೨. ಞಾಣಕಥಾವಣ್ಣನಾ

೮೬೩-೮೬೫. ಇದಾನಿ ಞಾಣಕಥಾ ನಾಮ ಹೋತಿ. ತತ್ಥ ದುವಿಧಂ ಞಾಣಂ – ಲೋಕಿಯಞ್ಚ ಲೋಕುತ್ತರಞ್ಚ. ಲೋಕಿಯಂ ಸಮಾಪತ್ತಿಞಾಣಮ್ಪಿ ಹೋತಿ ದಾನಾದಿವಸೇನ ಪವತ್ತಂ ಕಮ್ಮಸ್ಸಕತಞಾಣಮ್ಪಿ; ಲೋಕುತ್ತರಂ ಸಚ್ಚಪರಿಚ್ಛೇದಕಂ ಮಗ್ಗಞಾಣಮ್ಪಿ ಫಲಞಾಣಮ್ಪಿ. ಇಮಂ ಪನ ವಿಭಾಗಂ ಅಕತ್ವಾ ‘‘ಸಚ್ಚಪರಿಚ್ಛೇದಕಮೇವ ಞಾಣಂ ನ ಇತರಂ, ತಸ್ಮಾ ನತ್ಥಿ ಪುಥುಜ್ಜನಸ್ಸ ಞಾಣ’’ನ್ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಹೇತುವಾದಾನಂ, ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಪಞ್ಞಾತಿಆದಿ ಞಾಣವೇವಚನದಸ್ಸನತ್ಥಂ ವುತ್ತಂ. ತೇನೇತಂ ದೀಪೇತಿ – ಯದಿ ತಸ್ಸ ಞಾಣಂ ನತ್ಥಿ, ಪಞ್ಞಾದಯೋಪಿ ನತ್ಥಿ. ಅಥ ಪಞ್ಞಾದಯೋ ಅತ್ಥಿ, ಞಾಣಮ್ಪಿ ಅತ್ಥಿ. ಕಸ್ಮಾ? ಪಞ್ಞಾದೀನಂ ಞಾಣತೋ ಅನಞ್ಞತ್ತಾತಿ. ಪಠಮಂ ಝಾನನ್ತಿಆದಿ ಸಮಾಪತ್ತಿಞಾಣಸ್ಸ ದಸ್ಸನತ್ಥಂ ವುತ್ತಂ. ದಾನಂ ದದೇಯ್ಯಾತಿಆದಿ ಕಮ್ಮಸ್ಸಕತಞಾಣಸ್ಸ. ದುಕ್ಖಂ ಪರಿಜಾನಾತೀತಿ ಲೋಕುತ್ತರಮಗ್ಗಞಾಣಮೇವ ದೀಪೇತಿ, ನ ಚ ಲೋಕುತ್ತರಮೇವ ಞಾಣನ್ತಿ.

ಞಾಣಕಥಾವಣ್ಣನಾ.