೪. ಸಙ್ಖಾರಕ್ಖನ್ಧನಿದ್ದೇಸೋ

೨೦. ಸಙ್ಖಾರಕ್ಖನ್ಧನಿದ್ದೇಸೇ ಯೇ ಕೇಚಿ ಸಙ್ಖಾರಾತಿ ಚತುಭೂಮಿಕಸಙ್ಖಾರೇ ಪರಿಯಾದಿಯತಿ. ಚಕ್ಖುಸಮ್ಫಸ್ಸಜಾ ಚೇತನಾತಿಆದೀನಿ ಅತೀತಾದಿವಸೇನ ನಿದ್ದಿಟ್ಠಸಙ್ಖಾರೇ ಸಭಾವತೋ ದಸ್ಸೇತುಂ ವುತ್ತಾನಿ. ಚಕ್ಖುಸಮ್ಫಸ್ಸಜಾತಿಆದೀನಿ ವುತ್ತತ್ಥಾನೇವ. ಚೇತನಾತಿ ಹೇಟ್ಠಿಮಕೋಟಿಯಾ ಪಧಾನಸಙ್ಖಾರವಸೇನ ವುತ್ತಂ. ಹೇಟ್ಠಿಮಕೋಟಿಯಾ ಹಿ ಅನ್ತಮಸೋ ಚಕ್ಖುವಿಞ್ಞಾಣೇನ ಸದ್ಧಿಂ ಪಾಳಿಯಂ ಆಗತಾ ಚತ್ತಾರೋ ಸಙ್ಖಾರಾ ಉಪ್ಪಜ್ಜನ್ತಿ. ತೇಸು ಚೇತನಾ ಪಧಾನಾ ಆಯೂಹನಟ್ಠೇನ ಪಾಕಟತ್ತಾ. ತಸ್ಮಾ ಅಯಮೇವ ಗಹಿತಾ. ತಂಸಮ್ಪಯುತ್ತಸಙ್ಖಾರಾ ಪನ ತಾಯ ಗಹಿತಾಯ ಗಹಿತಾವ ಹೋನ್ತಿ. ಇಧಾಪಿ ಪುರಿಮಾ ಪಞ್ಚ ಚಕ್ಖುಪಸಾದಾದಿವತ್ಥುಕಾವ. ಮನೋಸಮ್ಫಸ್ಸಜಾ ಹದಯವತ್ಥುಕಾಪಿ ಅವತ್ಥುಕಾಪಿ. ಸಬ್ಬಾ ಚತುಭೂಮಿಕಚೇತನಾ. ಸೇಸಂ ವೇದನಾಕ್ಖನ್ಧಸದಿಸಮೇವಾತಿ.

ಅಯಂ ಸಙ್ಖಾರಕ್ಖನ್ಧನಿದ್ದೇಸೋ.