೬. ಕುಸಲಕಥಾವಣ್ಣನಾ

೮೪೪-೮೪೬. ಇದಾನಿ ಕುಸಲಕಥಾ ನಾಮ ಹೋತಿ. ತತ್ಥ ಅನವಜ್ಜಮ್ಪಿ ಕುಸಲಂ ಇಟ್ಠಪಾಕಮ್ಪಿ. ಅನವಜ್ಜಂ ನಾಮ ಕಿಲೇಸವಿಪ್ಪಯುತ್ತಂ. ಅಯಂ ನಯೋ ಠಪೇತ್ವಾ ಅಕುಸಲಂ ಸಬ್ಬಧಮ್ಮೇ ಭಜತಿ. ಇಟ್ಠವಿಪಾಕಂ ನಾಮ ಆಯತಿಂ ಉಪಪತ್ತಿಪವತ್ತೇಸು ಇಟ್ಠಫಲನಿಪ್ಫಾದಕಂ ಪುಞ್ಞಂ. ಅಯಂ ನಯೋ ಕುಸಲತ್ತಿಕೇ ಆದಿಪದಮೇವ ಭಜತಿ. ಯೇಸಂ ಪನ ಇಮಂ ವಿಭಾಗಂ ಅಗ್ಗಹೇತ್ವಾ ಅನವಜ್ಜಭಾವಮತ್ತೇನೇವ ನಿಬ್ಬಾನಂ ಕುಸಲನ್ತಿ ಲದ್ಧಿ, ಸೇಯ್ಯಥಾಪಿ ಅನ್ಧಕಾನಂ, ತೇಸಂ ಇಟ್ಠವಿಪಾಕಟ್ಠೇನ ನಿಬ್ಬಾನಸ್ಸ ಕುಸಲತಾಭಾವಂ ದೀಪೇತುಂ ಪುಚ್ಛಾ ಸಕವಾದಿಸ್ಸ, ಅತ್ತನೋ ಲದ್ಧಿವಸೇನ ಪಟಿಞ್ಞಾ ಇತರಸ್ಸ. ಸೇಸಮಿಧಾಪಿ ಹೇಟ್ಠಾ ವುತ್ತನಯತ್ತಾ ಉತ್ತಾನತ್ಥಮೇವಾತಿ.

ಕುಸಲಕಥಾವಣ್ಣನಾ.