೧೬. ಸಟ್ಠಿಕೂಟಪೇತವತ್ಥುವಣ್ಣನಾ

ಕಿಂ ನು ಉಮ್ಮತ್ತರೂಪೋವಾತಿ ಇದಂ ಸತ್ಥರಿ ವೇಳುವನೇ ವಿಹರನ್ತೇ ಅಞ್ಞತರಂ ಪೇತಂ ಆರಬ್ಭ ವುತ್ತಂ. ಅತೀತೇ ಕಿರ ಬಾರಾಣಸಿನಗರೇ ಅಞ್ಞತರೋ ಪೀಠಸಪ್ಪೀ ಸಾಲಿತ್ತಕಪಯೋಗೇ ಕುಸಲೋ, ತಹಿಂ ಸಕ್ಖರಖಿಪನಸಿಪ್ಪೇ ನಿಪ್ಫತ್ತಿಂ ಗತೋ ನಗರದ್ವಾರೇ ನಿಗ್ರೋಧರುಕ್ಖಮೂಲೇ ನಿಸೀದಿತ್ವಾ ಸಕ್ಖರಪಹಾರೇಹಿ ಹತ್ಥಿಅಸ್ಸಮನುಸ್ಸರಥಕೂಟಾಗಾರಧಜಪುಣ್ಣಘಟಾದಿರೂಪಾನಿ ನಿಗ್ರೋಧಪತ್ತೇಸು ದಸ್ಸೇತಿ. ನಗರದಾರಕಾ ಅತ್ತನೋ ಕೀಳನತ್ಥಾಯ ಮಾಯಕಡ್ಢಮಾಸಕಾದೀನಿ ದತ್ವಾ ಯಥಾರುಚಿ ತಾನಿ ಸಿಪ್ಪಾನಿ ಕಾರಾಪೇನ್ತಿ.

ಅಥೇಕದಿವಸಂ ಬಾರಾಣಸಿರಾಜಾ ನಗರತೋ ನಿಕ್ಖಮಿತ್ವಾ ತಂ ನಿಗ್ರೋಧಮೂಲಂ ಉಪಗತೋ ನಿಗ್ರೋಧಪತ್ತೇಸು ಹತ್ಥಿರೂಪಾದಿವಸೇನ ನಾನಾವಿಧರೂಪವಿಭತ್ತಿಯೋ ಅಪ್ಪಿತಾ ದಿಸ್ವಾ ಮನುಸ್ಸೇ ಪುಚ್ಛಿ – ‘‘ಕೇನ ನು ಖೋ ಇಮೇಸು ನಿಗ್ರೋಧಪತ್ತೇಸು ಏವಂ ನಾನಾವಿಧರೂಪವಿಭತ್ತಿಯೋ ಕತಾ’’ತಿ? ಮನುಸ್ಸಾ ತಂ ಪೀಠಸಪ್ಪಿಂ ದಸ್ಸೇಸುಂ ‘‘ದೇವ, ಇಮಿನಾ ಕತಾ’’ತಿ. ರಾಜಾ ತಂ ಪಕ್ಕೋಸಾಪೇತ್ವಾ ಏವಮಾಹ – ‘‘ಸಕ್ಕಾ ನು ಖೋ, ಭಣೇ, ಮಯಾ ದಸ್ಸಿತಸ್ಸ ಏಕಸ್ಸ ಪುರಿಸಸ್ಸ ಕಥೇನ್ತಸ್ಸ ಅಜಾನನ್ತಸ್ಸೇವ ಕುಚ್ಛಿಯಂ ಅಜಲಣ್ಡಿಕಾಹಿ ಪೂರೇತು’’ನ್ತಿ? ‘‘ಸಕ್ಕಾ, ದೇವಾ’’ತಿ. ರಾಜಾ ತಂ ಅತ್ತನೋ ರಾಜಭವನಂ ನೇತ್ವಾ ಬಹುಭಾಣಿಕೇ ಪುರೋಹಿತೇ ನಿಬ್ಬಿನ್ನರೂಪೋ ಪುರೋಹಿತಂ ಪಕ್ಕೋಸಾಪೇತ್ವಾ ತೇನ ಸಹ ವಿವಿತ್ತೇ ಓಕಾಸೇ ಸಾಣಿಪಾಕಾರಪರಿಕ್ಖಿತ್ತೇ ನಿಸೀದಿತ್ವಾ ಮನ್ತಯಮಾನೋ ಪೀಠಸಪ್ಪಿಂ ಪಕ್ಕೋಸಾಪೇಸಿ. ಪೀಠಸಪ್ಪೀ ನಾಳಿಮತ್ತಾ ಅಜಲಣ್ಡಿಕಾ ಆದಾಯಾಗನ್ತ್ವಾ ರಞ್ಞೋ ಆಕಾರಂ ಞತ್ವಾ ಪುರೋಹಿತಾಭಿಮುಖೋ ನಿಸಿನ್ನೋ ತೇನ ಮುಖೇ ವಿವಟೇ ಸಾಣಿಪಾಕಾರವಿವರೇನ ಏಕೇಕಂ ಅಜಲಣ್ಡಿಕಂ ತಸ್ಸ ಗಲಮೂಲೇ ಪತಿಟ್ಠಾಪೇಸಿ. ಸೋ ಲಜ್ಜಾಯ ಉಗ್ಗಿಲಿತುಂ ಅಸಕ್ಕೋನ್ತೋ ಸಬ್ಬಾ ಅಜ್ಝೋಹರಿ. ಅಥ ನಂ ರಾಜಾ ಅಜಲಣ್ಡಿಕಾಹಿ ಪೂರಿತೋದರಂ ವಿಸ್ಸಜ್ಜಿ – ‘‘ಗಚ್ಛ, ಬ್ರಾಹ್ಮಣ, ಲದ್ಧಂ ತಯಾ ಬಹುಭಾಣಿತಾಯ ಫಲಂ, ಮದ್ದನಫಲಪಿಯಙ್ಗುತಚಾದೀಹಿ ಅಭಿಸಙ್ಖತಂ ಪಾನಕಂ ಪಿವಿತ್ವಾ ಉಚ್ಛಡ್ಡೇಹಿ, ಏವಂ ತೇ ಸೋತ್ಥಿ ಭವಿಸ್ಸತೀ’’ತಿ. ತಸ್ಸ ಚ ಪೀಠಸಪ್ಪಿಸ್ಸ ತೇನ ಕಮ್ಮೇನ ಅತ್ತಮನೋ ಹುತ್ವಾ ಚುದ್ದಸ ಗಾಮೇ ಅದಾಸಿ. ಸೋ ಗಾಮೇ ಲಭಿತ್ವಾ ಅತ್ತಾನಂ ಸುಖೇನ್ತೋ ಪೀಣೇನ್ತೋ ಪರಿಜನಮ್ಪಿ ಸುಖೇನ್ತೋ ಪೀಣೇನ್ತೋ ಸಮಣಬ್ರಾಹ್ಮಣಾದೀನಂ ಯಥಾರಹಂ ಕಿಞ್ಚಿ ದೇನ್ತೋ ದಿಟ್ಠಧಮ್ಮಿಕಂ ಸಮ್ಪರಾಯಿಕಞ್ಚ ಅತ್ಥಂ ಅಹಾಪೇನ್ತೋ ಸುಖೇನೇವ ಜೀವತಿ, ಅತ್ತನೋ ಸನ್ತಿಕಂ ಉಪಗತಾನಂ ಸಿಪ್ಪಂ ಸಿಕ್ಖನ್ತಾನಂ ಭತ್ತವೇತನಂ ದೇತಿ.

ಅಥೇಕೋ ಪುರಿಸೋ ತಸ್ಸ ಸನ್ತಿಕಂ ಉಪಗನ್ತ್ವಾ ಏವಮಾಹ – ‘‘ಸಾಧು, ಆಚರಿಯ, ಮಮ್ಪಿ ಏತಂ ಸಿಪ್ಪಂ ಸಿಕ್ಖಾಪೇಹಿ, ಮಯ್ಹಂ ಪನ ಅಲಂ ಭತ್ತವೇತನೇನಾ’’ತಿ. ಸೋ ತಂ ಪುರಿಸಂ ತಂ ಸಿಪ್ಪಂ ಸಿಕ್ಖಾಪೇಸಿ. ಸೋ ಸಿಕ್ಖಿತಸಿಪ್ಪೋ ಸಿಪ್ಪಂ ವೀಮಂಸಿತುಕಾಮೋ ಗನ್ತ್ವಾ ಗಙ್ಗಾತೀರೇ ನಿಸಿನ್ನಸ್ಸ ಸುನೇತ್ತಸ್ಸ ನಾಮ ಪಚ್ಚೇಕಬುದ್ಧಸ್ಸ ಸಕ್ಖರಾಭಿಘಾತೇನ ಸೀಸಂ ಭಿನ್ದಿ. ಪಚ್ಚೇಕಬುದ್ಧೋ ತತ್ಥೇವ ಗಙ್ಗಾತೀರೇ ಪರಿನಿಬ್ಬಾಯಿ. ಮನುಸ್ಸಾ ತಂ ಪವತ್ತಿಂ ಸುತ್ವಾ ತಂ ಪುರಿಸಂ ತತ್ಥೇವ ಲೇಡ್ಡುದಣ್ಡಾದೀಹಿ ಪಹರಿತ್ವಾ ಜೀವಿತಾ ವೋರೋಪೇಸುಂ. ಸೋ ಕಾಲಕತೋ ಅವೀಚಿಮಹಾನಿರಯೇ ನಿಬ್ಬತ್ತಿತ್ವಾ ಬಹೂನಿ ವಸ್ಸಸಹಸ್ಸಾನಿ ನಿರಯೇ ಪಚ್ಚಿತ್ವಾ ತಸ್ಸೇವ ಕಮ್ಮಸ್ಸ ವಿಪಾಕಾವಸೇಸೇನ ಇಮಸ್ಮಿಂ ಬುದ್ಧುಪ್ಪಾದೇ ರಾಜಗಹನಗರಸ್ಸ ಅವಿದೂರೇ ಪೇತೋ ಹುತ್ವಾ ನಿಬ್ಬತ್ತಿ. ತಸ್ಸ ಕಮ್ಮಸ್ಸ ಸರಿಕ್ಖಕೇನ ವಿಪಾಕೇನ ಭವಿತಬ್ಬನ್ತಿ ಕಮ್ಮವೇಗುಕ್ಖಿತ್ತಾನಿ ಪುಬ್ಬಣ್ಹಸಮಯಂ ಮಜ್ಝನ್ಹಿಕಸಮಯಂ ಸಾಯನ್ಹಸಮಯಞ್ಚ ಸಟ್ಠಿ ಅಯೋಕೂಟಸಹಸ್ಸಾನಿ ಮತ್ಥಕೇ ನಿಪತನ್ತಿ. ಸೋ ಛಿನ್ನಭಿನ್ನಸೀಸೋ ಅಧಿಮತ್ತವೇದನಾಪ್ಪತ್ತೋ ಭೂಮಿಯಂ ನಿಪತತಿ, ಅಯೋಕೂಟೇಸು ಪನ ಅಪಗತಮತ್ತೇಸು ಪಟಿಪಾಕತಿಕಸಿರೋ ತಿಟ್ಠತಿ.

ಅಥೇಕದಿವಸಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ಗಿಜ್ಝಕೂಟಪಬ್ಬತಾ ಓತರನ್ತೋ ತಂ ದಿಸ್ವಾ –

೮೦೬. ‘‘ಕಿಂ ನು ಉಮ್ಮತ್ತರೂಪೋವ, ಮಿಗೋ ಭನ್ತೋವ ಧಾವಸಿ;

ನಿಸ್ಸಂಸಯಂ ಪಾಪಕಮ್ಮನ್ತೋ, ಕಿಂ ನು ಸದ್ದಾಯಸೇ ತುವ’’ನ್ತಿ. –

ಇಮಾಯ ಗಾಥಾಯ ಪಟಿಪುಚ್ಛಿ. ತತ್ಥ ಉಮ್ಮತ್ತರೂಪೋವಾತಿ ಉಮ್ಮತ್ತಕಸಭಾವೋ ವಿಯ ಉಮ್ಮಾದಪ್ಪತ್ತೋ ವಿಯ. ಮಿಗೋ ಭನ್ತೋವ ಧಾವಸೀತಿ ಭನ್ತಮಿಗೋ ವಿಯ ಇತೋ ಚಿತೋ ಚ ಧಾವಸಿ. ಸೋ ಹಿ ತೇಸು ಅಯೋಕೂಟೇಸು ನಿಪತನ್ತೇಸು ಪರಿತ್ತಾಣಂ ಅಪಸ್ಸನ್ತೋ ‘‘ನ ಸಿಯಾ ನು ಖೋ ಏವಂ ಪಹಾರೋ’’ತಿ ಇತೋಪಿ ಏತ್ತೋಪಿ ಪಲಾಯತಿ. ತೇ ಪನ ಕಮ್ಮವೇಗುಕ್ಖಿತ್ತಾ ಯತ್ಥ ಕತ್ಥಚಿ ಠಿತಸ್ಸ ಮತ್ಥಕೇಯೇವ ನಿಪತನ್ತಿ. ಕಿಂ ನು ಸದ್ದಾಯಸೇ ತುವನ್ತಿ ಕಿಂ ನು ಖೋ ತುವಂ ಸದ್ದಂ ಕರೋಸಿ, ಅತಿವಿಯ ವಿಸ್ಸರಂ ಕರೋನ್ತೋ ವಿಚರಸಿ.

ತಂ ಸುತ್ವಾ ಪೇತೋ –

೮೦೭. ‘‘ಅಹಂ ಭದನ್ತೇ ಪೇತೋಮ್ಹಿ, ದುಗ್ಗತೋ ಯಮಲೋಕಿಕೋ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತೋ.

೮೦೮. ‘‘ಸಟ್ಠಿ ಕೂಟಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಸೀಸೇ ಮಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ ಮತ್ಥಕ’’ನ್ತಿ. –

ದ್ವೀಹಿ ಗಾಥಾಹಿ ಪಟಿವಚನಂ ಅದಾಸಿ. ತತ್ಥ ಸಟ್ಠಿ ಕೂಟಸಹಸ್ಸಾನೀತಿ ಸಟ್ಠಿಮತ್ತಾನಿ ಅಯೋಕೂಟಸಹಸ್ಸಾನಿ. ಪರಿಪುಣ್ಣಾನೀತಿ ಅನೂನಾನಿ. ಸಬ್ಬಸೋತಿ ಸಬ್ಬಭಾಗತೋ. ತಸ್ಸ ಕಿರ ಸಟ್ಠಿಯಾ ಅಯೋಕೂಟಸಹಸ್ಸಾನಂ ಪತನಪ್ಪಹೋನಕಂ ಮಹನ್ತಂ ಪಬ್ಬತಕೂಟಪ್ಪಮಾಣಂ ಸೀಸಂ ನಿಬ್ಬತ್ತಿ. ತಂ ತಸ್ಸ ವಾಲಗ್ಗಕೋಟಿನಿತುದನಮತ್ತಮ್ಪಿ ಠಾನಂ ಅಸೇಸೇತ್ವಾ ತಾನಿ ಕೂಟಾನಿ ಪತನ್ತಾನಿ ಮತ್ಥಕಂ ಭಿನ್ದನ್ತಿ, ತೇನ ಸೋ ಅಟ್ಟಸ್ಸರಂ ಕರೋತಿ. ತೇನ ವುತ್ತಂ ‘‘ಸಬ್ಬಸೋ ಸೀಸೇ ಮಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ ಮತ್ಥಕ’’ನ್ತಿ.

ಅಥ ನಂ ಥೇರೋ ಕತಕಮ್ಮಂ ಪುಚ್ಛನ್ತೋ –

೮೦೯. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸ ಕಮ್ಮವಿಪಾಕೇನ, ಇದಂ ದುಕ್ಖಂ ನಿಗಚ್ಛಸಿ.

೮೧೦. ‘‘ಸಟ್ಠಿ ಕೂಟಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಸೀಸೇ ತುಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ ಮತ್ಥಕ’’ನ್ತಿ. –

ದ್ವೇ ಗಾಥಾ ಅಭಾಸಿ.

ತಸ್ಸ ಪೇತೋ ಅತ್ತನಾ ಕತಕಮ್ಮಂ ಆಚಿಕ್ಖನ್ತೋ –

೮೧೧. ‘‘ಅಥದ್ದಸಾಸಿಂ ಸಮ್ಬುದ್ಧಂ, ಸುನೇತ್ತಂ ಭಾವಿತಿನ್ದ್ರಿಯಂ;

ನಿಸಿನ್ನಂ ರುಕ್ಖಮೂಲಸ್ಮಿಂ, ಝಾಯನ್ತಂ ಅಕುತೋಭಯಂ.

೮೧೨. ‘‘ಸಾಲಿತ್ತಕಪ್ಪಹಾರೇನ, ಭಿನ್ದಿಸ್ಸಂ ತಸ್ಸ ಮತ್ಥಕಂ;

ತಸ್ಸಕಮ್ಮವಿಪಾಕೇನ, ಇದಂ ದುಕ್ಖಂ ನಿಗಚ್ಛಿಸಂ.

೮೧೩. ‘‘ಸಟ್ಠಿ ಕೂಟಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಸೀಸೇ ಮಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ ಮತ್ಥಕ’’ನ್ತಿ. –

ತಿಸ್ಸೋ ಗಾಥಾಯೋ ಅಭಾಸಿ.

೮೧೧. ತತ್ಥ ಸಮ್ಬುದ್ಧನ್ತಿ ಪಚ್ಚೇಕಸಮ್ಬುದ್ಧಂ. ಸುನೇತ್ತನ್ತಿ ಏವಂನಾಮಕಂ. ಭಾವಿತಿನ್ದ್ರಿಯನ್ತಿ ಅರಿಯಮಗ್ಗಭಾವನಾಯ ಭಾವಿತಸದ್ಧಾದಿಇನ್ದ್ರಿಯಂ.

೮೧೨-೧೩. ಸಾಲಿತ್ತಕಪ್ಪಹಾರೇನಾತಿ ಸಾಲಿತ್ತಕಂ ವುಚ್ಚತಿ ಧನುಕೇನ, ಅಙ್ಗುಲೀಹಿ ಏವ ವಾ ಸಕ್ಖರಖಿಪನಪಯೋಗೋ. ತಥಾ ಹಿ ಸಕ್ಖರಾಯ ಪಹಾರೇನಾತಿ ವಾ ಪಾಠೋ. ಭಿನ್ದಿಸ್ಸನ್ತಿ ಭಿನ್ದಿಂ.

ತಂ ಸುತ್ವಾ ಥೇರೋ ‘‘ಅತ್ತನೋ ಕತಕಮ್ಮಾನುರೂಪಮೇವ ಇದಾನಿ ಪುರಾಣಕಮ್ಮಸ್ಸ ಇದಂ ಫಲಂ ಪಟಿಲಭತೀ’’ತಿ ದಸ್ಸೇನ್ತೋ –

೮೧೪. ‘‘ಧಮ್ಮೇನ ತೇ ಕಾಪುರಿಸ;

ಸಟ್ಠಿ ಕೂಟಸಹಸ್ಸಾನಿ, ಪರಿಪುಣ್ಣಾನಿ ಸಬ್ಬಸೋ;

ಸೀಸೇ ತುಯ್ಹಂ ನಿಪತನ್ತಿ, ತೇ ಭಿನ್ದನ್ತಿ ಚ ಮತ್ಥಕ’’ನ್ತಿ. –

ಓಸಾನಗಾಥಮಾಹ. ತತ್ಥ ಧಮ್ಮೇನಾತಿ ಅನುರೂಪಕಾರಣೇನ. ತೇತಿ ತವ, ತಸ್ಮಿಂ ಪಚ್ಚೇಕಬುದ್ಧೇ ಅಪರಜ್ಝನ್ತೇನ ತಯಾ ಕತಸ್ಸ ಪಾಪಕಮ್ಮಸ್ಸ ಅನುಚ್ಛವಿಕಮೇವೇತಂ ಫಲಂ ತುಯ್ಹಂ ಉಪನೀತಂ. ತಸ್ಮಾ ಕೇನಚಿ ದೇವೇನ ವಾ ಮಾರೇನ ವಾ ಬ್ರಹ್ಮುನಾ ವಾ ಅಪಿ ಸಮ್ಮಾಸಮ್ಬುದ್ಧೇನಪಿ ಅಪ್ಪಟಿಬಾಹನೀಯಮೇತನ್ತಿ ದಸ್ಸೇತಿ.

ಏವಞ್ಚ ಪನ ವತ್ವಾ ತತೋ ನಗರೇ ಪಿಣ್ಡಾಯ ಚರಿತ್ವಾ ಕತಭತ್ತಕಿಚ್ಚೋ ಸಾಯನ್ಹಸಮಯೇ ಸತ್ಥಾರಂ ಉಪಸಙ್ಕಮಿತ್ವಾ ತಂ ಪವತ್ತಿಂ ಭಗವತೋ ಆರೋಚೇಸಿ. ಭಗವಾ ತಮತ್ಥಂ ಅಟ್ಠುಪ್ಪತ್ತಿಂ ಕತ್ವಾ ಸಮ್ಪತ್ತಪರಿಸಾಯ ಧಮ್ಮಂ ದೇಸೇನ್ತೋ ಪಚ್ಚೇಕಬುದ್ಧಾನಂ ಗುಣಾನುಭಾವಂ ಕಮ್ಮಾನಞ್ಚ ಅವಞ್ಝತಂ ಪಕಾಸೇಸಿ, ಮಹಾಜನೋ ಸಂವೇಗಜಾತೋ ಹುತ್ವಾ ಪಾಪಂ ಪಹಾಯ ದಾನಾದಿಪುಞ್ಞನಿರತೋ ಅಹೋಸೀತಿ.

ಸಟ್ಠಿಕೂಟಪೇತವತ್ಥುವಣ್ಣನಾ ನಿಟ್ಠಿತಾ.

ಇತಿ ಖುದ್ದಕ-ಅಟ್ಠಕಥಾಯ ಪೇತವತ್ಥುಸ್ಮಿಂ

ಸೋಳಸವತ್ಥುಪಟಿಮಣ್ಡಿತಸ್ಸ

ಚತುತ್ಥಸ್ಸ ಮಹಾವಗ್ಗಸ್ಸ ಅತ್ಥಸಂವಣ್ಣನಾ ನಿಟ್ಠಿತಾ.

ನಿಗಮನಕಥಾ

ಏತ್ತಾವತಾ ಚ –

ಯೇ ತೇ ಪೇತೇಸು ನಿಬ್ಬತ್ತಾ, ಸತ್ತಾ ದುಕ್ಕಟಕಾರಿನೋ;

ಯೇಹಿ ಕಮ್ಮೇಹಿ ತೇಸಂ ತಂ, ಪಾಪಕಂ ಕಟುಕಪ್ಫಲಂ.

ಪಚ್ಚಕ್ಖತೋ ವಿಭಾವೇನ್ತೀ, ಪುಚ್ಛಾವಿಸ್ಸಜ್ಜನೇಹಿ ಚ;

ಯಾ ದೇಸನಾನಿಯಾಮೇನ, ಸತಂ ಸಂವೇಗವಡ್ಢನೀ.

ಯಂ ಕಥಾವತ್ಥುಕುಸಲಾ, ಸುಪರಿಞ್ಞಾತವತ್ಥುಕಾ;

ಪೇತವತ್ಥೂತಿ ನಾಮೇನ, ಸಙ್ಗಾಯಿಂಸು ಮಹೇಸಯೋ.

ತಸ್ಸ ಅತ್ಥಂ ಪಕಾಸೇತುಂ, ಪೋರಾಣಟ್ಠಕಥಾನಯಂ;

ನಿಸ್ಸಾಯ ಯಾ ಸಮಾರದ್ಧಾ, ಅತ್ಥಸಂವಣ್ಣನಾ ಮಯಾ.

ಯಾ ತತ್ಥ ಪರಮತ್ಥಾನಂ, ತತ್ಥ ತತ್ಥ ಯಥಾರಹಂ;

ಪಕಾಸನಾ ಪರಮತ್ಥ-ದೀಪನೀ ನಾಮ ನಾಮತೋ.

ಸಮ್ಪತ್ತಾ ಪರಿನಿಟ್ಠಾನಂ, ಅನಾಕುಲವಿನಿಚ್ಛಯಾ;

ಸಾ ಪನ್ನರಸಮತ್ತಾಯ, ಪಾಳಿಯಾ ಭಾಣವಾರತೋ.

ಇತಿ ತಂ ಸಙ್ಖರೋನ್ತೇನ, ಯಂ ತಂ ಅಧಿಗತಂ ಮಯಾ;

ಪುಞ್ಞಂ ತಸ್ಸಾನುಭಾವೇನ, ಲೋಕನಾಥಸ್ಸ ಸಾಸನಂ.

ಓಗಾಹೇತ್ವಾ ವಿಸುದ್ಧಾಯ, ಸೀಲಾದಿಪಟಿಪತ್ತಿಯಾ;

ಸಬ್ಬೇಪಿ ದೇಹಿನೋ ಹೋನ್ತು, ವಿಮುತ್ತಿರಸಭಾಗಿನೋ.

ಚಿರಂ ತಿಟ್ಠತು ಲೋಕಸ್ಮಿಂ, ಸಮ್ಮಾಸಮ್ಬುದ್ಧಸಾಸನಂ;

ತಸ್ಮಿಂ ಸಗಾರವಾ ನಿಚ್ಚಂ, ಹೋನ್ತು ಸಬ್ಬೇಪಿ ಪಾಣಿನೋ.

ಸಮ್ಮಾ ವಸ್ಸತು ಕಾಲೇನ, ದೇವೋಪಿ ಜಗತೀಪತಿ;

ಸದ್ಧಮ್ಮನಿರತೋ ಲೋಕಂ, ಧಮ್ಮೇನೇವ ಪಸಾಸತೂತಿ.

ಇತಿ ಬದರತಿತ್ಥವಿಹಾರವಾಸಿನಾ ಮುನಿವರಯತಿನಾ

ಭದನ್ತೇನ ಆಚರಿಯಧಮ್ಮಪಾಲೇನ ಕತಾ ಪೇತವತ್ಥುಅತ್ಥಸಂವಣ್ಣನಾ ನಿಟ್ಠಿತಾ.

ಪೇತವತ್ಥು-ಅಟ್ಠಕಥಾ ಸಮತ್ತಾ.