೧೧. ಪಚ್ಛಾಜಾತಪಚ್ಚಯನಿದ್ದೇಸವಣ್ಣನಾ

೧೧. ಪಚ್ಛಾಜಾತಪಚ್ಚಯನಿದ್ದೇಸೇ ಪಚ್ಛಾಜಾತಾತಿ ಯಸ್ಸ ಕಾಯಸ್ಸ ಪಚ್ಚಯಾ ಹೋನ್ತಿ, ತಸ್ಮಿಂ ಉಪ್ಪಜ್ಜಿತ್ವಾ ಠಿತೇ ಜಾತಾ. ಪುರೇಜಾತಸ್ಸಾತಿ ತೇಸಂ ಉಪ್ಪಾದತೋ ಪಠಮತರಂ ಜಾತಸ್ಸ ಜಾತಿಕ್ಖಣಂ ಅತಿಕ್ಕಮಿತ್ವಾ ಠಿತಿಪ್ಪತ್ತಸ್ಸ. ಇಮಸ್ಸ ಕಾಯಸ್ಸಾತಿ ಇಮಸ್ಸ ಚತುಸಮುಟ್ಠಾನಿಕತಿಸಮುಟ್ಠಾನಿಕಭೂತಉಪಾದಾರೂಪಸಙ್ಖಾತಸ್ಸ ಕಾಯಸ್ಸ. ಏತ್ಥ ಚ ತಿಸಮುಟ್ಠಾನಿಕಕಾಯೋತಿ ಆಹಾರಸಮುಟ್ಠಾನಸ್ಸ ಅಭಾವತೋ ಬ್ರಹ್ಮಪಾರಿಸಜ್ಜಾದೀನಂ ಕಾಯೋ ವೇದಿತಬ್ಬೋ. ಅಯಮೇತ್ಥ ಪಾಳಿವಣ್ಣನಾ. ಅಯಂ ಪನ ಪಚ್ಛಾಜಾತಪಚ್ಚಯೋ ನಾಮ ಸಙ್ಖೇಪತೋ ಠಪೇತ್ವಾ ಆರುಪ್ಪವಿಪಾಕೇ ಅವಸೇಸಾ ಚತುಭೂಮಕಾ ಅರೂಪಕ್ಖನ್ಧಾ. ಸೋ ಜಾತಿವಸೇನ ಕುಸಲಾಕುಸಲವಿಪಾಕಕಿರಿಯಭೇದೇನ ಚತುಧಾ ಭಿಜ್ಜತೀತಿ ಏವಮೇತ್ಥ ನಾನಪ್ಪಕಾರಭೇದತೋ ವಿಞ್ಞಾತಬ್ಬೋ ವಿನಿಚ್ಛಯೋ.

ಏವಂ ಭಿನ್ನೇ ಪನೇತ್ಥ ಪಞ್ಚವೋಕಾರಭವೇ ಉಪ್ಪನ್ನಂ ಚತುಭೂಮಕಕುಸಲಞ್ಚ ಅಕುಸಲಞ್ಚ ಉಪ್ಪಾದಕ್ಖಣಂ ಅತಿಕ್ಕಮಿತ್ವಾ ಠಿತಿಪ್ಪತ್ತಸ್ಸ ಚತುಸಮುಟ್ಠಾನಿಕತಿಸಮುಟ್ಠಾನಿಕರೂಪಕಾಯಸ್ಸ ಪಚ್ಛಾಜಾತಪಚ್ಚಯೋ ಹೋತಿ. ವಿಪಾಕೇಪಿ ಠಪೇತ್ವಾ ಪಟಿಸನ್ಧಿವಿಪಾಕಂ ಅವಸೇಸೋ ಕಾಮಾವಚರರೂಪಾವಚರವಿಪಾಕೋ ತಸ್ಸೇವ ಏಕನ್ತೇನ ಪಚ್ಛಾಜಾತಪಚ್ಚಯೋ ಹೋತಿ. ಲೋಕುತ್ತರೋಪಿ ಪಞ್ಚವೋಕಾರೇ ಉಪ್ಪನ್ನವಿಪಾಕೋ ತಸ್ಸೇವ ಪಚ್ಛಾಜಾತಪಚ್ಚಯೋ ಹೋತಿ. ತೇಭೂಮಕಕಿರಿಯಾಪಿ ಪಞ್ಚವೋಕಾರೇ ಉಪ್ಪನ್ನಾವ ವುತ್ತಪ್ಪಕಾರಸ್ಸ ಕಾಯಸ್ಸ ಪಚ್ಛಾಜಾತಪಚ್ಚಯೋ ಹೋತೀತಿ ಏವಮೇತ್ಥ ಪಚ್ಚಯುಪ್ಪನ್ನತೋಪಿ ವಿಞ್ಞಾತಬ್ಬೋ ವಿನಿಚ್ಛಯೋತಿ.

ಪಚ್ಛಾಜಾತಪಚ್ಚಯನಿದ್ದೇಸವಣ್ಣನಾ.