೨೬. ಕಸ್ಸಪಬುದ್ಧವಂಸವಣ್ಣನಾ

ಕೋಣಾಗಮನಸ್ಸ ಪನ ಭಗವತೋ ಅಪರಭಾಗೇ ತಸ್ಸ ಸಾಸನೇ ಚ ಅನ್ತರಹಿತೇ ತಿಂಸವಸ್ಸಸಹಸ್ಸಾಯುಕಾ ಸತ್ತಾ ಅನುಪುಬ್ಬೇನ ಪರಿಹಾಯಿತ್ವಾ ದಸವಸ್ಸಾಯುಕಾ ಹುತ್ವಾ ಪುನ ವಡ್ಢಿತ್ವಾ ಅಪರಿಮಿತಾಯುಕಾ ಹುತ್ವಾ ಪುನ ಅನುಪುಬ್ಬೇನ ಪರಿಹಾಯಿತ್ವಾ ವೀಸತಿವಸ್ಸಸಹಸ್ಸಾಯುಕೇಸು ಸತ್ತೇಸು ಜಾತೇಸು ಅನೇಕಮನುಸ್ಸಪೋ ಕಸ್ಸಪೋ ನಾಮ ಸತ್ಥಾ ಲೋಕೇ ಉದಪಾದಿ (ಸು. ನಿ. ಅಟ್ಠ. ಆಮಕಗನ್ಧಸುತ್ತವಣ್ಣನಾ). ಸೋ ಪಾರಮಿಯೋ ಪೂರೇತ್ವಾ ತುಸಿತಪುರೇ ನಿಬ್ಬತ್ತಿತ್ವಾ ತತೋ ಚವಿತ್ವಾ ಬಾರಾಣಸೀನಗರೇ ಬ್ರಹ್ಮದತ್ತಸ್ಸ ನಾಮ ಬ್ರಾಹ್ಮಣಸ್ಸ ವಿಪುಲಗುಣವತಿಯಾ ಧನವತಿಯಾ ನಾಮ ಬ್ರಾಹ್ಮಣಿಯಾ ಕುಚ್ಛಿಸ್ಮಿಂ ಪಟಿಸನ್ಧಿಂ ಗಹೇತ್ವಾ ದಸನ್ನಂ ಮಾಸಾನಂ ಅಚ್ಚಯೇನ ಇಸಿಪತನೇ ಮಿಗದಾಯೇ ಮಾತುಕುಚ್ಛಿತೋ ನಿಕ್ಖಮಿ. ಗೋತ್ತವಸೇನ ಪನಸ್ಸ ‘‘ಕಸ್ಸಪಕುಮಾರೋ’’ತಿ ನಾಮಮಕಂಸು. ಸೋ ದ್ವೇ ವಸ್ಸಸಹಸ್ಸಾನಿ ಅಗಾರಂ ಅಜ್ಝಾವಸಿ. ಹಂಸವಾ ಯಸವಾ ಸಿರಿನನ್ದೋತಿ ತಸ್ಸ ತಯೋ ಪಾಸಾದಾ ಅಹೇಸುಂ. ಸುನನ್ದಾ ನಾಮ ಬ್ರಾಹ್ಮಣಿಪ್ಪಮುಖಾನಿ ಅಟ್ಠಚತ್ತಾಲೀಸ ಇತ್ಥಿಸಹಸ್ಸಾನಿ ಪಚ್ಚುಪಟ್ಠಿತಾನಿ ಅಹೇಸುಂ.

ಸೋ ಚತ್ತಾರಿ ನಿಮಿತ್ತಾನಿ ದಿಸ್ವಾ ಸುನನ್ದಾಯ ಬ್ರಾಹ್ಮಣಿಯಾ ವಿಜಿತಸೇನೇ ನಾಮ ಪುತ್ತೇ ಉಪ್ಪನ್ನೇ ಉಪ್ಪನ್ನಸಂವೇಗೋ ‘‘ಮಹಾಭಿನಿಕ್ಖಮನಂ ನಿಕ್ಖಮಿಸ್ಸಾಮೀ’’ತಿ ಚಿನ್ತೇಸಿ. ಅಥಸ್ಸ ಪರಿವಿತಕ್ಕಸಮನನ್ತರಮೇವ ಪಾಸಾದೋ ಕುಲಾಲಚಕ್ಕಮಿವ ಭಮಿತ್ವಾ ಗಗನತಲಮಬ್ಭುಗ್ಗನ್ತ್ವಾ ಪರಮರುಚಿರಕರನಿಕರೋ ಸರದಸಮಯರಜನಿಕರೋ ವಿಯ ತಾರಾಗಣಪರಿವುತೋ ಅನೇಕನರಸತಪರಿವುತೋ ಗಗನತಲಮಲಙ್ಕರೋನ್ತೋ ವಿಯ ಪುಞ್ಞಾನುಭಾವಂ ಪಕಾಸೇನ್ತೋ ವಿಯ ಜನನಯನಹದಯಾನಿ ಆಕಡ್ಢೇನ್ತೋ ವಿಯ ರುಕ್ಖಗ್ಗಾನಿ ಪರಂ ಸೋಭಯಮಾನೋ ವಿಯ ಚ ಗನ್ತ್ವಾ ನಿಗ್ರೋಧಬೋಧಿಂ ಮಜ್ಝೇಕತ್ವಾ ಭೂಮಿಯಂ ಪತಿಟ್ಠಹಿ. ಅಥ ಬೋಧಿಸತ್ತೋ ಮಹಾಸತ್ತೋ ಪಥವಿಯಂ ಪತಿಟ್ಠಹಿತ್ವಾ ದೇವದತ್ತಂ ಅರಹತ್ತದ್ಧಜಮಾದಾಯ ಪಬ್ಬಜಿ. ತಸ್ಸ ನಾಟಕಿತ್ಥಿಯೋ ಪಾಸಾದಾ ಓತರಿತ್ವಾ ಅಡ್ಢಗಾವುತಂ ಮಗ್ಗಂ ಗನ್ತ್ವಾ ಸಪರಿವಾರಾ ಸೇನಾಸನ್ನಿವೇಸಂ ಕತ್ವಾ ನಿಸೀದಿಂಸು. ತತೋ ಇತ್ಥಿಪರಿಚಾರಿಕೇ ಠಪೇತ್ವಾ ಸಹಾಗತಾ ಸಬ್ಬೇ ಪಬ್ಬಜಿಂಸು.

ಮಹಾಪುರಿಸೋ ಕಿರ ಸತ್ತಾಹಂ ತೇಹಿ ಪರಿವುತೋ ಪಧಾನಚರಿಯಂ ಚರಿತ್ವಾ ವಿಸಾಖಪುಣ್ಣಮಾಯ ಸುನನ್ದಾಯ ನಾಮ ಬ್ರಾಹ್ಮಣಿಯಾ ದಿನ್ನಂ ಮಧುಪಾಯಾಸಂ ಪರಿಭುಞ್ಜಿತ್ವಾ ಖದಿರವನೇ ದಿವಾವಿಹಾರಂ ಕತ್ವಾ ಸಾಯನ್ಹಸಮಯೇ ಸೋಮೇನ ನಾಮ ಯವಪಾಲಕೇನ ಉಪನೀತಾ ಅಟ್ಠ ತಿಣಮುಟ್ಠಿಯೋ ಗಹೇತ್ವಾ ನಿಗ್ರೋಧಬೋಧಿಂ ಉಪಗನ್ತ್ವಾ ಪಞ್ಚದಸಹತ್ಥಾಯಾಮವಿತ್ಥತಂ ತಿಣಸನ್ಥರಂ ಸನ್ಥರಿತ್ವಾ ತತ್ಥ ನಿಸೀದಿತ್ವಾ ಅಭಿಸಮ್ಬೋಧಿಂ ಪಾಪುಣಿತ್ವಾ – ‘‘ಅನೇಕಜಾತಿಸಂಸಾರಂ…ಪೇ… ತಣ್ಹಾನಂ ಖಯಮಜ್ಝಗಾ’’ತಿ ಉದಾನಂ ಉದಾನೇತ್ವಾ ಸತ್ತಸತ್ತಾಹಂ ವೀತಿನಾಮೇತ್ವಾ ಅತ್ತನಾ ಸಹ ಪಬ್ಬಜಿತಾನಂ ಭಿಕ್ಖೂನಂ ಕೋಟಿಯಾ ಉಪನಿಸ್ಸಯಸಮ್ಪತ್ತಿಂ ದಿಸ್ವಾ ಗಗನತಲೇನ ಗನ್ತ್ವಾ ಬಾರಾಣಸಿಯಂ ಇಸಿಪತನೇ ಮಿಗದಾಯೇ ಓತರಿತ್ವಾ ತೇಹಿ ಪರಿವುತೋ ತತ್ಥ ಧಮ್ಮಚಕ್ಕಂ ಪವತ್ತೇಸಿ. ತದಾ ವೀಸತಿಯಾ ಕೋಟಿಸಹಸ್ಸಾನಂ ಪಠಮೋ ಧಮ್ಮಾಭಿಸಮಯೋ ಅಹೋಸಿ. ತೇನ ವುತ್ತಂ –

೧. ‘‘ಕೋಣಾಗಮನಸ್ಸ ಅಪರೇನ, ಸಮ್ಬುದ್ಧೋ ದ್ವಿಪದುತ್ತಮೋ;

ಕಸ್ಸಪೋ ನಾಮ ಗೋತ್ತೇನ, ಧಮ್ಮರಾಜಾ ಪಭಙ್ಕರೋ.

೨. ‘‘ಸಞ್ಛಡ್ಡಿತಂ ಕುಲಮೂಲಂ, ಬಹ್ವನ್ನಪಾನಭೋಜನಂ;

ದತ್ವಾನ ಯಾಚಕೇ ದಾನಂ, ಪೂರಯಿತ್ವಾನ ಮಾನಸಂ;

ಉಸಭೋವ ಆಳಕಂ ಭೇತ್ವಾ, ಪತ್ತೋ ಸಮ್ಬೋಧಿಮುತ್ತಮಂ.

೩. ‘‘ಧಮ್ಮಚಕ್ಕಂ ಪವತ್ತೇನ್ತೇ, ಕಸ್ಸಪೇ ಲೋಕನಾಯಕೇ;

ವೀಸಕೋಟಿಸಹಸ್ಸಾನಂ, ಪಠಮಾಭಿಸಮಯೋ ಅಹೂ’’ತಿ.

ತತ್ಥ ಸಞ್ಛಡ್ಡಿತನ್ತಿ ಛಡ್ಡಿತಂ ಉಜ್ಝಿತಂ ಪರಿಚ್ಚತ್ತಂ. ಕುಲಮೂಲನ್ತಿ ಕುಲಘರಂ, ಅಪರಿಮಿತಭೋಗಕ್ಖನ್ಧಂ ಅನೇಕಕೋಟಿಸಹಸ್ಸಧನಸಞ್ಚಯಂ ದಸಸತನಯನಭವನಸದಿಸಭೋಗಂ ಅತಿದುಚ್ಚಜಂ ತಿಣಮಿವ ಛಡ್ಡಿತನ್ತಿ ಅತ್ಥೋ. ಯಾಚಕೇತಿ ಯಾಚಕಾನಂ ದತ್ವಾ. ಆಳಕನ್ತಿ ಗೋಟ್ಠಂ, ಯಥಾ ಉಸಭೋ ಗೋಟ್ಠಂ ಭಿನ್ದಿತ್ವಾ ಯಥಾಸುಖಂ ಇಚ್ಛಿತಟ್ಠಾನಂ ಪಾಪುಣಾತಿ, ಏವಂ ಮಹಾಪುರಿಸೋಪಿ ಗೇಹಬನ್ಧನಂ ಭಿನ್ದಿತ್ವಾ ಅಭಿಸಮ್ಬೋಧಿಂ ಪಾಪುಣೀತಿ ಅತ್ಥೋ.

ಪುನ ಚತುಮಾಸಂ ಜನಪದಚಾರಿಕಂ ಚರಮಾನೇ ಸತ್ಥರಿ ದಸಕೋಟಿಸಹಸ್ಸಾನಂ ದುತಿಯೋ ಅಭಿಸಮಯೋ ಅಹೋಸಿ. ಯದಾ ಪನ ಸುನ್ದರನಗರದ್ವಾರೇ ಅಸನರುಕ್ಖಮೂಲೇ ಯಮಕಪಾಟಿಹಾರಿಯಂ ಕರೋನ್ತೋ ಧಮ್ಮಂ ದೇಸೇಸಿ, ತದಾ ಪಞ್ಚನ್ನಂ ಕೋಟಿಸಹಸ್ಸಾನಂ ತತಿಯೋ ಅಭಿಸಮಯೋ ಅಹೋಸಿ. ಪುನ ಯಮಕಪಾಟಿಹಾರಿಯಂ ಕತ್ವಾ ಸುರರಿಪುದುರಭಿಭವನೇ ತಾವತಿಂಸಭವನೇ ಸುಧಮ್ಮಾ ನಾಮ ದೇವಸಭಾ ಅತ್ಥಿ, ತತ್ಥ ನಿಸೀದಿತ್ವಾ ಅತ್ತನೋ ಮಾತರಂ ಧನವತೀದೇವಿಂ ಪಮುಖಂ ಕತ್ವಾ ದಸಸಹಸ್ಸಿಲೋಕಧಾತುಯಾ ದೇವತಾನಂ ಅನುಗ್ಗಹಕರಣತ್ಥಂ ಸತ್ತಪ್ಪಕರಣಂ ಅಭಿಧಮ್ಮಪಿಟಕಂ ದೇಸೇನ್ತೋ ತೀಣಿ ದೇವತಾಕೋಟಿಸಹಸ್ಸಾನಿ ಧಮ್ಮಾಮತಂ ಪಾಯೇಸಿ. ತೇನ ವುತ್ತಂ –

೪. ‘‘ಚತುಮಾಸಂ ಯದಾ ಬುದ್ಧೋ, ಲೋಕೇ ಚರತಿ ಚಾರಿಕಂ;

ದಸಕೋಟಿಸಹಸ್ಸಾನಂ, ದುತಿಯಾಭಿಸಮಯೋ ಅಹು.

೫. ‘‘ಯಮಕಂ ವಿಕುಬ್ಬನಂ ಕತ್ವಾ, ಞಾಣಧಾತುಂ ಪಕಿತ್ತಯಿ;

ಪಞ್ಚಕೋಟಿಸಹಸ್ಸಾನಂ, ತತಿಯಾಭಿಸಮಯೋ ಅಹು.

೬. ‘‘ಸುಧಮ್ಮಾ ದೇವಪುರೇ ರಮ್ಮೇ, ತತ್ಥ ಧಮ್ಮಂ ಪಕಿತ್ತಯಿ;

ತೀಣಿಕೋಟಿಸಹಸ್ಸಾನಂ, ದೇವಾನಂ ಬೋಧಯೀ ಜಿನೋ.

೭. ‘‘ನರದೇವಸ್ಸ ಯಕ್ಖಸ್ಸ, ಅಪರೇ ಧಮ್ಮದೇಸನೇ;

ಏತೇಸಾನಂ ಅಭಿಸಮಯಾ, ಗಣನಾತೋ ಅಸಙ್ಖಿಯಾ’’ತಿ.

ತತ್ಥ ಚತುಮಾಸನ್ತಿ ಚಾತುಮಾಸೇ. ಅಯಮೇವ ವಾ ಪಾಠೋ. ಚರತೀತಿ ಅಚರಿ. ಯಮಕಂ ವಿಕುಬ್ಬನಂ ಕತ್ವಾತಿ ಯಮಕಪಾಟಿಹಾರಿಯಂ ಕತ್ವಾ. ಞಾಣಧಾತುನ್ತಿ ಸಬ್ಬಞ್ಞುತಞ್ಞಾಣಸಭಾವಂ. ‘‘ಸಬ್ಬಞಾಣಧಾತು’’ನ್ತಿಪಿ ವದನ್ತಿ. ಪಕಿತ್ತಯೀತಿ ಮಹಾಜನಸ್ಸ ಪಕಾಸೇಸಿ. ಸುಧಮ್ಮಾತಿ ತಾವತಿಂಸಭವನೇ ಸುಧಮ್ಮಾ ನಾಮ ಸಭಾ ಅತ್ಥಿ, ತತ್ಥ ನಿಸೀದಿತ್ವಾತಿ ಅತ್ಥೋ. ಧಮ್ಮನ್ತಿ ಅಭಿಧಮ್ಮಂ.

ತದಾ ಕಿರ ಆನುಭಾವವಿಜಿತನರದೇವೋ ನರದೇವೋ ನಾಮ ಮಹೇಸಕ್ಖೋ ಹೇಟ್ಠಾ ವುತ್ತನರದೇವಯಕ್ಖೋ ವಿಯ ಮಹಿದ್ಧಿಕೋ ಯಕ್ಖೋ ಅಹೋಸಿ. ಸೋ ಜಮ್ಬುದೀಪೇ ಏಕಸ್ಮಿಂ ನಗರೇ ರಞ್ಞೋ ಯಾದಿಸಂ ರೂಪಂ, ತಾದಿಸಂ ರೂಪಸಣ್ಠಾನಂ ಸರಕುತ್ತಿಂ ನಿಮ್ಮಿನಿತ್ವಾ ತಂ ರಾಜಾನಂ ಮಾರೇತ್ವಾ ಖಾದಿತ್ವಾ ಸಹಅನ್ತೇಪುರಂ ರಜ್ಜಂ ಪಟಿಪಜ್ಜಿತ್ವಾ ಅಪರಿಮಿತಮಂಸಭೋಜನೋ ಅಹೋಸಿ. ಸೋ ಕಿರ ಇತ್ಥಿಧುತ್ತೋ ಚ ಅಹೋಸಿ. ಯದಾ ಪನ ತಂ ಕುಸಲಾ ಛೇಕಾ ಇತ್ಥಿಯೋ – ‘‘ನಾಯಂ ಅಮ್ಹಾಕಂ ರಾಜಾ, ಅಮನುಸ್ಸೋ ಏಸೋ’’ತಿ ಜಾನನ್ತಿ, ತದಾ ಸೋ ಲಜ್ಜಿತೋ ಹುತ್ವಾ ತಾ ಸಬ್ಬಾ ಖಾದಿತ್ವಾ ಅಞ್ಞಂ ನಗರಂ ಪಟಿಪಜ್ಜತಿ. ಏವಮೇವ ಸೋ ನರದೇವಯಕ್ಖೋ ಮನುಸ್ಸೇ ಭಕ್ಖಯನ್ತೋ ಯದಾ ಸುನ್ದರನಗರಾಭಿಮುಖೋ ಅಗಮಾಸಿ, ತದಾ ತಂ ದಿಸ್ವಾ ನಗರವಾಸಿನೋ ಮನುಸ್ಸಾ ಮರಣಭಯತಜ್ಜಿತಸನ್ತಾಸಾ ಸಕನಗರತೋ ನಿಕ್ಖಮಿತ್ವಾ ತತೋ ತತೋ ಪಲಾಯಿಂಸು. ಅಥ ತೇ ಮನುಸ್ಸೇ ಪಲಾಯಮಾನೇ ದಿಸ್ವಾ ಕಸ್ಸಪದಸಬಲೋ ತಸ್ಸ ನರದೇವಸ್ಸ ಯಕ್ಖಸ್ಸ ಪುರತೋ ಅಟ್ಠಾಸಿ. ನರದೇವೋ ಏವಂ ದೇವದೇವಂ ಠಿತಂ ದಿಸ್ವಾ ವಿಸ್ಸರಂ ಘೋರಂ ನಾದಂ ನದಿತ್ವಾ ಭಗವತೋ ಭಯಂ ಉಪ್ಪಾದೇತುಂ ಅಸಕ್ಕೋನ್ತೋ ತಂ ಸರಣಂ ಗನ್ತ್ವಾ ಪಞ್ಹಂ ಪುಚ್ಛಿ. ಪಞ್ಹಂ ವಿಸ್ಸಜ್ಜೇತ್ವಾ ತಂ ದಮೇತ್ವಾ ಧಮ್ಮೇ ದೇಸಿಯಮಾನೇ ಸಮ್ಪತ್ತಾನಂ ನರಮರಾನಂ ಗಣನಪಥಾತೀತಾನಂ ಅಭಿಸಮಯೋ ಅಹೋಸಿ. ತೇನ ವುತ್ತಂ – ‘‘ನರದೇವಸ್ಸ ಯಕ್ಖಸ್ಸಾ’’ತಿಆದಿ. ತತ್ಥ ಅಪರೇ ಧಮ್ಮದೇಸನೇತಿ ಅಪರಸ್ಮಿಂ ಧಮ್ಮದೇಸನೇ. ಏತೇಸಾನನ್ತಿ ಏತೇಸಂ. ಅಯಮೇವ ವಾ ಪಾಠೋ.

ತಸ್ಸ ಪನ ಕಸ್ಸಪಭಗವತೋ ಏಕೋವ ಸಾವಕಸನ್ನಿಪಾತೋ ಅಹೋಸಿ. ಬಾರಾಣಸೀನಗರೇ ಪುರೋಹಿತಪುತ್ತೋ ತಿಸ್ಸೋ ನಾಮ ಅಹೋಸಿ. ಸೋ ಕಸ್ಸಪಸ್ಸ ಬೋಧಿಸತ್ತಸ್ಸ ಸರೀರೇ ಲಕ್ಖಣಸಮ್ಪತ್ತಿಂ ದಿಸ್ವಾ ಪಿತುನೋ ಭಾಸತೋ ಸುತ್ವಾ – ‘‘ನಿಸ್ಸಂಸಯಂ ಏಸೋ ಮಹಾಭಿನಿಕ್ಖಮನಂ ನಿಕ್ಖಮಿತ್ವಾ ಬುದ್ಧೋ ಭವಿಸ್ಸತಿ, ಏತಸ್ಸಾಹಂ ಸನ್ತಿಕೇ ಪಬ್ಬಜಿತ್ವಾ ಸಂಸಾರದುಕ್ಖತೋ ಮುಚ್ಚಿಸ್ಸಾಮೀ’’ತಿ ಚಿನ್ತೇತ್ವಾ ಸುದ್ಧಮುನಿಗಣವನ್ತಂ ಹಿಮವನ್ತಂ ಗನ್ತ್ವಾ ತಾಪಸಪಬ್ಬಜ್ಜಂ ಪಬ್ಬಜಿ. ತಸ್ಸ ಪರಿವಾರಭೂತಾನಿ ವೀಸತಿತಾಪಸಸಹಸ್ಸಾನಿ ಅಹೇಸುಂ. ಸೋ ಅಪರಭಾಗೇ ‘‘ಕಸ್ಸಪಕುಮಾರೋ ನಿಕ್ಖಮಿತ್ವಾ ಅಭಿಸಮ್ಬೋಧಿಂ ಅನುಪ್ಪತ್ತೋ’’ತಿ ಸುತ್ವಾ ಸಪರಿವಾರೋ ಆಗನ್ತ್ವಾ ಕಸ್ಸಪಸ್ಸ ಭಗವತೋ ಸನ್ತಿಕೇ ಸಪರಿವಾರೋ ಏಹಿಭಿಕ್ಖುಪಬ್ಬಜ್ಜಾಯ ಪಬ್ಬಜಿತ್ವಾ ಅರಹತ್ತಂ ಪಾಪುಣಿ. ತಸ್ಮಿಂ ಸಮಾಗಮೇ ಕಸ್ಸಪೋ ಭಗವಾ ಮಾಘಪುಣ್ಣಮಾಯಂ ಪಾತಿಮೋಕ್ಖಂ ಉದ್ದಿಸಿ. ತೇನ ವುತ್ತಂ –

೮. ‘‘ತಸ್ಸಾಪಿ ದೇವದೇವಸ್ಸ, ಏಕೋ ಆಸಿ ಸಮಾಗಮೋ;

ಖೀಣಾಸವಾನಂ ವಿಮಲಾನಂ, ಸನ್ತಚಿತ್ತಾನ ತಾದಿನಂ.

೯. ‘‘ವೀಸಭಿಕ್ಖುಸಹಸ್ಸಾನಂ, ತದಾ ಆಸಿ ಸಮಾಗಮೋ;

ಅತಿಕ್ಕನ್ತಭವನ್ತಾನಂ, ಹಿರಿಸೀಲೇನ ತಾದಿನ’’ನ್ತಿ.

ತತ್ಥ ಅತಿಕ್ಕನ್ತಭವನ್ತಾನನ್ತಿ ಅತಿಕ್ಕನ್ತಪುಥುಜ್ಜನಸೋತಾಪನ್ನಾದೀನಂ, ಸಬ್ಬೇಸಂ ಖೀಣಾಸವಾನಮೇವಾತಿ ಅತ್ಥೋ. ಹಿರಿಸೀಲೇನ ತಾದಿನನ್ತಿ ಹಿರಿಯಾ ಚ ಸೀಲೇನ ಚ ಸದಿಸಾನಂ.

ತದಾ ಅಮ್ಹಾಕಂ ಬೋಧಿಸತ್ತೋ ಜೋತಿಪಾಲೋ ನಾಮ ಮಾಣವೋ ತಿಣ್ಣಂ ವೇದಾನಂ ಪಾರಗೂ ಭೂಮಿಯಞ್ಚೇವ ಅನ್ತಲಿಕ್ಖೇ ಚ ಪಾಕಟೋ ಘಟಿಕಾರಸ್ಸ ಕುಮ್ಭಕಾರಸ್ಸ ಸಹಾಯೋ ಅಹೋಸಿ. ಸೋ ತೇನ ಸದ್ಧಿಂ ಸತ್ಥಾರಂ ಉಪಸಙ್ಕಮಿತ್ವಾ ತಸ್ಸ ಧಮ್ಮಕಥಂ ಸುತ್ವಾ ತಸ್ಸ ಸನ್ತಿಕೇ ಪಬ್ಬಜಿ. ಸೋ ಆರದ್ಧವೀರಿಯೋ ತೀಣಿ ಪಿಟಕಾನಿ ಉಗ್ಗಹೇತ್ವಾ ವತ್ತಪಟಿಪತ್ತಿಯಾ ಬುದ್ಧಸಾಸನಂ ಸೋಭೇಸಿ. ಸೋಪಿ ತಂ ಸತ್ಥಾ ಬ್ಯಾಕಾಸಿ. ತೇನ ವುತ್ತಂ –

೧೦. ‘‘ಅಹಂ ತದಾ ಮಾಣವಕೋ, ಜೋತಿಪಾಲೋತಿ ವಿಸ್ಸುತೋ;

ಅಜ್ಝಾಯಕೋ ಮನ್ತಧರೋ, ತಿಣ್ಣಂ ವೇದಾನ ಪಾರಗೂ.

೧೧. ‘‘ಲಕ್ಖಣೇ ಇತಿಹಾಸೇ ಚ, ಸಧಮ್ಮೇ ಪಾರಮಿಂ ಗತೋ;

ಭೂಮನ್ತಲಿಕ್ಖಕುಸಲೋ, ಕತವಿಜ್ಜೋ ಅನವಯೋ.

೧೨. ‘‘ಕಸ್ಸಪಸ್ಸ ಭಗವತೋ, ಘಟಿಕಾರೋ ನಾಮುಪಟ್ಠಕೋ;

ಸಗಾರವೋ ಸಪ್ಪತಿಸ್ಸೋ, ನಿಬ್ಬುತೋ ತತಿಯೇ ಫಲೇ.

೧೩. ‘‘ಆದಾಯ ಮಂ ಘಟೀಕಾರೋ, ಉಪಗಞ್ಛಿ ಕಸ್ಸಪಂ ಜಿನಂ;

ತಸ್ಸ ಧಮ್ಮಂ ಸುಣಿತ್ವಾನ, ಪಬ್ಬಜಿಂ ತಸ್ಸ ಸನ್ತಿಕೇ.

೧೪. ‘‘ಆರದ್ಧವೀರಿಯೋ ಹುತ್ವಾ, ವತ್ತಾವತ್ತೇಸು ಕೋವಿದೋ;

ನ ಕ್ವಚಿ ಪರಿಹಾಯಾಮಿ, ಪೂರೇಸಿಂ ಜಿನಸಾಸನಂ.

೧೫. ‘‘ಯಾವತಾ ಬುದ್ಧಭಣಿತಂ, ನವಙ್ಗಂ ಜಿನಸಾಸನಂ;

ಸಬ್ಬಂ ಪರಿಯಾಪುಣಿತ್ವಾನ, ಸೋಭಯಿಂ ಜಿನಸಾಸನಂ.

೧೬. ‘‘ಮಮ ಅಚ್ಛರಿಯಂ ದಿಸ್ವಾ, ಸೋಪಿ ಬುದ್ಧೋ ವಿಯಾಕರಿ;

ಇಮಮ್ಹಿ ಭದ್ದಕೇ ಕಪ್ಪೇ, ಅಯಂ ಬುದ್ಧೋ ಭವಿಸ್ಸತಿ.

೧೭. ‘‘ಅಹು ಕಪಿಲವ್ಹಯಾ ರಮ್ಮಾ…ಪೇ… ಹೇಸ್ಸಾಮ ಸಮ್ಮುಖಾ ಇಮಂ.

೩೦. ‘‘ತಸ್ಸಾಪಿ ವಚನಂ ಸುತ್ವಾ, ಭಿಯ್ಯೋ ಚಿತ್ತಂ ಪಸಾದಯಿಂ;

ಉತ್ತರಿಂ ವತಮಧಿಟ್ಠಾಸಿಂ, ದಸಪಾರಮಿಪೂರಿಯಾ.

೩೧. ‘‘ಏವಮಹಂ ಸಂಸರಿತ್ವಾ, ಪರಿವಜ್ಜೇನ್ತೋ ಅನಾಚರಂ;

ದುಕ್ಕರಞ್ಚ ಕತಂ ಮಯ್ಹಂ, ಬೋಧಿಯಾಯೇವ ಕಾರಣಾ’’ತಿ.

ತತ್ಥ ಭೂಮನ್ತಲಿಕ್ಖಕುಸಲೋತಿ ಭೂಮಿಸಿಕ್ಖಾಸು ಚ ಅನ್ತಲಿಕ್ಖೇಸು ಚ ಜೋತಿಚಕ್ಕಾಚಾರೇ ಜೋತಿವಿಜ್ಜಾಯ ಚ ಕುಸಲೋತಿ ಅತ್ಥೋ. ಉಪಟ್ಠಕೋತಿ ಉಪಟ್ಠಾಯಕೋ. ಸಪ್ಪತಿಸ್ಸೋತಿ ಸಪ್ಪತಿಸ್ಸಯೋ. ನಿಬ್ಬುತೋತಿ ವಿನೀತೋ, ವಿಸ್ಸುತೋ ವಾ. ತತಿಯೇ ಫಲೇತಿ ನಿಮಿತ್ತಸತ್ತಮೀ, ತತಿಯಫಲಾಧಿಗಮಹೇತು ನಿಬ್ಬುತೋತಿ ಅತ್ಥೋ. ಆದಾಯಾತಿ ಮಂ ಗಹೇತ್ವಾ. ವತ್ತಾವತ್ತೇಸೂತಿ ಖುದ್ದಕವತ್ತಮಹಾವತ್ತೇಸು. ಕೋವಿದೋತಿ ತೇಸಂ ಪೂರಣೇ ಕುಸಲೋ. ನ ಕ್ವಚಿ ಪರಿಹಾಯಾಮೀತಿ ಕ್ವಚಿಪಿ ಸೀಲೇಸು ವಾ ಸಮಾಧಿಸಮಾಪತ್ತಿಆದೀಸು ವಾ ಕತ್ಥಚಿ ಕುತೋಪಿ ನ ಪರಿಹಾಯಾಮಿ, ಸಬ್ಬತ್ಥ ಮೇ ಪರಿಹಾನಿ ನಾಮ ನ ವಿಜ್ಜತೀತಿ ದೀಪೇತಿ. ‘‘ನ ಕೋಚಿ ಪರಿಹಾಯಾಮೀ’’ತಿಪಿ ಪಾಠೋ, ಸೋಯೇವತ್ಥೋ.

ಯಾವತಾತಿ ಪರಿಚ್ಛೇದವಚನಮೇತಂ, ಯಾವತಕನ್ತಿ ಅತ್ಥೋ. ಬುದ್ಧಭಣಿತನ್ತಿ ಬುದ್ಧವಚನಂ. ಸೋಭಯಿನ್ತಿ ಸೋಭೇಸಿಂ ಪಕಾಸೇಸಿಂ. ಮಮ ಅಚ್ಛರಿಯನ್ತಿ ಮಮ ಸಮ್ಮಾಪಟಿಪತ್ತಿಂ ಅಞ್ಞೇಹಿ ಅಸಾಧಾರಣಂ ಅಚ್ಛರಿಯಂ ಅಬ್ಭುತಂ ಕಸ್ಸಪೋ ಭಗವಾ ದಿಸ್ವಾತಿ ಅತ್ಥೋ. ಸಂಸರಿತ್ವಾತಿ ಸಂಸಾರೇ ಸಂಸರಿತ್ವಾ. ಅನಾಚರನ್ತಿ ಅನಾಚಾರಂ ಅಕತ್ತಬ್ಬಂ, ಅಕರಣೀಯನ್ತಿ ಅತ್ಥೋ.

ತಸ್ಸ ಪನ ಕಸ್ಸಪಸ್ಸ ಭಗವತೋ ಜಾತನಗರಂ ಬಾರಾಣಸೀ ನಾಮ ಅಹೋಸಿ, ಬ್ರಹ್ಮದತ್ತೋ ನಾಮ ಬ್ರಾಹ್ಮಣೋ ಪಿತಾ, ಪರಮಗುಣವತೀ ಧನವತೀ ನಾಮ ಬ್ರಾಹ್ಮಣೀ ಮಾತಾ, ತಿಸ್ಸೋ ಚ ಭಾರದ್ವಾಜೋ ಚ ದ್ವೇ ಅಗ್ಗಸಾವಕಾ, ಸಬ್ಬಮಿತ್ತೋ ನಾಮುಪಟ್ಠಾಕೋ, ಅನುಳಾ ಚ ಉರುವೇಳಾ ಚ ದ್ವೇ ಅಗ್ಗಸಾವಿಕಾ, ನಿಗ್ರೋಧರುಕ್ಖೋ ಬೋಧಿ, ಸರೀರಂ ವೀಸತಿಹತ್ಥುಬ್ಬೇಧಂ ಅಹೋಸಿ, ವೀಸತಿವಸ್ಸಸಹಸ್ಸಾನಿ ಆಯು, ಸುನನ್ದಾ ನಾಮಸ್ಸ ಅಗ್ಗಮಹೇಸೀ, ವಿಜಿತಸೇನೋ ನಾಮ ಪುತ್ತೋ, ಪಾಸಾದಯಾನೇನ ನಿಕ್ಖಮಿ. ತೇನ ವುತ್ತಂ –

೩೨. ‘‘ನಗರಂ ಬಾರಾಣಸೀ ನಾಮ, ಕಿಕೀ ನಾಮಾಸಿ ಖತ್ತಿಯೋ;

ವಸತೇ ತತ್ಥ ನಗರೇ, ಸಮ್ಬುದ್ಧಸ್ಸ ಮಹಾಕುಲಂ.

೩೩. ‘‘ಬ್ರಾಹ್ಮಣೋ ಬ್ರಹ್ಮದತ್ತೋವ, ಆಸಿ ಬುದ್ಧಸ್ಸ ಸೋ ಪಿತಾ;

ಧನವತೀ ನಾಮ ಜನಿಕಾ, ಕಸ್ಸಪಸ್ಸ ಮಹೇಸಿನೋ.

೩೮. ‘‘ತಿಸ್ಸೋ ಚ ಭಾರದ್ವಾಜೋ ಚ, ಅಹೇಸುಂ ಅಗ್ಗಸಾವಕಾ;

ಸಬ್ಬಮಿತ್ತೋ ನಾಮುಪಟ್ಠಾಕೋ, ಕಸ್ಸಪಸ್ಸ ಮಹೇಸಿನೋ.

೩೯. ‘‘ಅನುಳಾ ಉರುವೇಳಾ ಚ, ಅಹೇಸುಂ ಅಗ್ಗಸಾವಿಕಾ;

ಬೋಧಿ ತಸ್ಸ ಭಗವತೋ, ನಿಗ್ರೋಧೋತಿ ಪವುಚ್ಚತಿ.

೪೧. ‘‘ಉಚ್ಚತ್ತನೇನ ಸೋ ಬುದ್ಧೋ, ವೀಸತಿರತನುಗ್ಗತೋ;

ವಿಜ್ಜುಲಟ್ಠೀವ ಆಕಾಸೇ, ಚನ್ದೋವ ಗಹಪೂರಿತೋ.

೪೨. ‘‘ವೀಸತಿವಸ್ಸಸಹಸ್ಸಾನಿ, ಆಯು ತಸ್ಸ ಮಹೇಸಿನೋ;

ತಾವತಾ ತಿಟ್ಠಮಾನೋ ಸೋ, ತಾರೇಸಿ ಜನತಂ ಬಹುಂ.

೪೩. ‘‘ಧಮ್ಮತಳಾಕಂ ಮಾಪಯಿತ್ವಾ, ಸೀಲಂ ದತ್ವಾ ವಿಲೇಪನಂ;

ಧಮ್ಮದುಸ್ಸಂ ನಿವಾಸೇತ್ವಾ, ಧಮ್ಮಮಾಲಂ ವಿಭಜ್ಜಿಯ.

೪೪. ‘‘ಧಮ್ಮವಿಮಲಮಾದಾಸಂ, ಠಪಯಿತ್ವಾ ಮಹಾಜನೇ;

ಕೇಚಿ ನಿಬ್ಬಾನಂ ಪತ್ಥೇನ್ತಾ, ಪಸ್ಸನ್ತು ಮೇ ಅಲಙ್ಕರಂ.

೪೫. ‘‘ಸೀಲಕಞ್ಚುಕಂ ದತ್ವಾನ, ಝಾನಕವಚವಮ್ಮಿತಂ;

ಧಮ್ಮಚಮ್ಮಂ ಪಾರುಪಿತ್ವಾ, ದತ್ವಾ ಸನ್ನಾಹಮುತ್ತಮಂ.

೪೬. ‘‘ಸತಿಫಲಕಂ ದತ್ವಾನ, ತಿಖಿಣಂ ಞಾಣಕುನ್ತಿಮಂ;

ಧಮ್ಮಖಗ್ಗವರಂ ದತ್ವಾ, ಸೀಲಸಂಸಗ್ಗಮದ್ದನಂ.

೪೭. ‘‘ತೇವಿಜ್ಜಾಭೂಸನಂ ದತ್ವಾನ, ಆವೇಳಂ ಚತುರೋ ಫಲೇ;

ಛಳಭಿಞ್ಞಾಭರಣಂ ದತ್ವಾ, ಧಮ್ಮಪುಪ್ಫಪಿಳನ್ಧನಂ.

೪೮. ‘‘ಸದ್ಧಮ್ಮಪಣ್ಡರಚ್ಛತ್ತಂ, ದತ್ವಾ ಪಾಪನಿವಾರಣಂ;

ಮಾಪಯಿತ್ವಾಭಯಂ ಪುಪ್ಫಂ, ನಿಬ್ಬುತೋ ಸೋ ಸಸಾವಕೋ.

೪೯. ‘‘ಏಸೋ ಹಿ ಸಮ್ಮಾಸಮ್ಬುದ್ಧೋ, ಅಪ್ಪಮೇಯ್ಯೋ ದುರಾಸದೋ;

ಏಸೋ ಹಿ ಧಮ್ಮರತನೋ, ಸ್ವಾಕ್ಖಾತೋ ಏಹಿಪಸ್ಸಿಕೋ.

೫೦. ‘‘ಏಸೋ ಹಿ ಸಙ್ಘರತನೋ, ಸುಪ್ಪಟಿಪನ್ನೋ ಅನುತ್ತರೋ;

ಸಬ್ಬಂ ತಮನ್ತರಹಿತಂ, ನನು ರಿತ್ತಾ ಸಬ್ಬಸಙ್ಖಾರಾ’’ತಿ.

ತತ್ಥ ವಿಜ್ಜುಲಟ್ಠೀವಾತಿ ಘನಭಾವೇನ ಸಣ್ಠಿತಾ ವಿಜ್ಜುಲತಾ ವಿಯ. ಚನ್ದೋವ ಗಹಪೂರಿತೋತಿ ಪರಿವೇಸಗಹಪರಿಕ್ಖಿತೋ ಪುಣ್ಣಚನ್ದೋ ವಿಯ. ಧಮ್ಮತಳಾಕಂ ಮಾಪಯಿತ್ವಾತಿ ಪರಿಯತ್ತಿಧಮ್ಮತಳಾಕಂ ಮಾಪಯಿತ್ವಾ. ಸೀಲಂ ದತ್ವಾ ವಿಲೇಪನನ್ತಿ ಚತುಪಾರಿಸುದ್ಧಿಸೀಲಸಙ್ಖಾತಂ ಚಿತ್ತಸನ್ತತಿವಿಭೂಸನತ್ಥಂ ವಿಲೇಪನಂ ದತ್ವಾ. ಧಮ್ಮದುಸ್ಸಂ ನಿವಾಸೇತ್ವಾತಿ ಹಿರೋತ್ತಪ್ಪಧಮ್ಮಸಙ್ಖಾತಂ ಸಾಟಕಯುಗಂ ನಿವಾಸೇತ್ವಾ. ಧಮ್ಮಮಾಲಂ ವಿಭಜ್ಜಿಯಾತಿ ಸತ್ತತ್ತಿಂಸಬೋಧಿಪಕ್ಖಿಯಧಮ್ಮಕುಸುಮಮಾಲಂ ವಿಭಜಿತ್ವಾ. ವಿದಹಿತ್ವಾತಿ ಅತ್ಥೋ.

ಧಮ್ಮವಿಮಲಮಾದಾಸನ್ತಿ ವಿಮಲಂ ಸೋತಾಪತ್ತಿಮಗ್ಗಸಙ್ಖಾತಂ ಆದಾಸಂ ಸಾವಜ್ಜಾನವಜ್ಜಕುಸಲಾಕುಸಲಧಮ್ಮಸಲ್ಲಕ್ಖಣತ್ಥಂ ಮಹಾಜನಸ್ಸ ಧಮ್ಮತಳಾಕತೀರೇ ಧಮ್ಮಾದಾಸಂ ಠಪೇತ್ವಾತಿ ಅತ್ಥೋ. ಮಹಾಜನೇತಿ ಮಹಾಜನಸ್ಸ. ಕೇಚೀತಿ ಯೇ ಕೇಚಿ. ನಿಬ್ಬಾನಂ ಪತ್ಥೇನ್ತಾತಿ ಸಬ್ಬಾಕುಸಲಮಲವಿಲಯಕರಂ ಅಮತಮಸಙ್ಖತಮನೀತಿಕಂ ಪರಮಸನ್ತಂ ಅಚ್ಚುತಿರಸಂ ನಿಬ್ಬಾನಂ ಪತ್ಥೇನ್ತಾ ವಿಚರನ್ತಿ. ತೇ ಇಮಂ ಅಲಙ್ಕಾರಂ ವುತ್ತಪ್ಪಕಾರಂ ಮಯಾ ದಸ್ಸಿತಂ ಪಸ್ಸನ್ತೂತಿ ಅತ್ಥೋ. ‘‘ನಿಬ್ಬಾನಮಭಿಪತ್ಥೇನ್ತಾ, ಪಸ್ಸನ್ತು ಮಂ ಅಲಙ್ಕರ’’ನ್ತಿಪಿ ಪಾಠೋ, ಸೋಯೇವತ್ಥೋ. ಅಲಙ್ಕರನ್ತಿ ರಸ್ಸಂ ಕತ್ವಾ ವುತ್ತಂ.

ಸೀಲಕಞ್ಚುಕಂ ದತ್ವಾನಾತಿ ಪಞ್ಚಸೀಲದಸಸೀಲಚತುಪಾರಿಸುದ್ಧಿಸೀಲಮಯಂ ಕಞ್ಚುಕಂ ದತ್ವಾ. ಝಾನಕವಚವಮ್ಮಿತನ್ತಿ ಚತುಕ್ಕಪಞ್ಚಕಜ್ಝಾನಕವಚಬನ್ಧಂ ಬನ್ಧಿತ್ವಾ. ಧಮ್ಮಚಮ್ಮಂ ಪಾರುಪಿತ್ವಾತಿ ಸತಿಸಮ್ಪಜಞ್ಞಸಙ್ಖಾತಧಮ್ಮಚಮ್ಮಂ ಪಾರುಪಿತ್ವಾ. ದತ್ವಾ ಸನ್ನಾಹಮುತ್ತಮನ್ತಿ ಉತ್ತಮಂ ಚತುರಙ್ಗಸಮನ್ನಾಗತಂ ವೀರಿಯಸನ್ನಾಹಂ ದತ್ವಾತಿ ಅತ್ಥೋ. ಸತಿಫಲಕಂ ದತ್ವಾನಾತಿ ರಾಗಾದಿದೋಸಾರಿಪಾಪನಿವಾರಣತ್ಥಂ ಚತುಸತಿಪಟ್ಠಾನಫಲಕನಿವಾರಣಂ ದತ್ವಾ. ತಿಖಿಣಂ ಞಾಣಕುನ್ತಿಮನ್ತಿ ಪಟಿವೇಧಸಮತ್ಥಂ ತಿಖಿಣವಿಪಸ್ಸನಾಞಾಣಕುನ್ತವನ್ತಂ, ವಿಪಸ್ಸನಾಞಾಣನಿಸಿತಕುನ್ತವರನ್ತಿ ಅತ್ಥೋ, ಕಿಲೇಸಬಲನಿಧನಕರಸಮತ್ಥಂ ವಾ ಯೋಗಾವಚರಯೋಧವರಂ ಠಪೇತ್ವಾತಿ ಅತ್ಥೋ. ಧಮ್ಮಖಗ್ಗವರಂ ದತ್ವಾತಿ ತಸ್ಸ ಯೋಗಾವಚರಸ್ಸ ವೀರಿಯುಪಲತಲನಿಸಿತಧಾರಂ ಮಗ್ಗಪಞ್ಞಾವರಖಗ್ಗಂ ದತ್ವಾ. ಸೀಲಸಂಸಗ್ಗಮದ್ದನನ್ತಿ ಅರಿಯಂ ಲೋಕುತ್ತರಸೀಲಂ ಕಿಲೇಸಸಂಸಗ್ಗಮದ್ದನತ್ಥಾಯ, ಕಿಲೇಸನಿಘಾತನತ್ಥಾಯಾತಿ ಅತ್ಥೋ.

ತೇವಿಜ್ಜಾಭೂಸನಂ ದತ್ವಾತಿ ತೇವಿಜ್ಜಾಮಯಂ ವಿಭೂಸನಂ ದತ್ವಾ. ಆವೇಳಂ ಚತುರೋ ಫಲೇತಿ ಚತ್ತಾರಿ ಫಲಾನಿ ವಟಂಸಕಂ ಕತ್ವಾ. ಛಳಭಿಞ್ಞಾಭರಣನ್ತಿ ಆಭರಣತ್ಥಾಯ ಅಲಙ್ಕಾರಕರಣತ್ಥಾಯ ಛ ಅಭಿಞ್ಞಾಯೋ ದತ್ವಾ. ಧಮ್ಮಪುಪ್ಫಪಿಳನ್ಧನನ್ತಿ ನವಲೋಕುತ್ತರಧಮ್ಮಸಙ್ಖಾತಂ ಕುಸುಮಮಾಲಂ ಕತ್ವಾ. ಸದ್ಧಮ್ಮಪಣ್ಡರಚ್ಛತ್ತಂ, ದತ್ವಾ ಪಾಪನಿವಾರಣನ್ತಿ ಅಚ್ಚನ್ತವಿಸುದ್ಧಂ ವಿಮುತ್ತಿಸೇತಚ್ಛತ್ತಂ ಸಬ್ಬಾಕುಸಲಾತಪನಿವಾರಣಂ ದತ್ವಾ. ಮಾಪಯಿತ್ವಾಭಯಂ ಪುಪ್ಫನ್ತಿ ಅಭಯಪುರಗಾಮಿನಂ ಅಟ್ಠಙ್ಗಿಕಮಗ್ಗಂ ಪುಪ್ಫಂ ಕತ್ವಾತಿ ಅತ್ಥೋ.

ಕಸ್ಸಪೋ ಕಿರ ಭಗವಾ ಕಾಸಿರಟ್ಠೇ ಸೇತಬ್ಯನಗರೇ ಸೇತಬ್ಯುಯ್ಯಾನೇ ಪರಿನಿಬ್ಬಾಯಿ. ಧಾತುಯೋ ಕಿರಸ್ಸ ನ ವಿಕಿರಿಂಸು. ಸಕಲಜಮ್ಬುದೀಪವಾಸಿನೋ ಮನುಸ್ಸಾ ಸನ್ನಿಪತಿತ್ವಾ ಏಕೇಕಂ ಸುವಣ್ಣಿಟ್ಠಕಂ ಕೋಟಿಅಗ್ಘನಕಂ ರತನವಿಚಿತ್ತಂ ಬಹಿಚಿನನತ್ಥಂ ಏಕೇಕಂ ಅಡ್ಢಕೋಟಿಅಗ್ಘನಕಂ ಅಬ್ಭನ್ತರಪೂರಣತ್ಥಂ ಮನೋಸಿಲಾಯ ಮತ್ತಿಕಾಕಿಚ್ಚಂ ತೇಲೇನ ಉದಕಕಿಚ್ಚಂ ಕರೋನ್ತೋ ಯೋಜನುಬ್ಬೇಧಂ ಥೂಪಮಕಂಸು.

‘‘ಕಸ್ಸಪೋಪಿ ಭಗವಾ ಕತಕಿಚ್ಚೋ, ಸಬ್ಬಸತ್ತಹಿತಮೇವ ಕರೋನ್ತೋ;

ಕಾಸಿರಾಜನಗರೇ ಮಿಗದಾಯೇ, ಲೋಕನನ್ದನಕರೋ ನಿವಸೀ’’ತಿ.

ಸೇಸಗಾಥಾಸು ಸಬ್ಬತ್ಥ ಪಾಕಟಮೇವಾತಿ.

ಇತಿ ಮಧುರತ್ಥವಿಲಾಸಿನಿಯಾ ಬುದ್ಧವಂಸ-ಅಟ್ಠಕಥಾಯ

ಕಸ್ಸಪಬುದ್ಧವಂಸವಣ್ಣನಾ ನಿಟ್ಠಿತಾ.

ಏತ್ತಾವತಾ ಚತುವೀಸತಿಯಾ ಬುದ್ಧಾನಂ ಬುದ್ಧವಂಸವಣ್ಣನಾ

ಸಬ್ಬಾಕಾರೇನ ನಿಟ್ಠಿತಾ.