೨೨. ನತ್ಥಿಪಚ್ಚಯನಿದ್ದೇಸವಣ್ಣನಾ

೨೨. ನತ್ಥಿಪಚ್ಚಯನಿದ್ದೇಸೇ ಸಮನನ್ತರನಿರುದ್ಧಾತಿ ಅಞ್ಞೇನ ಚಿತ್ತುಪ್ಪಾದೇನ ಅನನ್ತರಿಕಾ ಹುತ್ವಾ ಸಮನನ್ತರನಿರುದ್ಧಾ. ಪಟುಪ್ಪನ್ನಾನನ್ತಿ ಪಚ್ಚುಪ್ಪನ್ನಾನಂ. ಇಮಿನಾ ನತ್ಥಿಪಚ್ಚಯಸ್ಸ ಓಕಾಸದಾನಟ್ಠೇನ ನತ್ಥಿಪಚ್ಚಯಭಾವಂ ಸಾಧೇತಿ. ಪುರಿಮೇಸು ಹಿ ನಿರೋಧವಸೇನ ಪಚ್ಛಿಮಾನಂ ಪವತ್ತನೋಕಾಸಂ ಅದೇನ್ತೇಸು ತೇಸಂ ಪಟುಪ್ಪನ್ನಭಾವೋ ನ ಸಿಯಾತಿ ಅಯಮೇತ್ಥ ಪಾಳಿವಣ್ಣನಾ. ಸೇಸಂ ಸಬ್ಬಂ ಅನನ್ತರಪಚ್ಚಯೇ ವುತ್ತನಯೇನೇವ ವೇದಿತಬ್ಬಂ. ಪಚ್ಚಯಲಕ್ಖಣಮೇವ ಹೇತ್ಥ ನಾನಂ, ಪಚ್ಚಯಾನಂ ಪನ ಪಚ್ಚಯುಪ್ಪನ್ನಾನಞ್ಚ ನಾನಾಕರಣಂ ನತ್ಥಿ. ಕೇವಲಂ ಪನ ತತ್ಥ ‘‘ಚಕ್ಖುವಿಞ್ಞಾಣಧಾತು ತಂಸಮ್ಪಯುತ್ತಕಾ ಚ ಧಮ್ಮಾ ಮನೋಧಾತುಯಾ’’ತಿಆದಿನಾ ನಯೇನ ಪಚ್ಚಯಾ ಚ ಪಚ್ಚಯುಪ್ಪನ್ನಾ ಚ ಸರೂಪತೋ ದಸ್ಸಿತಾ. ಇಧ ಪನ ‘‘ಸಮನನ್ತರನಿರುದ್ಧಾ ಚಿತ್ತಚೇತಸಿಕಾ ಧಮ್ಮಾ ಪಟುಪ್ಪನ್ನಾನಂ ಚಿತ್ತಚೇತಸಿಕಾನಂ ಧಮ್ಮಾನ’’ನ್ತಿ ಸಬ್ಬೇಪಿ ತೇ ನಿರೋಧುಪ್ಪಾದವಸೇನ ಸಾಮಞ್ಞತೋ ದಸ್ಸಿತಾತಿ.

ನತ್ಥಿಪಚ್ಚಯನಿದ್ದೇಸವಣ್ಣನಾ.