೫. ತಿಕತಿಕಪಟ್ಠಾನವಣ್ಣನಾ

ತಿಕತಿಕಪಟ್ಠಾನೇಪಿ ಕುಸಲಂ ಸುಖಾಯ ವೇದನಾಯ ಸಮ್ಪಯುತ್ತಂ ಧಮ್ಮಂ ಪಟಿಚ್ಚ ಕುಸಲೋ ಸುಖಾಯ ವೇದನಾಯ ಸಮ್ಪಯುತ್ತೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾತಿ ಪಞ್ಹುದ್ಧಾರವಸೇನೇವ ಸಙ್ಖೇಪತೋ ದೇಸನಾ ಕತಾ. ಏತ್ಥ ಚ ಕುಸಲತ್ತಿಕಂ ವೇದನಾತ್ತಿಕಾದೀಹಿ, ವೇದನಾತ್ತಿಕಾದಯೋ ಚ ಕುಸಲತ್ತಿಕೇನಾತಿ ಏವಂ ತಿಕೇಸುಯೇವ ತಿಕಾ ಪಕ್ಖಿತ್ತಾ. ಯೇನ ಯೇನ ಚ ಪದೇನ ಸದ್ಧಿಂ ಯಂ ಯಂ ಪದಂ ಯೋಜನಂ ನ ಗಚ್ಛತಿ, ತಂ ತಂ ಹಾಪೇತ್ವಾ ಲಬ್ಭಮಾನವಸೇನೇವ ಸಬ್ಬಪಚ್ಚಯೇಸು ವಾರಾ ಚ ಗಣನನಯಾ ಚ ದಸ್ಸಿತಾ, ತಸ್ಮಾ ತೇ ಸಾಧುಕಂ ಪಾಳಿಂ ಉಪಪರಿಕ್ಖಿತ್ವಾ ವೇದಿತಬ್ಬಾ. ಯಥಾ ಚ ಕುಸಲತ್ತಿಕಂ ವೇದನಾತ್ತಿಕಾದೀಹಿ, ವೇದನಾತ್ತಿಕಾದಯೋ ಚ ತೇನ ಸದ್ಧಿಂ ಯೋಜೇತ್ವಾ ವೇದಿತಬ್ಬಾ; ತಥಾ ಏಕೇಕಂ ತಿಕಂ ಸೇಸೇಹಿ. ಸೇಸಾ ಚ ತೇಹಿ ಸದ್ಧಿಂ ಯೋಜೇತ್ವಾ ವೇದಿತಬ್ಬಾತಿ.

ತಿಕತಿಕಪಟ್ಠಾನವಣ್ಣನಾ.