೯. ದುಗ್ಗತಿಕಥಾವಣ್ಣನಾ

೬೫೦-೬೫೨. ಇದಾನಿ ದುಗ್ಗತಿಕಥಾ ನಾಮ ಹೋತಿ. ತತ್ಥ ಯೇ ದುಗ್ಗತಿಞ್ಚ ದುಗ್ಗತಿಸತ್ತಾನಂ ರೂಪಾದಿಆರಮ್ಮಣಂ ತಣ್ಹಞ್ಚಾತಿ ಉಭಯಮ್ಪಿ ದುಗ್ಗತೀತಿ ಗಹೇತ್ವಾ ಪುನ ತಥಾ ಅವಿಭಜಿತ್ವಾ ಅವಿಸೇಸೇನೇವ ‘‘ದಿಟ್ಠಿಸಮ್ಪನ್ನಸ್ಸ ಪಹೀನಾ ದುಗ್ಗತೀ’’ತಿ ವದನ್ತಿ, ಸೇಯ್ಯಥಾಪಿ ಉತ್ತರಾಪಥಕಾ; ತೇ ಸನ್ಧಾಯ ಪುಚ್ಛಾ ಸಕವಾದಿಸ್ಸ, ಪಟಿಞ್ಞಾ ಇತರಸ್ಸ. ಆಪಾಯಿಕೇ ರೂಪೇ ರಜ್ಜೇಯ್ಯಾತಿಆದಿ ಪರವಾದಿನೋ ಲದ್ಧಿಯಾ ದಿಟ್ಠಿಸಮ್ಪನ್ನಸ್ಸ ದುಗ್ಗತಿ ಅಪ್ಪಹೀನಾ, ತಸ್ಸ ವಸೇನ ಚೋದೇತುಂ ವುತ್ತಂ. ಸೇಸಮೇತ್ಥ ಉತ್ತಾನತ್ಥಮೇವ. ನಿರಯಂ ಉಪಪಜ್ಜೇಯ್ಯಾತಿಆದಿ ದುಗ್ಗತಿಪಹಾನಮೇವ ದುಗ್ಗತಿಗಾಮಿನಿತಣ್ಹಾಪಹಾನಂ ವಾ ದೀಪೇತಿ, ನ ದುಗ್ಗತಿಸತ್ತಾನಂ ರೂಪಾದಿಆರಮ್ಮಣಾಯ ತಣ್ಹಾಯ ಪಹಾನಂ, ತಸ್ಮಾ ಅಸಾಧಕನ್ತಿ.

ದುಗ್ಗತಿಕಥಾವಣ್ಣನಾ.

೬೫೩. ಸತ್ತಮಭವಿಕಕಥಾಯಪಿ ಏಸೇವ ನಯೋತಿ.

ದ್ವಾದಸಮೋ ವಗ್ಗೋ.