೧. ಸುಭಾಜೀವಕಮ್ಬವನಿಕಾಥೇರೀಗಾಥಾವಣ್ಣನಾ

ತಿಂಸನಿಪಾತೇ ಜೀವಕಮ್ಬವನಂ ರಮ್ಮನ್ತಿಆದಿಕಾ ಸುಭಾಯ ಜೀವಕಮ್ಬವನಿಕಾಯ ಥೇರಿಯಾ ಗಾಥಾ. ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರಾ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಂ ಕುಸಲಂ ಉಪಚಿನನ್ತೀ, ಸಮ್ಭಾವಿತಕುಸಲಮೂಲಾ ಅನುಕ್ಕಮೇನ ಪರಿಬ್ರೂಹಿತವಿಮೋಕ್ಖಸಮ್ಭಾರಾ ಪರಿಪಕ್ಕಞಾಣಾ ಹುತ್ವಾ, ಇಮಸ್ಮಿಂ ಬುದ್ಧುಪ್ಪಾದೇ ರಾಜಗಹೇ ಬ್ರಾಹ್ಮಣಮಹಾಸಾಲಕುಲೇ ನಿಬ್ಬತ್ತಿ, ಸುಭಾತಿಸ್ಸಾ ನಾಮಮಹೋಸಿ. ತಸ್ಸಾ ಕಿರ ಸರೀರಾವಯವಾ ಸೋಭನವಣ್ಣಯುತ್ತಾ ಅಹೇಸುಂ, ತಸ್ಮಾ ಸುಭಾತಿ ಅನ್ವತ್ಥಮೇವ ನಾಮಂ ಜಾತಂ. ಸಾ ಸತ್ಥು ರಾಜಗಹಪ್ಪವೇಸನೇ ಪಟಿಲದ್ಧಸದ್ಧಾ ಉಪಾಸಿಕಾ ಹುತ್ವಾ ಅಪರಭಾಗೇ ಸಂಸಾರೇ ಜಾತಸಂವೇಗಾ ಕಾಮೇಸು ಆದೀನವಂ ದಿಸ್ವಾ ನೇಕ್ಖಮ್ಮಞ್ಚ ಖೇಮತೋ ಸಲ್ಲಕ್ಖನ್ತೀ ಮಹಾಪಜಾಪತಿಯಾ ಗೋತಮಿಯಾ ಸನ್ತಿಕೇ ಪಬ್ಬಜಿತ್ವಾ ವಿಪಸ್ಸನಾಯ ಕಮ್ಮಂ ಕರೋನ್ತೀ ಕತಿಪಾಹೇನೇವ ಅನಾಗಾಮಿಫಲೇ ಪತಿಟ್ಠಾಸಿ.

ಅಥ ನಂ ಏಕದಿವಸಂ ಅಞ್ಞತರೋ ರಾಜಗಹವಾಸೀ ಧುತ್ತಪುರಿಸೋ ತರುಣೋ ಪಠಮಯೋಬ್ಬನೇ ಠಿತೋ ಜೀವಕಮ್ಬವನೇ ದಿವಾವಿಹಾರಾಯ ಗಚ್ಛನ್ತಿಂ ದಿಸ್ವಾ ಪಟಿಬದ್ಧಚಿತ್ತೋ ಹುತ್ವಾ ಮಗ್ಗಂ ಓವರನ್ತೋ ಕಾಮೇಹಿ ನಿಮನ್ತೇಸಿ. ಸಾ ತಸ್ಸ ನಾನಪ್ಪಕಾರೇಹಿ ಕಾಮಾನಂ ಆದೀನವಂ ಅತ್ತನೋ ಚ ನೇಕ್ಖಮ್ಮಜ್ಝಾಸಯಂ ಪವೇದೇನ್ತೀ ಧಮ್ಮಂ ಕಥೇಸಿ. ಸೋ ಧಮ್ಮಕಥಂ ಸುತ್ವಾಪಿ ನ ಪಟಿಕ್ಕಮತಿ, ನಿಬನ್ಧತಿಯೇವ. ಥೇರೀ ನಂ ಅತ್ತನೋ ವಚನೇ ಅತಿಟ್ಠನ್ತಂ ಅಕ್ಖಿಮ್ಹಿ ಚ ಅಭಿರತ್ತಂ ದಿಸ್ವಾ, ‘‘ಹನ್ದ, ತಯಾ ಸಮ್ಭಾವಿತಂ ಅಕ್ಖಿ’’ನ್ತಿ ಅತ್ತನೋ ಏಕಂ ಅಕ್ಖಿಂ ಉಪ್ಪಾಟೇತ್ವಾ ತಸ್ಸ ಉಪನೇಸಿ. ತತೋ ಸೋ ಪುರಿಸೋ ಸನ್ತಾಸೋ ಸಂವೇಗಜಾತೋ ತತ್ಥ ವಿಗತರಾಗೋವ ಹುತ್ವಾ ಥೇರಿಂ ಖಮಾಪೇತ್ವಾ ಗತೋ. ಥೇರೀ ಸತ್ಥು ಸನ್ತಿಕಂ ಅಗಮಾಸಿ. ಸತ್ಥುನೋ ಸಹ ದಸ್ಸನೇನೇವಸ್ಸಾ ಅಕ್ಖಿ ಪಟಿಪಾಕತಿಕಂ ಅಹೋಸಿ. ತತೋ ಸಾ ಬುದ್ಧಗತಾಯ ಪೀತಿಯಾ ನಿರನ್ತರಂ ಫುಟಾ ಹುತ್ವಾ ಅಟ್ಠಾಸಿ. ಸತ್ಥಾ ತಸ್ಸಾ ಚಿತ್ತಾಚಾರಂ ಞತ್ವಾ ಧಮ್ಮಂ ದೇಸೇತ್ವಾ ಅಗ್ಗಮಗ್ಗತ್ಥಾಯ ಕಮ್ಮಟ್ಠಾನಂ ಆಚಿಕ್ಖಿ. ಸಾ ಪೀತಿಂ ವಿಕ್ಖಮ್ಭೇತ್ವಾ ತಾವದೇವ ವಿಪಸ್ಸನಂ ವಡ್ಢೇತ್ವಾ ಸಹ ಪಟಿಸಮ್ಭಿದಾಹಿ ಅರಹತ್ತಂ ಪಾಪುಣಿ. ಅರಹತ್ತಂ ಪನ ಪತ್ವಾ ಫಲಸುಖೇನ ನಿಬ್ಬಾನಸುಖೇನ ವಿಹರನ್ತೀ ಅತ್ತನೋ ಪಟಿಪತ್ತಿಂ ಪಚ್ಚವೇಕ್ಖಿತ್ವಾ ಅತ್ತನಾ ತೇನ ಚ ಧುತ್ತಪುರಿಸೇನ ವುತ್ತಗಾಥಾ ಉದಾನವಸೇನ –

೩೬೮. ‘‘ಜೀವಕಮ್ಬವನಂ ರಮ್ಮಂ, ಗಚ್ಛನ್ತಿಂ ಭಿಕ್ಖುನಿಂ ಸುಭಂ;

ಧುತ್ತಕೋ ಸನ್ನಿವಾರೇಸಿ, ತಮೇನಂ ಅಬ್ರವೀ ಸುಭಾ.

೩೬೯. ‘‘ಕಿಂ ತೇ ಅಪರಾಧಿತಂ ಮಯಾ, ಯಂ ಮಂ ಓವರಿಯಾನ ತಿಟ್ಠಸಿ;

ನ ಹಿ ಪಬ್ಬಜಿತಾಯ ಆವುಸೋ, ಪುರಿಸೋ ಸಮ್ಫುಸನಾಯ ಕಪ್ಪತಿ.

೩೭೦. ‘‘ಗರುಕೇ ಮಮ ಸತ್ಥುಸಾಸನೇ, ಯಾ ಸಿಕ್ಖಾ ಸುಗತೇನ ದೇಸಿತಾ;

ಪರಿಸುದ್ಧಪದಂ ಅನಙ್ಗಣಂ, ಕಿಂ ಮಂ ಓವರಿಯಾನ ತಿಟ್ಠಸಿ.

೩೭೧. ‘‘ಆವಿಲಚಿತ್ತೋ ಅನಾವಿಲಂ, ಸರಜೋ ವೀತರಜಂ ಅನಙ್ಗಣಂ;

ಸಬ್ಬತ್ಥ ವಿಮುತ್ತಮಾನಸಂ, ಕಿಂ ಮಂ ಓವರಿಯಾನ ತಿಟ್ಠಸಿ.

೩೭೨. ‘‘ದಹರಾ ಚ ಅಪಾಪಿಕಾ ಚಸಿ, ಕಿಂ ತೇ ಪಬ್ಬಜ್ಜಾ ಕರಿಸ್ಸತಿ;

ನಿಕ್ಖಿಪ ಕಾಸಾಯಚೀವರಂ, ಏಹಿ ರಮಾಮ ಸುಪುಪ್ಫಿತೇ ವನೇ.

೩೭೩. ‘‘ಮಧುರಞ್ಚ ಪವನ್ತಿ ಸಬ್ಬಸೋ, ಕುಸುಮರಜೇನ ಸಮುಟ್ಠಿತಾ ದುಮಾ;

ಪಠಮವಸನ್ತೋ ಸುಖೋ ಉತು, ಏಹಿ ರಮಾಮ ಸುಪುಪ್ಫಿತೇ ವನೇ.

೩೭೪. ‘‘ಕುಸುಮಿತಸಿಖರಾ ಚ ಪಾದಪಾ, ಅಭಿಗಜ್ಜನ್ತಿವ ಮಾಲುತೇರಿತಾ;

ಕಾ ತುಯ್ಹಂ ರತಿ ಭವಿಸ್ಸತಿ, ಯದಿ ಏಕಾ ವನಮೋಗಹಿಸ್ಸಸಿ.

೩೭೫. ‘‘ವಾಳಮಿಗಸಙ್ಘಸೇವಿತಂ, ಕುಞ್ಜರಮತ್ತಕರೇಣುಲೋಳಿತಂ;

ಅಸಹಾಯಿಕಾ ಗನ್ತುಮಿಚ್ಛಸಿ, ರಹಿತಂ ಭಿಂಸನಕಂ ಮಹಾವನಂ.

೩೭೬. ‘‘ತಪನೀಯಕತಾವ ಧೀತಿಕಾ, ವಿಚರಸಿ ಚಿತ್ತಲತೇವ ಅಚ್ಛರಾ;

ಕಾಸಿಕಸುಖುಮೇಹಿ ವಗ್ಗುಭಿ, ಸೋಭಸೀ ಸುವಸನೇಹಿ ನೂಪಮೇ.

೩೭೭. ‘‘ಅಹಂ ತವ ವಸಾನುಗೋ ಸಿಯಂ, ಯದಿ ವಿಹರೇಮಸೇ ಕಾನನನ್ತರೇ;

ನ ಹಿ ಮತ್ಥಿ ತಯಾ ಪಿಯತ್ತರೋ, ಪಾಣೋ ಕಿನ್ನರಿಮನ್ದಲೋಚನೇ.

೩೭೮. ‘‘ಯದಿ ಮೇ ವಚನಂ ಕರಿಸ್ಸಸಿ, ಸುಖಿತಾ ಏಹಿ ಅಗಾರಮಾವಸ;

ಪಾಸಾದನಿವಾತವಾಸಿನೀ, ಪರಿಕಮ್ಮಂ ತೇ ಕರೋನ್ತು ನಾರಿಯೋ.

೩೭೯. ‘‘ಕಾಸಿಕಸುಖುಮಾನಿ ಧಾರಯ, ಅಭಿರೋಪೇಹಿ ಚ ಮಾಲವಣ್ಣಕಂ;

ಕಞ್ಚನಮಣಿಮುತ್ತಕಂ ಬಹುಂ, ವಿವಿಧಂ ಆಭರಣಂ ಕರೋಮಿ ತೇ.

೩೮೦. ‘‘ಸುಧೋತರಜಪಚ್ಛದಂ ಸುಭಂ, ಗೋನಕತೂಲಿಕಸನ್ಥತಂ ನವಂ;

ಅಭಿರುಹ ಸಯನಂ ಮಹಾರಹಂ, ಚನ್ದನಮಣ್ಡಿತಸಾರಗನ್ಧಿಕಂ.

೩೮೧. ‘‘ಉಪ್ಪಲಂ ಚುದಕಾ ಸಮುಗ್ಗತಂ, ಯಥಾ ತಂ ಅಮನುಸ್ಸಸೇವಿತಂ;

ಏವಂ ತ್ವಂ ಬ್ರಹ್ಮಚಾರಿನೀ, ಸಕೇಸಙ್ಗೇಸು ಜರಂ ಗಮಿಸ್ಸಸಿ.

೩೮೨. ‘‘ಕಿಂ ತೇ ಇಧ ಸಾರಸಮ್ಮತಂ, ಕುಣಪಪೂರಮ್ಹಿ ಸುಸಾನವಡ್ಢನೇ;

ಭೇದನಧಮ್ಮೇ ಕಳೇವರೇ, ಯಂ ದಿಸ್ವಾ ವಿಮನೋ ಉದಿಕ್ಖಸಿ.

೩೮೩. ‘‘ಅಕ್ಖೀನಿ ಚ ತೂರಿಯಾರಿವ, ಕಿನ್ನರಿಯಾರಿವ ಪಬ್ಬತನ್ತರೇ;

ತವ ಮೇ ನಯನಾನಿ ದಕ್ಖಿಯ, ಭಿಯ್ಯೋ ಕಾಮರತೀ ಪವಡ್ಢತಿ.

೩೮೪. ‘‘ಉಪ್ಪಲಸಿಖರೋಪಮಾನಿ ತೇ, ವಿಮಲೇ ಹಾಟಕಸನ್ನಿಭೇ ಮುಖೇ;

ತವ ಮೇ ನಯನಾನಿ ದಕ್ಖಿಯ, ಭಿಯ್ಯೋ ಕಾಮಗುಣೋ ಪವಡ್ಢತಿ.

೩೮೫. ‘‘ಅಪಿ ದೂರಗತಾ ಸರಮ್ಹಸೇ, ಆಯತಪಮ್ಹೇ ವಿಸುದ್ಧದಸ್ಸನೇ;

ನ ಹಿ ಮತ್ಥಿ ತಯಾ ಪಿಯತ್ತರೋ, ನಯನಾ ಕಿನ್ನರಿಮನ್ದಲೋಚನೇ.

೩೮೬. ‘‘ಅಪಥೇನ ಪಯಾತುಮಿಚ್ಛಸಿ, ಚನ್ದಂ ಕೀಳನಕಂ ಗವೇಸಸಿ;

ಮೇರುಂ ಲಙ್ಘೇತುಮಿಚ್ಛಸಿ, ಯೋ ತ್ವಂ ಬುದ್ಧಸುತಂ ಮಗ್ಗಯಸಿ.

೩೮೭. ‘‘ನತ್ಥಿ ಹಿ ಲೋಕೇ ಸದೇವಕೇ, ರಾಗೋ ಯತ್ಥಪಿ ದಾನಿ ಮೇ ಸಿಯಾ;

ನಪಿ ನಂ ಜಾನಾಮಿ ಕೀರಿಸೋ, ಅಥ ಮಗ್ಗೇನ ಹತೋ ಸಮೂಲಕೋ.

೩೮೮. ‘‘ಇಙ್ಗಾಲಕುಯಾವ ಉಜ್ಝಿತೋ, ವಿಸಪತ್ತೋರಿವ ಅಗ್ಗಿತೋ ಕತೋ;

ನಪಿ ನಂ ಪಸ್ಸಾಮಿ ಕೀರಿಸೋ, ಅಥ ಮಗ್ಗೇನ ಹತೋ ಸಮೂಲಕೋ.

೩೮೯. ‘‘ಯಸ್ಸಾ ಸಿಯಾ ಅಪಚ್ಚವೇಕ್ಖಿತಂ, ಸತ್ಥಾ ವಾ ಅನುಪಾಸಿತೋ ಸಿಯಾ;

ತ್ವಂ ತಾದಿಸಿಕಂ ಪಲೋಭಯ, ಜಾನನ್ತಿಂ ಸೋ ಇಮಂ ವಿಹಞ್ಞಸಿ.

೩೯೦. ‘‘ಮಯ್ಹಞ್ಹಿ ಅಕ್ಕುಟ್ಠವನ್ದಿತೇ, ಸುಖದುಕ್ಖೇ ಚ ಸತೀ ಉಪಟ್ಠಿತಾ;

ಸಙ್ಖತಮಸುಭನ್ತಿ ಜಾನಿಯ, ಸಬ್ಬತ್ಥೇವ ಮನೋ ನ ಲಿಮ್ಪತಿ.

೩೯೧. ‘‘ಸಾಹಂ ಸುಗತಸ್ಸ ಸಾವಿಕಾ, ಮಗ್ಗಟ್ಠಙ್ಗಿಕಯಾನಯಾಯಿನೀ;

ಉದ್ಧಟಸಲ್ಲಾ ಅನಾಸವಾ, ಸುಞ್ಞಾಗಾರಗತಾ ರಮಾಮಹಂ.

೩೯೨. ‘‘ದಿಟ್ಠಾ ಹಿ ಮಯಾ ಸುಚಿತ್ತಿತಾ, ಸೋಮ್ಭಾ ದಾರುಕಪಿಲ್ಲಕಾನಿ ವಾ;

ತನ್ತೀಹಿ ಚ ಖೀಲಕೇಹಿ ಚ, ವಿನಿಬದ್ಧಾ ವಿವಿಧಂ ಪನಚ್ಚಕಾ.

೩೯೩. ‘‘ತಮ್ಹುದ್ಧಟೇ ತನ್ತಿಖೀಲಕೇ, ವಿಸ್ಸಟ್ಠೇ ವಿಕಲೇ ಪರಿಕ್ರಿತೇ;

ನ ವಿನ್ದೇಯ್ಯ ಖಣ್ಡಸೋ ಕತೇ, ಕಿಮ್ಹಿ ತತ್ಥ ಮನಂ ನಿವೇಸಯೇ.

೩೯೪. ‘‘ತಥೂಪಮಾ ದೇಹಕಾನಿ ಮಂ, ತೇಹಿ ಧಮ್ಮೇಹಿ ವಿನಾ ನ ವತ್ತನ್ತಿ;

ಧಮ್ಮೇಹಿ ವಿನಾ ನ ವತ್ತತಿ, ಕಿಮ್ಹಿ ತತ್ಥ ಮನಂ ನಿವೇಸಯೇ.

೩೯೫. ‘‘ಯಥಾ ಹರಿತಾಲೇನ ಮಕ್ಖಿತಂ, ಅದ್ದಸ ಚಿತ್ತಿಕಂ ಭಿತ್ತಿಯಾ ಕತಂ;

ತಮ್ಹಿ ತೇ ವಿಪರೀತದಸ್ಸನಂ, ಸಞ್ಞಾ ಮಾನುಸಿಕಾ ನಿರತ್ಥಿಕಾ.

೩೯೬. ‘‘ಮಾಯಂ ವಿಯ ಅಗ್ಗತೋ ಕತಂ, ಸುಪಿನನ್ತೇವ ಸುವಣ್ಣಪಾದಪಂ;

ಉಪಗಚ್ಛಸಿ ಅನ್ಧ ರಿತ್ತಕಂ, ಜನಮಜ್ಝೇರಿವ ರುಪ್ಪರೂಪಕಂ.

೩೯೭. ‘‘ವಟ್ಟನಿರಿವ ಕೋಟರೋಹಿತಾ, ಮಜ್ಝೇ ಪುಬ್ಬುಳಕಾ ಸಅಸ್ಸುಕಾ;

ಪೀಳಕೋಳಿಕಾ ಚೇತ್ಥ ಜಾಯತಿ, ವಿವಿಧಾ ಚಕ್ಖುವಿಧಾ ಚ ಪಿಣ್ಡಿತಾ.

೩೯೮. ‘‘ಉಪ್ಪಾಟಿಯ ಚಾರುದಸ್ಸನಾ, ನ ಚ ಪಜ್ಜಿತ್ಥ ಅಸಙ್ಗಮಾನಸಾ;

ಹನ್ದ ತೇ ಚಕ್ಖುಂ ಹರಸ್ಸು ತಂ, ತಸ್ಸ ನರಸ್ಸ ಅದಾಸಿ ತಾವದೇ.

೩೯೯. ‘‘ತಸ್ಸ ಚ ವಿರಮಾಸಿ ತಾವದೇ, ರಾಗೋ ತತ್ಥ ಖಮಾಪಯೀ ಚ ನಂ;

ಸೋತ್ಥಿ ಸಿಯಾ ಬ್ರಹ್ಮಚಾರಿನೀ, ನ ಪುನೋ ಏದಿಸಕಂ ಭವಿಸ್ಸತಿ.

೪೦೦. ‘‘ಆಸಾದಿಯ ಏದಿಸಂ ಜನಂ, ಅಗ್ಗಿಂ ಪಜ್ಜಲಿತಂವ ಲಿಙ್ಗಿಯ;

ಗಣ್ಹಿಯ ಆಸೀವಿಸಂ ವಿಯ, ಅಪಿ ನು ಸೋತ್ಥಿ ಸಿಯಾ ಖಮೇಹಿ ನೋ.

೪೦೧. ‘‘ಮುತ್ತಾ ಚ ತತೋ ಸಾ ಭಿಕ್ಖುನೀ, ಅಗಮೀ ಬುದ್ಧವರಸ್ಸ ಸನ್ತಿಕಂ;

ಪಸ್ಸಿಯ ವರಪುಞ್ಞಲಕ್ಖಣಂ, ಚಕ್ಖು ಆಸಿ ಯಥಾ ಪುರಾಣಕ’’ನ್ತಿ. –

ಇಮಾ ಗಾಥಾ ಪಚ್ಚುದಾಹಾಸಿ.

ತತ್ಥ ಜೀವಕಮ್ಬವನನ್ತಿ ಜೀವಕಸ್ಸ ಕೋಮಾರಭಚ್ಚಸ್ಸ ಅಮ್ಬವನಂ. ರಮ್ಮನ್ತಿ ರಮಣೀಯಂ. ತಂ ಕಿರ ಭೂಮಿಭಾಗಸಮ್ಪತ್ತಿಯಾ ಛಾಯೂದಕಸಮ್ಪತ್ತಿಯಾ ಚ ರುಕ್ಖಾನಂ ರೋಪಿತಾಕಾರೇನ ಅತಿವಿಯ ಮನುಞ್ಞಂ ಮನೋರಮಂ. ಗಚ್ಛನ್ತಿನ್ತಿ ಅಮ್ಬವನಂ ಉದ್ದಿಸ್ಸ ಗತಂ, ದಿವಾವಿಹಾರಾಯ ಉಪಗಚ್ಛನ್ತಿಂ. ಸುಭನ್ತಿ ಏವಂನಾಮಿಕಂ. ಧುತ್ತಕೋತಿ ಇತ್ಥಿಧುತ್ತೋ. ರಾಜಗಹವಾಸೀ ಕಿರೇಕೋ ಮಹಾವಿಭವಸ್ಸ ಸುವಣ್ಣಕಾರಸ್ಸ ಪುತ್ತೋ ಯುವಾ ಅಭಿರೂಪೋ ಇತ್ಥಿಧುತ್ತೋ ಪುರಿಸೋ ಮತ್ತೋ ವಿಚರತಿ. ಸೋ ತಂ ಪಟಿಪಥೇ ದಿಸ್ವಾ ಪಟಿಬದ್ಧಚಿತ್ತೋ ಮಗ್ಗಂ ಉಪರುನ್ಧಿತ್ವಾ ಅಟ್ಠಾಸಿ. ತೇನ ವುತ್ತಂ – ‘‘ಧುತ್ತಕೋ ಸನ್ನಿವಾರೇಸೀ’’ತಿ, ಮಮ ಗಮನಂ ನಿಸೇಧೇಸೀತಿ ಅತ್ಥೋ. ತಮೇನಂ ಅಬ್ರವೀ ಸುಭಾತಿ ತಮೇನಂ ನಿವಾರೇತ್ವಾ ಠಿತಂ ಧುತ್ತಂ ಸುಭಾ ಭಿಕ್ಖುನೀ ಕಥೇಸಿ. ಏತ್ಥ ಚ ‘‘ಗಚ್ಛನ್ತಿಂ ಭಿಕ್ಖುನಿಂ ಸುಭಂ, ಅಬ್ರವಿ ಸುಭಾ’’ತಿ ಚ ಅತ್ತಾನಮೇವ ಥೇರೀ ಅಞ್ಞಂ ವಿಯ ಕತ್ವಾ ವದತಿ. ಥೇರಿಯಾ ವುತ್ತಗಾಥಾನಂ ಸಮ್ಬನ್ಧದಸ್ಸನವಸೇನ ಸಙ್ಗೀತಿಕಾರೇಹಿ ಅಯಂ ಗಾಥಾ ವುತ್ತಾ.

‘‘ಅಬ್ರವೀ ಸುಭಾ’’ತಿ ವತ್ವಾ ತಸ್ಸಾ ವುತ್ತಾಕಾರದಸ್ಸನತ್ಥಂ ಆಹ ‘‘ಕಿಂ ತೇ ಅಪರಾಧಿತ’’ನ್ತಿಆದಿ. ತತ್ಥ ಕಿಂ ತೇ ಅಪರಾಧಿತಂ ಮಯಾತಿ ಕಿಂ ತುಯ್ಹಂ, ಆವುಸೋ, ಮಯಾ ಅಪರದ್ಧಂ. ಯಂ ಮಂ ಓವರಿಯಾನ ತಿಟ್ಠಸೀತಿ ಯೇನ ಅಪರಾಧೇನ ಮಂ ಗಚ್ಛನ್ತಿಂ ಓವರಿತ್ವಾ ಗಮನಂ ನಿಸೇಧೇತ್ವಾ ತಿಟ್ಠಸಿ, ಸೋ ನತ್ಥೇವಾತಿ ಅಧಿಪ್ಪಾಯೋ. ಅಥ ಇತ್ಥೀತಿಸಞ್ಞಾಯ ಏವಂ ಪಟಿಪಜ್ಜಸಿ, ಏವಮ್ಪಿ ನ ಯುತ್ತನ್ತಿ ದಸ್ಸೇನ್ತೀ ಆಹ – ‘‘ನ ಹಿ ಪಬ್ಬಜಿತಾಯ, ಆವುಸೋ, ಪುರಿಸೋ ಸಮ್ಫುಸನಾಯ ಕಪ್ಪತೀ’’ತಿ, ಆವುಸೋ ಸುವಣ್ಣಕಾರಪುತ್ತ, ಲೋಕಿಯಚಾರಿತ್ತೇನಪಿ ಪುರಿಸಸ್ಸ ಪಬ್ಬಜಿತಾನಂ ಸಮ್ಫುಸನಾಯ ನ ಕಪ್ಪತಿ, ಪಬ್ಬಜಿತಾಯ ಪನ ಪುರಿಸೋ ತಿರಚ್ಛಾನಗತೋಪಿ ಸಮ್ಫುಸನಾಯ ನ ಕಪ್ಪತಿ, ತಿಟ್ಠತು ತಾವ ಪುರಿಸಫುಸನಾ, ರಾಗವಸೇನಸ್ಸಾ ನಿಸ್ಸಗ್ಗಿಯೇನ ಪುರಿಸಸ್ಸ ನಿಸ್ಸಗ್ಗಿಯಸ್ಸಾಪಿ ಫುಸನಾ ನ ಕಪ್ಪತೇವ.

ತೇನಾಹ ‘‘ಗರುಕೇ ಮಮ ಸತ್ಥುಸಾಸನೇ’’ತಿಆದಿ. ತಸ್ಸತ್ಥೋ – ಗರುಕೇ ಪಾಸಾಣಚ್ಛತ್ತಂ ವಿಯ ಗರುಕಾತಬ್ಬೇ ಮಯ್ಹಂ ಸತ್ಥು ಸಾಸನೇ ಯಾ ಸಿಕ್ಖಾ ಭಿಕ್ಖುನಿಯೋ ಉದ್ದಿಸ್ಸ ಸುಗತೇನ ಸಮ್ಮಾಸಮ್ಬುದ್ಧೇನ ದೇಸಿತಾ ಪಞ್ಞತ್ತಾ. ತಾಹಿ ಪರಿಸುದ್ಧಪದಂ ಪರಿಸುದ್ಧಕುಸಲಕೋಟ್ಠಾಸಂ, ರಾಗಾದಿಅಙ್ಗಣಾನಂ ಸಬ್ಬಸೋ ಅಭಾವೇನ ಅನಙ್ಗಣಂ, ಏವಂಭೂತಂ ಮಂ ಗಚ್ಛನ್ತಿಂ ಕೇನ ಕಾರಣೇನ ಆವರಿತ್ವಾ ತಿಟ್ಠಸೀತಿ.

ಆವಿಲಚಿತ್ತೋತಿ ಚಿತ್ತಸ್ಸ ಆವಿಲಭಾವಕರಾನಂ ಕಾಮವಿತಕ್ಕಾದೀನಂ ವಸೇನ ಆವಿಲಚಿತ್ತೋ, ತ್ವಂ ತದಭಾವತೋ ಅನಾವಿಲಂ, ರಾಗರಜಾದೀನಂ ವಸೇನ ಸರಜೋ, ಸಾಙ್ಗಣೋ ತದಭಾವತೋ ವೀತರಜಂ ಅನಙ್ಗಣಂ ಸಬ್ಬತ್ಥ ಖನ್ಧಪಞ್ಚಕೇ ಸಮುಚ್ಛೇದವಿಮುತ್ತಿಯಾ ವಿಮುತ್ತಮಾನಸಂ, ಮಂ ಕಸ್ಮಾ ಓವರಿತ್ವಾ ತಿಟ್ಠಸೀತಿ?

ಏವಂ ಥೇರಿಯಾ ವುತ್ತೇ ಧುತ್ತಕೋ ಅತ್ತನೋ ಅಧಿಪ್ಪಾಯಂ ವಿಭಾವೇನ್ತೋ ‘‘ದಹರಾ ಚಾ’’ತಿಆದಿನಾ ದಸ ಗಾಥಾ ಅಭಾಸಿ. ತತ್ಥ ದಹರಾತಿ ತರುಣೀ ಪಠಮೇ ಯೋಬ್ಬನೇ ಠಿತಾ. ಅಪಾಪಿಕಾ ಚಸೀತಿ ರೂಪೇನ ಅಲಾಮಿಕಾ ಚ ಅಸಿ, ಉತ್ತಮರೂಪಧರಾ ಚಾಹೋಸೀತಿ ಅಧಿಪ್ಪಾಯೋ. ಕಿಂ ತೇ ಪಬ್ಬಜ್ಜಾ ಕರಿಸ್ಸತೀತಿ ತುಯ್ಹಂ ಏವಂ ಪಠಮವಯೇ ಠಿತಾಯ ರೂಪಸಮ್ಪನ್ನಾಯ ಪಬ್ಬಜ್ಜಾ ಕಿಂ ಕರಿಸ್ಸತಿ, ವುಡ್ಢಾಯ ಬೀಭಚ್ಛರೂಪಾಯ ವಾ ಪಬ್ಬಜಿತಬ್ಬನ್ತಿ ಅಧಿಪ್ಪಾಯೇನ ವದತಿ. ನಿಕ್ಖಿಪಾತಿ ಛಡ್ಡೇಹಿ. ‘‘ಉಕ್ಖಿಪಾ’’ತಿ ವಾ ಪಾಠೋ, ಅಪನೇಹೀತಿ ಅತ್ಥೋ.

ಮಧುರನ್ತಿ ಸುಭಂ, ಸುಗನ್ಧನ್ತಿ ಅತ್ಥೋ. ಪವನ್ತೀತಿ ವಾಯನ್ತಿ. ಸಬ್ಬಸೋತಿ ಸಮನ್ತತೋ. ಕುಸುಮರಜೇನ ಸಮುಟ್ಠಿತಾ ದುಮಾತಿ ಇಮೇ ರುಕ್ಖಾ ಮನ್ದವಾತೇನ ಸಮುಟ್ಠಹಮಾನಕುಸುಮರೇಣುಜಾತೇನ ಅತ್ತನೋ ಕುಸುಮರಜೇನ ಸಯಂ ಸಮುಟ್ಠಿತಾ ವಿಯ ಹುತ್ವಾ ಸಮನ್ತತೋ ಸುರಭೀ ವಾಯನ್ತಿ. ಪಠಮವಸನ್ತೋ ಸುಖೋ ಉತೂತಿ ಅಯಂ ಪಠಮೋ ವಸನ್ತಮಾಸೋ ಸುಖಸಮ್ಫಸ್ಸೋ ಚ ಉತು ವತ್ತತೀತಿ ಅತ್ಥೋ.

ಕುಸುಮಿತಸಿಖರಾತಿ ಸುಪುಪ್ಫಿತಗ್ಗಾ. ಅಭಿಗಜ್ಜನ್ತಿವ ಮಾಲುತೇರಿತಾತಿ ವಾತೇನ ಸಞ್ಚಲಿತಾ ಅಭಿಗಜ್ಜನ್ತಿವ ಅಭಿತ್ಥನಿತಾ ವಿಯ ತಿಟ್ಠನ್ತಿ. ಯದಿ ಏಕಾ ವನಮೋಗಹಿಸ್ಸಸೀತಿ ಸಚೇ ತ್ವಂ ಏಕಿಕಾ ವನಮೋಗಾಹಿಸ್ಸಸಿ, ಕಾ ನಾಮ ತೇ ತತ್ಥ ರತಿ ಭವಿಸ್ಸತೀತಿ ಅತ್ತನಾ ಬದ್ಧಸುಖಾಭಿರತ್ತತ್ತಾ ಏವಮಾಹ.

ವಾಳಮಿಗಸಙ್ಘಸೇವಿತನ್ತಿ ಸೀಹಬ್ಯಗ್ಘಾದಿವಾಳಮಿಗಸಮೂಹೇಹಿ ತತ್ಥ ತತ್ಥ ಉಪಸೇವಿತಂ. ಕುಞ್ಜರಮತ್ತಕರೇಣುಲೋಳಿತನ್ತಿ ಮತ್ತಕುಞ್ಜರೇಹಿ ಹತ್ಥಿನೀಹಿ ಚ ಮಿಗಾನಂ ಚಿತ್ತತಾಪನೇನ ರುಕ್ಖಗಚ್ಛಾದೀನಂ ಸಾಖಾಭಞ್ಜನೇನ ಚ ಆಲೋಳಿತಪದೇಸಂ. ಕಿಞ್ಚಾಪಿ ತಸ್ಮಿಂ ವನೇ ಈದಿಸಂ ತದಾ ನತ್ಥಿ, ವನಂ ನಾಮ ಏವರೂಪನ್ತಿ ತಂ ಭಿಂಸಾಪೇತುಕಾಮೋ ಏವಮಾಹ. ರಹಿತನ್ತಿ ಜನರಹಿತಂ ವಿಜನಂ. ಭಿಂಸನಕನ್ತಿ ಭಯಜನಕಂ.

ತಪನೀಯಕತಾವ ಧೀತಿಕಾತಿ ರತ್ತಸುವಣ್ಣೇನ ವಿಚರಿತಾ ಧೀತಲಿಕಾ ವಿಯ ಸುಕುಸಲೇನ ಯನ್ತಾಚರಿಯೇನ ಯನ್ತಯೋಗವಸೇನ ಸಜ್ಜಿತಾ ಸುವಣ್ಣಪಟಿಮಾ ವಿಯ ವಿಚರಸಿ, ಇದಾನೇವ ಇತೋ ಚಿತೋ ಚ ಸಞ್ಚರಸಿ. ಚಿತ್ತಲತೇವ ಅಚ್ಛರಾತಿ ಚಿತ್ತಲತಾನಾಮಕೇ ಉಯ್ಯಾನೇ ದೇವಚ್ಛರಾ ವಿಯ. ಕಾಸಿಕಸುಖುಮೇಹೀತಿ ಕಾಸಿರಟ್ಠೇ ಉಪ್ಪನ್ನೇಹಿ ಅತಿವಿಯ ಸುಖುಮೇಹಿ. ವಗ್ಗುಭೀತಿ ಸಿನಿದ್ಧಮಟ್ಠೇಹಿ. ಸೋಭಸೀ ಸುವಸನೇಹಿ ನೂಪಮೇತಿ ನಿವಾಸನಪಾರುಪನವತ್ಥೇಹಿ ಅನುಪಮೇ ಉಪಮಾರಹಿತೇ ತ್ವಂ ಇದಾನಿ ಮೇ ವಸಾನುಗೋ ಸೋಭಸೀತಿ ಭಾವಿನಂ ಅತ್ತನೋ ಅಧಿಪ್ಪಾಯವಸೇನ ಏಕನ್ತಿಕಂ ವತ್ತಮಾನಂ ವಿಯ ಕತ್ವಾ ವದತಿ.

ಅಹಂ ತವ ವಸಾನುಗೋ ಸಿಯನ್ತಿ ಅಹಮ್ಪಿ ತುಯ್ಹಂ ವಸಾನುಗೋ ಕಿಂಕಾರಪಟಿಸ್ಸಾವೀ ಭವೇಯ್ಯಂ. ಯದಿ ವಿಹರೇಮಸೇ ಕಾನನನ್ತರೇತಿ ಯದಿ ಮಯಂ ಉಭೋಪಿ ವನನ್ತರೇ ಸಹ ವಸಾಮ ರಮಾಮ. ನ ಹಿ ಮತ್ಥಿ ತಯಾ ಪಿಯತ್ತರೋತಿ ವಸಾನುಗಭಾವಸ್ಸ ಕಾರಣಮಾಹ. ಪಾಣೋತಿ ಸತ್ತೋ, ಅಞ್ಞೋ ಕೋಚಿಪಿ ಸತ್ತೋ ತಯಾ ಪಿಯತರೋ ಮಯ್ಹಂ ನ ಹಿ ಅತ್ಥೀತಿ ಅತ್ಥೋ. ಅಥ ವಾ ಪಾಣೋತಿ ಅತ್ತನೋ ಜೀವಿತಂ ಸನ್ಧಾಯ ವದತಿ, ಮಯ್ಹಂ ಜೀವಿತಂ ತಯಾ ಪಿಯತರಂ ನ ಹಿ ಅತ್ಥೀತಿ ಅತ್ಥೋ. ಕಿನ್ನರಿಮನ್ದಲೋಚನೇತಿ ಕಿನ್ನರಿಯಾ ವಿಯ ಮನ್ದಪುಥುವಿಲೋಚನೇ.

ಯದಿ ಮೇ ವಚನಂ ಕರಿಸ್ಸಸಿ, ಸುಖಿತಾ ಏಹಿ ಅಗಾರಮಾವಸಾತಿ ಸಚೇ ತ್ವಂ ಮಮ ವಚನಂ ಕರಿಸ್ಸಸಿ, ಏಕಾಸನಂ ಏಕಸೇಯ್ಯಂ ಬ್ರಹ್ಮಚರಿಯದುಕ್ಖಂ ಪಹಾಯ ಏಹಿ ಕಾಮಭೋಗೇಹಿ ಸುಖಿತಾ ಹುತ್ವಾ ಅಗಾರಂ ಅಜ್ಝಾವಸ. ‘‘ಸುಖಿತಾ ಹೇತಿ ಅಗಾರಮಾವಸನ್ತೀ’’ತಿ ಕೇಚಿ ಪಠನ್ತಿ, ತೇಸಂ ಸುಖಿತಾ ಭವಿಸ್ಸತಿ, ಅಗಾರಂ ಅಜ್ಝಾವಸನ್ತೀತಿ ಅತ್ಥೋ. ಪಾಸಾದನಿವಾತವಾಸಿನೀತಿ ನಿವಾತೇಸು ಪಾಸಾದೇಸು ವಾಸಿನೀ. ‘‘ಪಾಸಾದವಿಮಾನವಾಸಿನೀ’’ತಿ ಚ ಪಾಠೋ, ವಿಮಾನಸದಿಸೇಸು ಪಾಸಾದೇಸು ವಾಸಿನೀತಿ ಅತ್ಥೋ. ಪರಿಕಮ್ಮನ್ತಿ ವೇಯ್ಯಾವಚ್ಚಂ.

ಧಾರಯಾತಿ ಪರಿದಹ, ನಿವಾಸೇಹಿ ಚೇವ ಉತ್ತರಿಯಞ್ಚ ಕರೋಹಿ. ಅಭಿರೋಪೇಹೀತಿ ಮಣ್ಡನವಿಭೂಸನವಸೇನ ವಾ ಸರೀರಂ ಆರೋಪಯ, ಅಲಙ್ಕರೋಹೀತಿ ಅತ್ಥೋ. ಮಾಲವಣ್ಣಕನ್ತಿ ಮಾಲಞ್ಚೇವ ಗನ್ಧವಿಲೇಪನಞ್ಚ. ಕಞ್ಚನಮಣಿಮುತ್ತಕನ್ತಿ ಕಞ್ಚನೇನ ಮಣಿಮುತ್ತಾಹಿ ಚ ಯುತ್ತಂ, ಸುವಣ್ಣಮಯಮಣಿಮುತ್ತಾಹಿ ಖಚಿತನ್ತಿ ಅತ್ಥೋ. ಬಹುನ್ತಿ ಹತ್ಥೂಪಗಾದಿಭೇದತೋ ಬಹುಪ್ಪಕಾರಂ. ವಿವಿಧನ್ತಿ ಕರಣವಿಕತಿಯಾ ನಾನಾವಿಧಂ.

ಸುಧೋತರಜಪಚ್ಛದನ್ತಿ ಸುಧೋತತಾಯ ಪವಾಹಿತರಜಂ ಉತ್ತರಚ್ಛದಂ. ಸುಭನ್ತಿ ಸೋಭನಂ. ಗೋನಕತೂಲಿಕಸನ್ಥತನ್ತಿ ದೀಘಲೋಮಕಾಳಕೋಜವೇನ ಚೇವ ಹಂಸಲೋಮಾದಿಪುಣ್ಣಾಯ ತೂಲಿಕಾಯ ಚ ಸನ್ಥತಂ. ನವನ್ತಿ ಅಭಿನವಂ. ಮಹಾರಹನ್ತಿ ಮಹಗ್ಘಂ. ಚನ್ದನಮಣ್ಡಿತಸಾರಗನ್ಧಿಕನ್ತಿ ಗೋಸೀಸಕಾದಿಸಾರಚನ್ದನೇನ ಮಣ್ಡಿತತಾಯ ಸುರಭಿಗನ್ಧಿಕಂ, ಏವರೂಪಂ ಸಯನಮಾರುಹ, ತಂ ಆರುಹಿತ್ವಾ ಯಥಾಸುಖಂ ಸಯಾಹಿ ಚೇವ ನಿಸೀದ ಚಾತಿ ಅತ್ಥೋ.

ಉಪ್ಪಲಂ ಚುದಕಾ ಸಮುಗ್ಗತನ್ತಿ ಚ-ಕಾರೋ ನಿಪಾತಮತ್ತಂ, ಉದಕತೋ ಉಗ್ಗತಂ ಉಟ್ಠಿತಂ ಅಚ್ಚುಗ್ಗಮ್ಮ ಠಿತಂ ಸುಫುಲ್ಲಮುಪ್ಪಲಂ. ಯಥಾ ತಂ ಅಮನುಸ್ಸಸೇವಿತನ್ತಿ ತಞ್ಚ ರಕ್ಖಸಪರಿಗ್ಗಹಿತಾಯ ಪೋಕ್ಖರಣಿಯಾ ಜಾತತ್ತಾ ನಿಮ್ಮನುಸ್ಸೇಹಿ ಸೇವಿತಂ ಕೇನಚಿ ಅಪರಿಭುತ್ತಮೇವ ಭವೇಯ್ಯ. ಏವಂ ತ್ವಂ ಬ್ರಹ್ಮಚಾರಿನೀತಿ ಏವಮೇವ ತಂ ಸುಟ್ಠು ಫುಲ್ಲಮುಪ್ಪಲಂ ವಿಯ ತುವಂ ಬ್ರಹ್ಮಚಾರಿನೀ. ಸಕೇಸಙ್ಗೇಸು ಅತ್ತನೋ ಸರೀರಾವಯವೇಸು ಕೇನಚಿ ಅಪರಿಭುತ್ತೇಸುಯೇವ ಜರಂ ಗಮಿಸ್ಸಸಿ, ಮುಧಾಯೇವ ಜರಾಜಿಣ್ಣಾ ಭವಿಸ್ಸಸಿ.

ಏವಂ ಧುತ್ತಕೇನ ಅತ್ತನೋ ಅಧಿಪ್ಪಾಯೇ ಪಕಾಸಿತೇ ಥೇರೀ ಸರೀರಸಭಾವವಿಭಾವನೇನ ತಂ ತತ್ಥ ವಿಚ್ಛಿನ್ದೇನ್ತೀ ‘‘ಕಿಂ ತೇ ಇಧಾ’’ತಿ ಗಾಥಮಾಹ. ತಸ್ಸತ್ಥೋ – ಆವುಸೋ ಸುವಣ್ಣಕಾರಪುತ್ತ, ಕೇಸಾದಿಕುಣಪಪೂರೇ ಏಕನ್ತೇನ ಭೇದನಧಮ್ಮೇ ಸುಸಾನವಡ್ಢನೇ, ಇಧ ಇಮಸ್ಮಿಂ ಕಾಯಸಞ್ಞಿತೇ ಅಸುಚಿಕಳೇವರೇ ಕಿಂ ನಾಮ ತವ ಸಾರನ್ತಿ ಸಮ್ಮತಂ ಸಮ್ಭಾವಿತಂ, ಯಂ ದಿಸ್ವಾ ವಿಮನೋ ಅಞ್ಞತರಸ್ಮಿಂ ಆರಮ್ಮಣೇ ವಿಗತಮನಸಙ್ಕಪ್ಪೋ, ಏತ್ಥೇವ ವಾ ಅವಿಮನೋ ಸೋಮನಸ್ಸಿಕೋ ಹುತ್ವಾ ಉದಿಕ್ಖಸಿ, ತಂ ಮಯ್ಹಂ ಕಥೇಹೀತಿ.

ತಂ ಸುತ್ವಾ ಧುತ್ತಕೋ ಕಿಞ್ಚಾಪಿ ತಸ್ಸಾ ರೂಪಂ ಚಾತುರಿಯಸೋಭಿತಂ, ಪಠಮದಸ್ಸನತೋ ಪನ ಪಟ್ಠಾಯ ಯಸ್ಮಿಂ ದಿಟ್ಠಿಪಾತೇ ಪಟಿಬದ್ಧಚಿತ್ತೋ, ತಮೇವ ಅಪದಿಸನ್ತೋ ‘‘ಅಕ್ಖೀನಿ ಚ ತೂರಿಯಾರಿವಾ’’ತಿಆದಿಮಾಹ. ಕಾಮಞ್ಚಾಯಂ ಥೇರೀ ಸುಟ್ಠು ಸಂಯತತಾಯ ಸನ್ತಿನ್ದ್ರಿಯಾ, ತಾಯ ಥಿರವಿಪ್ಪಸನ್ನಸೋಮ್ಮಸನ್ತನಯನನಿಪಾತೇಸು ಕಮ್ಮಾನುಭಾವನಿಪ್ಫನ್ನೇಸು ಪಸನ್ನಪಞ್ಚಪ್ಪಸಾದಪಟಿಮಣ್ಡಿತೇಸು ನಯನೇಸು ಲಬ್ಭಮಾನೇ ಪಭಾವಿಸಿಟ್ಠಚಾತುರಿಯೇ ದಿಟ್ಠಿಪಾತೇ, ಯಸ್ಮಾ ಸಯಂ ಚರಿತಹಾವಭಾವವಿಲಾಸಾದಿಪರಿಕಪ್ಪವಞ್ಚಿತೋ ಸೋ ಧುತ್ತೋ ಜಾತೋ, ತಸ್ಮಾಸ್ಸ ದಿಟ್ಠಿರಾಗೋ ಸವಿಸೇಸಂ ವೇಪುಲ್ಲಂ ಅಗಮಾಸಿ. ತತ್ಥ ಅಕ್ಖೀನಿ ಚ ತೂರಿಯಾರಿವಾತಿ ತೂರಿ ವುಚ್ಚತಿ ಮಿಗೀ, ಚ-ಸದ್ದೋ ನಿಪಾತಮತ್ತಂ, ಮಿಗಚ್ಛಾಪಾಯ ವಿಯ ತೇ ಅಕ್ಖೀನೀತಿ ಅತ್ಥೋ. ‘‘ಕೋರಿಯಾರಿವಾ’’ತಿ ವಾ ಪಾಳಿ, ಕುಞ್ಚಕಾರಕುಕ್ಕುಟಿಯಾತಿ ವುತ್ತಂ ಹೋತಿ. ಕಿನ್ನರಿಯಾರಿವ ಪಬ್ಬತನ್ತರೇತಿ ಪಬ್ಬತಕುಚ್ಛಿಯಂ ವಿಚರಮಾನಾಯ ಕಿನ್ನರಿವನಿತಾಯ ವಿಯ ಚ ತೇ ಅಕ್ಖೀನೀತಿ ಅತ್ಥೋ. ತವ ಮೇ ನಯನಾನಿ ದಕ್ಖಿಯಾತಿ ತವ ವುತ್ತಗುಣವಿಸೇಸಾನಿ ನಯನಾನಿ ದಿಸ್ವಾ, ಭಿಯ್ಯೋ ಉಪರೂಪರಿ ಮೇ ಕಾಮಾಭಿರತಿ ಪವಡ್ಢತಿ.

ಉಪ್ಪಲಸಿಖರೋಪಮಾನಿ ತೇತಿ ರತ್ತುಪ್ಪಲಅಗ್ಗಸದಿಸಾನಿ ಪಮ್ಹಾನಿ ತವ. ವಿಮಲೇತಿ ನಿಮ್ಮಲೇ. ಹಾಟಕಸನ್ನಿಭೇತಿ ಕಞ್ಚನರೂಪಕಸ್ಸ ಮುಖಸದಿಸೇ ತೇ ಮುಖೇ, ನಯನಾನಿ ದಕ್ಖಿಯಾತಿ ಯೋಜನಾ.

ಅಪಿ ದೂರಗತಾತಿ ದೂರಂ ಠಾನಂ ಗತಾಪಿ. ಸರಮ್ಹಸೇತಿ ಅಞ್ಞಂ ಕಿಞ್ಚಿ ಅಚಿನ್ತೇತ್ವಾ ತವ ನಯನಾನಿ ಏವ ಅನುಸ್ಸರಾಮಿ. ಆಯತಪಮ್ಹೇತಿ ದೀಘಪಖುಮೇ. ವಿಸುದ್ಧದಸ್ಸನೇತಿ ನಿಮ್ಮಲಲೋಚನೇ. ನ ಹಿ ಮತ್ಥಿ ತಯಾ ಪಿಯತ್ತರೋ ನಯನಾತಿ ತವ ನಯನತೋ ಅಞ್ಞೋ ಕೋಚಿ ಮಯ್ಹಂ ಪಿಯತರೋ ನತ್ಥಿ. ತಯಾತಿ ಹಿ ಸಾಮಿಅತ್ಥೇ ಏವ ಕರಣವಚನಂ.

ಏವಂ ಚಕ್ಖುಸಮ್ಪತ್ತಿಯಾ ಉಮ್ಮಾದಿತಸ್ಸ ವಿಯ ತಂ ತಂ ವಿಪ್ಪಲಪತೋ ತಸ್ಸ ಪುರಿಸಸ್ಸ ಮನೋರಥಂ ವಿಪರಿವತ್ತೇನ್ತೀ ಥೇರೀ ‘‘ಅಪಥೇನಾ’’ತಿಆದಿನಾ ದ್ವಾದಸ ಗಾಥಾ ಅಭಾಸಿ. ತತ್ಥ ಅಪಥೇನ ಪಯಾತುಮಿಚ್ಛಸೀತಿ, ಆವುಸೋ ಸುವಣ್ಣಕಾರಪುತ್ತ, ಸನ್ತೇ ಅಞ್ಞಸ್ಮಿಂ ಇತ್ಥಿಜನೇ ಯೋ ತ್ವಂ ಬುದ್ಧಸುತಂ ಬುದ್ಧಸ್ಸ ಭಗವತೋ ಓರಸಧೀತರಂ ಮಂ ಮಗ್ಗಯಸಿ ಪತ್ಥೇಸಿ, ಸೋ ತ್ವಂ ಸನ್ತೇ ಖೇಮೇ ಉಜುಮಗ್ಗೇ ಅಪಥೇನ ಕಣ್ಟಕನಿವುತೇನ ಸಭಯೇನ ಕುಮ್ಮಗ್ಗೇನ ಪಯಾತುಮಿಚ್ಛಸಿ ಪಟಿಪಜ್ಜಿತುಕಾಮೋಸಿ, ಚನ್ದಂ ಕೀಳನಕಂ ಗವೇಸಸಿ ಚನ್ದಮಣ್ಡಲಂ ಕೀಳಾಗೋಳಕಂ ಕಾತುಕಾಮೋಸಿ, ಮೇರುಂ ಲಙ್ಘೇತುಮಿಚ್ಛಸಿ ಚತುರಾಸೀತಿಯೋಜನಸಹಸ್ಸುಬ್ಬೇಧಂ ಸಿನೇರುಪಬ್ಬತರಾಜಂ ಲಙ್ಘಯಿತ್ವಾ ಅಪರಭಾಗೇ ಠಾತುಕಾಮೋಸಿ, ಸೋ ತ್ವಂ ಮಂ ಬುದ್ಧಸುತಂ ಮಗ್ಗಯಸೀತಿ ಯೋಜನಾ.

ಇದಾನಿ ತಸ್ಸ ಅತ್ತನೋ ಅವಿಸಯಭಾವಂ ಪತ್ಥನಾಯ ಚ ವಿಘಾತಾವಹತಂ ದಸ್ಸೇತುಂ ‘‘ನತ್ಥೀ’’ತಿಆದಿ ವುತ್ತಂ. ತತ್ಥ ರಾಗೋ ಯತ್ಥಪಿ ದಾನಿ ಮೇ ಸಿಯಾತಿ ಯತ್ಥ ಇದಾನಿ ಮೇ ರಾಗೋ ಸಿಯಾ ಭವೇಯ್ಯ, ತಂ ಆರಮ್ಮಣಂ ಸದೇವಕೇ ಲೋಕೇ ನತ್ಥಿ ಏವ. ನಪಿ ನಂ ಜಾನಾಮಿ ಕೀರಿಸೋತಿ ನಂ ರಾಗಂ ಕೀರಿಸೋತಿಪಿ ನ ಜಾನಾಮಿ. ಅಥ ಮಗ್ಗೇನ ಹತೋ ಸಮೂಲಕೋತಿ ಅಥಾತಿ ನಿಪಾತಮತ್ತಂ. ಅಯೋನಿಸೋಮನಸಿಕಾರಸಙ್ಖಾತೇನ ಮೂಲೇನ ಸಮೂಲಕೋ ರಾಗೋ ಅರಿಯಮಗ್ಗೇನ ಹತೋ ಸಮುಗ್ಘಾತಿತೋ.

ಇಙ್ಗಾಲಕುಯಾತಿ ಅಙ್ಗಾರಕಾಸುಯಾ. ಉಜ್ಝಿತೋತಿ ವಾತುಕ್ಖಿತ್ತೋ ವಿಯ ಯೋ ಕೋಚಿ, ದಹನಿಯಾ ಇನ್ಧನಂ ವಿಯಾತಿ ಅತ್ಥೋ. ವಿಸಪತ್ತೋರಿವಾತಿ ವಿಸಗತಭಾಜನಂ ವಿಯ. ಅಗ್ಗಿತೋ ಕತೋತಿ ಅಗ್ಗಿತೋ ಅಙ್ಗಾರತೋ ಅಪಗತೋ ಕತೋ, ವಿಸಸ್ಸ ಲೇಸಮ್ಪಿ ಅಸೇಸೇತ್ವಾ ಅಪನೀತೋ ವಿನಾಸಿತೋತಿ ಅತ್ಥೋ.

ಯಸ್ಸಾ ಸಿಯಾ ಅಪಚ್ಚವೇಕ್ಖಿತನ್ತಿ ಯಸ್ಸಾ ಇತ್ಥಿಯಾ ಇದಂ ಖನ್ಧಪಞ್ಚಕಂ ಞಾಣೇನ ಅಪ್ಪಟಿವೇಕ್ಖಿತಂ ಅಪರಿಞ್ಞಾತಂ ಸಿಯಾ. ಸತ್ತಾ ವಾ ಅನುಸಾಸಿತೋ ಸಿಯಾತಿ ಸತ್ತಾ ವಾ ಧಮ್ಮಸರೀರಸ್ಸ ಅದಸ್ಸನೇನ ಯಸ್ಸಾ ಇತ್ಥಿಯಾ ಅನನುಸಾಸಿತೋ ಸಿಯಾ. ತ್ವಂ ತಾದಿಸಿಕಂ ಪಲೋಭಯಾತಿ, ಆವುಸೋ, ತ್ವಂ ತಥಾರೂಪಂ ಅಪರಿಮದ್ದಿತಸಙ್ಖಾರಂ ಅಪಚ್ಚವೇಕ್ಖಿತಲೋಕುತ್ತರಧಮ್ಮಂ ಕಾಮೇಹಿ ಪಲೋಭಯ ಉಪಗಚ್ಛ. ಜಾನನ್ತಿಂ ಸೋ ಇಮಂ ವಿಹಞ್ಞಸೀತಿ ಸೋ ತ್ವಂ ಪವತ್ತಿಂ ನಿವತ್ತಿಞ್ಚ ಯಾಥಾವತೋ ಜಾನನ್ತಿಂ ಪಟಿವಿದ್ಧಸಚ್ಚಂ ಇಮಂ ಸುಭಂ ಭಿಕ್ಖುನಿಂ ಆಗಮ್ಮ ವಿಹಞ್ಞಸಿ, ಸಮ್ಪತಿ ಆಯತಿಞ್ಚ ವಿಘಾತಂ ದುಕ್ಖಂ ಆಪಜ್ಜಸಿ.

ಇದಾನಿಸ್ಸ ವಿಘಾತಾಪತ್ತಿತಂ ಕಾರಣವಿಭಾವನೇನ ದಸ್ಸೇನ್ತೀ ‘‘ಮಯ್ಹಂ ಹೀ’’ತಿಆದಿಮಾಹ. ತತ್ಥ ಹೀತಿ ಹೇತುಅತ್ಥೇ ನಿಪಾತೋ. ಅಕ್ಕುಟ್ಠವನ್ದಿತೇತಿ ಅಕ್ಕೋಸೇ ವನ್ದನಾಯ ಚ. ಸುಖದುಕ್ಖೇತಿ ಸುಖೇ ಚ ದುಕ್ಖೇ ಚ, ಇಟ್ಠಾನಿಟ್ಠವಿಸಯಸಮಾಯೋಗೇ ವಾ. ಸತೀ ಉಪಟ್ಠಿತಾತಿ ಪಚ್ಚವೇಕ್ಖಣಯುತ್ತಾ ಸತಿ ಸಬ್ಬಕಾಲಂ ಉಪಟ್ಠಿತಾ. ಸಙ್ಖತಮಸುಭನ್ತಿ ಜಾನಿಯಾತಿ ತೇಭೂಮಕಂ ಸಙ್ಖಾರಗತಂ ಕಿಲೇಸಾಸುಚಿಪಗ್ಘರಣೇನ ಅಸುಭನ್ತಿ ಞತ್ವಾ. ಸಬ್ಬತ್ಥೇವಾತಿ ಸಬ್ಬಸ್ಮಿಂಯೇವ ಭವತ್ತಯೇ ಮಯ್ಹಂ ಮನೋ ತಣ್ಹಾಲೇಪಾದಿನಾ ನ ಉಪಲಿಮ್ಪತಿ.

ಮಗ್ಗಟ್ಠಙ್ಗಿಕಯಾನಯಾಯಿನೀತಿ ಅಟ್ಠಙ್ಗಿಕಮಗ್ಗಸಙ್ಖಾತೇನ ಅರಿಯಯಾನೇನ ನಿಬ್ಬಾನಪುರಂ ಯಾಯಿನೀ ಉಪಗತಾ. ಉದ್ಧಟಸಲ್ಲಾತಿ ಅತ್ತನೋ ಸನ್ತಾನತೋ ಸಮುದ್ಧಟರಾಗಾದಿಸಲ್ಲಾ.

ಸುಚಿತ್ತಿತಾತಿ ಹತ್ಥಪಾದಮುಖಾದಿಆಕಾರೇನ ಸುಟ್ಠು ಚಿತ್ತಿತಾ ವಿರಚಿತಾ. ಸೋಮ್ಭಾತಿ ಸುಮ್ಭಕಾ. ದಾರುಕಪಿಲ್ಲಕಾನಿ ವಾತಿ ದಾರುದಣ್ಡಾದೀಹಿ ಉಪರಚಿತರೂಪಕಾನಿ. ತನ್ತೀಹೀತಿ ನ್ಹಾರುಸುತ್ತಕೇಹಿ. ಖೀಲಕೇಹೀತಿ ಹತ್ಥಪಾದಪಿಟ್ಠಿಕಣ್ಣಾದಿಅತ್ಥಾಯ ಠಪಿತದಣ್ಡೇಹಿ. ವಿನಿಬದ್ಧಾತಿ ವಿವಿಧೇನಾಕಾರೇನ ಬದ್ಧಾ. ವಿವಿಧಂ ಪನಚ್ಚಕಾತಿ ಯನ್ತಸುತ್ತಾದೀನಂ ಅಞ್ಛನವಿಸ್ಸಜ್ಜನಾದಿನಾ ಪಟ್ಠಪಿತನಚ್ಚಕಾ, ಪನಚ್ಚನ್ತಾ ವಿಯ ದಿಟ್ಠಾತಿ ಯೋಜನಾ.

ತಮ್ಹುದ್ಧಟೇ ತನ್ತಿಖೀಲಕೇತಿ ಸನ್ನಿವೇಸವಿಸಿಟ್ಠರಚನಾವಿಸೇಸಯುತ್ತಂ ಉಪಾದಾಯ ರೂಪಕಸಮಞ್ಞಾ ತಮ್ಹಿ ತನ್ತಿಮ್ಹಿ ಖೀಲಕೇ ಚ ಠಾನತೋ ಉದ್ಧಟೇ ಬನ್ಧನ್ತೋ ವಿಸ್ಸಟ್ಠೇ, ವಿಸುಂ ಕರಣೇನ ಅಞ್ಞಮಞ್ಞಂ ವಿಕಲೇ, ತಹಿಂ ತಹಿಂ ಖಿಪನೇನ ಪರಿಕ್ರಿತೇ ವಿಕಿರಿತೇ. ನ ವಿನ್ದೇಯ್ಯ ಖಣ್ಡಸೋ ಕತೇತಿ ಪೋತ್ಥಕರೂಪಸ್ಸ ಅವಯವೇ ಖಣ್ಡಾಖಣ್ಡಿತೇ ಕತೇ ಪೋತ್ಥಕರೂಪಂ ನ ವಿನ್ದೇಯ್ಯ, ನ ಉಪಲಭೇಯ್ಯ. ಏವಂ ಸನ್ತೇ ಕಿಮ್ಹಿ ತತ್ಥ ಮನಂ ನಿವೇಸಯೇ ತಸ್ಮಿಂ ಪೋತ್ಥಕರೂಪಾವಯವೇ ಕಿಮ್ಹಿ ಕಿಂ ಖಾಣುಕೇ, ಉದಾಹು ರಜ್ಜುಕೇ, ಮತ್ತಿಕಾಪಿಣ್ಡಾದಿಕೇ ವಾ ಮನಂ ಮನಸಞ್ಞಂ ನಿವೇಸೇಯ್ಯ, ವಿಸಙ್ಖಾರೇ ಅವಯವೇ ಸಾ ಸಞ್ಞಾ ಕದಾಚಿಪಿ ನಪತೇಯ್ಯಾತಿ ಅತ್ಥೋ.

ತಥೂಪಮಾತಿ ತಂಸದಿಸಾ ತೇನ ಪೋತ್ಥಕರೂಪೇನ ಸದಿಸಾ. ಕಿನ್ತಿ ಚೇ ಆಹ ‘‘ದೇಹಕಾನೀ’’ತಿಆದಿ. ತತ್ಥ ದೇಹಕಾನೀತಿ ಹತ್ಥಪಾದಮುಖಾದಿದೇಹಾವಯವಾ. ಮನ್ತಿ ಮೇ ಪಟಿಬದ್ಧಾ ಉಪಟ್ಠಹನ್ತಿ. ತೇಹಿ ಧಮ್ಮೇಹೀತಿ ತೇಹಿ ಪಥವಿಆದೀಹಿ ಚ ಚಕ್ಖಾದೀಹಿ ಚ ಧಮ್ಮೇಹಿ. ವಿನಾ ನ ವತ್ತನ್ತೀತಿ ನ ಹಿ ತಥಾ ತಥಾ ಸನ್ನಿವಿಟ್ಠೇ ಪಥವಿಆದಿಧಮ್ಮೇ ಮುಞ್ಚಿತ್ವಾ ದೇಹಾ ನಾಮ ಸನ್ತಿ. ಧಮ್ಮೇಹಿ ವಿನಾ ನ ವತ್ತತೀತಿ ದೇಹೋ ಅವಯವೇಹಿ ಅವಯವಧಮ್ಮೇಹಿ ವಿನಾ ನ ವತ್ತತಿ ನ ಉಪಲಬ್ಭತಿ. ಏವಂ ಸನ್ತೇ ಕಿಮ್ಹಿ ತತ್ಥ ಮನಂ ನಿವೇಸಯೇತಿ ಕಿಮ್ಹಿ ಕಿಂ ಪಥವಿಯಂ, ಉದಾಹು ಆಪಾದಿಕೇ ದೇಹೋತಿ ವಾ ಹತ್ಥಪಾದಾದೀನೀತಿ ವಾ ಮನಂ ಮನಸಞ್ಞಂ ನಿವೇಸೇಯ್ಯ. ಯಸ್ಮಾ ಪಥವಿಆದಿಪಸಾದಧಮ್ಮಮತ್ತೇ ಏಸಾ ಸಮಞ್ಞಾ, ಯದಿದಂ ದೇಹೋತಿ ವಾ ಹತ್ಥಪಾದಾದೀನೀತಿ ವಾ ಸತ್ತೋತಿ ವಾ ಇತ್ಥೀತಿ ವಾ ಪುರಿಸೋತಿ ವಾ, ತಸ್ಮಾ ನ ಏತ್ಥ ಜಾನತೋ ಕೋಚಿ ಅಭಿನಿವೇಸೋ ಹೋತೀತಿ.

ಯಥಾ ಹರಿತಾಲೇನ ಮಕ್ಖಿತಂ, ಅದ್ದಸ ಚಿತ್ತಿಕಂ ಭಿತ್ತಿಯಾ ಕತನ್ತಿ ಯಥಾ ಕುಸಲೇನ ಚಿತ್ತಕಾರೇನ ಭಿತ್ತಿಯಂ ಹರಿತಾಲೇನ ಮಕ್ಖಿತಂ ಲಿತ್ತಂ ತೇನ ಲೇಪಂ ದತ್ವಾ ಕತಂ ಆಲಿಖಿತಂ ಚಿತ್ತಿಕಂ ಇತ್ಥಿರೂಪಂ ಅದ್ದಸ ಪಸ್ಸೇಯ್ಯ. ತತ್ಥ ಯಾ ಉಪಥಮ್ಭನಖೇಪನಾದಿಕಿರಿಯಾಸಮ್ಪತ್ತಿಯಾ ಮಾನುಸಿಕಾ ನು ಖೋ ಅಯಂ ಭಿತ್ತಿ ಅಪಸ್ಸಾಯ ಠಿತಾತಿ ಸಞ್ಞಾ, ಸಾ ನಿರತ್ಥಕಾ ಮನುಸ್ಸಭಾವಸಙ್ಖಾತಸ್ಸ ಅತ್ಥಸ್ಸ ತತ್ಥ ಅಭಾವತೋ, ಮಾನುಸೀತಿ ಪನ ಕೇವಲಂ ತಹಿಂ ತಸ್ಸ ಚ ವಿಪರೀತದಸ್ಸನಂ, ಯಾಥಾವತೋ ಗಹಣಂ ನ ಹೋತಿ, ಧಮ್ಮಪುಞ್ಜಮತ್ತೇ ಇತ್ಥಿಪುರಿಸಾದಿಗಹಣಮ್ಪಿ ಏವಂ ಸಮ್ಪದಮಿದಂ ದಟ್ಠಬ್ಬನ್ತಿ ಅಧಿಪ್ಪಾಯೋ.

ಮಾಯಂ ವಿಯ ಅಗ್ಗತೋ ಕತನ್ತಿ ಮಾಯಾಕಾರೇನ ಪುರತೋ ಉಪಟ್ಠಾಪಿತಂ ಮಾಯಾಸದಿಸಂ. ಸುಪಿನನ್ತೇವ ಸುವಣ್ಣಪಾದಪನ್ತಿ ಸುಪಿನಮೇವ ಸುಪಿನನ್ತಂ, ತತ್ಥ ಉಪಟ್ಠಿತಸುವಣ್ಣಮಯರುಕ್ಖಂ ವಿಯ. ಉಪಗಚ್ಛಸಿ ಅನ್ಧ ರಿತ್ತಕನ್ತಿ ಅನ್ಧಬಾಲ ರಿತ್ತಕಂ ತುಚ್ಛಕಂ ಅನ್ತೋಸಾರರಹಿತಂ ಇಮಂ ಅತ್ತಭಾವಂ ‘‘ಏತಂ ಮಮಾ’’ತಿ ಸಾರವನ್ತಂ ವಿಯ ಉಪಗಚ್ಛಸಿ ಅಭಿನಿವಿಸಸಿ. ಜನಮಜ್ಝೇರಿವ ರುಪ್ಪರೂಪಕನ್ತಿ ಮಾಯಾಕಾರೇನ ಮಹಾಜನಮಜ್ಝೇ ದಸ್ಸಿತಂ ರೂಪಿಯರೂಪಸದಿಸಂ ಸಾರಂ ವಿಯ ಉಪಟ್ಠಹನ್ತಂ, ಅಸಾರನ್ತಿ ಅತ್ಥೋ.

ವಟ್ಟನಿರಿವಾತಿ ಲಾಖಾಯ ಗುಳಿಕಾ ವಿಯ. ಕೋಟರೋಹಿತಾತಿ ಕೋಟರೇ ರುಕ್ಖಸುಸಿರೇ ಠಪಿತಾ. ಮಜ್ಝೇ ಪುಬ್ಬುಳಕಾತಿ ಅಕ್ಖಿದಲಮಜ್ಝೇ ಠಿತಜಲಪುಬ್ಬುಳಸದಿಸಾ. ಸಅಸ್ಸುಕಾತಿ ಅಸ್ಸುಜಲಸಹಿತಾ. ಪೀಳಕೋಳಿಕಾತಿ ಅಕ್ಖಿಗೂಥಕೋ. ಏತ್ಥ ಜಾಯತೀತಿ ಏತಸ್ಮಿಂ ಅಕ್ಖಿಮಣ್ಡಲೇ ಉಭೋಸು ಕೋಟೀಸು ವಿಸಗನ್ಧಂ ವಾಯನ್ತೋ ನಿಬ್ಬತ್ತತಿ. ಪೀಳಕೋಳಿಕಾತಿ ವಾ ಅಕ್ಖಿದಲೇಸು ನಿಬ್ಬತ್ತನಕಾ ಪೀಳಕಾ ವುಚ್ಚತಿ. ವಿವಿಧಾತಿ ಸೇತನೀಲಮಣ್ಡಲಾನಞ್ಚೇವ ರತ್ತಪೀತಾದೀನಂ ಸತ್ತನ್ನಂ ಪಟಲಾನಞ್ಚ ವಸೇನ ಅನೇಕವಿಧಾ. ಚಕ್ಖುವಿಧಾತಿ ಚಕ್ಖುಭಾಗಾ ಚಕ್ಖುಪ್ಪಕಾರಾ ವಾ ತಸ್ಸ ಅನೇಕಕಲಾಪಗತಭಾವತೋ. ಪಿಣ್ಡಿತಾತಿ ಸಮುದಿತಾ.

ಏವಂ ಚಕ್ಖುಸ್ಮಿಂ ಸಾರಜ್ಜನ್ತಸ್ಸ ಚಕ್ಖುನೋ ಅಸುಭತಂ ಅನವಟ್ಠಿತತಾಯ ಅನಿಚ್ಚತಞ್ಚ ವಿಭಾವೇಸಿ. ವಿಭಾವೇತ್ವಾ ಚ ಯಥಾ ನಾಮ ಕೋಚಿ ಲೋಭನೀಯಂ ಭಣ್ಡಂ ಗಹೇತ್ವಾ ಚೋರಕನ್ತಾರಂ ಪಟಿಪಜ್ಜನ್ತೋ ಚೋರೇಹಿ ಪಲಿಬುದ್ಧೋ ತಂ ಲೋಭನೀಯಭಣ್ಡಂ ದತ್ವಾ ಗಚ್ಛತಿ, ಏವಮೇವ ಚಕ್ಖುಮ್ಹಿ ಸಾರತ್ತೇನ ತೇನ ಪುರಿಸೇನ ಪಲಿಬುದ್ಧಾ ಥೇರೀ ಅತ್ತನೋ ಚಕ್ಖುಂ ಉಪ್ಪಾಟೇತ್ವಾ ತಸ್ಸ ಅದಾಸಿ. ತೇನ ವುತ್ತಂ ‘‘ಉಪ್ಪಾಟಿಯ ಚಾರುದಸ್ಸನಾ’’ತಿಆದಿ. ತತ್ಥ ಉಪ್ಪಾಟಿಯಾತಿ ಉಪ್ಪಾಟೇತ್ವಾ ಚಕ್ಖುಕೂಪತೋ ನೀಹರಿತ್ವಾ. ಚಾರುದಸ್ಸನಾತಿ ಪಿಯದಸ್ಸನಾ ಮನೋಹರದಸ್ಸನಾ. ನ ಚ ಪಜ್ಜಿತ್ಥಾತಿ ತಸ್ಮಿಂ ಚಕ್ಖುಸ್ಮಿಂ ಸಙ್ಗಂ ನಾಪಜ್ಜಿ. ಅಸಙ್ಗಮಾನಸಾತಿ ಕತ್ಥಚಿಪಿ ಆರಮ್ಮಣೇ ಅನಾಸತ್ತಚಿತ್ತಾ. ಹನ್ದ ತೇ ಚಕ್ಖುನ್ತಿ ತಯಾ ಕಾಮಿತಂ ತತೋ ಏವ ಮಯಾ ದಿನ್ನತ್ತಾ ತೇ ಚಕ್ಖುಸಞ್ಞಿತಂ ಅಸುಚಿಪಿಣ್ಡಂ ಗಣ್ಹ, ಗಹೇತ್ವಾ ಹರಸ್ಸು ಪಸಾದಯುತ್ತಂ ಇಚ್ಛಿತಂ ಠಾನಂ ನೇಹಿ.

ತಸ್ಸ ಚ ವಿರಮಾಸಿ ತಾವದೇತಿ ತಸ್ಸ ಧುತ್ತಪುರಿಸಸ್ಸ ತಾವದೇವ ಅಕ್ಖಿಮ್ಹಿ ಉಪ್ಪಾಟಿತಕ್ಖಣೇ ಏವ ರಾಗೋ ವಿಗಚ್ಛಿ. ತತ್ಥಾತಿ ಅಕ್ಖಿಮ್ಹಿ, ತಸ್ಸಂ ವಾ ಥೇರಿಯಂ. ಅಥ ವಾ ತತ್ಥಾತಿ ತಸ್ಮಿಂಯೇವ ಠಾನೇ. ಖಮಾಪಯೀತಿ ಖಮಾಪೇಸಿ. ಸೋತ್ಥಿ ಸಿಯಾ ಬ್ರಹ್ಮಚಾರಿನೀತಿ ಸೇಟ್ಠಚಾರಿನಿ ಮಹೇಸಿಕೇ ತುಯ್ಹಂ ಆರೋಗ್ಯಮೇವ ಭವೇಯ್ಯ. ನ ಪುನೋ ಏದಿಸಕಂ ಭವಿಸ್ಸತೀತಿ ಇತೋ ಪರಂ ಏವರೂಪಂ ಅನಾಚಾರಚರಣಂ ನ ಭವಿಸ್ಸತಿ, ನ ಕರಿಸ್ಸಾಮೀತಿ ಅತ್ಥೋ.

ಆಸಾದಿಯಾತಿ ಘಟ್ಟೇತ್ವಾ. ಏದಿಸನ್ತಿ ಏವರೂಪಂ ಸಬ್ಬತ್ಥ ವೀತರಾಗಂ. ಅಗ್ಗಿಂ ಪಜ್ಜಲಿತಂವ ಲಿಙ್ಗಿಯಾತಿ ಪಜ್ಜಲಿತಂ ಅಗ್ಗಿಂ ಆಲಿಙ್ಗೇತ್ವಾ ವಿಯ.

ತತೋತಿ ತಸ್ಮಾ ಧುತ್ತಪುರಿಸಾ. ಸಾ ಭಿಕ್ಖುನೀತಿ ಸಾ ಸುಭಾ ಭಿಕ್ಖುನೀ. ಅಗಮೀ ಬುದ್ಧವರಸ್ಸ ಸನ್ತಿಕನ್ತಿ ಸಮ್ಮಾಸಮ್ಬುದ್ಧಸ್ಸ ಸನ್ತಿಕಂ ಉಪಗಚ್ಛಿ ಉಪಸಙ್ಕಮಿ. ಪಸ್ಸಿಯ ವರಪುಞ್ಞಲಕ್ಖಣನ್ತಿ ಉತ್ತಮೇಹಿ ಪುಞ್ಞಸಮ್ಭಾರೇಹಿ ನಿಬ್ಬತ್ತಮಹಾಪುರಿಸಲಕ್ಖಣಂ ದಿಸ್ವಾ. ಯಥಾ ಪುರಾಣಕನ್ತಿ ಪೋರಾಣಂ ವಿಯ ಉಪ್ಪಾಟನತೋ ಪುಬ್ಬೇ ವಿಯ ಚಕ್ಖು ಪಟಿಪಾಕತಿಕಂ ಅಹೋಸಿ. ಯಮೇತ್ಥ ಅನ್ತರನ್ತರಾ ನ ವುತ್ತಂ, ತಂ ವುತ್ತನಯತ್ತಾ ಸುವಿಞ್ಞೇಯ್ಯಮೇವ.

ಸುಭಾಜೀವಕಮ್ಬವನಿಕಾಥೇರೀಗಾಥಾವಣ್ಣನಾ ನಿಟ್ಠಿತಾ.

ತಿಂಸನಿಪಾತವಣ್ಣನಾ ನಿಟ್ಠಿತಾ.