೧೩. ವಿಸಾಖಾಥೇರೀಗಾಥಾವಣ್ಣನಾ

ಕರೋಥ ಬುದ್ಧಸಾಸನನ್ತಿ ವಿಸಾಖಾಯ ಥೇರಿಯಾ ಗಾಥಾ. ತಸ್ಸಾ ವತ್ಥು ಧೀರಾಥೇರಿಯಾವತ್ಥುಸದಿಸಮೇವ. ಸಾ ಅರಹತ್ತಂ ಪತ್ವಾ ವಿಮುತ್ತಿಸುಖೇನ ವೀತಿನಾಮೇನ್ತೀ –

೧೩. ‘‘ಕರೋಥ ಬುದ್ಧಸಾಸನಂ, ಯಂ ಕತ್ವಾ ನಾನುತಪ್ಪತಿ;

ಖಿಪ್ಪಂ ಪಾದಾನಿ ಧೋವಿತ್ವಾ, ಏಕಮನ್ತೇ ನಿಸೀದಥಾ’’ತಿ. –

ಇಮಾಯ ಗಾಥಾಯ ಅಞ್ಞಂ ಬ್ಯಾಕಾಸಿ.

ತತ್ಥ ಕರೋಥ ಬುದ್ಧಸಾಸನನ್ತಿ ಬುದ್ಧಸಾಸನಂ ಓವಾದಅನುಸಿಟ್ಠಿಂ ಕರೋಥ, ಯಥಾನುಸಿಟ್ಠಂ ಪಟಿಪಜ್ಜಥಾತಿ ಅತ್ಥೋ. ಯಂ ಕತ್ವಾ ನಾನುತಪ್ಪತೀತಿ ಅನುಸಿಟ್ಠಿಂ ಕತ್ವಾ ಕರಣಹೇತು ನ ಅನುತಪ್ಪತಿ ತಕ್ಕರಸ್ಸ ಸಮ್ಮದೇವ ಅಧಿಪ್ಪಾಯಾನಂ ಸಮಿಜ್ಝನತೋ. ಖಿಪ್ಪಂ ಪಾದಾನಿ ಧೋವಿತ್ವಾ, ಏಕಮನ್ತೇ ನಿಸೀದಥಾತಿ ಇದಂ ಯಸ್ಮಾ ಸಯಂ ಪಚ್ಛಾಭತ್ತಂ ಪಿಣ್ಡಪಾತಪಟಿಕ್ಕನ್ತಾ ಆಚರಿಯುಪಜ್ಝಾಯಾನಂ ವತ್ತಂ ದಸ್ಸೇತ್ವಾ ಅತ್ತನೋ ದಿವಾಟ್ಠಾನೇ ಪಾದೇ ಧೋವಿತ್ವಾ ರಹೋ ನಿಸಿನ್ನಾ ಸದತ್ಥಂ ಮತ್ಥಕಂ ಪಾಪೇಸಿ, ತಸ್ಮಾ ತತ್ಥ ಅಞ್ಞೇಪಿ ನಿಯೋಜೇನ್ತೀ ಅವೋಚ.

ವಿಸಾಖಾಥೇರೀಗಾಥಾವಣ್ಣನಾ ನಿಟ್ಠಿತಾ.