೧೪. ವಿಪಾಕಪಚ್ಚಯನಿದ್ದೇಸವಣ್ಣನಾ

೧೪. ವಿಪಾಕಪಚ್ಚಯನಿದ್ದೇಸೇ ವಿಪಾಕಾ ಚತ್ತಾರೋ ಖನ್ಧಾತಿ ಯಸ್ಮಾ ಕಮ್ಮಸಮುಟ್ಠಾನಾಪಿ ರೂಪಾ ವಿಪಾಕಾ ನ ಹೋನ್ತಿ, ತಸ್ಮಾ ‘‘ವಿಪಾಕಾ’’ತಿ ವತ್ವಾ ‘‘ಚತ್ತಾರೋ ಖನ್ಧಾ’’ತಿ ವುತ್ತಂ. ಏವಂ ಅಯಂ ಪಾಳಿ ಅರೂಪಧಮ್ಮಾನಞ್ಞೇವ ವಿಪಾಕಪಚ್ಚಯವಸೇನ ಆಗತಾ. ಪಞ್ಹಾವಾರೇ ಪನ ‘‘ವಿಪಾಕಾಬ್ಯಾಕತೋ ಏಕೋ ಖನ್ಧೋ ತಿಣ್ಣಂ ಖನ್ಧಾನಂ ಚಿತ್ತಸಮುಟ್ಠಾನಾನಞ್ಚ ರೂಪಾನಂ ವಿಪಾಕಪಚ್ಚಯೇನ ಪಚ್ಚಯೋ. ಪಟಿಸನ್ಧಿಕ್ಖಣೇ ವಿಪಾಕಾಬ್ಯಾಕತೋ ಏಕೋ ಖನ್ಧೋ ತಿಣ್ಣನ್ನಂ ಖನ್ಧಾನಂ ಕಟತ್ತಾ ಚ ರೂಪಾನಂ ವಿಪಾಕಪಚ್ಚಯೇನ ಪಚ್ಚಯೋ’’ತಿ ಆಗತತ್ತಾ ಚಿತ್ತಸಮುಟ್ಠಾನಕಮ್ಮಸಮುಟ್ಠಾನರೂಪಾನಮ್ಪಿ ವಿಪಾಕಪಚ್ಚಯೋ ಲಬ್ಭತಿ. ಇಧ ಪನ ಸಾವಸೇಸವಸೇನ ದೇಸನಾ ಕತಾತಿ ಅಯಂ ತಾವೇತ್ಥ ಪಾಳಿವಣ್ಣನಾ. ಅಯಂ ಪನ ವಿಪಾಕಪಚ್ಚಯೋ ವಿಪಾಕಭಾವೇನ ಜಾತಿತೋ ಏಕವಿಧೋ, ಭೂಮಿಭೇದತೋ ಕಾಮಾವಚರಾದಿವಸೇನ ಚತುಧಾ ಭಿಜ್ಜತೀತಿ ಏವಮೇತ್ಥ ನಾನಪ್ಪಕಾರಭೇದತೋ ವಿಞ್ಞಾತಬ್ಬೋ ವಿನಿಚ್ಛಯೋ.

ಏವಂ ಭಿನ್ನೇ ಪನೇತ್ಥ ಕಾಮಾವಚರರೂಪಾವಚರವಿಪಾಕೋ ಅತ್ತನಾ ಸಮ್ಪಯುತ್ತಧಮ್ಮಾನಂ ಪವತ್ತೇ ಚಿತ್ತಸಮುಟ್ಠಾನರೂಪಾನಂ ಪಟಿಸನ್ಧಿಯಂ ಕಟತ್ತಾರೂಪಾನಞ್ಚ ವಿಪಾಕಪಚ್ಚಯೋ ಹೋತಿ. ಅರೂಪಾವಚರವಿಪಾಕೋ ಸಮ್ಪಯುತ್ತಧಮ್ಮಾನಞ್ಞೇವ. ಲೋಕುತ್ತರವಿಪಾಕೋ ಪಞ್ಚವೋಕಾರೇ ಸಮ್ಪಯುತ್ತಧಮ್ಮಾನಞ್ಚೇವ ಚಿತ್ತಸಮುಟ್ಠಾನರೂಪಸ್ಸ ಚ, ಚತುವೋಕಾರೇ ಸಮ್ಪಯುತ್ತಕ್ಖನ್ಧಾನಞ್ಞೇವ ವಿಪಾಕಪಚ್ಚಯೋ ಹೋತೀತಿ ಏವಮೇತ್ಥ ಪಚ್ಚಯುಪ್ಪನ್ನತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋತಿ.

ವಿಪಾಕಪಚ್ಚಯನಿದ್ದೇಸವಣ್ಣನಾ.