೪. ಧಮ್ಮದಸ್ಸನವಾರವಣ್ಣನಾ

೧೦೦೭. ಚತುತ್ಥವಾರೇ ಏಕಾದಸಾಯತನಾನೀತಿ ಸದ್ದಾಯತನವಜ್ಜಾನಿ. ತಞ್ಹಿ ಏಕನ್ತೇನ ಪಟಿಸನ್ಧಿಯಂ ನುಪ್ಪಜ್ಜತಿ. ಇಮಿನಾ ನಯೇನ ಸಬ್ಬತ್ಥ ಅತ್ಥೋ ವೇದಿತಬ್ಬೋ. ಸತ್ತಕೇ ‘‘ದೇವಾನಂ ಅಸುರಾನ’’ನ್ತಿ ಗತಿವಸೇನ ಅವತ್ವಾ ಅವಿಸೇಸೇನ ಗಬ್ಭಸೇಯ್ಯಕಾನನ್ತಿ ವುತ್ತಂ. ತಸ್ಮಾ ಯತ್ಥ ಯತ್ಥ ಗಬ್ಭಸೇಯ್ಯಕಾ ಸಮ್ಭವನ್ತಿ ತತ್ಥ ತತ್ಥ ತೇಸಂ ಸತ್ತಾಯತನಾನಿ ವೇದಿತಬ್ಬಾನಿ. ತಥಾ ಧಾತುಯೋ. ಸೇಸಮೇತ್ಥ ಉತ್ತಾನತ್ಥಮೇವ. ಪಞ್ಚಮವಾರೇ ಯಂ ವತ್ತಬ್ಬಂ ತಂ ಧಮ್ಮಸಙ್ಗಹಟ್ಠಕಥಾಯಂ ವುತ್ತಮೇವ.