂ ಉಪಾಯೇನ ವಿಸ್ಸಜ್ಜೇಸ್ಸಾಮೀ’’ತಿ ಚಿನ್ತೇತ್ವಾ ಇಮಂ ದೇಸನಮಾರಭಿ.

ಸೋ ಮೇ ತ್ವಂ ಭಾಗಿನೇಯ್ಯೋ ಹೋಸೀತಿ ಸೋ ತ್ವಂ ತಸ್ಮಿಂ ಕಾಲೇ ಮಯ್ಹಂ ಭಾಗಿನೇಯ್ಯೋ ಹೋಸಿ. ಇದಂ ಪವೇಣಿವಸೇನ ವುತ್ತಂ. ದೇವಲೋಕಸ್ಮಿಂ ಪನ ಮಾರಸ್ಸ ಪಿತು ವಂಸೋ ಪಿತಾಮಹಸ್ಸ ವಂಸೋ ರಜ್ಜಂ ಕರೋನ್ತೋ ನಾಮ ನತ್ಥಿ, ಪುಞ್ಞವಸೇನ ದೇವಲೋಕೇ ದೇವರಾಜಾ ಹುತ್ವಾ ನಿಬ್ಬತ್ತೋ, ಯಾವತಾಯುಕಂ ಠತ್ವಾ ಚವತಿ. ಅಞ್ಞೋ ಏಕೋ ಅತ್ತನಾ ಕತೇನ ಕಮ್ಮೇನ ತಸ್ಮಿಂ ಠಾನೇ ಅಧಿಪತಿ ಹುತ್ವಾ ನಿಬ್ಬತ್ತತಿ. ಇತಿ ಅಯಂ ಮಾರೋಪಿ ತದಾ ತತೋ ಚವಿತ್ವಾ ಪುನ ಕುಸಲಂ ಕತ್ವಾ ಇಮಸ್ಮಿಂ ಕಾಲೇ ತಸ್ಮಿಂ ಅಧಿಪತಿಟ್ಠಾನೇ ನಿಬ್ಬತ್ತೋತಿ ವೇದಿತಬ್ಬೋ.

ವಿಧುರೋತಿ ವಿಗತಧುರೋ, ಅಞ್ಞೇಹಿ ಸದ್ಧಿಂ ಅಸದಿಸೋತಿ ಅತ್ಥೋ. ಅಪ್ಪಕಸಿರೇನಾತಿ ಅಪ್ಪದುಕ್ಖೇನ. ಪಸುಪಾಲಕಾತಿ ಅಜೇಳಕಪಾಲಕಾ. ಪಥಾವಿನೋತಿ ಮಗ್ಗಪಟಿಪನ್ನಾ. ಕಾಯೇ ಉಪಚಿನಿತ್ವಾತಿ ಸಮನ್ತತೋ ಚಿತಕಂ ಬನ್ಧಿತ್ವಾ. ಅಗ್ಗಿಂ ದತ್ವಾ ಪಕ್ಕಮಿಂಸೂತಿ ಏತ್ತಕೇನ ಸರೀರಂ ಪರಿಯಾದಾನಂ ಗಮಿಸ್ಸತೀತಿ ಚಿತಕಸ್ಸ ಪಮಾಣಂ ಸಲ್ಲಕ್ಖೇತ್ವಾ ಚತೂಸು ದಿಸಾಸು ಅಗ್ಗಿಂ ದತ್ವಾ ಪಕ್ಕಮಿಂಸು. ಚಿತಕೋ ಪದೀಪಸಿಖಾ ವಿಯ ಪಜ್ಜಲಿ, ಥೇರಸ್ಸ ಉದಕಲೇಣಂ ಪವಿಸಿತ್ವಾ ನಿಸಿನ್ನಕಾಲೋ ವಿಯ ಅಹೋಸಿ. ಚೀವರಾನಿ ಪಪ್ಫೋಟೇತ್ವಾತಿ ಸಮಾಪತ್ತಿತೋ ವುಟ್ಠಾಯ ವಿಗತಧೂಮೇ ಕಿಂಸುಕವಣ್ಣೇ ಅಙ್ಗಾರೇ ಮದ್ದಮಾನೋ ಚೀವರಾನಿ ವಿಧುನಿತ್ವಾ. ಸರೀರೇ ಪನಸ್ಸ ಉಸುಮಮತ್ತಮ್ಪಿ ನಾಹೋಸಿ, ಚೀವರೇಸು ಅಂಸುಮತ್ತಮ್ಪಿ ನಜ್ಝಾಯಿ, ಸಮಾಪತ್ತಿಫಲಂ ನಾಮೇತಂ.

೫೦೮. ಅಕ್ಕೋಸಥಾತಿ ದಸಹಿ ಅಕ್ಕೋಸವತ್ಥೂಹಿ ಅಕ್ಕೋಸಥ. ಪರಿಭಾಸಥಾತಿ ವಾಚಾಯ ಪರಿಭಾಸಥ. ರೋಸೇಥಾತಿ ಘಟ್ಟೇಥ. ವಿಹೇಸೇಥಾತಿ ದುಕ್ಖಾಪೇಥ. ಸಬ್ಬಮೇತಂ ವಾಚಾಯ ಘಟ್ಟನಸ್ಸೇವ ಅಧಿವಚನಂ. ಯಥಾ ತಂ ದೂಸೀ ಮಾರೋತಿ ಯಥಾ ಏತೇಸಂ ದೂಸೀ ಮಾರೋ. ಲಭೇಥ ಓತಾರನ್ತಿ ಲಭೇಥ ಛಿದ್ದಂ, ಕಿಲೇಸುಪ್ಪತ್ತಿಯಾ ಆರಮ್ಮಣಂ ಪಚ್ಚಯಂ ಲಭೇಯ್ಯಾತಿ ಅತ್ಥೋ. ಮುಣ್ಡಕಾತಿಆದೀಸು ಮುಣ್ಡೇ ಮುಣ್ಡಾತಿ ಸಮಣೇ ಚ ಸಮಣಾತಿ ವತ್ತುಂ ವಟ್ಟೇಯ್ಯ, ಇಮೇ ಪನ ಹೀಳೇನ್ತಾ ಮುಣ್ಡಕಾ ಸಮಣಕಾತಿ ಆಹಂಸು. ಇಬ್ಭಾತಿ ಗಹಪತಿಕಾ. ಕಿಣ್ಹಾತಿ ಕಣ್ಹಾ, ಕಾಳಕಾತಿ ಅತ್ಥೋ. ಬನ್ಧುಪಾದಾಪಚ್ಚಾತಿ ಏತ್ಥ ಬನ್ಧೂತಿ ಬ್ರಹ್ಮಾ ಅಧಿಪ್ಪೇತೋ. ತಞ್ಹಿ ಬ್ರಾಹ್ಮಣಾ ಪಿತಾಮಹೋತಿ ವೋಹರನ್ತಿ. ಪಾದಾನಂ ಅಪಚ್ಚಾ ಪಾದಾಪಚ್ಚಾ, ಬ್ರಹ್ಮುನೋ ಪಿಟ್ಠಿಪಾದತೋ ಜಾತಾತಿ ಅಧಿಪ್ಪಾಯೋ. ತೇಸಂ ಕಿರ ಅಯಂ ಲದ್ಧಿ – ‘‘ಬ್ರಾಹ್ಮಣಾ ಬ್ರಹ್ಮುನೋ ಮುಖತೋ ನಿಕ್ಖನ್ತಾ, ಖತ್ತಿಯಾ ಉರತೋ, ವೇಸ್ಸಾ ನಾಭಿತೋ, ಸುದ್ದಾ ಜಾಣುತೋ, ಸಮಣಾ ಪಿಟ್ಠಿಪಾದತೋ’’ತಿ.

ಝಾಯಿನೋಸ್ಮಾ ಝಾಯಿನೋಸ್ಮಾತಿ ಝಾಯಿನೋ ಮಯಂ ಝಾಯಿನೋ ಮಯನ್ತಿ. ಮಧುರಕಜಾತಾತಿ ಆಲಸಿಯಜಾತಾ. ಝಾಯನ್ತೀತಿ ಚಿನ್ತಯನ್ತಿ. ಪಜ್ಝಾಯನ್ತೀತಿಆದೀನಿ ಉಪಸಗ್ಗವಸೇನ ವಡ್ಢಿತಾನಿ. ಮೂಸಿಕಂ ಮಗ್ಗಯಮಾನೋತಿ ಸಾಯಂ ಗೋಚರತ್ಥಾಯ ಸುಸಿರರುಕ್ಖತೋ ನಿಕ್ಖನ್ತಂ ರುಕ್ಖಸಾಖಾಯ ಮೂಸಿಕಂ ಪರಿಯೇಸನ್ತೋ. ಸೋ ಕಿರ ಉಪಸನ್ತೂಪಸನ್ತೋ ವಿಯ ನಿಚ್ಚಲೋವ ತಿಟ್ಠತಿ, ಸಮ್ಪತ್ತಕಾಲೇ ಮೂಸಿಕಂ ಸಹಸಾ ಗಣ್ಹಾತಿ. ಕೋತ್ಥೂತಿ ಸಿಙ್ಗಾಲೋ, ಸೋಣೋತಿಪಿ ವದನ್ತಿ. ಸನ್ಧಿಸಮಲಸಙ್ಕಟಿರೇತಿ ಸನ್ಧಿಮ್ಹಿ ಚ ಸಮಲೇ ಚ ಸಙ್ಕಟಿರೇ ಚ. ತತ್ಥ ಸನ್ಧಿ ನಾಮ ಘರಸನ್ಧಿ. ಸಮಲೋ ನಾಮ ಗೂಥನಿದ್ಧಮನಪನಾಳಿ. ಸಙ್ಕಟಿರಂ ನಾಮ ಸಙ್ಕಾರಟ್ಠಾನಂ. ವಹಚ್ಛಿನ್ನೋತಿ ಕನ್ತಾರತೋ ನಿಕ್ಖನ್ತೋ ಛಿನ್ನವಹೋ. ಸನ್ಧಿಸಮಲಸಙ್ಕಟಿರೇತಿ ಸನ್ಧಿಮ್ಹಿ ವಾ ಸಮಲೇ ವಾ ಸಙ್ಕಟಿರೇ ವಾ. ಸೋಪಿ ಹಿ ಬದ್ಧಗತ್ತೋ ವಿಯ ನಿಚ್ಚಲೋ ಝಾಯತಿ.

ನಿರಯಂ ಉಪಪಜ್ಜನ್ತೀತಿ ಸಚೇ ಮಾರೋ ಮನುಸ್ಸಾನಂ ಸರೀರೇ ಅಧಿಮುಚ್ಚಿತ್ವಾ ಏವಂ ಕರೇಯ್ಯ, ಮನುಸ್ಸಾನಂ ಅಕುಸಲಂ ನ ಭವೇಯ್ಯ, ಮಾರಸ್ಸೇವ ಭವೇಯ್ಯ. ಸರೀರೇ ಪನ ಅನಧಿಮುಚ್ಚಿತ್ವಾ ವಿಸಭಾಗವತ್ಥುಂ ವಿಪ್ಪಟಿಸಾರಾರಮ್ಮಣಂ ದಸ್ಸೇತಿ, ತದಾ ಕಿರ ಸೋ ಭಿಕ್ಖೂ ಖಿಪ್ಪಂ ಗಹೇತ್ವಾ ಮಚ್ಛೇ ಅಜ್ಝೋತ್ಥರನ್ತೇ ವಿಯ, ಜಾಲಂ ಗಹೇತ್ವಾ ಮಚ್ಛೇ ಗಣ್ಹನ್ತೇ ವಿಯ, ಲೇಪಯಟ್ಠಿಂ ಓಡ್ಡೇತ್ವಾ ಸಕುಣೇ ಬನ್ಧನ್ತೇ ವಿಯ, ಸುನಖೇಹಿ ಸದ್ಧಿಂ ಅರಞ್ಞೇ ಮಿಗವಂ ಚರನ್ತೇ ವಿಯ, ಮಾತುಗಾಮೇ ಗಹೇತ್ವಾ ಆಪಾನಭೂಮಿಯಂ ನಿಸಿನ್ನೇ ವಿಯ, ನಚ್ಚನ್ತೇ ವಿಯ, ಗಾಯನ್ತೇ ವಿಯ, ಭಿಕ್ಖುನೀನಂ ರತ್ತಿಟ್ಠಾನದಿವಾಟ್ಠಾನೇಸು ವಿಸಭಾಗಮನುಸ್ಸೇ ನಿಸಿನ್ನೇ ವಿಯ, ಠಿತೇ ವಿಯ ಚ ಕತ್ವಾ ದಸ್ಸೇಸಿ. ಮನುಸ್ಸಾ ಅರಞ್ಞಗತಾಪಿ ವನಗತಾಪಿ ವಿಹಾರಗತಾಪಿ ವಿಪ್ಪಟಿಸಾರಾರಮ್ಮಣಂ ಪಸ್ಸಿತ್ವಾ ಆಗನ್ತ್ವಾ ಅಞ್ಞೇಸಂ ಕಥೇನ್ತಿ – ‘‘ಸಮಣಾ ಏವರೂಪಂ ಅಸ್ಸಮಣಕಂ ಅನನುಚ್ಛವಿಕಂ ಕರೋನ್ತಿ, ಏತೇಸಂ ದಿನ್ನೇ ಕುತೋ ಕುಸಲಂ, ಮಾ ಏತೇಸಂ ಕಿಞ್ಚಿ ಅದತ್ಥಾ’’ತಿ. ಏವಂ ತೇ ಮನುಸ್ಸಾ ದಿಟ್ಠದಿಟ್ಠಟ್ಠಾನೇ ಸೀಲವನ್ತೇ ಅಕ್ಕೋಸನ್ತಾ ಅಪುಞ್ಞಂ ಪಸವಿತ್ವಾ ಅಪಾಯಪೂರಕಾ ಅಹೇಸುಂ. ತೇನ ವುತ್ತಂ ‘‘ನಿರಯಂ ಉಪಪಜ್ಜನ್ತೀ’’ತಿ.

೫೦೯. ಅನ್ವಾವಿಟ್ಠಾತಿ ಆವಟ್ಟಿತಾ. ಫರಿತ್ವಾ ವಿಹರಿಂಸೂತಿ ನ ಕೇವಲಂ ಫರಿತ್ವಾ ವಿಹರಿಂಸು. ಕಕುಸನ್ಧಸ್ಸ ಪನ ಭಗವತೋ ಓವಾದೇ ಠತ್ವಾ ಇಮೇ ಚತ್ತಾರೋ ಬ್ರಹ್ಮವಿಹಾರೇ ನಿಬ್ಬತ್ತೇತ್ವಾ ಝಾನಪದಟ್ಠಾನಂ ವಿಪಸ್ಸನಂ ವಡ್ಢೇತ್ವಾ ಅರಹತ್ತೇ ಪತಿಟ್ಠಹಿಂಸು.

೫೧೦. ಆಗತಿಂ ವಾ ಗತಿಂ ವಾತಿ ಪಟಿಸನ್ಧಿವಸೇನ ಆಗಮನಟ್ಠಾನಂ ವಾ, ಚುತಿವಸೇನ ಗಮನಟ್ಠಾನಂ ವಾ ನ ಜಾನಾಮಿ. ಸಿಯಾ ಚಿತ್ತಸ್ಸ ಅಞ್ಞಥತ್ತನ್ತಿ ಸೋಮನಸ್ಸವಸೇನ ಅಞ್ಞಥತ್ತಂ ಭವೇಯ್ಯ. ಸಗ್ಗಂ ಲೋಕಂ ಉಪಪಜ್ಜನ್ತೀತಿ ಇಧಾಪಿ ಪುರಿಮನಯೇನೇವ ಅತ್ಥೋ ವೇದಿತಬ್ಬೋ. ಯಥಾ ಹಿ ಪುಬ್ಬೇ ವಿಪ್ಪಟಿಸಾರಕರಂ ಆರಮ್ಮಣಂ ದಸ್ಸೇತಿ, ಏವಮಿಧಾಪಿ ಪಸಾದಕರಂ. ಸೋ ಕಿರ ತದಾ ಮನುಸ್ಸಾನಂ ದಸ್ಸನಟ್ಠಾನೇ ಭಿಕ್ಖೂ ಆಕಾಸೇ ಗಚ್ಛನ್ತೇ ವಿಯ, ಠಿತೇ ವಿಯ ಪಲ್ಲಙ್ಕೇನ ನಿಸಿನ್ನೇ ವಿಯ, ಆಕಾಸೇ ಸೂಚಿಕಮ್ಮಂ ಕರೋನ್ತೇ ವಿಯ, ಪೋತ್ಥಕಂ ವಾಚೇನ್ತೇ ವಿಯ, ಆಕಾಸೇ ಚೀವರಂ ಪಸಾರೇತ್ವಾ ಕಾಯಂ ಉತುಂ ಗಣ್ಹಾಪೇನ್ತೇ ವಿಯ, ನವಪಬ್ಬಜಿತೇ ಆಕಾಸೇನ ಚರನ್ತೇ ವಿಯ, ತರುಣಸಾಮಣೇರೇ ಆಕಾಸೇ ಠತ್ವಾ ಪುಪ್ಫಾನಿ ಓಚಿನನ್ತೇ ವಿಯ ಕತ್ವಾ ದಸ್ಸೇಸಿ. ಮನುಸ್ಸಾ ಅರಞ್ಞಗತಾಪಿ ವನಗತಾಪಿ ವಿಹಾರಗತಾಪಿ ಪಬ್ಬಜಿತಾನಂ ತಂ ಪಟಿಪತ್ತಿಂ ದಿಸ್ವಾ ಆಗನ್ತ್ವಾ ಅಞ್ಞೇಸಂ ಕಥೇನ್ತಿ – ‘‘ಭಿಕ್ಖೂಸು ಅನ್ತಮಸೋ ಸಾಮಣೇರಾಪಿ ಏವಂಮಹಿದ್ಧಿಕೋ ಮಹಾನುಭಾವಾ, ಏತೇಸಂ ದಿನ್ನಂ ಮಹಪ್ಫಲಂ ನಾಮ ಹೋತಿ, ಏತೇಸಂ ದೇಥ ಸಕ್ಕರೋಥಾ’’ತಿ. ತತೋ ಮನುಸ್ಸಾ ಭಿಕ್ಖುಸಙ್ಘಂ ಚತೂಹಿ ಪಚ್ಚಯೇಹಿ ಸಕ್ಕರೋನ್ತಾ ಬಹುಂ ಪುಞ್ಞಂ ಕತ್ವಾ ಸಗ್ಗಪಥಪೂರಕಾ ಅಹೇಸುಂ. ತೇನ ವುತ್ತಂ ‘‘ಸಗ್ಗಂ ಲೋಕಂ ಉಪಪಜ್ಜನ್ತೀ’’ತಿ.

೫೧೧. ಏಥ ತುಮ್ಹೇ, ಭಿಕ್ಖವೇ, ಅಸುಭಾನುಪಸ್ಸಿನೋ ಕಾಯೇ ವಿಹರಥಾತಿ ಭಗವಾ ಸಕಲಜಮ್ಬುದೀಪಂ ಆಹಿಣ್ಡನ್ತೋ ಅನ್ತಮಸೋ ದ್ವಿನ್ನಮ್ಪಿ ತಿಣ್ಣಮ್ಪಿ ಭಿಕ್ಖೂನಂ ವಸನಟ್ಠಾನಂ ಗನ್ತ್ವಾ –

‘‘ಅಸುಭಸಞ್ಞಾಪರಿಚಿತೇನ, ಭಿಕ್ಖವೇ, ಭಿಕ್ಖುನೋ ಚೇತಸಾ ಬಹುಲಂ ವಿಹರತೋ ಮೇಥುನಧಮ್ಮಸಮಾಪತ್ತಿಯಾ ಚಿತ್ತಂ ಪತಿಲೀಯತಿ ಪತಿಕುಟತಿ ಪತಿವತ್ತತಿ ನ ಸಮ್ಪಸಾರಿಯತಿ, ಉಪೇಕ್ಖಾ ವಾ ಪಾಟಿಕುಲ್ಯತಾ ವಾ ಸಣ್ಠಾತಿ.

ಆಹಾರೇ ಪಟಿಕೂಲಸಞ್ಞಾಪರಿಚಿತೇನ, ಭಿಕ್ಖವೇ, ಭಿಕ್ಖುನೋ ಚೇತಸಾ ಬಹುಲಂ ವಿಹರತೋ ರಸತಣ್ಹಾಯ ಚಿತ್ತಂ ಪತಿಲೀಯತಿ ಪತಿಕುಟತಿ ಪತಿವತ್ತತಿ ನ ಸಮ್ಪಸಾರಿಯತಿ, ಉಪೇಕ್ಖಾ ವಾ ಪಾಟಿಕುಲ್ಯತಾ ವಾ ಸಣ್ಠಾತಿ.

ಸಬ್ಬಲೋಕೇ ಅನಭಿರತಿಸಞ್ಞಾಪರಿಚಿತೇನ, ಭಿಕ್ಖವೇ, ಭಿಕ್ಖುನೋ ಚೇತಸಾ ಬಹುಲಂ ವಿಹರತೋ ಲೋಕಚಿತ್ರೇಸು ಚಿತ್ತಂ ಪತಿಲೀಯತಿ ಪತಿಕುಟತಿ ಪತಿವತ್ತತಿ ನ ಸಮ್ಪಸಾರಿಯತಿ, ಉಪೇಕ್ಖಾ ವಾ ಪಾಟಿಕುಲ್ಯತಾ ವಾ ಸಣ್ಠಾತಿ.

ಅನಿಚ್ಚಸಞ್ಞಾಪರಿಚಿತೇನ, ಭಿಕ್ಖವೇ, ಭಿಕ್ಖುನೋ ಚೇತಸಾ ಬಹುಲಂ ವಿಹರತೋ ಲಾಭಸಕ್ಕಾರಸಿಲೋಕೇ ಚಿತ್ತಂ ಪತಿಲೀಯತಿ ಪತಿಕುಟತಿ ಪತಿವತ್ತತಿ ನ ಸಮ್ಪಸಾರಿಯತಿ, ಉಪೇಕ್ಖಾ ವಾ ಪಾಟಿಕುಲ್ಯತಾ ವಾ ಸಣ್ಠಾತೀ’’ತಿ (ಅ. ನಿ. ೭.೪೯) ಏವಂ ಆನಿಸಂಸಂ ದಸ್ಸೇತ್ವಾ –

ಏಥ ತುಮ್ಹೇ, ಭಿಕ್ಖವೇ, ಅಸುಭಾನುಪಸ್ಸೀ ಕಾಯೇ ವಿಹರಥ, ಆಹಾರೇ ಪಟಿಕೂಲಸಞ್ಞಿನೋ ಸಬ್ಬಲೋಕೇ ಅನಭಿರತಿಸಞ್ಞಿನೋ ಸಬ್ಬಸಙ್ಖಾರೇಸು ಅನಿಚ್ಚಾನುಪಸ್ಸಿನೋತಿ. ಇಮಾನಿ ಚತ್ತಾರಿ ಕಮ್ಮಟ್ಠಾನಾನಿ ಕಥೇಸಿ. ತೇಪಿ ಭಿಕ್ಖೂ ಇಮೇಸು ಚತೂಸು ಕಮ್ಮಟ್ಠಾನೇಸು ಕಮ್ಮಂ ಕರೋನ್ತಾ ವಿಪಸ್ಸನಂ ವಡ್ಢೇತ್ವಾ ಸಬ್ಬಾಸವೇ ಖೇಪೇತ್ವಾ ಅರಹತ್ತೇ ಪತಿಟ್ಠಹಿಂಸು, ಇಮಾನಿಪಿ ಚತ್ತಾರಿ ಕಮ್ಮಟ್ಠಾನಾನಿ ರಾಗಸನ್ತಾನಿ ದೋಸಮೋಹಸನ್ತಾನಿ ರಾಗಪಟಿಘಾತಾನಿ ದೋಸಮೋಹಪಟಿಘಾತಾನಿ ಚಾತಿ.

೫೧೨. ಸಕ್ಖರಂ ಗಹೇತ್ವಾತಿ ಅನ್ತೋಮುಟ್ಠಿಯಂ ತಿಟ್ಠನಪಮಾಣಂ ಪಾಸಾಣಂ ಗಹೇತ್ವಾ. ಅಯಞ್ಹಿ ಬ್ರಾಹ್ಮಣಗಹಪತಿಕೇಹಿ ಭಿಕ್ಖೂ ಅಕ್ಕೋಸಾಪೇತ್ವಾಪಿ, ಬ್ರಾಹ್ಮಣಗಹಪತಿಕಾನಂ ವಸೇನ ಭಿಕ್ಖುಸಙ್ಘಸ್ಸ ಲಾಭಸಕ್ಕಾರಂ ಉಪ್ಪಾದಾಪೇತ್ವಾಪಿ, ಓತಾರಂ ಅಲಭನ್ತೋ ಇದಾನಿ ಸಹತ್ಥಾ ಉಪಕ್ಕಮಿತುಕಾಮೋ ಅಞ್ಞತರಸ್ಸ ಕುಮಾರಸ್ಸ ಸರೀರೇ ಅಧಿಮುಚ್ಚಿತ್ವಾ ಏವರೂಪಂ ಪಾಸಾಣಂ ಅಗ್ಗಹೇಸಿ. ತಂ ಸನ್ಧಾಯ ವುತ್ತಂ ‘‘ಸಕ್ಖರಂ ಗಹೇತ್ವಾ’’ತಿ.

ಸೀಸಂ ವೋ ಭಿನ್ದೀತಿ ಸೀಸಂ ಭಿನ್ದಿ, ಮಹಾಚಮ್ಮಂ ಛಿಜ್ಜಿತ್ವಾ ಮಂಸಂ ದ್ವೇಧಾ ಅಹೋಸಿ. ಸಕ್ಖರಾ ಪನಸ್ಸ ಸೀಸಕಟಾಹಂ ಅಭಿನ್ದಿತ್ವಾ ಅಟ್ಠಿಂ ಆಹಚ್ಚೇವ ನಿವತ್ತಾ. ನಾಗಾಪಲೋಕಿತಂ ಅಪಲೋಕೇಸೀತಿ ಪಹಾರಸದ್ದಂ ಸುತ್ವಾ ಯಥಾ ನಾಮ ಹತ್ಥಿನಾಗೋ ಇತೋ ವಾ ಏತ್ತೋ ವಾ ಅಪಲೋಕೇತುಕಾಮೋ ಗೀವಂ ಅಪರಿವತ್ತೇತ್ವಾ ಸಕಲಸರೀರೇನೇವ ನಿವತ್ತಿತ್ವಾ ಅಪಲೋಕೇತಿ. ಏವಂ ಸಕಲಸರೀರೇನೇವ ನಿವತ್ತಿತ್ವಾ ಅಪಲೋಕೇಸಿ. ಯಥಾ ಹಿ ಮಹಾಜನಸ್ಸ ಅಟ್ಠೀನಿ ಕೋಟಿಯಾ ಕೋಟಿಂ ಆಹಚ್ಚ ಠಿತಾನಿ, ಪಚ್ಚೇಕಬುದ್ಧಾನಂ ಅಙ್ಕುಸಲಗ್ಗಾನಿ, ನ ಏವಂ ಬುದ್ಧಾನಂ. ಬುದ್ಧಾನಂ ಪನ ಸಙ್ಖಲಿಕಾನಿ ವಿಯ ಏಕಾಬದ್ಧಾನಿ ಹುತ್ವಾ ಠಿತಾನಿ, ತಸ್ಮಾ ಪಚ್ಛತೋ ಅಪಲೋಕನಕಾಲೇ ನ ಸಕ್ಕಾ ಹೋತಿ ಗೀವಂ ಪರಿವತ್ತೇತುಂ. ಯಥಾ ಪನ ಹತ್ಥಿನಾಗೋ ಪಚ್ಛಾಭಾಗಂ ಅಪಲೋಕೇತುಕಾಮೋ ಸಕಲಸರೀರೇನೇವ ಪರಿವತ್ತತಿ, ಏವಂ ಪರಿವತ್ತಿತಬ್ಬಂ ಹೋತಿ. ತಸ್ಮಾ ಭಗವಾ ಯನ್ತೇನ ಪರಿವತ್ತಿತಾ ಸುವಣ್ಣಪಟಿಮಾ ವಿಯ ಸಕಲಸರೀರೇನೇವ ನಿವತ್ತಿತ್ವಾ ಅಪಲೋಕೇಸಿ, ಅಪಲೋಕೇತ್ವಾ ಠಿತೋ ಪನ, ‘‘ನ ವಾಯಂ ದೂಸೀ ಮಾರೋ ಮತ್ತಮಞ್ಞಾಸೀ’’ತಿ ಆಹ. ತಸ್ಸತ್ಥೋ, ಅಯಂ ದೂಸೀ ಮಾರೋ ಪಾಪಂ ಕರೋನ್ತೋ ನೇವ ಪಮಾಣಂ ಅಞ್ಞಾಸಿ, ಪಮಾಣಾತಿಕ್ಕನ್ತಮಕಾಸೀತಿ.

ಸಹಾಪಲೋಕನಾಯಾತಿ ಕಕುಸನ್ಧಸ್ಸ ಭಗವತೋ ಅಪಲೋಕನೇನೇವ ಸಹ ತಙ್ಖಣಞ್ಞೇವ. ತಮ್ಹಾ ಚ ಠಾನಾ ಚವೀತಿ ತಮ್ಹಾ ಚ ದೇವಟ್ಠಾನಾ ಚುತೋ, ಮಹಾನಿರಯಂ ಉಪಪನ್ನೋತಿ ಅತ್ಥೋ. ಚವಮಾನೋ ಹಿ ನ ಯತ್ಥ ಕತ್ಥಚಿ ಠಿತೋ ಚವತಿ, ತಸ್ಮಾ ವಸವತ್ತಿದೇವಲೋಕಂ ಆಗನ್ತ್ವಾ ಚುತೋ, ‘‘ಸಹಾಪಲೋಕನಾಯಾ’’ತಿ ಚ ವಚನತೋ ನ ಭಗವತೋ ಅಪಲೋಕಿತತ್ತಾ ಚುತೋತಿ ವೇದಿತಬ್ಬೋ, ಚುತಿಕಾಲದಸ್ಸನಮತ್ತಮೇವ ಹೇತಂ. ಉಳಾರೇ ಪನ ಮಹಾಸಾವಕೇ ವಿರದ್ಧತ್ತಾ ಕುದಾರಿಯಾ ಪಹಟಂ ವಿಯಸ್ಸ ಆಯು ತತ್ಥೇವ ಛಿಜ್ಜಿತ್ವಾ ಗತನ್ತಿ ವೇದಿತಬ್ಬಂ. ತಯೋ ನಾಮಧೇಯ್ಯಾ ಹೋನ್ತೀತಿ ತೀಣಿ ನಾಮಾನಿ ಹೋನ್ತಿ. ಛಫಸ್ಸಾಯತನಿಕೋತಿ ಛಸು ಫಸ್ಸಾಯತನೇಸು ಪಾಟಿಯೇಕ್ಕಾಯ ವೇದನಾಯ ಪಚ್ಚಯೋ.

ಸಙ್ಕುಸಮಾಹತೋತಿ ಅಯಸೂಲೇಹಿ ಸಮಾಹತೋ. ಪಚ್ಚತ್ತವೇದನಿಯೋತಿ ಸಯಮೇವ ವೇದನಾಜನಕೋ. ಸಙ್ಕುನಾ ಸಙ್ಕು ಹದಯೇ ಸಮಾಗಚ್ಛೇಯ್ಯಾತಿ ಅಯಸೂಲೇನ ಸದ್ಧಿಂ ಅಯಸೂಲಂ ಹದಯಮಜ್ಝೇ ಸಮಾಗಚ್ಛೇಯ್ಯ. ತಸ್ಮಿಂ ಕಿರ ನಿರಯೇ ಉಪಪನ್ನಾನಂ ತಿಗಾವುತೋ ಅತ್ತಭಾವೋ ಹೋತಿ, ಥೇರಸ್ಸಾಪಿ ತಾದಿಸೋ ಅಹೋಸಿ. ಅಥಸ್ಸ ಹಿ ನಿರಯಪಾಲಾ ತಾಲಕ್ಖನ್ಧಪಮಾಣಾನಿ ಅಯಸೂಲಾನಿ ಆದಿತ್ತಾನಿ ಸಮ್ಪಜ್ಜಲಿತಾನಿ ಸಜೋತಿಭೂತಾನಿ ಸಯಮೇವ ಗಹೇತ್ವಾ ಪುನಪ್ಪುನಂ ನಿವತ್ತಮಾನಾ, – ‘‘ಇಮಿನಾ ತೇ ಠಾನೇನ ಚಿನ್ತೇತ್ವಾ ಪಾಪಂ ಕತ’’ನ್ತಿ ಪೂವದೋಣಿಯಂ ಪೂವಂ ಕೋಟ್ಟೇನ್ತೋ ವಿಯ ಹದಯಮಜ್ಝಂ ಕೋಟ್ಟೇತ್ವಾ, ಪಣ್ಣಾಸ ಜನಾ ಪಾದಾಭಿಮುಖಾ ಪಣ್ಣಾಸ ಜನಾ ಸೀಸಾಭಿಮುಖಾ ಕೋಟ್ಟೇತ್ವಾ ಗಚ್ಛನ್ತಿ, ಏವಂ ಗಚ್ಛನ್ತಾ ಪಞ್ಚಹಿ ವಸ್ಸಸತೇಹಿ ಉಭೋ ಅನ್ತೇ ಪತ್ವಾ ಪುನ ನಿವತ್ತಮಾನಾ ಪಞ್ಚಹಿ ವಸ್ಸಸತೇಹಿ ಹದಯಮಜ್ಝಂ ಆಗಚ್ಛನ್ತಿ. ತಂ ಸನ್ಧಾಯ ಏವಂ ವುತ್ತಂ.

ವುಟ್ಠಾನಿಮನ್ತಿ ವಿಪಾಕವುಟ್ಠಾನವೇದನಂ. ಸಾ ಕಿರ ಮಹಾನಿರಯೇ ವೇದನಾತೋ ದುಕ್ಖತರಾ ಹೋತಿ, ಯಥಾ ಹಿ ಸಿನೇಹಪಾನಸತ್ತಾಹತೋ ಪರಿಹಾರಸತ್ತಾಹಂ ದುಕ್ಖತರಂ, ಏವಂ ಮಹಾನಿರಯದುಕ್ಖತೋ ಉಸ್ಸದೇ ವಿಪಾಕವುಟ್ಠಾನವೇದನಾ ದುಕ್ಖತರಾತಿ ವದನ್ತಿ. ಸೇಯ್ಯಥಾಪಿ ಮಚ್ಛಸ್ಸಾತಿ ಪುರಿಸಸೀಸಞ್ಹಿ ವಟ್ಟಂ ಹೋತಿ, ಸೂಲೇನ ಪಹರನ್ತಸ್ಸ ಪಹಾರೋ ಠಾನಂ ನ ಲಭತಿ ಪರಿಗಲತಿ, ಮಚ್ಛಸೀಸಂ ಆಯತಂ ಪುಥುಲಂ, ಪಹಾರೋ ಠಾನಂ ಲಭತಿ, ಅವಿರಜ್ಝಿತ್ವಾ ಕಮ್ಮಕಾರಣಾ ಸುಕರಾ ಹೋತಿ, ತಸ್ಮಾ ಏವರೂಪಂ ಸೀಸಂ ಹೋತಿ.

೫೧೩. ವಿಧುರಂ ಸಾವಕಮಾಸಜ್ಜಾತಿ ವಿಧುರಂ ಸಾವಕಂ ಘಟ್ಟಯಿತ್ವಾ. ಪಚ್ಚತ್ತವೇದನಾತಿ ಸಯಮೇವ ಪಾಟಿಯೇಕ್ಕವೇದನಾಜನಕಾ. ಈದಿಸೋ ನಿರಯೋ ಆಸೀತಿ ಇಮಸ್ಮಿಂ ಠಾನೇ ನಿರಯೋ ದೇವದೂತಸುತ್ತೇನ ದೀಪೇತಬ್ಬೋ. ಕಣ್ಹ-ದುಕ್ಖಂ ನಿಗಚ್ಛಸೀತಿ ಕಾಳಕ-ಮಾರ, ದುಕ್ಖಂ ವಿನ್ದಿಸ್ಸಸಿ. ಮಜ್ಝೇ ಸರಸ್ಸಾತಿ ಮಹಾಸಮುದ್ದಸ್ಸ ಮಜ್ಝೇ ಉದಕಂ ವತ್ಥುಂ ಕತ್ವಾ ನಿಬ್ಬತ್ತವಿಮಾನಾನಿ ಕಪ್ಪಟ್ಠಿತಿಕಾನಿ ಹೋನ್ತಿ, ತೇಸಂ ವೇಳುರಿಯಸ್ಸ ವಿಯ ವಣ್ಣೋ ಹೋತಿ, ಪಬ್ಬತಮತ್ಥಕೇ ಜಲಿತನಳಗ್ಗಿಕ್ಖನ್ಧೋ ವಿಯ ಚ ನೇಸಂ ಅಚ್ಚಿಯೋ ಜೋತನ್ತಿ, ಪಭಸ್ಸರಾ ಪಭಾಸಮ್ಪನ್ನಾ ಹೋನ್ತಿ, ತೇಸು ವಿಮಾನೇಸು ನೀಲಭೇದಾದಿವಸೇನ ನಾನತ್ತವಣ್ಣಾ ಅಚ್ಛರಾ ನಚ್ಚನ್ತಿ. ಯೋ ಏತಮಭಿಜಾನಾತೀತಿ ಯೋ ಏತಂ ವಿಮಾನವತ್ಥುಂ ಜಾನಾತೀತಿ ಅತ್ಥೋ. ಏವಮೇತ್ಥ ವಿಮಾನಪೇತವತ್ಥುಕೇನೇವ ಅತ್ಥೋ ವೇದಿತಬ್ಬೋ. ಪಾದಙ್ಗುಟ್ಠೇನ ಕಮ್ಪಯೀತಿ ಇದಂ ಪಾಸಾದಕಮ್ಪನಸುತ್ತೇನ ದೀಪೇತಬ್ಬಂ. ಯೋ ವೇಜಯನ್ತಂ ಪಾಸಾದನ್ತಿ ಇದಂ ಚೂಳತಣ್ಹಾಸಙ್ಖಯವಿಮುತ್ತಿಸುತ್ತೇನ ದೀಪೇತಬ್ಬಂ. ಸಕ್ಕಂ ಸೋ ಪರಿಪುಚ್ಛತೀತಿ ಇದಮ್ಪಿ ತೇನೇವ ದೀಪೇತಬ್ಬಂ. ಸುಧಮ್ಮಾಯಾಭಿತೋ ಸಭನ್ತಿ ಸುಧಮ್ಮಸಭಾಯ ಸಮೀಪೇ, ಅಯಂ ಪನ ಬ್ರಹ್ಮಲೋಕೇ ಸುಧಮ್ಮಸಭಾವ, ನ ತಾವತಿಂಸಭವನೇ. ಸುಧಮ್ಮಸಭಾವಿರಹಿತೋ ಹಿ ದೇವಲೋಕೋ ನಾಮ ನತ್ಥಿ.

ಬ್ರಹ್ಮಲೋಕೇ ಪಭಸ್ಸರನ್ತಿ ಬ್ರಹ್ಮಲೋಕೇ ಮಹಾಮೋಗ್ಗಲ್ಲಾನಮಹಾಕಸ್ಸಪಾದೀಹಿ ಸಾವಕೇಹಿ ಸದ್ಧಿಂ ತಸ್ಸ ತೇಜೋಧಾತುಂ ಸಮಾಪಜ್ಜಿತ್ವಾ ನಿಸಿನ್ನಸ್ಸ ಭಗವತೋ ಓಭಾಸಂ. ಏಕಸ್ಮಿಞ್ಹಿ ಸಮಯೇ ಭಗವಾ ಬ್ರಹ್ಮಲೋಕೇ ಸುಧಮ್ಮಾಯ ದೇವಸಭಾಯ ಸನ್ನಿಪತಿತ್ವಾ, – ‘‘ಅತ್ಥಿ ನು ಖೋ ಕೋಚಿ ಸಮಣೋ ವಾ ಬ್ರಾಹ್ಮಣೋ ವಾ ಏವಂಮಹಿದ್ಧಿಕೋ. ಯೋ ಇಧ ಆಗನ್ತುಂ ಸಕ್ಕುಣೇಯ್ಯಾ’’ತಿ ಚಿನ್ತೇನ್ತಸ್ಸೇವ ಬ್ರಹ್ಮಗಣಸ್ಸ ಚಿತ್ತಮಞ್ಞಾಯ ತತ್ಥ ಗನ್ತ್ವಾ ಬ್ರಹ್ಮಗಣಸ್ಸ ಮತ್ಥಕೇ ನಿಸಿನ್ನೋ ತೇಜೋಧಾತುಂ ಸಮಾಪಜ್ಜಿತ್ವಾ ಮಹಾಮೋಗ್ಗಲ್ಲಾನಾದೀನಂ ಆಗಮನಂ ಚಿನ್ತೇಸಿ. ತೇಪಿ ಗನ್ತ್ವಾ ಸತ್ಥಾರಂ ವನ್ದಿತ್ವಾ ತೇಜೋಧಾತುಂ ಸಮಾಪಜ್ಜಿತ್ವಾ ಪಚ್ಚೇಕಂ ದಿಸಾಸು ನಿಸೀದಿಂಸು, ಸಕಲಬ್ರಹ್ಮಲೋಕೋ ಏಕೋಭಾಸೋ ಅಹೋಸಿ. ಸತ್ಥಾ ಚತುಸಚ್ಚಪ್ಪಕಾಸನಂ ಧಮ್ಮಂ ದೇಸೇಸಿ, ದೇಸನಾಪರಿಯೋಸಾನೇ ಅನೇಕಾನಿ ಬ್ರಹ್ಮಸಹಸ್ಸಾನಿ ಮಗ್ಗಫಲೇಸು ಪತಿಟ್ಠಹಿಂಸು. ತಂ ಸನ್ಧಾಯಿಮಾ ಗಾಥಾ ವುತ್ತಾ, ಸೋ ಪನಾಯಮತ್ಥೋ ಅಞ್ಞತರಬ್ರಹ್ಮಸುತ್ತೇನ ದೀಪೇತಬ್ಬೋ.

ವಿಮೋಕ್ಖೇನ ಅಫಸ್ಸಯೀತಿ ಝಾನವಿಮೋಕ್ಖೇನ ಫುಸಿ. ವನನ್ತಿ ಜಮ್ಬುದೀಪಂ. ಪುಬ್ಬವಿದೇಹಾನನ್ತಿ ಪುಬ್ಬವಿದೇಹಾನಞ್ಚ ದೀಪಂ. ಯೇ ಚ ಭೂಮಿಸಯಾ ನರಾತಿ ಭೂಮಿಸಯಾ ನರಾ ನಾಮ ಅಪರಗೋಯಾನಕಾ ಚ ಉತ್ತರಕುರುಕಾ ಚ. ತೇಪಿ ಸಬ್ಬೇ ಫುಸೀತಿ ವುತ್ತಂ ಹೋತಿ. ಅಯಂ ಪನ ಅತ್ಥೋ ನನ್ದೋಪನನ್ದದಮನೇನ ದೀಪೇತಬ್ಬೋ. ವತ್ಥು ವಿಸುದ್ಧಿಮಗ್ಗೇ ಇದ್ಧಿಕಥಾಯ ವಿತ್ಥಾರಿತಂ. ಅಪುಞ್ಞಂ ಪಸವೀತಿ ಅಪುಞ್ಞಂ ಪಟಿಲಭಿ. ಆಸಂ ಮಾ ಅಕಾಸಿ ಭಿಕ್ಖೂಸೂತಿ ಭಿಕ್ಖೂ ವಿಹೇಸೇಮೀತಿ ಏತಂ ಆಸಂ ಮಾ ಅಕಾಸಿ. ಸೇಸಂ ಸಬ್ಬತ್ಥ ಉತ್ತಾನಮೇವಾತಿ.

ಪಪಞ್ಚಸೂದನಿಯಾ ಮಜ್ಝಿಮನಿಕಾಯಟ್ಠಕಥಾಯ

ಮಾರತಜ್ಜನೀಯಸುತ್ತವಣ್ಣನಾ ನಿಟ್ಠಿತಾ.

ಪಞ್ಚಮವಗ್ಗವಣ್ಣನಾ ನಿಟ್ಠಿತಾ.