೧. ನಸುತ್ತಸಾಧನಕಥಾವಣ್ಣನಾ

೨೯೭. ಇದಾನಿ ‘‘ಅತೀತಂ ಖನ್ಧಾ’’ತಿಆದಿಕಥಾ ಹೋತಿ. ತತ್ಥ ಖನ್ಧಾದಿಭಾವಾವಿಜಹನತೋ ಅತೀತಾನಾಗತಾನಂ ಅತ್ಥಿತಂ ಇಚ್ಛನ್ತಸ್ಸ ಅತೀತಂ ಖನ್ಧಾತಿ ಪುಚ್ಛಾ ಪರವಾದಿಸ್ಸ, ಅತೀತಸ್ಸ ಖನ್ಧಸಙ್ಗಹಿತತ್ತಾ ಆಮನ್ತಾತಿ ಪಟಿಞ್ಞಾ ಸಕವಾದಿಸ್ಸ. ಪುನ ಅತೀತಂ ನತ್ಥೀತಿ ಪುಚ್ಛಾ ಪರವಾದಿಸ್ಸ, ತಸ್ಸ ನಿರುತ್ತಿಪಥಸುತ್ತೇನ ಅತ್ಥಿತಾಯ ವಾರಿತತ್ತಾ ಪಟಿಕ್ಖೇಪೋ ಸಕವಾದಿಸ್ಸ. ಆಯತನಧಾತುಪುಚ್ಛಾಸುಪಿ ಅನಾಗತಪಞ್ಹೇಸುಪಿ ಪಚ್ಚುಪ್ಪನ್ನೇನ ಸದ್ಧಿಂ ಸಂಸನ್ದಿತ್ವಾ ಅನುಲೋಮಪಟಿಲೋಮತೋ ಆಗತಪಞ್ಹೇಸುಪಿ ‘‘ಅತೀತಂ ರೂಪ’’ನ್ತಿಆದಿಪಞ್ಹೇಸುಪಿ ಇಮಿನಾವುಪಾಯೇನ ಅತ್ಥೋ ವೇದಿತಬ್ಬೋ.