೧೦. ಗಣಪೇತವತ್ಥುವಣ್ಣನಾ

ನಗ್ಗಾ ದುಬ್ಬಣ್ಣರೂಪಾತ್ಥಾತಿ ಇದಂ ಸತ್ಥರಿ ಜೇತವನೇ ವಿಹರನ್ತೇ ಸಮ್ಬಹುಲೇ ಪೇತೇ ಆರಬ್ಭ ವುತ್ತಂ. ಸಾವತ್ಥಿಯಂ ಕಿರ ಸಮ್ಬಹುಲಾ ಮನುಸ್ಸಾ ಗಣಭೂತಾ ಅಸ್ಸದ್ಧಾ ಅಪ್ಪಸನ್ನಾ ಮಚ್ಛೇರಮಲಪರಿಯುಟ್ಠಿತಚಿತ್ತಾ ದಾನಾದಿಸುಚರಿತವಿಮುಖಾ ಹುತ್ವಾ ಚಿರಂ ಜೀವಿತ್ವಾ ಕಾಯಸ್ಸ ಭೇದಾ ನಗರಸ್ಸ ಸಮೀಪೇ ಪೇತಯೋನಿಯಂ ನಿಬ್ಬತ್ತಿಂಸು. ಅಥೇಕದಿವಸಂ ಆಯಸ್ಮಾ ಮಹಾಮೋಗ್ಗಲ್ಲಾನೋ ಸಾವತ್ಥಿಯಂ ಪಿಣ್ಡಾಯ ಗಚ್ಛನ್ತೋ ಅನ್ತರಾಮಗ್ಗೇ ಪೇತೇ ದಿಸ್ವಾ –

೭೮೨. ‘‘ನಗ್ಗಾ ದುಬ್ಬಣರೂಪಾತ್ಥ, ಕಿಸಾ ಧಮನಿಸನ್ಥತಾ;

ಉಪ್ಫಾಸುಲಿಕಾ ಕಿಸಿಕಾ, ಕೇ ನು ತುಮ್ಹೇತ್ಥ ಮಾರಿಸಾ’’ತಿ. –

ಗಾಥಾಯ ಪುಚ್ಛಿ. ತತ್ಥ ದುಬ್ಬಣ್ಣರೂಪಾತ್ಥಾತಿ ದುಬ್ಬಣ್ಣಸರೀರಾ ಹೋಥ. ಕೇ ನು ತುಮ್ಹೇತ್ಥಾತಿ ತುಮ್ಹೇ ಕೇ ನು ನಾಮ ಭವಥ. ಮಾರಿಸಾತಿ ತೇ ಅತ್ತನೋ ಸಾರುಪ್ಪವಸೇನ ಆಲಪತಿ.

ತಂ ಸುತ್ವಾ ಪೇತಾ –

೭೮೩. ‘‘ಮಯಂ ಭದನ್ತೇ ಪೇತಮ್ಹಾ, ದುಗ್ಗತಾ ಯಮಲೋಕಿಕಾ;

ಪಾಪಕಮ್ಮಂ ಕರಿತ್ವಾನ, ಪೇತಲೋಕಂ ಇತೋ ಗತಾ’’ತಿ. –

ಗಾಥಾಯ ಅತ್ತನೋ ಪೇತಭಾವಂ ಪಕಾಸೇತ್ವಾ ಪುನ ಥೇರೇನ –

೭೮೪. ‘‘ಕಿಂ ನು ಕಾಯೇನ ವಾಚಾಯ, ಮನಸಾ ದುಕ್ಕಟಂ ಕತಂ;

ಕಿಸ್ಸಕಮ್ಮವಿಪಾಕೇನ, ಪೇತಲೋಕಂ ಇತೋ ಗತಾ’’ತಿ. –

ಗಾಥಾಯ ಕತಕಮ್ಮಂ ಪುಚ್ಛಿತಾ –

೭೮೫. ‘‘ಅನಾವಟೇಸು ತಿತ್ಥೇಸು, ವಿಚಿನಿಮ್ಹದ್ಧಮಾಸಕಂ;

ಸನ್ತೇಸು ದೇಯ್ಯಧಮ್ಮೇಸು, ದೀಪಂ ನಾಕಮ್ಹ ಅತ್ತನೋ.

೭೮೬. ‘‘ನದಿಂ ಉಪೇಮ ತಸಿತಾ, ರಿತ್ತಕಾ ಪರಿವತ್ತತಿ;

ಛಾಯಂ ಉಪೇಮ ಉಣ್ಹೇಸು, ಆತಪೋ ಪರಿವತ್ತತಿ.

೭೮೭. ‘‘ಅಗ್ಗಿವಣ್ಣೋ ಚ ನೋ ವಾತೋ, ಡಹನ್ತೋ ಉಪವಾಯತಿ;

ಏತಞ್ಚ ಭನ್ತೇ ಅರಹಾಮ, ಅಞ್ಞಞ್ಚ ಪಾಪಕಂ ತತೋ.

೭೮೮. ‘‘ಅಪಿ ಯೋಜನಾನಿ ಗಚ್ಛಾಮ, ಛಾತಾ ಆಹಾರಗೇಧಿನೋ;

ಅಲದ್ಧಾವ ನಿವತ್ತಾಮ, ಅಹೋ ನೋ ಅಪ್ಪಪುಞ್ಞತಾ.

೭೮೯. ‘‘ಛಾತಾ ಪಮುಚ್ಛಿತಾ ಭನ್ತಾ, ಭೂಮಿಯಂ ಪಟಿಸುಮ್ಭಿತಾ;

ಉತ್ತಾನಾ ಪಟಿಕಿರಾಮ, ಅವಕುಜ್ಜಾ ಪತಾಮಸೇ.

೭೯೦. ‘‘ತೇ ಚ ತತ್ಥೇವ ಪತಿತಾ, ಭೂಮಿಯಂ ಪಟಿಸುಮ್ಭಿತಾ;

ಉರಂ ಸೀಸಞ್ಚ ಘಟ್ಟೇಮ, ಅಹೋ ನೋ ಅಪ್ಪಪುಞ್ಞತಾ.

೭೯೧. ‘‘ಏತಞ್ಚ ಭನ್ತೇ ಅರಹಾಮ, ಅಞ್ಞಞ್ಚ ಪಾಪಕಂ ತತೋ;

ಸನ್ತೇಸು ದೇಯ್ಯಧಮ್ಮೇಸು, ದೀಪಂ ನಾಕಮ್ಹ ಅತ್ತನೋ.

೭೯೨. ‘‘ತೇ ಹಿ ನೂನ ಇತೋ ಗನ್ತ್ವಾ, ಯೋನಿಂ ಲದ್ಧಾನ ಮಾನುಸಿಂ;

ವದಞ್ಞೂ ಸೀಲಸಮ್ಪನ್ನಾ, ಕಾಹಾಮ ಕುಸಲಂ ಬಹು’’ನ್ತಿ. –

ಅತ್ತನಾ ಕತಕಮ್ಮಂ ಕಥೇಸುಂ.

೭೮೮. ತತ್ಥ ಅಪಿ ಯೋಜನಾನಿ ಗಚ್ಛಾಮಾತಿ ಅನೇಕಾನಿಪಿ ಯೋಜನಾನಿ ಗಚ್ಛಾಮ. ಕಥಂ? ಛಾತಾ ಆಹಾರಗೇಧಿನೋತಿ, ಚಿರಕಾಲಂ ಜಿಘಚ್ಛಾಯ ಜಿಘಚ್ಛಿತಾ ಆಹಾರೇ ಗಿದ್ಧಾ ಅಭಿಗಿಜ್ಝನ್ತಾ ಹುತ್ವಾ, ಏವಂ ಗನ್ತ್ವಾಪಿ ಕಿಞ್ಚಿ ಆಹಾರಂ ಅಲದ್ಧಾಯೇವ ನಿವತ್ತಾಮ. ಅಪ್ಪಪುಞ್ಞತಾತಿ ಅಪುಞ್ಞತಾ ಅಕತಕಲ್ಯಾಣತಾ.

೭೮೯. ಉತ್ತಾನಾ ಪಟಿಕಿರಾಮಾತಿ ಕದಾಚಿ ಉತ್ತಾನಾ ಹುತ್ವಾ ವಿಕಿರಿಯಮಾನಙ್ಗಪಚ್ಚಙ್ಗಾ ವಿಯ ವತ್ತಾಮ. ಅವಕುಜ್ಜಾ ಪತಾಮಸೇತಿ ಕದಾಚಿ ಅವಕುಜ್ಜಾ ಹುತ್ವಾ ಪತಾಮ.

೭೯೦. ತೇ ಚಾತಿ ತೇ ಮಯಂ. ಉರಂ ಸೀಸಞ್ಚ ಘಟ್ಟೇಮಾತಿ ಅವಕುಜ್ಜಾ ಹುತ್ವಾ ಪತಿತಾ ಉಟ್ಠಾತುಂ ಅಸಕ್ಕೋನ್ತಾ ವೇಧನ್ತಾ ವೇದನಾಪ್ಪತ್ತಾ ಅತ್ತನೋ ಅತ್ತನೋ ಉರಂ ಸೀಸಞ್ಚ ಪಟಿಘಂಸಾಮ. ಸೇಸಂ ಹೇಟ್ಠಾ ವುತ್ತನಯಮೇವ.

ಥೇರೋ ತಂ ಪವತ್ತಿಂ ಭಗವತೋ ಆರೋಚೇಸಿ. ಭಗವಾ ತಮತ್ಥಂ ಅಟ್ಠುಪ್ಪತ್ತಿಂ ಕತ್ವಾ ಸಮ್ಪತ್ತಪರಿಸಾಯ ಧಮ್ಮಂ ದೇಸೇಸಿ. ತಂ ಸುತ್ವಾ ಮಹಾಜನೋ ಮಚ್ಛೇರಮಲಂ ಪಹಾಯ ದಾನಾದಿಸುಚರಿತನಿರತೋ ಅಹೋಸೀತಿ.

ಗಣಪೇತವತ್ಥುವಣ್ಣನಾ ನಿಟ್ಠಿತಾ.