೮. ಸಮಾಪನ್ನೋ ಸದ್ದಂ ಸುಣಾತೀತಿಕಥಾವಣ್ಣನಾ

೮೨೩-೮೨೫. ಇದಾನಿ ಸಮಾಪನ್ನೋ ಸದ್ದಂ ಸುಣಾತೀತಿಕಥಾ ನಾಮ ಹೋತಿ. ತತ್ಥ ‘‘ಯಸ್ಮಾ ಪಠಮಸ್ಸ ಝಾನಸ್ಸ ಸದ್ದೋ ಕಣ್ಡಕೋ ವುತ್ತೋ ಭಗವತಾ, ಯದಿ ಚ ಸಮಾಪನ್ನೋ ತಂ ನ ಸುಣೇಯ್ಯ, ಕಥಂ ಕಣ್ಡಕೋ ಸಿಯಾ. ತಸ್ಮಾ ಸಮಾಪನ್ನೋ ಸದ್ದಂ, ಸುಣಾತೀ’’ತಿ ಯೇಸಂ ಲದ್ಧಿ, ಸೇಯ್ಯಥಾಪಿ ಪುಬ್ಬಸೇಲಿಯಾನಂ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಚಕ್ಖುನಾ ರೂಪಂ ಪಸ್ಸತೀತಿಆದಿ ‘‘ಸಮಾಪನ್ನಸ್ಸ ತಾವ ಪಞ್ಚದ್ವಾರಪ್ಪವತ್ತಂ ನತ್ಥಿ, ತಸ್ಮಿಂ ಅಸತಿ ಯದಿ ಸೋ ಸದ್ದಂ ಸುಣೇಯ್ಯ, ರೂಪಮ್ಪಿ ಪಸ್ಸೇಯ್ಯಾ’’ತಿ ಚೋದನತ್ಥಂ ವುತ್ತಂ. ಸದ್ದೋ ಕಣ್ಡಕೋತಿ ವಿಕ್ಖೇಪಕರತ್ತಾ ವುತ್ತಂ. ಓಳಾರಿಕೇನ ಹಿ ಸದ್ದೇನ ಸೋತೇ ಘಟ್ಟಿತೇ ಪಠಮಜ್ಝಾನತೋ ವುಟ್ಠಾನಂ ಹೋತಿ, ತೇನೇತಂ ವುತ್ತಂ, ತಸ್ಮಾ ಅಸಾಧಕಂ. ದುತಿಯಸ್ಸ ಝಾನಸ್ಸಾತಿಆದಿ ‘‘ಯಥಾ ಅಞ್ಞೋಪಿ ಕಣ್ಡಕೋ ಅನ್ತೋಸಮಾಪತ್ತಿಯಂ ನತ್ಥಿ, ಏವಂ ಸದ್ದಸ್ಸವನಮ್ಪೀ’’ತಿ ಬೋಧನತ್ಥಂ ವುತ್ತಂ, ತಂ ಸಬ್ಬಂ ಉತ್ತಾನತ್ಥಮೇವಾತಿ.

ಸಮಾಪನ್ನೋ ಸದ್ದಂ ಸುಣಾತೀತಿಕಥಾವಣ್ಣನಾ.