೫. ಮಗ್ಗಕಥಾವಣ್ಣನಾ

೮೭೨-೮೭೫. ಇದಾನಿ ಮಗ್ಗಕಥಾ ನಾಮ ಹೋತಿ. ತತ್ಥ ಯೇಸಂ ‘‘ಪುಬ್ಬೇವ ಖೋ ಪನಸ್ಸ ಕಾಯಕಮ್ಮಂ ವಚೀಕಮ್ಮಂ ಆಜೀವೋ ಸುಪರಿಸುದ್ಧೋ ಹೋತೀ’’ತಿ (ಅ. ನಿ. ೩.೪೩೧) ಇದಞ್ಚೇವ ಸುತ್ತಂ ಸಮ್ಮಾವಾಚಾಕಮ್ಮನ್ತಾಜೀವಾನಞ್ಚ ಚಿತ್ತವಿಪ್ಪಯುತ್ತತಂ ನಿಸ್ಸಾಯ ‘‘ನಿಪ್ಪರಿಯಾಯೇನ ಪಞ್ಚಙ್ಗಿಕೋವ ಮಗ್ಗೋ’’ತಿ ಲದ್ಧಿ, ಸೇಯ್ಯಥಾಪಿ ಮಹಿಸಾಸಕಾನಂ, ತೇ ಸನ್ಧಾಯ ಪಞ್ಚಙ್ಗಿಕೋತಿ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಸಮ್ಮಾವಾಚಾ ಮಗ್ಗಙ್ಗಂ, ಸಾ ಚ ನ ಮಗ್ಗೋತಿಆದಿ ಪರಸಮಯವಸೇನ ವುತ್ತಂ. ಪರಸಮಯಸ್ಮಿಞ್ಹಿ ಸಮ್ಮಾವಾಚಾದಯೋ ಮಗ್ಗಙ್ಗನ್ತಿ ಆಗತಾ. ರೂಪತ್ತಾ ಪನ ಮಗ್ಗೋ ನ ಹೋತೀತಿ ವಣ್ಣಿತಾ. ಸಮ್ಮಾದಿಟ್ಠಿ ಮಗ್ಗಙ್ಗನ್ತಿಆದಿ ಮಗ್ಗಙ್ಗಸ್ಸ ಅಮಗ್ಗತಾ ನಾಮ ನತ್ಥೀತಿ ದಸ್ಸನತ್ಥಂ ವುತ್ತಂ. ಪುಬ್ಬೇವ ಖೋ ಪನಸ್ಸಾತಿ ಸುತ್ತೇ ಪರಿಸುದ್ಧಸೀಲಸ್ಸ ಮಗ್ಗಭಾವನಾ ನಾಮ ಹೋತಿ, ನ ಇತರಸ್ಸಾತಿ ಆಗಮನಿಯಪಟಿಪದಾಯ ವಿಸುದ್ಧಿಭಾವದಸ್ಸನತ್ಥಂ ‘‘ಕಾಯಕಮ್ಮಂ ವಚೀಕಮ್ಮಂ ಆಜೀವೋ ಸುಪರಿಸುದ್ಧೋ ಹೋತೀ’’ತಿ ವುತ್ತಂ, ನ ಇಮೇಹಿ ವಿನಾ ಪಞ್ಚಙ್ಗಿಕಭಾವದಸ್ಸನತ್ಥಂ. ತೇನೇವಾಹ ‘‘ಏವಮಸ್ಸಾಯಂ ಅರಿಯೋ ಅಟ್ಠಙ್ಗಿಕೋ ಮಗ್ಗೋ ಭಾವನಾಪಾರಿಪೂರಿಂ ಗಚ್ಛತೀ’’ತಿ. ಸಕವಾದಿನಾ ಆಭತಸುತ್ತಂ ನೀತತ್ಥಮೇವಾತಿ.

ಮಗ್ಗಕಥಾವಣ್ಣನಾ.