೬. ಕುಮಾರಪೇತವತ್ಥುವಣ್ಣನಾ

ಸಾವತ್ಥಿ ನಾಮ ನಗರನ್ತಿ ಇದಂ ಸತ್ಥಾ ಜೇತವನೇ ವಿಹರನ್ತೋ ದ್ವೇ ಪೇತೇ ಆರಬ್ಭ ಕಥೇಸಿ. ಸಾವತ್ಥಿಯಂ ಕಿರ ಕೋಸಲರಞ್ಞೋ ದ್ವೇ ಪುತ್ತಾ ಪಾಸಾದಿಕಾ ಪಠಮವಯೇ ಠಿತಾ ಯೋಬ್ಬನಮದಮತ್ತಾ ಪರದಾರಕಮ್ಮಂ ಕತ್ವಾ ಕಾಲಂ ಕತ್ವಾ ಪರಿಖಾಪಿಟ್ಠೇ ಪೇತಾ ಹುತ್ವಾ ನಿಬ್ಬತ್ತಿಂಸು. ತೇ ರತ್ತಿಯಂ ಭೇರವೇನ ಸದ್ದೇನ ಪರಿದೇವಿಂಸು. ಮನುಸ್ಸಾ ತಂ ಸುತ್ವಾ ಭೀತತಸಿತಾ ‘‘ಏವಂ ಕತೇ ಇದಂ ಅವಮಙ್ಗಲಂ ವೂಪಸಮ್ಮತೀ’’ತಿ ಬುದ್ಧಪ್ಪಮುಖಸ್ಸ ಭಿಕ್ಖುಸಙ್ಘಸ್ಸ ಮಹಾದಾನಂ ದತ್ವಾ ತಂ ಪವತ್ತಿಂ ಭಗವತೋ ಆರೋಚೇಸುಂ. ಭಗವಾ ‘‘ಉಪಾಸಕಾ ತಸ್ಸ ಸದ್ದಸ್ಸ ಸವನೇನ ತುಮ್ಹಾಕಂ ನ ಕೋಚಿ ಅನ್ತರಾಯೋ’’ತಿ ವತ್ವಾ ತಸ್ಸ ಕಾರಣಂ ಆಚಿಕ್ಖಿತ್ವಾ ತೇಸಂ ಧಮ್ಮಂ ದೇಸೇತುಂ –

೭೪೬. ‘‘ಸಾವತ್ಥಿ ನಾಮ ನಗರಂ, ಹಿಮವನ್ತಸ್ಸ ಪಸ್ಸತೋ;

ತತ್ಥ ಆಸುಂ ದ್ವೇ ಕುಮಾರಾ, ರಾಜಪುತ್ತಾತಿ ಮೇ ಸುತಂ.

೭೪೭. ‘‘ಸಮ್ಮತ್ತಾ ರಜನೀಯೇಸು, ಕಾಮಸ್ಸಾದಾಭಿನನ್ದಿನೋ;

ಪಚ್ಚುಪ್ಪನ್ನಸುಖೇ ಗಿದ್ಧಾ, ನ ತೇ ಪಸ್ಸಿಂಸುನಾಗತಂ.

೭೪೮. ‘‘ತೇ ಚುತಾ ಚ ಮನುಸ್ಸತ್ತಾ, ಪರಲೋಕಂ ಇತೋ ಗತಾ;

ತೇಧ ಘೋಸೇನ್ತ್ಯದಿಸ್ಸನ್ತಾ, ಪುಬ್ಬೇ ದುಕ್ಕಟಮತ್ತನೋ.

೭೪೯. ‘‘ಬಹೂಸು ವತ ಸನ್ತೇಸು, ದೇಯ್ಯಧಮ್ಮೇ ಉಪಟ್ಠಿತೇ;

ನಾಸಕ್ಖಿಮ್ಹಾ ಚ ಅತ್ತಾನಂ, ಪರಿತ್ತಂ ಕಾತುಂ ಸುಖಾವಹಂ.

೭೫೦. ‘‘ಕಿಂ ತತೋ ಪಾಪಕಂ ಅಸ್ಸ, ಯಂ ನೋ ರಾಜಕುಲಾ ಚುತಾ;

ಉಪಪನ್ನಾ ಪೇತ್ತಿವಿಸಯಂ, ಖುಪ್ಪಿಪಾಸಸಮಪ್ಪಿತಾ.

೭೫೧. ‘‘ಸಾಮಿನೋ ಇಧ ಹುತ್ವಾನ, ಹೋನ್ತಿ ಅಸಾಮಿನೋ ತಹಿಂ;

ಭಮನ್ತಿ ಖುಪ್ಪಿಪಾಸಾಯ, ಮನುಸ್ಸಾ ಉನ್ನತೋನತಾ.

೭೫೨. ‘‘ಏತಮಾದೀನವಂ ಞತ್ವಾ, ಇಸ್ಸರಮದಸಮ್ಭವಂ;

ಪಹಾಯ ಇಸ್ಸರಮದಂ, ಭವೇ ಸಗ್ಗಗತೋ ನರೋ;

ಕಾಯಸ್ಸ ಭೇದಾ ಸಪ್ಪಞ್ಞೋ, ಸಗ್ಗಂ ಸೋ ಉಪಪಜ್ಜತೀ’’ತಿ – ಗಾಥಾ ಅಭಾಸಿ;

೭೪೬. ತತ್ಥ ಇತಿ ಮೇ ಸುತನ್ತಿ ನ ಕೇವಲಂ ಅತ್ತನೋ ಞಾಣೇನ ದಿಟ್ಠಮೇವ, ಅಥ ಖೋ ಲೋಕೇ ಪಾಕಟಭಾವೇನ ಏವಂ ಮಯಾ ಸುತನ್ತಿ ಅತ್ಥೋ.

೭೪೭. ಕಾಮಸ್ಸಾದಾಭಿನನ್ದಿನೋತಿ ಕಾಮಗುಣೇಸು ಅಸ್ಸಾದವಸೇನ ಅಭಿನನ್ದನಸೀಲಾ. ಪಚ್ಚುಪ್ಪನ್ನಸುಖೇ ಗಿದ್ಧಾತಿ ವತ್ತಮಾನಸುಖಮತ್ತೇ ಗಿದ್ಧಾ ಗಥಿತಾ ಹುತ್ವಾ. ನ ತೇ ಪಸ್ಸಿಂಸುನಾಗತನ್ತಿ ದುಚ್ಚರಿತಂ ಪಹಾಯ ಸುಚರಿತಂ ಚರಿತ್ವಾ ಅನಾಗತಂ ಆಯತಿಂ ದೇವಮನುಸ್ಸೇಸು ಲದ್ಧಬ್ಬಂ ಸುಖಂ ತೇ ನ ಚಿನ್ತೇಸುಂ.

೭೪೮. ತೇಧ ಘೋಸೇನ್ತ್ಯದಿಸ್ಸನ್ತಾತಿ ತೇ ಪುಬ್ಬೇ ರಾಜಪುತ್ತಭೂತಾ ಪೇತಾ ಇಧ ಸಾವತ್ಥಿಯಾ ಸಮೀಪೇ ಅದಿಸ್ಸಮಾನರೂಪಾ ಘೋಸೇನ್ತಿ ಕನ್ದನ್ತಿ. ಕಿಂ ಕನ್ದನ್ತೀತಿ ಆಹ ‘‘ಪುಬ್ಬೇ ದುಕ್ಕಟಮತ್ತನೋ’’ತಿ.

೭೪೯. ಇದಾನಿ ತೇಸಂ ಕನ್ದನಸ್ಸ ಕಾರಣಂ ಹೇತುತೋ ಚ ಫಲತೋ ಚ ವಿಭಜಿತ್ವಾ ದಸ್ಸೇತುಂ ‘‘ಬಹೂಸು ವತ ಸನ್ತೇಸೂ’’ತಿಆದಿ ವುತ್ತಂ.

ತತ್ಥ ಬಹೂಸು ವತ ಸನ್ತೇಸೂತಿ ಅನೇಕೇಸು ದಕ್ಖಿಣೇಯ್ಯೇಸು ವಿಜ್ಜಮಾನೇಸು. ದೇಯ್ಯಧಮ್ಮೇ ಉಪಟ್ಠಿತೇತಿ ಅತ್ತನೋ ಸನ್ತಕೇ ದಾತಬ್ಬದೇಯ್ಯಧಮ್ಮೇಪಿ ಸಮೀಪೇ ಠಿತೇ, ಲಬ್ಭಮಾನೇತಿ ಅತ್ಥೋ. ಪರಿತ್ತಂ ಸುಖಾವಹನ್ತಿ ಅಪ್ಪಮತ್ತಕಮ್ಪಿ ಆಯತಿಂ ಸುಖಾವಹಂ ಪುಞ್ಞಂ ಕತ್ವಾ ಅತ್ತಾನಂ ಸೋತ್ಥಿಂ ನಿರುಪದ್ದವಂ ಕಾತುಂ ನಾಸಕ್ಖಿಮ್ಹಾ ವತಾತಿ ಯೋಜನಾ.

೭೫೦. ಕಿಂ ತತೋ ಪಾಪಕಂ ಅಸ್ಸಾತಿ ತತೋ ಪಾಪಕಂ ಲಾಮಕಂ ನಾಮ ಕಿಂ ಅಞ್ಞಂ ಅಸ್ಸ ಸಿಯಾ. ಯಂ ನೋ ರಾಜಕುಲಾ ಚುತಾತಿ ಯೇನ ಪಾಪಕಮ್ಮೇನ ಮಯಂ ರಾಜಕುಲತೋ ಚುತಾ ಇಧ ಪೇತ್ತಿವಿಸಯಂ ಉಪಪನ್ನಾ ಪೇತೇಸು ನಿಬ್ಬತ್ತಾ ಖುಪ್ಪಿಪಾಸಸಮಪ್ಪಿತಾ ವಿಚರಾಮಾತಿ ಅತ್ಥೋ.

೭೫೧. ಸಾಮಿನೋ ಇಧ ಹುತ್ವಾನಾತಿ ಇಧ ಇಮಸ್ಮಿಂ ಲೋಕೇ ಯಸ್ಮಿಂಯೇವ ಠಾನೇ ಪುಬ್ಬೇ ಸಾಮಿನೋ ಹುತ್ವಾ ವಿಚರನ್ತಿ, ತಹಿಂ ತಸ್ಮಿಂಯೇವ ಠಾನೇ ಹೋನ್ತಿ ಅಸ್ಸಾಮಿನೋ. ಮನುಸ್ಸಾ ಉನ್ನತೋನತಾತಿ ಮನುಸ್ಸಕಾಲೇ ಸಾಮಿನೋ ಹುತ್ವಾ ಕಾಲಕತಾ ಕಮ್ಮವಸೇನ ಓನತಾ ಭಮನ್ತಿ ಖುಪ್ಪಿಪಾಸಾಯ, ಪಸ್ಸ ಸಂಸಾರಪಕತಿನ್ತಿ ದಸ್ಸೇತಿ.

೭೫೨. ಏತಮಾದೀನವಂ ಞತ್ವಾ, ಇಸ್ಸರಮದಸಮ್ಭವನ್ತಿ ಏತಂ ಇಸ್ಸರಿಯಮದವಸೇನ ಸಮ್ಭೂತಂ ಅಪಾಯೂಪಪತ್ತಿಸಙ್ಖಾತಂ ಆದೀನವಂ ದೋಸಂ ಞತ್ವಾ ಪಹಾಯ ಇಸ್ಸರಿಯಮದಂ ಪುಞ್ಞಪ್ಪಸುತೋ ಹುತ್ವಾ. ಭವೇ ಸಗ್ಗಗತೋ ನರೋತಿ ಸಗ್ಗಂ ದೇವಲೋಕಂ ಗತೋಯೇವ ಭವೇಯ್ಯ.

ಇತಿ ಸತ್ಥಾ ತೇಸಂ ಪೇತಾನಂ ಪವತ್ತಿಂ ಕಥೇತ್ವಾ ತೇಹಿ ಮನುಸ್ಸೇಹಿ ಕತಂ ದಾನಂ ತೇಸಂ ಪೇತಾನಂ ಉದ್ದಿಸಾಪೇತ್ವಾ ಸಮ್ಪತ್ತಪರಿಸಾಯ ಅಜ್ಝಾಸಯಾನುರೂಪಂ ಧಮ್ಮಂ ದೇಸೇಸಿ. ಸಾ ದೇಸನಾ ಮಹಾಜನಸ್ಸ ಸಾತ್ಥಿಕಾ ಅಹೋಸೀತಿ.

ಕುಮಾರಪೇತವತ್ಥುವಣ್ಣನಾ ನಿಟ್ಠಿತಾ.