೧. ಸೀಸೂಪಚಾಲಾಥೇರೀಗಾಥಾವಣ್ಣನಾ

ಅಟ್ಠಕನಿಪಾತೇ ಭಿಕ್ಖುನೀ ಸೀಲಸಮ್ಪನ್ನಾತಿಆದಿಕಾ ಸೀಸೂಪಚಾಲಾಯ ಥೇರಿಯಾ ಗಾಥಾ. ಇಮಿಸ್ಸಾಪಿ ವತ್ಥು ಚಾಲಾಯ ಥೇರಿಯಾ ವತ್ಥುಮ್ಹಿ ವುತ್ತನಯಮೇವ. ಅಯಮ್ಪಿ ಹಿ ಆಯಸ್ಮತೋ ಧಮ್ಮಸೇನಾಪತಿಸ್ಸ ಪಬ್ಬಜಿತಭಾವಂ ಸುತ್ವಾ ಸಯಮ್ಪಿ ಉಸ್ಸಾಹಜಾತಾ ಪಬ್ಬಜಿತ್ವಾ ಕತಪುಬ್ಬಕಿಚ್ಚಾ ವಿಪಸ್ಸನಂ ಪಟ್ಠಪೇತ್ವಾ, ಘಟೇನ್ತೀ ವಾಯಮನ್ತೀ ನಚಿರಸ್ಸೇವ ಅರಹತ್ತಂ ಪಾಪುಣಿ. ಅರಹತ್ತಂ ಪತ್ವಾ ಫಲಸಮಾಪತ್ತಿಸುಖೇನ ವಿಹರನ್ತೀ ಏಕದಿವಸಂ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಕತಕಿಚ್ಚಾತಿ ಸೋಮನಸ್ಸಜಾತಾ ಉದಾನವಸೇನ –

೧೯೬. ‘‘ಭಿಕ್ಖುನೀ ಸೀಲಸಮ್ಪನ್ನಾ, ಇನ್ದ್ರಿಯೇಸು ಸುಸಂವುತಾ;

ಅಧಿಗಚ್ಛೇ ಪದಂ ಸನ್ತಂ, ಅಸೇಚನಕಮೋಜವ’’ನ್ತಿ. – ಗಾಥಮಾಹ;

ತತ್ಥ ಸೀಲಸಮ್ಪನ್ನಾತಿ ಪರಿಸುದ್ಧೇನ ಭಿಕ್ಖುನಿಸೀಲೇನ ಸಮನ್ನಾಗತಾ ಪರಿಪುಣ್ಣಾ. ಇನ್ದ್ರಿಯೇಸು ಸುಸಂವುತಾತಿ ಮನಚ್ಛಟ್ಠೇಸು ಇನ್ದ್ರಿಯೇಸು ಸುಟ್ಠು ಸಂವುತಾ, ರೂಪಾದಿಆರಮ್ಮಣೇ ಇಟ್ಠೇ ರಾಗಂ, ಅನಿಟ್ಠೇ ದೋಸಂ, ಅಸಮಪೇಕ್ಖನೇ ಮೋಹಞ್ಚ ಪಹಾಯ ಸುಟ್ಠು ಪಿಹಿತಿನ್ದ್ರಿಯಾ. ಅಸೇಚನಕಮೋಜವನ್ತಿ ಕೇನಚಿ ಅನಾಸಿತ್ತಕಂ ಓಜವನ್ತಂ ಸಭಾವಮಧುರಂ ಸಬ್ಬಸ್ಸಾಪಿ ಕಿಲೇಸರೋಗಸ್ಸ ವೂಪಸಮನೋಸಧಭೂತಂ ಅರಿಯಮಗ್ಗಂ, ನಿಬ್ಬಾನಮೇವ ವಾ. ಅರಿಯಮಗ್ಗಮ್ಪಿ ಹಿ ನಿಬ್ಬಾನತ್ಥಿಕೇಹಿ ಪಟಿಪಜ್ಜಿತಬ್ಬತೋ ಕಿಲೇಸಪರಿಳಾಹಾಭಾವತೋ ಚ ಪದಂ ಸನ್ತನ್ತಿ ವತ್ತುಂ ವಟ್ಟತಿ.

೧೯೭. ‘‘ತಾವತಿಂಸಾ ಚ ಯಾಮಾ ಚ, ತುಸಿತಾ ಚಾಪಿ ದೇವತಾ;

ನಿಮ್ಮಾನರತಿನೋ ದೇವಾ, ಯೇ ದೇವಾ ವಸವತ್ತಿನೋ;

ತತ್ಥ ಚಿತ್ತಂ ಪಣೀಧೇಹಿ, ಯತ್ಥ ತೇ ವುಸಿತಂ ಪುರೇ’’ತಿ. –

ಅಯಂ ಗಾಥಾ ಕಾಮಸಗ್ಗೇಸು ನಿಕನ್ತಿಂ ಉಪ್ಪಾದೇಹೀತಿ ತತ್ಥ ಉಯ್ಯೋಜನವಸೇನ ಥೇರಿಂ ಸಮಾಪತ್ತಿಯಾ ಚಾವೇತುಕಾಮೇನ ಮಾರೇನ ವುತ್ತಾ.

ತತ್ಥ ಸಹಪುಞ್ಞಕಾರಿನೋ ತೇತ್ತಿಂಸ ಜನಾ ಯತ್ಥ ಉಪಪನ್ನಾ, ತಂ ಠಾನಂ ತಾವತಿಂಸನ್ತಿ. ತತ್ಥ ನಿಬ್ಬತ್ತಾ ಸಬ್ಬೇಪಿ ದೇವಪುತ್ತಾ ತಾವತಿಂಸಾ. ಕೇಚಿ ಪನ ‘‘ತಾವತಿಂಸಾತಿ ತೇಸಂ ದೇವಾನಂ ನಾಮಮೇವಾ’’ತಿ ವದನ್ತಿ. ದ್ವೀಹಿ ದೇವಲೋಕೇಹಿ ವಿಸಿಟ್ಠಂ ದಿಬ್ಬಂ ಸುಖಂ ಯಾತಾ ಉಪಯಾತಾ ಸಮ್ಪನ್ನಾತಿ ಯಾಮಾ. ದಿಬ್ಬಾಯ ಸಮ್ಪತ್ತಿಯಾ ತುಟ್ಠಾ ಪಹಟ್ಠಾತಿ ತುಸಿತಾ. ಪಕತಿಪಟಿಯತ್ತಾರಮ್ಮಣತೋ ಅತಿರೇಕೇನ ರಮಿತುಕಾಮತಾಕಾಲೇ ಯಥಾರುಚಿತೇ ಭೋಗೇ ನಿಮ್ಮಿನಿತ್ವಾ ರಮನ್ತೀತಿ ನಿಮ್ಮಾನರತಿನೋ. ಚಿತ್ತರುಚಿಂ ಞತ್ವಾ ಪರೇಹಿ ನಿಮ್ಮಿತೇಸು ಭೋಗೇಸು ವಸಂ ವತ್ತೇನ್ತೀತಿ ವಸವತ್ತಿನೋ. ತತ್ಥ ಚಿತ್ತಂ ಪಣೀಧೇಹೀತಿ ತಸ್ಮಿಂ ತಾವತಿಂಸಾದಿಕೇ ದೇವನಿಕಾಯೇ ತವ ಚಿತ್ತಂ ಠಪೇಹಿ, ಉಪಪಜ್ಜನಾಯ ನಿಕನ್ತಿಂ ಕರೋಹಿ. ಚಾತುಮಹಾರಾಜಿಕಾನಂ ಭೋಗಾ ಇತರೇಹಿ ನಿಹೀನಾತಿ ಅಧಿಪ್ಪಾಯೇನ ತಾವತಿಂಸಾದಯೋವ ವುತ್ತಾ. ಯತ್ಥ ತೇ ವುಸಿತಂ ಪುರೇತಿ ಯೇಸು ದೇವನಿಕಾಯೇಸು ತಯಾ ಪುಬ್ಬೇ ವುತ್ಥಂ. ಅಯಂ ಕಿರ ಪುಬ್ಬೇ ದೇವೇಸು ಉಪ್ಪಜ್ಜನ್ತೀ, ತಾವತಿಂಸತೋ ಪಟ್ಠಾಯ ಪಞ್ಚಕಾಮಸಗ್ಗೇ ಸೋಧೇತ್ವಾ ಪುನ ಹೇಟ್ಠತೋ ಓತರನ್ತೀ, ತುಸಿತೇಸು ಠತ್ವಾ ತತೋ ಚವಿತ್ವಾ ಇದಾನಿ ಮನುಸ್ಸೇಸು ನಿಬ್ಬತ್ತಾ.

ತಂ ಸುತ್ವಾ ಥೇರೀ – ‘‘ತಿಟ್ಠತು, ಮಾರ, ತಯಾ ವುತ್ತಕಾಮಲೋಕೋ. ಅಞ್ಞೋಪಿ ಸಬ್ಬೋ ಲೋಕೋ ರಾಗಗ್ಗಿಆದೀಹಿ ಆದಿತ್ತೋ ಸಮ್ಪಜ್ಜಲಿತೋ. ನ ತತ್ಥ ವಿಞ್ಞೂನಂ ಚಿತ್ತಂ ರಮತೀ’’ತಿ ಕಾಮತೋ ಚ ಲೋಕತೋ ಚ ಅತ್ತನೋ ವಿನಿವತ್ತಿತಮಾನಸತಂ ದಸ್ಸೇತ್ವಾ ಮಾರಂ ತಜ್ಜೇನ್ತೀ –

೧೯೮. ಯಾಮಾ ಚ‘‘ತಾವತಿಂಸಾ ಚ ಯಾಮಾ ಚ, ತುಸಿತಾ ಚಾಪಿ ದೇವತಾ;

ನಿಮ್ಮಾನರತಿನೋ ದೇವಾ, ಯೇ ದೇವಾ ವಸವತ್ತಿನೋ.

೧೯೯. ‘‘ಕಾಲಂ ಕಾಲಂ ಭವಾ ಭವಂ, ಸಕ್ಕಾಯಸ್ಮಿಂ ಪುರಕ್ಖತಾ;

ಅವೀತಿವತ್ತಾ ಸಕ್ಕಾಯಂ, ಜಾತಿಮರಣಸಾರಿನೋ.

೨೦೦. ‘‘ಸಬ್ಬೋ ಆದೀಪಿತೋ ಲೋಕೋ, ಸಬ್ಬೋ ಲೋಕೋ ಪದೀಪಿತೋ;

ಸಬ್ಬೋ ಪಜ್ಜಲಿತೋ ಲೋಕೋ, ಸಬ್ಬೋ ಲೋಕೋ ಪಕಮ್ಪಿತೋ.

೨೦೧. ‘‘ಅಕಮ್ಪಿಯಂ ಅತುಲಿಯಂ, ಅಪುಥುಜ್ಜನಸೇವಿತಂ;

ಬುದ್ಧೋ ಧಮ್ಮಮದೇಸೇಸಿ, ತತ್ಥ ಮೇ ನಿರತೋ ಮನೋ.

೨೦೨. ‘‘ತಸ್ಸಾಹಂ ವಚನಂ ಸುತ್ವಾ, ವಿಹರಿಂ ಸಾಸನೇ ರತಾ;

ತಿಸ್ಸೋ ವಿಜ್ಜಾ ಅನುಪ್ಪತ್ತಾ, ಕತಂ ಬುದ್ಧಸ್ಸ ಸಾಸನಂ.

೨೦೩. ‘‘ಸಬ್ಬತ್ಥ ವಿಹತಾ ನನ್ದೀ, ತಮೋಕ್ಖನ್ಧೋ ಪದಾಲಿತೋ;

ಏವಂ ಜಾನಾಹಿ ಪಾಪಿಮ, ನಿಹತೋ ತ್ವಮಸಿ ಅನ್ತಕಾ’’ತಿ. –

ಇಮಾ ಗಾಥಾ ಅಭಾಸಿ.

ತತ್ಥ ಕಾಲಂ ಕಾಲನ್ತಿ ತಂ ತಂ ಕಾಲಂ. ಭವಾ ಭವನ್ತಿ ಭವತೋ ಭವಂ. ಸಕ್ಕಾಯಸ್ಮಿನ್ತಿ ಖನ್ಧಪಞ್ಚಕೇ. ಪುರಕ್ಖತಾತಿ ಪುರಕ್ಖಾರಕಾರಿನೋ. ಇದಂ ವುತ್ತಂ ಹೋತಿ – ಮಾರ, ತಯಾ ವುತ್ತಾ ತಾವತಿಂಸಾದಯೋ ದೇವಾ ಭವತೋ ಭವಂ ಉಪಗಚ್ಛನ್ತಾ ಅನಿಚ್ಚತಾದಿಅನೇಕಾದೀನವಾಕುಲೇ ಸಕ್ಕಾಯೇ ಪತಿಟ್ಠಿತಾ, ತಸ್ಮಾ ತಸ್ಮಿಂ ಭವೇ ಉಪ್ಪತ್ತಿಕಾಲೇ, ವೇಮಜ್ಝಕಾಲೇ, ಪರಿಯೋಸಾನಕಾಲೇತಿ ತಸ್ಮಿಂ ತಸ್ಮಿಂ ಕಾಲೇ ಸಕ್ಕಾಯಮೇವ ಪುರಕ್ಖತ್ವಾ ಠಿತಾ. ತತೋ ಏವ ಅವೀತಿವತ್ತಾ ಸಕ್ಕಾಯಂ ನಿಸ್ಸರಣಾಭಿಮುಖಾ ಅಹುತ್ವಾ ಸಕ್ಕಾಯತೀರಮೇವ ಅನುಪರಿಧಾವನ್ತಾ ಜಾತಿಮರಣಸಾರಿನೋ ರಾಗಾದೀಹಿ ಅನುಗತತ್ತಾ ಪುನಪ್ಪುನಂ ಜಾತಿಮರಣಮೇವ ಅನುಸ್ಸರನ್ತಿ, ತತೋ ನ ವಿಮುಚ್ಚನ್ತೀತಿ.

ಸಬ್ಬೋ ಆದೀಪಿತೋ ಲೋಕೋತಿ, ಮಾರ, ನ ಕೇವಲಂ ತಯಾ ವುತ್ತಕಾಮಲೋಕೋಯೇವ ಧಾತುತ್ತಯಸಞ್ಞಿತೋ, ಸಬ್ಬೋಪಿ ಲೋಕೋ ರಾಗಗ್ಗಿಆದೀಹಿ ಏಕಾದಸಹಿ ಆದಿತ್ತೋ. ತೇಹಿಯೇವ ಪುನಪ್ಪುನಂ ಆದೀಪಿತತಾಯ ಪದೀಪಿತೋ. ನಿರನ್ತರಂ ಏಕಜಾಲೀಭೂತತಾಯ ಪಜ್ಜಲಿತೋ. ತಣ್ಹಾಯ ಸಬ್ಬಕಿಲೇಸೇಹಿ ಚ ಇತೋ ಚಿತೋ ಚ ಕಮ್ಪಿತತಾಯ ಚಲಿತತಾಯ ಪಕಮ್ಪಿತೋ.

ಏವಂ ಆದಿತ್ತೇ ಪಜ್ಜಲಿತೇ ಪಕಮ್ಪಿತೇ ಚ ಲೋಕೇ ಕೇನಚಿಪಿ ಕಮ್ಪೇತುಂ ಚಾಲೇತುಂ ಅಸಕ್ಕುಣೇಯ್ಯತಾಯ ಅಕಮ್ಪಿಯಂ, ಗುಣತೋ ‘‘ಏತ್ತಕೋ’’ತಿ ತುಲೇತುಂ ಅಸಕ್ಕುಣೇಯ್ಯತಾಯ ಅತ್ತನಾ ಸದಿಸಸ್ಸ ಅಭಾವತೋ ಚ ಅತುಲಿಯಂ. ಬುದ್ಧಾದೀಹಿ ಅರಿಯೇಹಿ ಏವ ಗೋಚರಭಾವನಾಭಿಗಮತೋ ಸೇವಿತತ್ತಾ ಅಪುಥುಜ್ಜನಸೇವಿತಂ. ಬುದ್ಧೋ ಭಗವಾ ಮಗ್ಗಫಲನಿಬ್ಬಾನಪ್ಪಭೇದಂ ನವವಿಧಂ ಲೋಕುತ್ತರಧಮ್ಮಂ ಮಹಾಕರುಣಾಯ ಸಞ್ಚೋದಿತಮಾನಸೋ ಅದೇಸೇಸಿ ಸದೇವಕಸ್ಸ ಲೋಕಸ್ಸ ಕಥೇಸಿ ಪವೇದೇಸಿ. ತತ್ಥ ತಸ್ಮಿಂ ಅರಿಯಧಮ್ಮೇ ಮಯ್ಹಂ ಮನೋ ನಿರತೋ ಅಭಿರತೋ, ನ ತತೋ ವಿನಿವತ್ತತೀತಿ ಅತ್ಥೋ. ಸೇಸಂ ಹೇಟ್ಠಾ ವುತ್ತನಯಮೇವ.

ಸೀಸೂಪಚಾಲಾಥೇರೀಗಾಥಾವಣ್ಣನಾ ನಿಟ್ಠಿತಾ.

ಅಟ್ಠಕನಿಪಾತವಣ್ಣನಾ ನಿಟ್ಠಿತಾ.