೪. ಉಪಾದಿನ್ನತ್ತಿಕವಣ್ಣನಾ

೫೧. ಉಪಾದಿನ್ನುಪಾದಾನಿಯತ್ತಿಕಸ್ಸ ಪಞ್ಹಾವಾರೇ ವತ್ಥು ಉಪಾದಾನಿಯಾನಂ ಖನ್ಧಾನಂ ಪುರೇಜಾತಪಚ್ಚಯೇನ ಪಚ್ಚಯೋತಿ ಪವತ್ತಿಂ ಸನ್ಧಾಯ ವುತ್ತಂ. ಪಟಿಸನ್ಧಿಯಂ ಪನ ತಂ ಪುರೇಜಾತಂ ನ ಹೋತಿ.

೭೨. ಉಪಾದಿನ್ನುಪಾದಾನಿಯೋ ಕಬಳೀಕಾರೋ ಆಹಾರೋ ಉಪಾದಿನ್ನುಪಾದಾನಿಯಸ್ಸ ಕಾಯಸ್ಸ ಆಹಾರಪಚ್ಚಯೇನ ಪಚ್ಚಯೋತಿ ಏತ್ಥ ಉಪಾದಿನ್ನುಪಾದಾನಿಯೋ ಕಬಳೀಕಾರಾಹಾರೋ ನಾಮ ಕಮ್ಮಸಮುಟ್ಠಾನಾನಂ ರೂಪಾನಂ ಅಬ್ಭನ್ತರಗತಾ ಓಜಾ. ಉಪಾದಿನ್ನುಪಾದಾನಿಯಸ್ಸ ಕಾಯಸ್ಸಾತಿ ತಸ್ಸೇವ ಕಮ್ಮಸಮುಟ್ಠಾನರೂಪಕಾಯಸ್ಸ ಆಹಾರಪಚ್ಚಯೇನ ಪಚ್ಚಯೋ. ರೂಪಜೀವಿತಿನ್ದ್ರಿಯಂ ವಿಯ ಕಟತ್ತಾರೂಪಾನಂ ಅನುಪಾಲನಉಪತ್ಥಮ್ಭನವಸೇನ ಪಚ್ಚಯೋ, ನ ಜನಕವಸೇನ. ಯಂ ಪನ ಮಣ್ಡೂಕಾದಯೋ ಗಿಲಿತ್ವಾ ಠಿತಾನಂ ಅಹಿಆದೀನಂ ಕಾಯಸ್ಸ ಜೀವಮಾನಕಮಣ್ಡೂಕಾದಿಸರೀರೇ ಓಜಾ ಆಹಾರಪಚ್ಚಯೇನ ಪಚ್ಚಯೋತಿ ವದನ್ತಿ, ತಂ ನ ಗಹೇತಬ್ಬಂ. ನ ಹಿ ಜೀವಮಾನಕಸರೀರೇ ಓಜಾ ಅಞ್ಞಸ್ಸ ಸರೀರಸ್ಸ ಆಹಾರಪಚ್ಚಯತಂ ಸಾಧೇತಿ. ಅನುಪಾದಿನ್ನುಪಾದಾನಿಯಸ್ಸ ಕಾಯಸ್ಸಾತಿ ಏತ್ಥ ಪನ ಜನಕವಸೇನಾಪಿ ಲಬ್ಭತಿ. ಉಪಾದಿನ್ನುಪಾದಾನಿಯಸ್ಸ ಚ ಅನುಪಾದಿನ್ನುಪಾದಾನಿಯಸ್ಸ ಚಾತಿ ಏತ್ಥ ಏಕಸ್ಸ ಉಪತ್ಥಮ್ಭಕವಸೇನ, ಏಕಸ್ಸ ಜನಕವಸೇನ, ಉಭಿನ್ನಮ್ಪಿ ವಾ ಉಪತ್ಥಮ್ಭಕವಸೇನೇವ ವುತ್ತೋ. ದ್ವೇ ಪನ ಆಹಾರಾ ಏಕತೋ ಪಚ್ಚಯಾ ಹೋನ್ತಾ ಉಪತ್ಥಮ್ಭಕಾವ ಹೋನ್ತಿ, ನ ಜನಕಾ. ಸೇಸಮೇತ್ಥ ಪಾಳಿಮೇವ ಸಾಧುಕಂ ಓಲೋಕೇತ್ವಾ ವೇದಿತಬ್ಬಂ.

ಉಪಾದಿನ್ನತ್ತಿಕವಣ್ಣನಾ.