೧. ಸಬ್ಬಸಙ್ಗಾಹಿಕವಾರವಣ್ಣನಾ

೯೭೮. ಇದಾನಿ ತದನನ್ತರೇ ಧಮ್ಮಹದಯವಿಭಙ್ಗೇ ಪಾಳಿಪರಿಚ್ಛೇದೋ ತಾವ ಏವಂ ವೇದಿತಬ್ಬೋ – ಏತ್ಥ ಹಿ ಆದಿತೋವ ಖನ್ಧಾದೀನಂ ದ್ವಾದಸನ್ನಂ ಕೋಟ್ಠಾಸಾನಂ ವಸೇನ ಸಬ್ಬಸಙ್ಗಾಹಿಕವಾರೋ ನಾಮ ವುತ್ತೋ. ದುತಿಯೋ ತೇಸಂಯೇವ ಧಮ್ಮಾನಂ ಕಾಮಧಾತುಆದೀಸು ಉಪ್ಪತ್ತಾನುಪ್ಪತ್ತಿದಸ್ಸನವಾರೋ ನಾಮ. ತತಿಯೋ ತತ್ಥೇವ ಪರಿಯಾಪನ್ನಾಪರಿಯಾಪನ್ನದಸ್ಸನವಾರೋ ನಾಮ. ಚತುತ್ಥೋ ತೀಸು ಭೂಮೀಸು ಉಪ್ಪತ್ತಿಕ್ಖಣೇ ವಿಜ್ಜಮಾನಾವಿಜ್ಜಮಾನಧಮ್ಮದಸ್ಸನವಾರೋ ನಾಮ. ಪಞ್ಚಮೋ ತೇಸಂ ಧಮ್ಮಾನಂ ಭೂಮನ್ತರವಸೇನ ದಸ್ಸನವಾರೋ ನಾಮ. ಛಟ್ಠೋ ಗತೀಸು ಉಪ್ಪಾದಕಕಮ್ಮಆಯುಪ್ಪಮಾಣದಸ್ಸನವಾರೋ ನಾಮ. ಸತ್ತಮೋ ಅಭಿಞ್ಞೇಯ್ಯಾದಿವಾರೋ ನಾಮ. ಅಟ್ಠಮೋ ಸಾರಮ್ಮಣಾನಾರಮ್ಮಣವಾರೋ ನಾಮ. ನವಮೋ ತೇಸಂ ಖನ್ಧಾದಿಧಮ್ಮಾನಂ ದಿಟ್ಠಸುತಾದಿವಸೇನ ಸಙ್ಗಹೇತ್ವಾ ದಸ್ಸನವಾರೋ ನಾಮ. ದಸಮೋ ಕುಸಲತ್ತಿಕಾದಿವಸೇನ ಸಙ್ಗಹೇತ್ವಾ ದಸ್ಸನವಾರೋ ನಾಮ.

೯೭೯. ಏವಂ ದಸಹಿ ವಾರೇಹಿ ಪರಿಚ್ಛಿನ್ನಾಯ ಪಾಳಿಯಾ ಪಠಮೇ ತಾವ ಸಬ್ಬಸಙ್ಗಾಹಿಕವಾರೇ ‘‘ಅವೀಚಿತೋ ಯಾವ ಭವಗ್ಗಂ ಏತ್ಥನ್ತರೇ ಕತಿ ಖನ್ಧಾ’’ತಿ ಪುಚ್ಛಿತೇ ‘‘ಏಕೋತಿ ವಾ…ಪೇ… ಚತ್ತಾರೋತಿ ವಾ ಛಾತಿ ವಾ ಅವತ್ವಾ ಪಞ್ಚಾತಿ ವತ್ತುಂ ಸಮತ್ಥೋ ಅಞ್ಞೋ ನತ್ಥೀ’’ತಿ ಅತ್ತನೋ ಞಾಣಬಲಂ ದೀಪೇನ್ತೋ ಪಞ್ಚಕ್ಖನ್ಧಾತಿ ಪುಚ್ಛಾನುರೂಪಂ ವಿಸ್ಸಜ್ಜನಂ ಆಹ. ಯಥಾಪುಚ್ಛಂ ವಿಸ್ಸಜ್ಜನಞ್ಹಿ ಸಬ್ಬಞ್ಞುಬ್ಯಾಕರಣಂ ನಾಮಾತಿ ವುಚ್ಚತಿ. ದ್ವಾದಸಾಯತನಾನೀತಿಆದೀಸುಪಿ ಏಸೇವ ನಯೋ. ರೂಪಕ್ಖನ್ಧಾದೀನಂ ಪಭೇದೋ ಖನ್ಧವಿಭಙ್ಗಾದೀಸು ವುತ್ತನಯೇನೇವ ವೇದಿತಬ್ಬೋ.