೬. ದುಕದುಕಪಟ್ಠಾನವಣ್ಣನಾ

ದುಕದುಕಪಟ್ಠಾನೇಪಿ ಹೇತುಸಹೇತುಕಂ ಧಮ್ಮಂ ಪಟಿಚ್ಚ ಹೇತುಸಹೇತುಕೋ ಧಮ್ಮೋ ಉಪ್ಪಜ್ಜತಿ ಹೇತುಪಚ್ಚಯಾತಿ ಪಞ್ಹುದ್ಧಾರವಸೇನೇವ ಸಙ್ಖೇಪತೋ ದೇಸನಾ ಕತಾ. ತತ್ಥ ಹೇತುದುಕಂ ಸಹೇತುಕದುಕಾದೀಹಿ, ಸಹೇತುಕದುಕಾದೀನಿ ಚ ತೇನ ಸದ್ಧಿಂ ಯೋಜಿತಾನಿ. ಏಕೇಕಂ ಪನ ದುಕಂ ಸೇಸೇಹಿ, ಸೇಸಾ ಚ ತೇಹಿ ಸದ್ಧಿಂ ಪಟಿಪಾಟಿಯಾ ಯೋಜೇತಬ್ಬಾ. ಇದಞ್ಹಿ ದುಕದುಕಪಟ್ಠಾನಂ ನಾಮ ‘ದುಕೇಸುಯೇವ ದುಕೇ ಪಕ್ಖಿಪಿತ್ವಾ’ ದೇಸಿತಂ. ತೇನೇತ್ಥ ಸಬ್ಬದುಕೇಹಿ ಸದ್ಧಿಂ ಸಬ್ಬದುಕಾನಂ ಯೋಜನಾ ವೇದಿತಬ್ಬಾ. ಪಾಳಿ ಪನ ಸಙ್ಖಿತ್ತಾ. ಯೇನ ಯೇನ ಚ ಪದೇನ ಸದ್ಧಿಂ ಯಂ ಯಂ ಪದಂ ಯೋಜನಂ ನ ಗಚ್ಛತಿ, ತಂ ತಂ ಹಾಪೇತ್ವಾವ ದೇಸನಾ ಕತಾತಿ.

ದುಕದುಕಪಟ್ಠಾನವಣ್ಣನಾ.

ಏತ್ತಾವತಾ –

ತಿಕಞ್ಚ ಪಟ್ಠಾನವರಂ ದುಕುತ್ತಮಂ,

ದುಕಂ ತಿಕಞ್ಚೇವ ತಿಕಂ ದುಕಞ್ಚ;

ತಿಕಂ ತಿಕಞ್ಚೇವ ದುಕಂ ದುಕಞ್ಚ,

ಛ ಅನುಲೋಮಮ್ಹಿ ನಯಾ ಸುಗಮ್ಭೀರಾತಿ. –

ಅಟ್ಠಕಥಾಯಂ ವುತ್ತಗಾಥಾಯ ದೀಪಿತಾ. ಧಮ್ಮಾನುಲೋಮಪಟ್ಠಾನೇ ಛ ನಯಾ ನಿದ್ದಿಟ್ಠಾ ಹೋನ್ತಿ. ಪಚ್ಚಯವಸೇನ ಪನೇತ್ಥ ಏಕೇಕಸ್ಮಿಂ ಪಟ್ಠಾನೇ ಅನುಲೋಮಾದಯೋ ಚತ್ತಾರೋ ಚತ್ತಾರೋ ನಯಾತಿ ಏಕೇನ ಪರಿಯಾಯೇನ ಚತುವೀಸತಿನಯಪಟಿಮಣ್ಡಿತಂ ಅನುಲೋಮಪಟ್ಠಾನಂಯೇವ ವೇದಿತಬ್ಬಂ.